1. Como cosa ta explica na Efeso 6:10-13, cosa el uno del maga manera ta dale mira si Jehova que ta ama le kanaton? Explica.

UNO del maga manera ta dale mira si Jehova que ta ama le kanaton como de suyu maga siervo amo si ta ayuda le kanaton resisti con el diaton maga enemigo. Si Satanas y el de suyu maga demonio amo el numero uno enemigo diaton. Ya dale kanaton aviso si Jehova acerca con este maga enemigo y ya dale le kanaton el cosa kita necesita para resisti kanila. (Le con el Efeso 6:10-13.) Si acepta kita con el ayuda de Jehova y confia con ele, puede kita resisti con el Diablo. Puede kita tiene confianza igual con apostol Pablo. Ele ya escribi: “Si el Dios afavor canaton, quien pa ay puede man contra canaton?”​—Rom. 8:31.

2. Cosa kita considera na este articulo?

² Como maga deverasan Cristiano, gendeh kita tan focus con Satanas y na de suyu maga demonio. Sino, tan focus kita si paquemodo kita mas aprende acerca con Jehova y sirvi con ele. (Sal. 25:5) Pero necesita kita sabe cuanto cosas que ta hace si Satanas. Porque? Para gendeh le kanaton puede engaña. (2 Cor. 2:11) Na este articulo, hay considera kita con el un serioso manera que ta usa si Satanas y el maga demonio para engaña con el maga gente. Hay considera tambien kita si paquemodo kita puede resisti kanila.

3-4. (a) Cosa el espiritismo? (b) Paquemodo de manada el ta creé con el espiritismo?

³ El un manera que ta usa si Satanas y el maga demonio para engaña con el maga gente amo el espiritismo. Aquellos quien  ta hace con este practica ta clama que tiene sila cosa sabe o ta puede sila controla maga cosas que no sabe y no puede controla el maga ordinario gente. Por ejemplo, el otro ta clama que sabe sila si cosa sucede na futuro por medio de adivinacion o astrologia. El otro ta actua que dol ta puede sila converza con aquellos maga ya muri. El cuanto ta usa magica y ta hace barang con el un gente. *

⁴ Paquemodo de manada el ta creé con el poder de espiritismo? Asegun na survey que ya hace na 18 nacion na Latin America y Caribbean, maga 30 por ciento del maga gente el ta creé na magica, barang o salamanca y cerca ansina de manada el ta creé que posible comunica con el maga espiritu. Tiene otro survey ya hace na 18 lugar na Africa. Mas de 50 por ciento el ta creé na barang. Siempre maskin onde kita ta queda, debe kita protege diaton cuerpo contra na espiritismo. Cay si Satanas ta pricura engaña “con el entero mundo.”​—Rev. 12:9.

5. Cosa el sentido de Jehova acerca na espiritismo?

⁵ Si Jehova “el Dios de verdad.” (Sal. 31:5) Poreso, cosa el de suyu sentido acerca na espiritismo? Ta odia le con ese! Ya habla si Jehova con el maga Israelita: “Nuay debe ni uno con ustedes quien hace pasa na fuego con el de suyu anak hombre o mujer, maskin quien ta practica adivinacion, maskin quien ta practica magica, maskin quien ta busca maga señal, salamanquero, maskin quien ta hace daño con otro, maskin quien ta consulta na espiritista o con el quien ta adivina o maskin quien tan cuento na muerto. Cay detestable con Jehova si quien ta hace con este maga cosas.” (Deut. 18:10-12) El maga Cristiano gendeh bajo na Ley que ya dale si Jehova con el maga Israelita. Pero sabe kita que nuay cambia el de suyu sentido acerca na espiritismo.​—Mal. 3:6.

6. (a) Paquemodo ta usa si Satanas con el espiritismo para causa peligro con el maga gente? (b) Asegun na Eclesiastes 9:5, cosa el deverasan condicion del maga muerto?

⁶ Ya dale kanaton aviso si Jehova contra na espiritismo cay sabe le que ta usa se si Satanas para causa peligro con el maga gente. Ta usa si Satanas con el espiritismo para man imbusterias, incluido el imbusterias que el maga muerto ta esta vivo na otro lugar. (Le con el Eclesiastes 9:5.) Ta usa tambien si Satanas con el espiritismo para hace miedo con el maga gente y hace kanila lejos con Jehova. Quierre le que el maga gente quien ta hace con este practica hay confia con el maga mal espiritu en vez con Jehova.

7. Cosa kanaton ta habla si Jehova?

⁷ Como cosa kita ya discuti, ta habla kanaton si Jehova si cosa kita necesita sabe para gendeh kanaton puede engaña si Satanas y el maga demonio. Considera kita cuanto practical manera que puede kita hace para resisti con Satanas y na de suyu maga demonio.

