1. Cosa quierre hace el todo siervo del Dios y porque? (Mira con el letrato na cover.)

SI Jesucristo ya manda con el de suyu maga siguidores que “anda . . . y hace maga dicipulo con todo el maga gente.” (Mat. 28:19) Todo maga fiel siervo del Dios quierre aprende si paquemodo sila puede “hace gayot embuenamente” este ministerio que ya manda kanila. (2 Tim. 4:5) Este trabajo amo el mas importante, mas tiene beneficio y mas apuro contra na otro trabajo. Pero maskin pa quierre kita dale manada tiempo na ministerio, tan dificil kita hace con ese.

2. Cosa maga dificultad kita ta enfrenta mientras ta cumpli con el diaton ministerio?

² Tiene pa importante trabajo que ta necesita diaton tiempo y esfuerzo. Posible, necesita kita trabaja manada hora cada dia para dale el diaton necesidad y del diaton familia. Posible, tiene pa kita otro maga responsibilidad na familia, enfermo, depress o tiene maga dolencia cay de edad ya. Paquemodo kita puede cumpli con el diaton ministerio mientras ta enfrenta con ese maga dificultad?

3. Cosa kita puede habla acerca na palabra de Jesus na Mateo 13:23?

³ Si limitao diaton tiempo para na servicio con Jehova por causa na diaton circumstancia, gendeh kita debe man luya. Sabe si Jesus que el cada uno kanaton gendeh puede produci igual de manada fruta del Reino. (Le con el Mateo 13:23.) Aprecia gayot si Jehova el todo cosa kita ta hace para con ele basta ese el de con todo bueno kita puede hace. (Heb. 6:10-12) Pero posible, ta sinti kita que el diaton circumstancia ta permiti kanaton para hace mas na servicio con Dios. Na este articulo,  examina kita si paquemodo kita puede hace prioridad na diaton vida el ministerio, si paquemodo kita hace simple diaton vida y progresa pa na diaton predicacion y enseñada. Pero cosa quierre decir que cumpli enbuenamente con el diaton ministerio?

4. Cosa quierre decir que cumpli enbuenamente con el diaton ministerio?

⁴ Para cumpli enbuenamente con el diaton ministerio, debe kita hace el todo lo que puede para predica y enseña. Pero gendeh lang tiempo el envuelto. Importante con Jehova el diaton motivo. Cay ta ama kita con Jehova y con el diaton projimo, ta trabaja kita con todo alma para na diaton ministerio. * (Mar. 12:30, 31; Col. 3:23) Ta sirvi kita con Dios con todo alma si ta usa kita diaton fuerza para hace el de con todo bueno na diaton servicio. Si ta aprecia kita con el diaton privilegio hace el trabajo predicacion, pricura kita predica el buen noticia na mas manada gente.

5-6. Dale un ejemplo si paquemodo el un persona puede hace prioridad el ministerio maskin pa limitao lang de suyu tiempo.

⁵ Imagina con el un joven hombre quien quierre-quierre tuca guitara. Alegre le tuca guitara maskin onde le. Nuay tarda, ya tiene le trabajo na un café como un guitarista durante el weekend. Pero gendeh bastante el de suyu income para na de suyu gasto. Poreso, ya trabaja le Lunes hasta Viernes como un cashier na un grocery. Maskin manada del de suyu tiempo na grocery, mas quierre siempre le tuca guitara. Quierre le mas progresa pa de suyu talento y queda un full-time musicero. Poreso, ta busca le oportunidad para tuca guitara maskin unrato lang.

⁶ Na igual manera, posible limitao lang el de tuyu tiempo para na trabajo predicacion. Pero ese el cosa tu quierre-quierre hace. Ya hace tu esfuerzo para progresa si paquemodo alcanza na corazon del maga gente el buen noticia. Pero cay tiene tu manada cosa debe hace, posible ta pensa tu si paquemodo hace prioridad con el trabajo predicacion.

7-8. Paquemodo kita puede imita con el mirada de Jesus na ministerio?

⁷ Ya dale mira buen ejemplo si Jesus na de suyu ministerio. El mas importante na de suyu vida amo que predica con el Reino del Dios. (Juan 4:34, 35) Ya camina le mas de cien kilometro para predica con el mas manada gente. Ya busca le manera para predica con el maga gente na publico lugar y na diila casa. Ya pone si Jesus una na de suyu vida el de suyu ministerio.

