1. Paquemodo el 2 Corinto 3:1-3 ayuda kanaton aprecia con el diaton privilegio que conduci Bible study que ta resulta na bautismo? (Mira con el letrato na cover.)

COSA tu sinti si ya bautiza el un Bible study estaba na de ustedes congregacion? Asigurao hay queda gayot tu alegre. (Mat. 28:19) Y si etu el quien yan Bible study con ele, hay queda gayot tu alegre y excited que bautiza ya le! (1 Tes. 2:19, 20) El maga nuevo bautizao dicipulo amo maga buen “carta de recomendacion” gendeh lang para con aquellos quien yan Bible study kanila, sino para con el entero congregacion tambien.​—Le con el 2 Corinto 3:1-3.

2. (a) Cosa importante pregunta el necesita kita considera y porque? (b) Cosa el Bible study? (Mira con el footnote.)

² Bonito gayot mira que del ya pasa cuatro año, el maga publisher yan report maga 10,000,000 Bible study * cada mes na entero mundo. Durante na ese maga año, tiene mas de 280,000 el ya bautiza cada año como maga Testigo de Jehova y ya queda maga nuevo dicipulo de Jesucristo. Paquemodo kita ayuda con este millones de Bible study para bautiza? Mientras ta dale pa tiempo y oportunidad si Jehova con el  maga gente para queda dicipulo del Cristo, quierre kita hace el todo para ayuda kanila progresa na bautismo mas pronto si posible. Mas ta queda ya corto el tiempo!​—1 Cor. 7:29a; 1 Ped. 4:7.

3. Cosa kita hay considera na este articulo acerca si paquemodo conduci Bible study?

³ Cay bien importante que hace maga dicipulo ahora, yan survey na maga branch office para sabe si paquemodo mas puede ayuda con el diaton maga Bible study progresa para na bautismo. Na este articulo y na siguiente, hay mira kita si cosa kita puede aprende na maga experienciao pioneer, misionario y circuit overseer. * (Prov. 11:14; 15:22) Ya habla sila si cosa puede hace el maga publisher y el diila maga Bible study para mas tiene buen resulta el diila estudiada. Na este articulo, hay considera kita con el cinco cosas que necesita hace el maga Bible study para progresa na bautismo.

4. Cosa kita debe realiza si ta conduci Bible study que ta hace na puerta del householder?

⁴ Manada del diaton maga hermano y hermana ta conduci Bible study na puerta del householder. Maskin pa bueno este para principia tiene interes el persona na Biblia, mas mucho de este maga discusion corto lang y posible gendeh ta hace cada semana. Para continua hace crici con el interes del persona, el cuanto maga hermano y hermana hay pidi con el de suyu contact number y despues llama o man text para man share un cosa estaba na Biblia. Ese maga discusion posible continua por cuanto mes que gendeh ta resulta na progresivo Bible study. Hay progresa ba el un Bible study para na dedicacion y bautismo si amo lang se el esfuerzo y tiempo que ta dale le para estudia con el Palabra del Dios? Posible gendeh.

5. Asegun na Lucas 14:27-33, cosa ya hace claro si Jesus que puede ayuda kanaton que hace maga dicipulo?

⁵ Na un ocasion, ya ilustra si Jesus si cosa debe hace el un persona si quierre le queda de suyu dicipulo. Yan cuento le acerca con el un persona quien quierre planta un torre y acerca con el un rey quien quierre anda na guerra. Si Jesus ya habla que el quien quierre planta debe “sinta una y carcula el maga gastos” si tiene ba le para hace acaba con el torre y el rey debe “sinta una y pensa” si puede ba el de suyu maga soldao hace con el cosa sila ya plaña hace. (Le con el Lucas 14:27-33.) Na igual manera, sabe si Jesus que el un persona quien quierre queda de suyu dicipulo, debe  pensa enbuenamente si cosa le necesita hace para sigui con Jesus. Amo se el razon si porque necesita kita anima con el diaton maga Bible study para estudia junto kanaton cada semana. Paquemodo se kita hace?

6. Cosa kita puede hace para tiene progresivo Bible study?

⁶ Una, puede hace largo con el de ustedes estudiada na puerta. Posible, puede discuti omento texto na Biblia cada vez tu visita. Si comfortable ya el Bible study que largo el de ustedes estudiada, pregunta con ele si tiene ba ustedes onde puede sinta y continua con el discusion. El de suyu contestacion hay revela si paquemodo le de serioso acerca na estudiada del Biblia. Despues del cuanto tiempo, para puede con ele ayuda progresa, puede tu pregunta con ele si quierre ba le estudia dos beses na un semana. Pero, gendeh bastante que estudia lang tu con ele una vez o dos beses cada semana.