8. (a) Cosa el primer manera que puede kita resisti con el maga mal espiritu? (b) Paquemodo el Salmo 146:4 ta dale mira que imbusterias el cosa ya habla si Satanas acerca na maga muerto?

⁸ Le y medita con el Palabra del Dios. Este el primer manera que puede kita resisti con el imbusterias que ta hace el maga mal espiritu.  El Palabra del Dios igual na un agudo espada que puede penetra con el imbusterias que ta hace si Satanas. (Ef. 6:17) Por ejemplo, el Palabra del Dios claro ta dale mira que gendeh deverasan que el maga muerto puede man cuento con el maga vivo. (Le con el Salmo 146:4.) Ta hace tambien este acorda kanaton que si Jehova lang el puede predicta con el futuro. (Isa. 45:21; 46:10) Si regular kita le y medita con el Palabra del Dios, hay queda kita preparao resisti y odia con el imbusterias que quierre kanaton manda creé el maga mal espiritu.

9. Cosa maga practica de espiritismo el debe kita evita?

⁹ No hace maskin cosa que tiene coneccion na espiritismo. Como maga deverasan Cristiano, gendeh kita ta practica maskin cosa clase de espiritismo. Por ejemplo, gendeh kita ta anda na maga espiritista o pricura comunica con el maga muerto. Como cosa ya discuti del ya pasa articulo, ta evita kita con el maga practica de intierro que base na creencia que el muerto ta esta pa vivo na otro lugar. Y gendeh kita ta consulta na espiritista o quien ta practica astrologia para sabe acerca el futuro. (Isa. 8:19) Sabe kita que ese todo clase de practica bien peligroso y puede kita tiene directa coneccion con Satanas y na maga demonio.

10-11. (a) Cosa ya hace el cuanto del primer siglo cuando ya aprende sila el verdad? (b) Asegun na 1 Corinto 10:21, porque kita debe imita con el ejemplo del maga Cristiano del primer siglo y paquemodo kita se puede hace?

¹⁰ Desaleja con el maga cosas que relatao na espiritismo. Cuanto del maga gente ta queda na Efeso del primer siglo el envuelto na practica de espiritismo. Cuando ya aprende sila el verdad, ya hace dayun sila accion. “Y mucho de aquellos quien estaba ta practica magic ya saca el diila maga libro y ya quema todo esos na publico.” (Act. 19:19) Ya hace sila el todo para resisti con el maga mal espiritu. Bien caro quel maga libro acerca na magica. Pero en vez de dale quel maga libro o vende con  otro, ya destroza sila con aquel. Mas ta pensa sila si paquemodo hace alegre con Jehova contra na valor del libro.

¹¹ Paquemodo kita puede imita con el ejemplo del maga Cristiano del primer siglo? Mas bueno si destroza kita todo cosas kita tiene que conectao na espiritismo. Incluido aqui el maga anting-anting o otro pa maga cosas que tiene o ta usa el maga gente para protege kanila desde na maga mal espiritu.​—Le con el 1 Corinto 10:21.

12. Cosa kita debe pregunta con el diaton mismo cuerpo acerca na entretenimiento?

¹² Examina enbuenamente con el de tuyu entretenimiento. Pregunta con el de tuyu mismo cuerpo: ‘Ta le ba yo libro, magasin o maga articulo na Internet acerca na espiritismo? Cosa musica yo ta oi, salida ta mira o video games ta juga? Envuelto ba de espiritismo el de mio entretenimiento? Ta dale ba este mira maga vampira, zombie o otro pa semejante con este? Ta dale ba este mira que el magica, o barang gendeh peligroso?’ Pero siempre, gendeh todo entretenimiento que acerca na fantasia o fairy tale tiene coneccion na espiritismo. Si ta examina con el de tuyu entretenimiento, queda determinao iscuji aquel puede ayuda contigo desaleja na maskin cosa que ta odia si Jehova. Quierre kita hace el diaton de con todo bueno para ‘tiene limpio conciencia’ adelante con Dios.​—Act. 24:16. *

13. Cosa kita debe evita hace?

¹³ Evita cunta istoria acerca na maga demonio. Na ese manera, ta imita kita con el ejemplo de Jesus. (1 Ped. 2:21) Antes le anda aqui na tierra, ya vivi si Jesus na cielo y manada le cosa sabe acerca con Satanas y con el maga  demonio. Pero nuay le cunta istoria acerca na cosa ya hace este maga mal espiritu. Quierre si Jesus queda testigo de Jehova y gendeh de Satanas. Puede kita imita con Jesus si gendeh kita hace istoria acerca na maga demonio. En vez, dale kita mira por medio na diaton maga palabra que el diaton corazon lleno de buen cosas​—el verdad.​—Sal. 45:1.

