1. Cosa el de con todo justo decision puede hace el un persona?

EL MAGA decision del maga mayores tiene grande efecto na diila maga anak por largo tiempo. Si gendeh justo el diila maga decision, puede sila causa problema con el diila maga anak. Pero si hace sila maga justo decision, puede sila ayuda con el diila maga anak tiene alegre vida. Pero siempre, debe tambien hace justo decision el maga anak. El de con todo justo decision que puede hace el un persona amo que sirvi con el diaton amable Tata na cielo, si Jehova.​—Sal. 73:28.

2. Cosa maga justo decision ya hace si Jesus y el de suyu maga mayores?

² Determinao el maga mayores de Jesus que ayuda con el diila maga anak que sirvi con Jehova y el decision que hace sila ya dale prueba que amo se el de con todo importante na diila vida. (Luc. 2:40, 41, 52) Ya hace tambien justo decision si Jesus que ya ayuda con ele para cumpli con el de suyu papel na proposito de Jehova. (Mat. 4:1-10) Ya engranda si Jesus que un bueno, leal y animoso gente​—el clase de anak que puede hace proud y alegre con el mayores quien ta sirvi con Dios.

3. Cosa maga pregunta kita contesta na este articulo?

³ Na este articulo, hay contesta kita con el siguiente maga pregunta: Cosa justo decision ya hace si Jehova acerca con Jesus? Cosa puede aprende el maga Cristiano mayores na decision que ya hace el maga mayores de Jesus? Y cosa puede aprende el maga joven Cristiano na decision que ya hace si Jesus?

4. Cosa importante decision ya hace si Jehova acerca na de suyu Anak?

⁴ Ya iscuji maga buen mayores si Jehova para con Jesus. (Mat. 1:18-23; Luc. 1:26-38) El maga sincero expresion de Maria ta revela con el de suyu hondo amor para con Jehova y na de suyu Palabra. (Luc. 1:46-55) El reaccion de Jose na direccion de Jehova ta dale mira que tiene le miedo con Dios y quierre le hace alegre con ele.​—Mat. 1:24.

5-6. Cosa ya permiti si Jehova que experiencia el de suyu Anak?

⁵ Nota que nuay iscuji si Jehova rico mayores para con Jesus. El ofrecimiento que ya dale si Jose y Maria despues nace si Jesus ta dale mira que pobre sila. (Luc. 2:24) Posible, tiene diutay shop si Jose na costao del de suyu casa na Nazaret donde le ta trabaja como un carpintero. Posible, simple lang el diila vida, especialmente cuando ya tiene sila siete anak o mas pa.​—Mat. 13:55, 56.

⁶ Ya protege si Jehova con Jesus na cuanto peligro pero gendeh na todo dificultad. (Mat. 2:13-15) Por ejemplo, tiene maga pariente si Jesus que gendeh con ele ta creé. Imagina si paquemodo quel de dificil para con Jesus que tiene maga miembro na de suyu familia quien nuay con ele acepta del primero como el Mesias. (Mar. 3:21; Juan 7:5) Posible, dificil tambien con Jesus cuando ya muri el de suyu tata, si Jose. Ciendo ele el mayor anak, necesita le hace el trabajo que ya deja el de suyu tata. (Mar. 6:3) Mientras ta queda adulto si Jesus, ya aprende le si paquemodo cuida con el de suyu familia. Posible, necesita le trabaja enbuenamente para suporta kanila. Poreso sabe le si paquemodo de cansao que trabaja entero dia.

7. (a) Cosa maga pregunta puede ayuda con el maga man maridable quien ta hace engranda anak? (b) Paquemodo el Proverbio 2:1-6 puede ayuda con el maga mayores man train con el maga anak?

⁷ Si casao ustedes y quierre tiene anak, pregunta con el de ustedes mismo cuerpo: ‘Hay iscuji ba kanamon si Jehova para cuida con el un precioso vida?’ (Sal. 127:3, 4) Si un mayores ya tu, pregunta na de tuyu mismo cuerpo: ‘Ta enseña ba yo con el de mio anak que trabaja enbuenamente?’ (Ecl. 3:12, 13) ‘Ta protege ba yo con el de mio maga anak desde na fisical y moral peligro  que posible sila enfrenta na mundo de Satanas?’ (Prov. 22:3) Gendeh tu puede protege con el de tuyu anak na todo dificultad que posible sila enfrenta ciendo imposible se hace. Pero puede tu prepara kanila para enfrenta con ese maga problema si continua tu enseña kanila na amable manera si paquemodo confia na Biblia. (Le con el Proverbio 2:1-6.) Por ejemplo, si tiene ustedes pariente quien ya descanza sirvi con Jehova, ayuda con el de ustedes maga anak aprende na Palabra del Dios si porque importante que este leal con Jehova. (Sal. 31:23) O si tiene quien ya muri na familia, dale mira con el de tuyu maga anak si paquemodo usa con el Biblia para enfrenta con el tristeza y tiene paz.​—2 Cor. 1:3, 4; 2 Tim. 3:16.

