1. Cosa debe continua hace el maga bautizao Cristiano?

BAUTIZAO ba tu? Si ansina, ya dale tu mira na publico con el de tuyu fe con Jehova y quierre tu sirvi con ele junto na de suyu organizacion. * Siempre, debe tu continua hace fuerte con el de tuyu fe con Jehova. Y necesita tu continua hace fuerte con el de tuyu confianza que si Jehova ta usa con el de suyu organizacion ahora.

2-3. Na cosa manera ta guia si Jehova con el de suyu organizacion ahora? Dale maga ejemplo.

² Ta guia si Jehova con el de suyu organizacion ahora na manera que ta reflecta con el de suyu personalidad, proposito y maga principio. Considera kita con el tres calidad de Jehova que ta reflecta na de suyu organizacion.

³ Una, “[el] Dios igual lang ta trata con todo el maga gente.” (Act. 10:34, El Nuevo Testamento) El amor de Jehova amo el ya manda move con ele para dale de suyu Anak “para rescata canaton todo.” (1 Tim. 2:6; Juan 3:16) Ta usa si Jehova con el de suyu maga siervo para predica con el buen noticia con todo quien quierre oi. Na ansina manera, ta ayuda le con todo para beneficia na rescate. Ika-dos, si Jehova un Dios de paz y orden. (1 Cor. 14:33, 40) Poreso, puede kita expecta que el de suyu maga siervo hay sirvi con ele como un organizao grupo que tiene paz. Ika-tres, si Jehova amo el “Grande Instructor.” (Isa. 30:20, 21) Amo se el razon si porque el de suyu organizacion ta hace gayot esfuerzo para enseña con el maga gente acerca na de suyu Palabra na congregacion y na ministerio. Paquemodo  este tres calidad de Jehova puede mira na Cristiano congregacion del primer siglo? Paquemodo el maga siervo de Jehova ta imita con ese maga calidad na diaton tiempo ahora? Paquemodo puede ayuda contigo el sagrao espiritu mientras ta sirvi tu junto con el organizacion de Jehova ahora?

4. Como cosa ta habla na Maga Actividad 1:8, cosa ya manda si Jesus con el de suyu maga siguidores y cosa ayuda sila hay ricibi?

⁴ Del primer siglo. El mensaje que ya predica si Jesus ya dale esperanza con todo el maga gente. (Luc. 4:43) Ya manda le con el de suyu maga siguidores que continua con el trabajo que ya principia le y predica “hasta na entero lugar del mundo.” (Le con el Maga Actividad 1:8, El Nuevo Testamento) Siempre, gendeh este sila puede hace na diila lang mismo fuerza. Hay necesita sila con el sagrao espiritu​—el ayuda que ya promete si Jesus que dale kanila.​—Juan 14:26; Zac. 4:6.

5-6. Na cosa maga manera el sagrao espiritu ya ayuda con el maga siguidores de Jesus?

⁵ El maga siguidores de Jesus ya ricibi sagrao espiritu del Pentecostes 33 C.E. Na ayuda de ese espiritu, ya principia dayun sila predica y adentro lang na corto tiempo, miles el ya acepta con el buen noticia. (Act. 2:41; 4:4) Cuando ya enfrenta maga oposicion, nuay tiene miedo el maga dicipulo, sino ya pidi sila ayuda con Dios. Sila ya reza: “Ayuda canamon, de uste maga muchacho, para gendeh came ay tene miedo anuncia el de Uste Palabra.” Ya queda sila lleno de sagrao espiritu y ya continua sila “proclama el Palabra del Dios sin miedo.”​—Act. 4:18-20, 29, 31.

