Maga cuanto año ya pasa, posible el maga mayores el una ta puede man cuento con el diila maga anak acerca na sex. Y hinay-hinay sila ta puede explica maga cosas asegun na edad del bata y si cosa este necesita sabe.

Pero, otro ya ahora. “Maskin el maga diutay bata ta puede mira y ta oi maga cosas acerca na sex y mas ta queda este comon maskin na maga libro del maga bata, na salida y programa na TV,” ya habla el libro The Lolita Effect. Este ba nuevo realidad bueno o malo para na maga bata?

Maskin onde puede mira y oi acerca na sex. Na libro Talk to Me First de Deborah Roffman, ele ya escribi que “el maga gente tan cuento acerca na sex y puede mira y oi con ese na maga advertisement, salida, libro, cancion, na TV, na text, na juego, na billboard y na de tuyu cellphone y computer. Y por causa con este, el maga teenager y maskin el maga bata ta pensa que el sex amo . . . el de con todo importante cosa na vida.”

Porque este ta sucede? El maga negociante ta vende maga ropa de maga bata que sexy y ta dale este gendeh justo idea con el maga bata para pensa que bien importante el diila ichura. “Sabe el maga negociante que el maga bata quierre queda igual na diila maga amigo y ta toma sila ventaja con ese,” ya habla el libro So Sexy So Soon. “Este maga letrato y producto nuay diseña para anima con el maga bata que man sex” sino “para anima kanila que cumpra.”

Gendeh bastante el informacion. Igual si paquemodo gendeh bastante el saber si paquemodo hace corre con el coche para queda un buen driver, gendeh tambien bastante el saber acerca na sex para puede hace maga justo decision.

Acorda: Ahora, mas necesita tu ayuda con el de tuyu maga anak que man train con el diila abilidad para pensa para puede sila “distingui el bueno y el malo.”​—Maga Hebreo 5:14, El Nuevo Testamento na Chavacano.

Man cuento con el de tuyu maga anak. Maskin dol dificil con ese para discuti, responsibilidad de tuyu que man cuento con el de tuyu anak acerca na sex. Acepta con ese.​—Principio na Biblia: Proverbio 22:6.

Hinay-hinay con ese discuti. En vez de man cuento acerca na sex por largo hora, usa con el oportunidad que man cuento kanila, posible mientras tan viaje ustedes na de ustedes coche o ta hace maga trabajo na casa. Para ayuda con el de tuyu maga anak, usa maga pregunta para sabe si cosa sila ta pensa. Por ejemplo, en vez de habla, “Ta gusta ba tu maga advertisement igual ansina?” puede tu habla, “Para contigo, porque gaha el maga advertiser ta usa ansina clase de maga letrato para vende con el diila producto?” Despues contesta el de tuyu anak, puede tu pregunta, “Cosa tu ta sinti acerca con ese?”​—Principio na Biblia: Deuteronomio 6:6, 7.

Enseña base na diila edad. Puede ya enseña con el maga bata que gendeh pa ta entra escuela acerca na maga nombre del maga sex organ y si paquemodo sila protege con el diila mismo cuerpo desde na sexual abuso. Mientras ta engranda sila, puede kanila enseña acerca na sex na simple manera. Si teenager ya sila, debe mas ta entende ya sila acerca na sex y sabe si cosa ta pensa el Dios acerca con ese.

Enseña na de tuyu anak si cosa el justo y mali. Mientras bata pa el de tuyu maga anak, enseña kanila que habla el verdad, hace si cosa el justo y dale mira respeto con otro. Puede se ayuda contigo para mas facil man cuento kanila acerca na sex. Necesita tambien tu claro explica si cosa el bueno y malo. Por ejemplo, si gendeh tu uyun que man sex antes casa, habla se kanila. Y explica si porque mali se y peligroso. “Si sabe el maga teenager que gendeh uyun el diila maga mayores que man sex mientras teenager sila, grande el posibilidad que gendeh se sila hace,” ya habla el libro Beyond the Big Talk.

Dale mira na de tuyu ejemplo. Hace si cosa tu ta enseña kanila. Por ejemplo, ta ri ba tu na maga bastos broma? Ta usa ba maga sexy ropa? Tan flirt? Si ta hace tu con ese maga cosas, posible gendeh contigo oi el de tuyu maga anak si ta enseña tu kanila acerca na sex.​—Principio na Biblia: Roma 2:21.

Man cuento na positivo manera. Un regalo estaba con Dios el sex y si na justo edad ya sila para casa, puede este dale kanila grande alegria. (Proverbio 5:18, 19) Hace entende con el de tuyu anak que puede le obtene con este regalo si casao ya le y gendeh le arripinti y man triste por causa cay yan sexo le que nuay pa casa.​—1 Timoteo 1:18, 19.