Ya hace fuerte si Jehova con este maga predicador. Durante ese año, el 225 colporteur o pioneer ya queda 350. Y por primer vez, mas de 8,000 publisher el ya imbia con el diila report na headquarters. Ya bendici si Jehova con el diila trabajo.

Del Marzo 21, 1920, si Joseph F. Rutherford, quien ta guia con el maga Estudiante del Biblia na ese tiempo, ya dale talk que tiene tema “Millones que Vivo Ahora el Nunca Muri.” El maga Estudiante del Biblia ya hace el todo para invita con el maga interesao na este ocasion. Yan renta sila con el uno na maga de con todo grande teatro na New York City y ya distribui maga 320,000 invitacion.

Nuay gayot sila expecta que bien manada gente el quien atende. Ciendo 5,000 lang el capacidad de ese teatro, 7,000 gente el nuay puede entra. El The Watch Tower ya llama con este como “uno del maga miting que ya hace el International Bible Students que ya tiene gayot buen exito.”

Ya queda bien conocido el maga Estudiante del Biblia cay ya proclama sila que “millones que vivo ahora el nunca muri.” Na ese tiempo, nuay sila entende que necesita pa sila hace mas para proclama con el mensaje del Reino. Maskin pa ansina, bien activo sila na este trabajo. Si Ida Olmstead quien ya principia atende na maga miting del 1902 ya habla, “Sabe kame que tiene grande bendicion para na todo maga gente na futuro y ya habla kame con ese buen noticia con aquellos ya conoce kame na ministerio.”

Para asigura que tiene espiritual comida, el maga hermano na Bethel ya principia man imprenta con el cuanto del diaton maga literatura. Ya cumpra sila maga gamit y ya pone con este na un building que yan renta sila na 35 Myrtle Avenue, Brooklyn, New York, que cerca na Bethel.

Del Enero 1920, si Leo Pelle y si Walter Kessler ya principia trabaja na Bethel. “Cuando ya llega kame na Bethel,” si Walter ya habla, “el overseer del printery ya mira kanamon y ya habla ‘Tiene pa ustedes un hora y media antes kita come media dia.’ Ya manda le kanamon rimpuja maga carton de libro estaba na basement pa-arriba.”

Si Leo ya acorda si cosa ya sucede pagka-alamañana: “Trabajo diamon que limpia con el dindin del primer piso del building. Amo quel el de con todo mabuling trabajo que ya hace yo.  Para quel na Señor, poreso gendeh sayang el diamon esfuerzo.”

Adentro lang del cuanto semana, ya puede dayun man imprenta el maga voluntario ministro con el The Watch Tower. Sesenta mil copia de Febrero 1, 1920, issue del The Watch Tower el ya puede man imprenta na segundo piso. Mientras ta hace sila se, el maga hermano na basement ya prepara con el imprenta que ya llama sila Battleship. Ya principia del Abril 14, 1920 issue, ya produci tambien con el The Golden Age. Claro gayot que ya bendici si Jehova con el esfuerzo de aquel maga hermano.

El maga leal siervo de Jehova ya queda otravez activo na trabajo y na asosacion na maga hermano. Pero cuanto del maga Estudiante del Biblia el ya deja con el organizacion durante el dificil tiempo del 1917 hasta 1919. Cosa ya hace para puede ayuda kanila?

El The Watch Tower de Abril 1, 1920, tiene articulo “Vivi Kita con Paz.” Este ya anima kanila: “Asigurao kame . . . que el cada uno quien tiene el espiritu del Señor . . . preparao ulvida con el maga cosas que ya pasa ya, . . . man junto y continua na trabajo con unidad.”

Manada el ya responde con este maga amable palabra. Un man maridable ya escribi: “Sabe kame que un kamali que nuay kame cosa ya hace del ya pasa maga año mientras el otro ya hace con el trabajo [predicacion]. . . . Ojala gendeh mas kame hace gendeh justo decision.” Este maga hermano quien ya queda activo manada pa trabajo cosa hace.

Del Junio 21, 1920, el maga Estudiante del Biblia ya hace un campaña para distribui con el “ZG.” Un edicion este del libro The Finished Mystery que tiene pino cover. * Bien manada copia de este libro el ya puede esconde cuando ya prohibi con este libro del 1918.

