NUAY barco que de maga pasajero lang na tiempo de Pablo. Para puede man viaje el maga gente por medio de barco, necesita sila pregunta con otro si tiene ba barco de cargamento que para alla na diila direccion y conforme lleva pasajero. (Act. 21:2, 3) Maskin pa el barco gendeh para na direccion onde quierre anda el pasajero pero si descanza el barco na diferente pantalan, puede le busca otro barco que lleva con ele mas cerca na de suyu destinacion.​—Act. 27:1-6.

Cuanto beses na un año lang tan viaje el maga barco y nuay este schedule ta sigui. Gendeh tan viaje el maga marinero si malo el tiempo y por causa tambien na maga supersticion. Por ejemplo, gendeh sila man viaje si na amarro del barco tiene uwak ta grita o si ya mira sila bungcao barco na aplaya. Ta vicia el maga marinero con el condicion del tiempo poreso sale sila na pantalan si favorable kanila el viento. Si ya puede incuntra barco el un persona onde le puede munta, anda le na pantalan llevando de suyu carga y espera anuncio si cuando larga el barco.

“Tiene simple manera el Roma para puede incuntra barco el maga gente y gendeh necesita que sila mismo busca barco,” ya habla el un historiador, si Lionel Casson. “El pantalan de este puede incuntra na Tiber River. Na pueblo de Ostia que cerca con ese rio, puede mira con el un grande plaza que tiene manada oficina alrededor. Manada de este maga oficina amo de aquellos maga marinero de otro-otro pantalan: tiene un oficina de maga marinero de Narbonne [France ahora], de maga marinero de Carthage [Tunisia ahora], . . . y otro pa. Si tiene quien ta busca barco para munta, anda lang le na este maga oficina del maga ciudad onde le pasa para llega na de suyu destinacion.”

Mas paspas puede llega na destinacion el maga gente si munta sila barco pero peligroso tambien este. Cuanto beses ya sumi el barco onde ta munta si Pablo durante de suyu viaje como un misionario.​—2 Cor. 11:25.