⁸ Puede kita imita con el Cristo si ta busca kita manera para predica con el buen noticia maskin cuando y maskin onde kita puede predica. Preparao kita sacrificia para puede predica. (Mar. 6:31-34; 1 Ped. 2:21) El cuanto na diaton congregacion ta puede sirvi como maga special, regular o auxiliary pioneer. El otro ya aprende converza otro lengguaje o ya cambia na lugar donde tiene mas grande necesidad para predica. Pero grande trabajo el ta puede hace el maga publisher quien ta hace el todo lo que puede sila hace. Pero maskin cosa pa kita puede y gendeh puede hace, gendeh si Jehova ta pidi kanaton mas na cosa kita puede hace. Quierre le que alegre kita sirvi con ele mientras ta declara kita con el “glorioso buen noticia del alegre Dios.”​—1 Tim. 1:11, NW; Deut. 30:11.

9. (a) Paquemodo ya hace prioridad si Pablo con el trabajo predicacion maskin necesita le trabaja? (b) Cosa ta dale mira el Maga Actividad 28:16, 30, 31 acerca na mirada de Pablo na ministerio?

⁹ Si apostol Pablo ya dale mira buen ejemplo cay ya hace le prioridad na de suyu vida el ministerio. Cuando talla le na Corinto durante de suyu segundo viaje como misionario, un poco lang de suyu sen y necesita le trabaja. Pero el hacida de tolda gendeh amo el de con todo importante con Pablo. Ya trabaja le para suporta de suyu necesidad para puede le predica el buen noticia na maga de Corinto que nuay pago. (2 Cor. 11:7) Maskin pa necesita si Pablo hace secular trabajo, ya continua le hace prioridad con el de suyu ministerio y predica cada Sabbath. Despues cambia el de suyu circumstancia, si Pablo ya puede dale mas tiempo na predicacion. Ele “ya usa todo el disuyo tiempo para predica y ta declara le con el maga Judio, cay si Jesus amo el Cristo.” (Act. 18:3-5; 2 Cor. 11:9) Na uliji, cuando ya hace con ele preso na casa na Roma por dos año, ya predica le con el maga ta visita con ele y ta escribi le carta. (Le con el Maga Actividad 28:16, 30, 31.) Nuay deja si Pablo que tiene cosa queda mas importante contra con el de suyu ministerio. Ya escribi le: “Ya recivi came este trabajo . . . poreso, gendeh came ta perde el animo.” (2 Cor. 4:1) Igual con Pablo, maskin necesita kita trabaja, puede siempre kita hace prioridad na diaton vida el ministerio.

10-11. Paquemodo kita puede cumpli enbuenamente con el diaton ministerio si tiene kita problema na salud?

¹⁰ Si malisud ya kita predica na casa en casa por causa cay de edad ya kita o tiene problema na salud, puede siempre kita predica na otro manera. El maga predicador del primer siglo ya predica maskin onde tiene gente. Ya usa sila con el cada oportunidad para man cuento acerca el verdad​—na casa en casa, na publico, na informal manera o ‘maskin con quien sila tan encuentro.’ (Act. 17:17; 20:20) Si gendeh mas kita tanto ta puede camina, puede kita sinta na publico lugar donde puede predica con el maga ta pasa. O posible puede kita predica na informal manera, escribi carta o por medio de telefono. Manada del maga publisher quien bien limitao el circumstancia  el alegre ta participa na ansina clase de predicacion.

¹¹ Maskin pa tiene tu problema na salud, puede siempre tu cumpli enbuenamente con el de tuyu ministerio. Considera con el ejemplo de apostol Pablo. Ya habla le: “Tiene yo fuerza para enfrenta todo cosas por causa con ele quien ta dale conmigo poder.” (Fil. 4:13, NW) Necesita si Pablo ese poder cuando ya enferma le na uno del de suyu maga viaje. Ya explica le con el maga de Galacia: “Sabe ya man ustedes que un emfermedad dimio amo ya dale conmigo el oportunidad para predica el Buen Noticia con ustedes por primera vez.” (Gal. 4:13) Na igual manera, el de tuyu problema na salud posible puede contigo dale oportunidad para predica el buen noticia con otro igual na maga doctor, nurse y otro quien ta cuida contigo. Manada kanila el na trabajo si ta visita el maga publisher na diila casa.