8. Asegun na Deuteronomio 6:6, 7, cosa necesita hace si Jose y Maria?

⁸ El maga mayores de Jesus aqui na tierra ya ayuda con ele que engranda que tiene el favor del Dios. Ya sigui sila con el maga direccion de Jehova para na maga mayores. (Le con el Deuteronomio 6:6, 7.) Si Jose y Maria tiene hondo amor para con Jehova y prioridad diila que anima con el diila maga anak que tiene ansina clase de amor.

9. Cosa maga importante decision ya hace kanda Jose y Maria?

⁹ Si Jose y Maria ya iscuji mentena con el diila espiritual rutina como un familia. Asigurao, ta atende sila na maga miting que ta hace na sinagoga na Nazaret y con el Pascua na Jerusalem cada año. (Luc. 2:41; 4:16) Posible, mientras tan viaje sila para na Jerusalem ta enseña sila con Jesus y con el de suyu maga hermano y hermana acerca con el cosa ya pasa con el maga siervo de Jehova. Posible tambien que ta visita sila con el maga lugar que ya menciona na Escritura. Mientras ta omenta el maga anak de Jose y Maria, asigurao que gendeh quel facil para kanila que mentena con el diila buen espiritual rutina. Pero ya beneficia gayot sila. Cay ya hace sila una con el adoranza para con Jehova, el diila familia ya esta cerca con ele.

10. Cosa maga leccion puede aprende el maga Cristiano mayores con Jose y Maria?

¹⁰ Cosa puede aprende el maga mayores con Jose y Maria? El de con todo importante amo que enseña tu con el de tuyu maga anak na palabra y accion que ta ama gayot tu con Jehova.  El de con todo bonito regalo que puede tu dale kanila amo que ayuda kanila ama con Jehova. Y uno del de con todo importante leccion que puede tu enseña kanila amo si paquemodo mentena con el diila buen espiritual rutina de estudiada, rezo, miting y participacion na ministerio. (1 Tim. 6:6, El Nuevo Testamento) Pero siempre, debe tu dale el material necesidad del de tuyu maga anak. (1 Tim. 5:8) Pero acorda que el cerca relacion del de tuyu maga anak con Jehova y gendeh el maga material cosas el puede ayuda kanila para salva na este daan sistema para na nuevo mundo. *​—Eze. 7:19; 1 Tim. 4:8.

11. (a) Paquemodo el consejo na 1 Timoteo 6:17-19 puede ayuda con el maga mayores hace maga justo decision si ta hace engranda maga anak? (b) Cosa maga goal ustedes puede alcanza como un familia y cosa maga bendicion ustedes puede ricibi? (Mira con el cajon “ Cosa Goal Ustedes Puede Alcanza?”)

¹¹ Bien maka-alegre mira con el manada maga Cristiano mayores quien ta hace maga justo decision para na diila familia! Junto sila ta adora con Jehova. Ta atende sila na maga miting na congregacion y asemblea. Y ta participa sila na ministerio. El cuanto familia ta puede pa gane predica na maga lugar que ralo lang ta puede predica. El otro ta visita na Bethel o tan voluntario na construida del maga teocratico facilidad. Asigurao, el maga familia quien ta hace este maga actividad necesita hace maga sacrificio na financial y posible sila enfrenta maga dificultad. Pero hay bendici gayot kanila si Jehova. (Le con el 1 Timoteo 6:17-19.) Mas mucho, el maga anak quien ya engranda na este clase de familia ta continua hace con este y nuay gayot sila arripinti! *​—Prov. 10:22.

12. Cosa necesita hace si Jesus mientras ta engranda le?

¹² El Tata de Jesus na cielo pirmi ta hace maga justo decision y el de suyu maga mayores aqui na tierra, ya hace tambien maga justo decision. Pero mientras ta engranda si Jesus, necesita le hace de suyu mismo decision. (Gal. 6:5) Igual kanaton todo, tiene tambien ele libertad para decidi. Puede era le busca una el de suyu interes pero nuay se le hace. Sino, ya iscuji le mentena el de suyu buen relacion con Jehova. (Juan 8:29) Paquemodo el de suyu buen ejemplo puede ayuda con el maga jovenes ahora?

13. Cosa importante decision ya hace si Jesus cuando joven pa le?

¹³ Cuando bata pa si Jesus aqui na tierra, ya iscuji le somete con el de suyu maga mayores. Nuay le desobedece con el maga direccion del de suyu maga mayores y pensa que mas manada le cosa sabe que kanila. Sino, “ya queda Le bajo del diila autoridad.” (Luc. 2: 51) Asigurao ya hace si Jesus con el de suyu responsibilidad como el mayor anak. Asigurao ya hace le esfuerzo que aprende con Jose el trabajo de carpintero para suporta con el de suyu familia.