⁶ Ya enfrenta tambien otro maga dificultad el maga dicipulo de Jesus. Por ejemplo, poco lang copia del Escritura. Nuay tambien sila maga literatura igual na cosa kita tiene ahora. Y necesita predica el maga dicipulo con el maga gente quien ta converza na otro-otro maga lengguaje. Maskin pa na ese maga dificultad, aquellos maga activo dicipulo ya puede hace con el un cosa que dol imposible. Adentro lang del cuanto decada, ya puede sila predica el buen noticia “con todo el maga gente na mundo.”​—Col. 1:6, 23.

7. Mas de 100 año el ya pasa, paquemodo ya puede sabe el maga siervo de Jehova si cosa ta pidi kanila el Dios y cosa sila ya hace?

⁷ Na moderno tiempo. Ta continua guia si Jehova con el de suyu maga siervo y ta dale kanila el fuerza para hace el de suyu voluntad. Mas mucho del de suyu direccion ta sale na Palabra del Dios que inspirao del sagrao espiritu. Puede kita le alli acerca na ministerio de Jesus y na de suyu mandamiento con el de suyu maga siguidores que continua con el trabajo que ya principia le. (Mat. 28:19, 20) Del Julio 1881, el The Watchtower ya habla: “Nuay kanaton llama ni iscuji para ricibi honor y queda rico sino para usa kita con el todo cosa kita tiene para predica con el buen noticia.” El booklet To Whom the Work Is Entrusted que ya produci del 1919, ya habla: “Bien manada gayot el cosa kita hace, pero trabajo este del Señor y hay dale le kanaton el fuerza que necesita para hace con ese.” Igual con el maga Cristiano del primer siglo, este maga hermano con coraje ya hace esfuerzo na este trabajo y tiene confianza que el sagrao espiritu hay ayuda kanila para predica na todo clase de gente. Ta confia tambien kita que el sagrao espiritu hay ayuda kanaton ahora.

8-9. Cosa maga manera ya usa el organizacion de Jehova para predica con el buen noticia?

⁸ El organizacion de Jehova ta usa con el de con todo bueno maga tool que tiene para predica con el buen noticia. Este maga tool ta  inclui el maga printed publicacion, el “Photo-Drama of Creation,” phonograph, sound car, broadcast na radio y por medio na computer y internet. El organizacion del Dios tan translate tambien maga informacion na mas manada lengguaje compara de antes! Porque? Para el todo clase de maga gente hay puede oi con el buen noticia na diila mismo lengguaje. Nuay con quien tan afavor si Jehova. Ele ya habla que el buen noticia hay declara “con todo nacion, raza, lenguaje y pais.” (Rev. 14:6, 7) Quierre le que el todo puede oi con el mensaje del Reino.

⁹ Paquemodo aquellos con quien bien dificil predica, posible cay ta queda sila na maga bien guardiao apartment? Para puede predica na mas manada de ese maga gente, si Jehova ya ayuda con el de suyu organizacion para usa con el diferente clase de public witnessing. Por ejemplo, del 2001, el Cuerpo Gobernante ya aproba con el usada del maga literature cart y otro maga display na France y nuay dura, pati na otro maga lugar tambien. Positivo el maga resulta de este. Del 2011, ya principia con el un nuevo proyecto na United States, na uno del maga de con todo busy lugar na New York City. Durante el primer año, tiene 102,129 libro y 68,911 magasin el ya puede dale. Y 4,701 maga gente el ya pidi que man Bible study kanila! Claro que el sagrao espiritu ta suporta con este trabajo. Poreso, el Cuerpo Gobernante ya aproba usa con el maga literature display na entero mundo.

10. Cosa kita puede hace para progresa na diaton ministerio?

¹⁰ Si cosa tu puede hace. Usa con el training que ta dale si Jehova na maga miting na congregacion. Regular predica junto na de tuyu field service group. El maga hermano y hermana na de tuyu grupo puede ayuda contigo para progresa na ministerio. Puede tambien sila anima contigo por medio na diila buen ejemplo. Continua predica maskin pa tiene maga dificultad. Como cosa ta habla el texto onde yan base este articulo, ta puede kita cumpli con el voluntad del Dios, gendeh por medio na diaton mismo fuerza, sino por medio na sagrao espiritu. (Zac. 4:6) Puede kita asigura que ayuda kanaton el Dios cay ta hace kita con el de suyu trabajo.