12. Cosa quierre decir que hace focus o simple de tuyu ojos?

¹² Si Jesus ya habla: “El ojos amo el lampara del cuerpo. Si bueno [o simple] el dituyo ojos, el entero cuerpo dituyo ay queda claro.” (Mat. 6:22) Cosa este quierre decir? Ta enseña kanaton si Jesus que necesita kita hace centro diaton vida na un goal o proposito y gendeh permiti que perde diaton focus. Si Jesus mismo ya dale mira ejemplo cuando ya hace le centro de suyu vida na ministerio y ya enseña le con el de suyu maga dicipulo que man focus na diila servicio con Jehova y na De Suyu Reino. Ta imita kita con Jesus si hace kita centro na diaton vida el ministerio  y ‘busca una el Reino del Dios y hace el de suyu voluntad.’​—Mat. 6:33.

13. Cosa puede ayuda kanaton para man focus na diaton ministerio?

¹³ Un manera que puede kita man focus na diaton ministerio amo si hace kita simple diaton vida para tiene kita mas manada tiempo para ayuda con otro conoce y ama con Jehova. * Por ejemplo, puede ba kita man adjust diaton hora na trabajo para tiene kita mas grande tiempo na ministerio? Puede ba kita menora diaton tiempo na maga entretenimiento que ta come manada hora?

14. Cosa maga adjustment ya hace el man maridable para dale mas manada tiempo na ministerio?

¹⁴ Este el cosa ya hace si Elias que un anciano y de suyu mujer. Ya explica le: “Gendeh pa kame puede man pioneer aquel tiempo pero tiene maga cosas que puede kame hace para usa el diamon tiempo na trabajo predicacion. Poreso, ya hace kame diutay cosas para omenta diamon tiempo na ministerio. Por ejemplo, ya menora kame diamon gasto, ya menora tambien kame el diamon entretenimiento y ya pidi na diamon amo si puede cambia con el diamon schedule na trabajo. Como resulta, ya puede kame participa na predicacion de denoche, conduci mas manada Bible study y predica na medio del semana dos beses na un mes. Yan enjoy gayot kame!”

15-16. Asegun na 1 Timoteo 4:13, 15, paquemodo mas progresa el diaton abilidad predica? (Mira tambien con el cajon ““ Maga Goal que Puede Conmigo Ayuda Cumpli De Mio Ministerio.”)

¹⁵ El otro manera para cumpli enbuenamente con el diaton ministerio amo si progresa pa diaton abilidad na trabajo predicacion.  El cuanto maga profecional necesita regular training para mas progresa pa diila saber y abilidad. Deverasan tambien este na maga ta predica con el Reino. Necesita kita continua aprende si paquemodo mas progresa diaton abilidad na ministerio.​—Prov. 1:5; le con el 1 Timoteo 4:13, 15.

¹⁶ Pero paquemodo kita puede continua progresa na diaton abilidad na ministerio? Puede kita se hace si pone kita mas atencion na maga instruccion que ta ricibi kita cada semana na Miting de Vida y Ministerio. Este miting ta dale importante training para ayuda kanaton progresa diaton abilidad na ministerio. Por ejemplo, si ta dale consejo el chairman con aquellos quien tiene assignment, puede kita aprende maga cosas que puede kanaton ayuda progresa na diaton ministerio. Puede kita usa con ese maga sugestion si predica kita con el buen noticia con otro. Puede kita pidi ayuda con el diaton field service group overseer o man partner con ele, na otro experienciao publisher, un pioneer o con el circuit overseer durante el predicacion. Mientras ta progresa kita na diaton usada del cada tool na Teaching Toolbox, mas man enjoy kita predica y enseña.

17. Cosa tu experiencia si cumpli tu enbuenamente con el de tuyu ministerio?

¹⁷ Un grande privilegio gayot que ya permiti kanaton si Jehova queda “trabajador de Dios”! (1 Cor. 3:9) Si ta “asigura [tu] el maga cosas que mas importante” y man focus na ministerio, hay “sirvi [tu] con Jehova con alegria.” (Fil. 1:10, NW; Sal. 100:2) Como maga ministro del Dios, puede tu asigura que dale le contigo el poder que necesita tu para cumpli con el de tuyu ministerio maskin cosa dificultad y limitacion pa tu tiene. (2 Cor. 4:1, 7; 6:4) Si ta permiti el de tuyu circumstancia dale diutay o grande tiempo para predica, queda siempre tu “alegre” si con todo alma tu ta hace con ese. (Gal. 6:4, El Nuevo Testamento) Si cumpli tu enbuenamente con el de tuyu ministerio, ta dale tu mira que ta ama tu con Jehova y con el de tuyu projimo. “Hace firmi ansina y ay salva tu mismo y aquellos quien ta oi contigo.”​—1 Tim. 4:16.