7. Paquemodo puede prepara enbuenamente el publisher para na cada estudiada?

⁷ Ciendo etu el quien enseña, necesita tu prepara para na cada estudiada. Puede tu se hace si le tu una con el material y con el maga texto. Pone na pensamiento si cosa el maga importante punto. Pensa con el titulo del leccion, subheading, maga pregunta, con el texto para le, maga letrato y maskin cosa maga video que puede ayuda entende con el topico. Despues, pensa con el de tuyu Bible study y si paquemodo tu se dale na simple y claro manera para pronto le puede entende y aplica con ese.​—Neh. 8:8; Prov. 15:28a.

8. Cosa ta enseña kanaton el maga palabra de apostol Pablo na Colosa 1:9, 10 acerca na rezo para na diaton maga Bible study?

⁸ Como parte del de tuyu preparacion, reza con Jehova acerca con el de tuyu Bible study y de suyu necesidad. Pidi con Jehova que ayuda contigo enseña con el Biblia na manera que puede alcanza na corazon del persona. (Le con el Colosa 1:9, 10.) Pruba pensa si onde posible man dificil entende o acepta el Bible study. Acorda que el de tuyu goal amo que ayuda con ele progresa para na bautismo.

9. Paquemodo el publisher puede ayuda con el de suyu Bible study para prepara na de suyu estudiada? Explica.

⁹ Ta esperanza kita que por medio na regular estudiada del Biblia, el persona hay aprecia con el cosa ya hace si Jehova y si Jesus, y hay continua pa aprende mas. (Mat. 5:3, 6) Para mas beneficia na estudiada, el Bible  study necesita concentra na cosa le ta aprende. Para ayuda con ele hace se, explica si paquemodo de importante que prepara le para na cada estudiada. Puede le este hace si le ele adelantao con el leccion y pensa si paquemodo le aplica con este. Paquemodo tu puede ayuda con ele? Prepara ustedes junto na un leccion para puede le mira si paquemodo este ta hace. * Explica si paquemodo puede incuntra con el maga directa contestacion na maga pregunta y dale mira que si marca le con el maga importante frase puede este ayuda para acorda le con el maga contestacion. Despues, habla con ele que contesta na de suyu mismo maga palabra. Si hace le se, puede tu sabe si ya entende ba gayot le con el leccion. Pero tiene pa otro cosa que puede tu anima con el de tuyu Bible study que hace.

10. Porque importante que le con el Biblia cada dia y cosa puede ayuda con el Bible study para mas beneficia con el lehida del Biblia?

¹⁰ Puera que estudia con el Biblia junto con el publisher, el Bible study puede tambien beneficia si tiene le cosa hace cada dia. Necesita le comunica con Jehova. Paquemodo? Puede le se hace si oi le y man cuento con Jehova. Puede le oi con Dios si le ele con el Biblia cada dia. (Jos. 1:8; Sal. 1:1-3) Enseña con ele si paquemodo usa con el “Schedule del Lehida de Biblia” na jw.org que puede man print. * Siempre, para mas beneficia le na lehida del Biblia, anima con ele que medita si cosa ta enseña con ele el Biblia acerca con Jehova y si paquemodo le aplica con el cosa le ta aprende na de suyu vida.​—Act. 17:11; Sant. 1:25.

11. Paquemodo puede aprende el Bible study que reza na justo manera y porque importante que reza le con Jehova firmi?

¹¹ Anima con el de tuyu Bible study que man cuento con Jehova cada dia por medio na rezo. Reza con todo corazon junto y para na de tuyu Bible study na principio y na fin del cada estudiada. Mientras ta oi le con el de tuyu rezo, hay puede le aprende que debe le reza con Dios Jehova por medio na nombre de Jesucristo y con todo corazon. (Mat. 6:9; Juan 15:16) Imagina si paquemodo el lehida del Biblia cada dia (oi con Jehova) y rezo (converza con Jehova) hay puede ayuda con el de tuyu Bible study para queda mas cerca con Dios. (Sant. 4:8) Si hace le este cada dia, puede este ayuda para progresa le para na dedicacion y bautismo. Cosa pa puede ayuda con ele?