 El todo publisher, gendeh lang el maga colporteur, el invitao na este distribucion. “El todo bautizao persona na cada congregacion quien puede participa debe hace con ese con alegria. Este debe el queda motto del cada uno ahora: ‘Este el cosa yo hace’​—distribui con el ZG.” Ya acorda si Edmund Hooper que para na manada, este el primer vez que ya predica sila na casa en casa. Ele ya omenta, “Ya principia kame entende si cosa el envuelto na este trabajo que queda pa grande.”

Ciendo dificil el comunicacion del maga Estudiante del Biblia na otro nacion durante el Guerra Mundial I, quierre anima si Hermano Rutherford con este maga hermano y organiza otravez con el trabajo predicacion. Poreso, del Agosto 12, 1920, ele y el cuatro maga hermano ya anda na Britain, Continental Europe y na Middle East.

Cuando ya visita si Rutherford na Britain, el maga Estudiante del Biblia ya hace tres convencion y 12 maga miting para na publico. Tiene maga 50,000 el ya atende. Como resulta de este visitada, el The Watch Tower ya habla: “Ya puede gayot este anima con el maga hermano y hermana. Mas ya queda sila unido na amor y na trabajo, y ya hace este kanila alegre.” Na Paris, si Hermano Rutherford ya dale otravez con el talk “Millones que Vivo Ahora el Nunca Muri.” Cuando ya principia el talk, bien manada el ya atende. Tres cientos gente el ya pidi mas informacion.

Na siguiente semana, el cuanto maga hermano ya visita na Athens, Cairo y Jerusalem. Para continua con el interes del maga gente na este maga lugar, si Hermano Rutherford ya establicia un locacion onde puede saca maga literatura na pueblo del Ramallah que cerca na Jerusalem. Despues, ya bira le na Europe y ya establicia con el Central European Office y ya habla que alla man imprenta con el maga literatura.

Del Septiembre 1920, el maga Estudiante del Biblia ya distribui con el Num. 27 del The Golden Age, un especial issue que ya revela con el persecucion que ya enfrenta el maga Estudiante del Biblia del 1918. El Battleship que ya menciona enante, ya anda didia y denoche para produci mas de cuatro millon copia de este magasin.

El maga quien ya le con ese magasin ya sabe acerca con el caso de Emma Martin. Si Hermana Martin amo un colporteur na San Bernardino, California. Del Marzo 17, 1918, ele y el  tres hermano que si E. Hamm, E. J. Sonnenburg y E. A. Stevens, ya atende con el diutay miting del maga Estudiante del Biblia.

El hombre que ya atende alla, nuay atende para aprende acerca na Biblia. “Ya atende yo na este miting . . . na mandato del Prosecuting office,” ele ya habla. “Ya anda yo alla para busca evidencia.” Ya incuntra le con el “evidencia” que ta busca le, el un copia del The Finished Mystery. Cuanto dia despues, ya arresta con Hermana Martin y con el tres hermano. Ya acusa kanila que ya viola sila con el ley cuando ya distribui sila con el copia del libro que ya prohibi.

Ya decidi el corte que culpable si Emma y el tres hermano y ya sentencia kanila por tres año na preso. Manada beses sila ya apela na corte pero nuay siempre cambia con el diila sentencia. Del Mayo 17, 1920, ya pone kanila na preso. Pero nuay dura, ya cambia el diila situacion.

Del Junio 20, 1920, ya relata si Hermano Rutherford con el diila experiencia na convencion na San Francisco. El maga quien ya atende nuay gayot gusta con el cosa ya hace con este maga Cristiano, poreso ya imbia sila telegrama con el presidente del United States. Ya escribi sila: “Ta considera kame con el decision del corte con Mrs. Martin, . . . como gendeh justo . . . El maga oficial ya usa con el diila poder na gobierno para . . . engaña . . . con Mrs. Martin . . . y despues usa con ese para planta caso con ele y pone con ele na preso. Para kanamon, gendeh este . . . aceptable.”

Pagka-alamañana dayun, si Presidente Woodrow Wilson ya curta con el sentencia de kanda Hermana Martin y Hermano Hamm, Sonnenburg y Stevens. Gendeh mas sila preso.

Na fin del 1920, ya realiza el maga Estudiante del Biblia que manada sila razon para queda alegre. Mas ya omenta el trabajo na headquarters y el maga deverasan Cristiano mas activo ya proclama con el Reino del Dios como solucion na maga problema del gente. (Mat. 24:14) Pagka-sunod año, 1921, mas manada pa sila cosa hace para proclama con el verdad acerca del Reino.