14-15. (a) Porque gendeh kita debe tiene miedo na maga mal espiritu? (b) Cosa el evidencia que ta protege si Jehova con el de suyu maga siervo ahora?

¹⁴ No tiene miedo na maga mal espiritu. Na este imperfecto mundo, tiene maga mal cosas posible sucede kanaton. El accidente, enfermedad o maskin muerte posible sucede na tiempo que gendeh kita ta expecta. Pero gendeh kita debe pensa que el maga invisible espiritu el ya causa con este. El Biblia ya explica que el “tiempo y maga suceso que gendeh ta expecta” puede sucede kanaton. (Ecl. 9:11) Pero, ya dale mira si Jehova que mas poderoso le na maga demonio. Por ejemplo, nuay le permiti con Satanas que mata con Job. (Job 2:6) Na tiempo de Moises, ya dale mira si Jehova que mas poderoso le contra na maga sacerdote que ta practica magica na Egipto. (Ex. 8:18; 9:11) Por medio na poder de Jehova, si Jesus ya dale mira el de suyu poder con Satanas y na maga demonio cuando ya buta le kanila estaba na cielo para na tierra. Y na futuro, hay buta kanila na hondura donde gendeh sila puede causa peligro con maskin quien.​—Rev. 12:9; 20:2, 3.

¹⁵ Ahora, puede kita mira manada evidencia que ta protege si Jehova con el de suyu maga siervo. Considera este: Ta predica y ta enseña kita el verdad na todo parte del tierra. (Mat. 28:19, 20) Como resulta, ta dale kita mira si cosa el trabajo del Diablo. Asigurao, si puede hace descanza si Satanas con el todo diaton trabajo, hay hace gayot se ele pero gendeh le se puede hace. Poreso, gendeh kita debe tiene miedo con el maga mal espiritu. Sabe kita que “el ojos de Jehova ta mira enbuenamente con el entero tierra para dale mira el de suyu fuerza para con aquellos quien completo el corazon para con ele.” (2 Cron. 16:9) Si fiel kita con Jehova, gendeh kanaton puede causa permanente peligro el maga demonio.

16-17. Dale un ejemplo de coraje para resisti con el maga mal espiritu.

¹⁶ Necesita coraje para resisti con el maga mal espiritu especialmente si el de tuyu maga amigo o pariente tan contra contigo. Pero bendici si Jehova con aquellos quien ta dale mira ansina clase de coraje. Considera con el ejemplo del un hermana, si Erica, quien ta queda na Ghana. Yan Bible study si Erica cuando 21 año le. El de suyu tata un padre quien ta practica magica y ta expecta con ele que participa na un practica donde necesita come con el carne que ya ofrece na maga dios del de suyu tata. Cuando nuay se hace si Erica, ya considera se de suyu familia como insulto na diila maga dios. Ta creé el de suyu familia que hay castiga kanila el diila maga dios por medio na enfermedad de utuk y cuerpo.

¹⁷ Ya forza con Erica de suyu familia que participa con ese practica pero nuay gayot se ele hace maskin pa hay resulta se que sale ele na diila casa. El cuanto maga Testigo de Jehova ya manda con ele queda junto kanila. Na ese manera, ya bendici si Jehova con Erica un nuevo familia​—el de suyu maga hermano y hermana na fe. (Mar. 10:29, 30) Maskin ya desconoce con ele el de suyu mismo familia y ya quema de suyu maga cosas, ya esta leal si Erica con Jehova, ya bautiza y ahora un regular pioneer ya. Gendeh le ta tiene miedo na maga demonio. Y si acerca na de suyu familia, si Erica ya habla, “Todo’l dia yo ta reza que hay experiencia el de mio familia el alegria que conoce con Jehova y tiene el libertad mientras ta sirvi con el diaton amable Dios.”

18. Cosa maga bendicion kita ricibi si confia kita con Jehova?

¹⁸ Gendeh kita todo hay experiencia ansina clase de probanza na fe. Pero todo kita necesita resisti con el maga mal espiritu y confia con Jehova. Si hace kita se, hay ricibi kita manada bendicion y gendeh kanaton puede engaña el maga imbusterias de Satanas. Y gendeh tambien kita tiene miedo na maga demonio. Y mas pa na todo, hay queda mas fuerte el diaton amistad con Jehova. El dicipulo Santiago ya escribi: “Somete ustedes con el Dios. Resisti ustedes con el Demonio, y ay desaleja le con ustedes. Atraca con Dios y Ele ay atraca con ustedes.”​—Sant. 4:7, 8.