11. Paquemodo el cuerpo gobernante del primer siglo unido ya trabaja para mentena con el paz y orden entre na maga siervo del Dios?

¹¹ Del primer siglo. El cuerpo gobernante na Jerusalem unido ya trabaja para mentena con el paz y orden entre na maga siervo del Dios. (Act. 2:42) Por ejemplo, cuando el issue del capada ya sale del maga 49 C.E., el cuerpo gobernante ya discuti acerca con este bajo na direccion del sagrao espiritu. Si el congregacion ya esta dividido por causa con este issue, posible este sangga con el trabajo predicacion. Maskin pa Judio el maga apostoles y maga anciano, nuay kanila influencia el tradicion del maga Judio o aquellos quien ta influencia con este. Sino, ya depende sila na Palabra del Dios y na sagrao espiritu para na guia. (Act. 15:1, 2, 5-20, 28) Cosa el resulta? Ya bendici si Jehova con el diila decision, ya tiene paz y unidad, y ya continua el trabajo predicacion.​—Act. 15:30, 31; 16:4, 5.

12. Cosa el evidencia que tiene paz y orden na organizacion de Jehova ahora?

¹² Na moderno tiempo. El organizacion de Jehova ya hace esfuerzo para mentena con el paz y orden entre na maga siervo de Jehova. Del 1895, el Zion’s Watch Tower and Herald of Christ’s Presence del Noviembre 15 tiene articulo “Decente y con Orden,” que yan base na 1 Corinto 14:40. El articulo ya habla: “Manada cosas ya escribi el maga apostoles para na congregacion del primer siglo acerca na orden . . . Importante que continua sigui enbuenamente ‘todo el maga cosa-cosa que ya escribi antes pa para enseña kanaton.’” (Roma 15:4) Igual con el maga Cristiano del primer siglo, el organizacion de Jehova ahora ta hace esfuerzo para mentena con el paz y orden entre na maga siervo del Dios. Para ilustra: Si atende tu na Estudiada del El Torre de Guardia na otro congregacion​—maskin na otro nacion—​sabe tu si paquemodo conduci con el estudiada y si cosa articulo el considera. Hay queda dayun tu comfortable! El sagrao espiritu del Dios lang el puede hace posible con ese unidad.​—Sof. 3:9, ftn.

13. Uyun na Santiago 3:17, cosa kita debe pregunta na diaton mismo cuerpo?

¹³ Si cosa tu puede hace. Quierre si Jehova  que el de suyu maga siervo hay “trabaja para tene paz entre con uno y otro.” (Ef. 4:1-3) Poreso, pregunta na de tuyu mismo cuerpo: ‘Ta hace ba yo esfuerzo para mentena con el paz y unidad na congregacion? Ta obedece ba yo con aquellos quien ta guia con el congregacion? Puede ba conmigo depende el otro especialmente si tiene yo responsibilidad na congregacion? Pirmi ba yo na hora, ta ayuda y preparao sirvi con otro?’ (Le con el Santiago 3:17.) Si ta mira tu que puede pa tu progresa na cuanto aspeto, reza para na sagrao espiritu. Si mas permiti tu con este que influencia con el de tuyu personalidad y accion, mas hay ama y aprecia contigo el maga hermano y hermana na cosa tu ta hace na congregacion.