12. Paquemodo puede ayuda el un publisher con el de suyu Bible study que tiene personal relacion con Jehova?

¹² El cosa ta aprende el un Bible study debe alcanza gendeh lang na de suyu pensamiento sino pati na de suyu corazon. Porque? El diaton corazon​—que ta inclui con el diaton maga deseo, emocion y sentido—​amo el ta manda move kanaton para actua. Ya enseña si Jesus manada cosas con el maga gente y ya gusta sila con el cosa le ya enseña kanila. Pero, ya sigui tambien sila con ele cay ya puede le alcanza con el diila corazon. (Luc. 24:15, 27, 32) El de tuyu Bible study necesita mira con Jehova como un real Persona con quien le puede tiene personal relacion y mira con Ele como de suyu Tata, de suyu Dios y de suyu Amigo. (Sal. 25:4, 5) Durante el estudiada, hace claro con el maga bonito calidad del diaton Dios. (Ex. 34:5, 6; 1 Ped. 5:6, 7) Hace este maskin cosa topico ustedes ta discuti. Ayuda con el de tuyu Bible study aprecia con el maga bonito calidad de Jehova​—de suyu amor, pagka-bueno y compasion. Si Jesus ya habla que “el mas importante y el primero del maga mandamiento” amo que “ama con [Jehova], el dituyo Dios.” (Mat. 22:37, 38) Pricura ayuda con el de tuyu Bible study que tiene hondo amor con Jehova.

13. Dale un ejemplo si paquemodo ayuda con el un Bible study para aprende acerca na personalidad de Jehova.

¹³ Si tan cuento tu con el de tuyu Bible study, habla con ele si porque tu ta ama con Jehova. Puede este ayuda para realiza el de tuyu Bible study que necesita tambien le tiene personal relacion con Dios. (Sal. 73:28) Por ejemplo, tiene ba un frase na publicacion que ta usa ustedes estudia o un texto que ta revela un cosa acerca con Jehova​—de suyu amor, sabeduria, justicia o poder—​que ta aprecia gayot tu? Menciona este con el de tuyu Bible study y manda con ele sabe que amo este el uno na manada maga razon si porque tu ta ama con el diaton Tata na cielo. Pero, tiene pa otro cosa necesita hace el maga Bible study para progresa para na bautismo.

14. Cosa ta habla kanaton el Maga Hebreo 10:24, 25 acerca na maga miting que puede ayuda con el un Bible study para progresa?

¹⁴ Todo kita quierre que progresa para na bautismo el diaton maga Bible study. El un importante manera que puede kita ayuda kanila amo si anima kita kanila atende na maga miting na congregacion. El maga experienciao  publisher ta habla que mas lijero progresa el maga Bible study si atende sila dayun na maga miting. (Sal. 111:1) El cuanto ta explica con el diila maga Bible study que media del cosa sila puede aprende acerca na Biblia puede sila saca na diila estudiada y el otro media na maga miting. Le con el Maga Hebreo 10:24, 25 con el de tuyu Bible study y explica con ele si cosa el maga beneficio si atende le na maga miting. Dale con ele mira el video Cosa Ta Hace na Kingdom Hall? * Ayuda con el de tuyu Bible study para queda determinao que gendeh falta na maga miting cada semana.

15. Cosa kita puede hace para anima con el un Bible study que regular atende na maga miting?

¹⁵ Cosa tu puede hace si el de tuyu Bible study nuay pa atende na miting o gendeh regular ta atende? Habla con ele si cosa tu ya aprende del ya pasa miting. Mas puede se anima con el Bible study que atende na maga miting contra invita lang con ele. Dale con ele copia del El Torre de Guardia o el Vida y Ministerio Workbook que ta usa na miting. Dale con ele mira si cosa hay discuti na siguiente miting y pregunta con ele si onde aqui el interesao le. Mas pa el cosa hay experiencia el de tuyu Bible study na de suyu primer atendida na miting contra na cosa le ya experiencia na otro maga religion. (1 Cor. 14:24, 25) Puede le conoce con el maga hermano con quien le puede imita y puede ayuda con ele progresa para na bautismo.

16. Cosa necesita hace el maga Bible study para progresa para na bautismo y cosa kita considera na siguiente articulo?

¹⁶ Paquemodo kita conduci Bible study que ta resulta na bautismo? Puede kita ayuda con el cada Bible study para queda serioso na de suyu estudiada si anima kita con ele que estudia cada semana y prepara para na cada estudiada. Quierre tambien kita anima con ele que comunica con Jehova cada dia y tiene personal relacion con ele. Quierre kita motiva con el Bible study para atende na maga miting na congregacion. (Mira con el cajon “ Si Cosa Necesita Hace el Bible Study Para Progresa Para na Bautismo.”) Pero, como cosa hay discuti na siguiente articulo, tiene pa cinco cosas el necesita hace el maga publisher para ayuda con el maga Bible study progresa para na bautismo.