14. Porque kita puede habla que ya estudia enbuenamente si Jesus con el Palabra del Dios?

¹⁴ Posible, el maga mayores de Jesus ya habla con ele acerca con el de suyu milagroso nacimiento y si cosa ya habla el maga mensajero del Dios acerca con ele. (Luc. 2:8-19, 25-38) Gendeh contento si Jesus na cosa lang con ele ya habla. Sino, ele mismo ya estudia con el Escritura. Porque kita puede habla que ya estudia enbuenamente si Jesus con el Palabra del Dios? Cay cuando bata pa le, el maga maestro na Jerusalem “ya queda espantao por causa del disuyo inteligencia, y del disuyo maga contestacion.” (Luc. 2:46, 47) Y cuando 12 año pa lang si Jesus, convincido ya le que si Jehova el de suyu Tata.​—Luc. 2:42, 43, 49.

15. Paquemodo ya dale mira si Jesus que ya iscuji le hace con el voluntad de Jehova?

¹⁵ Cuando ya sabe si Jesus si cosa el de suyu papel na proposito de Jehova, ya iscuji le acepta con ese assignment. (Juan 6:38) Sabe le que odia con ele el manada maga gente y gendeh quel facil para con ele. Pero maskin pa ansina, ya iscuji le obedece con Jehova. Cuando ya bautiza con Jesus del 29 C.E., el de con todo importante cosa para con ele amo que hace si cosa quierre si Jehova. (Heb. 10:5-7) Y maskin pa pamurida ya le na estaca, ya esta le determinao hace con el voluntad del de suyu Tata.​—Juan 19:30.

16. Cosa el un leccion que puede aprende el maga anak con Jesus?

¹⁶ Obedece con el de tuyu maga mayores. Igual con Jose y Maria, gendeh perfecto el de tuyu maga mayores. Pero, ya iscuji kanila si Jehova para protege, enseña y guia contigo. Si oi tu con el diila consejo y respeta con el diila autoridad, “el dituyo maga cosa-cosa ay anda embuenamente.”​—Ef. 6:1-4.

17. Asegun na Josue 24:15, cosa decision necesita hace el maga jovenes para na diila mismo cuerpo?

¹⁷ Decidi si con quien tu sirvi. Necesita tu queda convincido si quien si Jehova, si cosa el de suyu voluntad y si paquemodo tu con ese hace na de tuyu vida. (Roma 12:2) Si hace tu se, puede tu hace con el de con todo importante decision na de tuyu vida​—el decision  que sirvi con Jehova. (Le con el Josue 24:15; Ecl. 12:1) Si mentena tu con el de tuyu regular lehida de Biblia y estudiada, hay queda mas hondo el de tuyu amor con Jehova y queda mas fuerte el de tuyu fe con ele.

18. Cosa el un decision que debe hace el maga jovenes y cosa el resulta de este?

¹⁸ Iscuji hace una con el voluntad de Jehova na de tuyu vida. El mundo de Satanas ta promete que si usa tu con el de tuyu maga abilidad para na de tuyu mismo bien, hay queda tu alegre. Pero el deverasan, aquellos quien tan focus na maga material cosas, ‘ta hace iri el diila corazon con mucho irida.’ (1 Tim. 6:9, 10) Pero si oi tu con Jehova y iscuji hace una con el de suyu voluntad, hay tiene buen exito el de tuyu vida y “hay actua tu con sabeduria.”​—Jos. 1:8.

19. Cosa debe acorda el maga mayores?

¹⁹ Maga mayores, hace el todo para ayuda con el de ustedes familia sirvi con Jehova. Confia con ele y ayuda le con ustedes hace maga justo decision. (Prov. 3:5, 6) Acorda que mas tiene influencia con el de ustedes maga anak el cosa ustedes ta hace contra na cosa ustedes ta habla. Poreso, hace maga decision que puede ayuda con el de ustedes maga anak para tiene el favor de Jehova.

20. Cosa maga bendicion puede ricibi el maga jovenes si iscuji sila sirvi con Jehova?

²⁰ Maga jovenes, el de ustedes maga mayores puede ayuda con ustedes para hace maga justo decision na vida. Pero necesita ustedes hace con ese para tiene el favor del Dios. Poreso, imita con Jesus y iscuji sirvi con el de ustedes Tata na cielo. Si hace ustedes se, hay tiene ustedes bonito y alegre vida ahora. (1 Tim. 4:16) Y na futuro, hay tiene ustedes el de con todo alegre vida que posible!