14. Asegun na Colosa 1:9, 10, paquemodo si Jehova ya enseña con el de suyu maga siervo del primer siglo?

¹⁴ Del primer siglo. Alegre si Jehova enseña con el de suyu maga siervo. (Sal. 32:8) Quierre le que conoce sila con ele, ama con ele y vivi hasta para cuando como de suyu maga anak con quien le ta ama. Gendeh este queda posible si nuay el educacion que ta dale le. (Juan 17:3) Ya usa si Jehova con el Cristiano congregacion del primer siglo para enseña con el de suyu maga siervo. (Le con el Colosa 1:9, 10.) El sagrao espiritu que ya promete si Jesus, ya ayuda tambien kanila. (Juan 14:16) Ya ayuda este con el maga dicipulo para mas entende con el Palabra del Dios y acorda con el maga cosas que ya habla y ya hace si Jesus para puede escribi na Evangelio. Este saber ya hace fuerte con el fe del maga Cristiano del primer siglo y con el diila amor para con Dios, na de suyu Anak y para na uno y otro.

15. Na cosa maga manera ya puede tu mira que ya cumpli si Jehova con el de suyu promesa na Isaias 2:2, 3?

¹⁵ Na moderno tiempo. Si Jehova ya habla que “na ultimo parte del maga dia,” el maga gente estaba na todo maga nacion hay anda na de suyu figurativo monte para aprende  acerca con ele. (Le con el Isaias 2:2, 3.) Ta mira kita que ta cumpli ya este profecia na diaton tiempo. Puede kita mira que el verdadero adoranza mas bueno que con el maskin cosa falso adoranza. Y bien manada espiritual comida ta dale si Jehova! (Isa. 25:6) Por medio del “fiel y sabio esclavo,” gendeh lang le ta dale kanaton manada comida sino clase-clase tambien. (Mat. 24:45, NWT) Por ejemplo, tiene kita maga articulo, talk, cartoon y video. Ta sinti kita igual con el amigo de Job, si Elihu, quien ya habla: “Quien maestro el igual con [Dios]?”​—Job 36:22.

16. Cosa tu puede hace para progresa na espiritual?

¹⁶ Si cosa tu puede hace. El espiritu del Dios puede ayuda contigo para aplica con el cosa tu ta le y ta estudia na Palabra del Dios. Reza igual con el salmista quien ya habla: “O Jehova, enseña conmigo acerca na de tuyu camino. Hay camina yo na de tuyu verdad. Ayuda conmigo para con todo corazon yo tiene miedo na de tuyu nombre.” (Sal. 86:11) Continua beneficia na maga espiritual comida que ta dale si Jehova por medio na de suyu Palabra y na de suyu organizacion. Siempre, gendeh lang goal de tuyu que saca saber. Quierre tu queda convincido na verdad que ta aprende tu y aplica este na de tuyu vida. El espiritu de Jehova puede contigo ayuda hace se. Quierre tambien tu anima con el de tuyu maga hermano y hermana. (Heb. 10:24, 25) Porque? Cay maga espiritual familia sila de tuyu. Reza que dale contigo sagrao espiritu para puede dale sincero comento y puede tu dale enbuenamente con el de tuyu maga part na maga miting. Na ese maga manera, ta dale tu mira con Jehova y con el de suyu Anak que ta ama tu con el diila precioso maga “carnero.”​—Juan 21:15-17.

17. Cosa tu hace para dale mira que ta suporta tu con el organizacion de Jehova?

¹⁷ Gendeh dura, el organizacion que ta guia el sagrao espiritu del Dios amo lang el organizacion que esta na tierra. Poreso, coopera na organizacion que ta guia si Jehova. Imita con el amor que ta dale mira el Dios con todo el maga gente y puede tu se hace si predica tu con el buen noticia con todo con quien tu puede conoce. Aprecia con el paz y orden y hace manera para tiene unidad na congregacion. Oi con el de tuyu Grande Instructor y beneficia na maga espiritual comida que ta dale le. Si hace tu se, gendeh tu tiene miedo mientras ta queda cerca el fin del mundo de Satanas. Sino, hay tiene tu animo junto con aquellos quien fiel ta sirvi na organizacion de Jehova.