1-2. (a) Na cosa maga manera ta engaña si Satanas con el maga gente? (b) Cosa kita discuti na este articulo?

SI Satanas, el “tata del imbusterias,” ya engaña con el maga gente desde el tiempo de Adan y Eva. (Juan 8:44) Incluido na de suyu maga imbusterias amo el falso enseñanza acerca na muerte y acerca na vida despues del muerte. Manada maga practica y supersticion el base na falso enseñanza de Satanas acerca na muerte. Como resulta, cuanto del diaton maga hermano y hermana el necesita defende el diila fe si tiene quien ya muri na diila familia o comunidad.​—Judas 3.

² Si ta enfrenta tu ansina probanza, cosa puede ayuda contigo para esta fiel cay sabe tu si cosa ta enseña el Biblia acerca na muerte? (Ef. 6:11) Paquemodo tu puede dale comforta y hace fuerte con el un Cristiano quien posible ta enfrenta pressure que participa na maga practica que no quierre el Dios? Este articulo hay discuti el guia que ta dale si Jehova kanaton. Pero discuti kita una si cosa ta enseña el Biblia acerca na muerte.

3. Cosa el resulta del primer imbusterias?

³ Gendeh proposito del Dios que muri el maga gente. Pero para puede vivi hasta para cuando kanda Adan y Eva, necesita sila obedece con Jehova quien ya dale kanila este simple mandato: “Gendeh gayot tu debe come con el fruta del pono de saber del bueno y malo, cay na dia que come tu con este hay muri gayot tu.” (Gen. 2:16, 17) Despues, ya causa problema si Satanas. Por medio na un culebra, ya habla le con Eva: “Gendeh gayot ustedes muri.” Makatriste cay ya creé si Eva con ese imbusterias y ya come con el fruta. Ya come tambien con el fruta el de suyu  marido. (Gen. 3:4, 6) Na este manera ya principia el pecado y muerte.​—Rom. 5:12.

4-5. Paquemodo ya puede continua engaña si Satanas con el maga gente?

⁴ Ya muri kanda Adan y Eva como cosa ya habla el Dios que sucede kanila. Pero nuay siempre descanza habla imbusterias si Satanas acerca na muerte. Na uliji, ya principia le introduci otro imbusterias. Uno de ese amo el enseñanza que ta muri el fisical cuerpo pero tiene parte del persona el ta continua vivi como un espiritu. El otro-otro clase de ese imbusterias ya engaña con el bien manada gente hasta na diaton tiempo ahora.​—1 Tim. 4:1.

⁵ Porque ya puede engaña con el bien manada gente? Sabe si Satanas si cosa ta sinti el maga gente na muerte y ta usa le con este para engaña kanila. Cay ya crea kanaton para vivi hasta para cuando, no quierre kita muri. (Ecl. 3:11) Ta considera kita con el muerte como un enemigo.​—1 Cor. 15:26.

6-7. (a) Ya puede ba esconde si Satanas con el verdad acerca na maga muerto? Explica. (b) Paquemodo el verdad na Biblia ta ayuda kanaton para gendeh tiene miedo na maga muerto?

⁶ Maskin pa na esfuerzo de Satanas, nuay esta escondido el verdad acerca na muerte. Gane, manada gente ahora el sabe y ta proclama si cosa el Biblia ta habla acerca na condicion del maga muerto y el diila esperanza. (Ecl. 9:5, 10; Act. 24:15) Este maga verdad ta dale kanaton comforta y ta ayuda kanaton para gendeh tiene miedo o man duda si cosa ta sucede si ta muri el maga gente. Por ejemplo, gendeh kita ta tiene miedo con el maga muerto y gendeh tambien kita ta tiene miedo que tiene cosa malo sucede kanila. Sabe kita que gendeh mas sila vivo y gendeh puede hace sinti duele maskin con quien. Dol ta durmi lang sila. (Juan 11:11-14) Sabe tambien kita que el maga muerto no sabe si cuanto tiempo ya el ya pasa. Poreso na resureccion, maskin pa aquellos cuanto siglo ya muerto, hay sinti que dol unrato tiempo lang el ya pasa.

⁷ Asigurao man uyun tu que claro, simple y razonable el verdad acerca na condicion del maga muerto. Bien diferente este na imbusterias de Satanas que ta hace libug con el maga gente! Puera que ta engaña este con el maga gente, ta hace tambien este malo con el reputacion del diaton Creador. Para puede kita mas entende con el peligro que ya causa si Satanas, considera kita con este siguiente pregunta: Paquemodo el maga imbusterias de Satanas ta hace malo con el reputacion de Jehova? Paquemodo este ta manda pensa con el maga gente que gendeh importante el rescate del Cristo? Paquemodo este ta omenta con el tristeza y sufrimiento del maga gente?

8. Como cosa ta dale mira na Jeremias 19:5, paquemodo el imbusterias de Satanas acerca na maga muerto ta hace malo con el reputacion de Jehova?

⁸ El imbusterias de Satanas acerca na maga muerto ta hace malo con el reputacion de Jehova. Incluido na de suyu maga imbusterias amo el falso enseñanza que ta sufri el maga muerto na fuego de infierno. Ese enseñanza ta hace malo con el reputacion del Dios! Na cosa manera? Ta manda este creé con el maga gente que el Dios de amor tiene igual personalidad con el Diablo. (1 Juan 4:8) Cosa se ta manda sinti contigo? Y mas importante, cosa ta sinti si Jehova con ese ciendo ta odia le con el todo clase de maltratamiento?​—Le con el Jeremias 19:5.

9. Paquemodo el imbusterias de Satanas ta afecta con el enseñanza acerca na rescate del Cristo que ta discuti na Juan 3:16 y 15:13?

⁹ El imbusterias de Satanas acerca na muerte ta manda pensa con el maga gente que gendeh importante el rescate del Cristo. (Mat. 20:28) El otro imbusterias de Satanas amo que el gente tiene alma que gendeh ta muri. Si deverasan se, todo gente hay vivi hasta para cuando. Gendeh mas era necesita dale si Jesus con el de suyu vida como rescate para obtene kita vida hasta para cuando. Acorda que el rescate del Cristo amo el de con todo grande expresion de amor para na maga gente. (Le con el Juan 3:16; 15:13.) Imagina si cosa ta sinti si Jehova y si Jesus na maga enseñanza que ta hace sale que gendeh importante ese regalo!

10. Paquemodo el imbusterias de Satanas ta omenta con el tristeza y sufrimiento del maga gente?

¹⁰ El imbusterias de Satanas ta omenta con el tristeza y sufrimiento del maga gente. Posible, habla con el dolorido mayores que ya muri el diila anak cay ya saca el Dios con este para hace angel na cielo. Este imbusterias ba ta menora con el dolor del mayores o ta omenta con ese? Ya usa con el falso enseñanza acerca na fuego de infierno para dale mira que justo lang el torture​—incluido el quemada na estaca con aquellos quien tan contra con el enseñanza del iglesia. Asegun na un libro acerca na Spanish Inquisition, cuanto de aquellos quien responsable na este clase de brutal acto ta creé que ta dale lang sila “idea si cosa ta sucede na fuego de infierno” para aquellos tan contra con el enseñanza del iglesia hay arripinti antes de muri y gendeh sufri na fuego de infierno. Na manada nacion, ta pensa el maga gente que necesita sila adora, dale honor o pidi bendicion na diila maga familia quien ya muri. El otro ta hace se para gendeh kanila castiga diila familia quien ya muri. Makatriste cay ese maga imbusterias gendeh ta dale deverasan comforta. Sino, ta causa este lingasa o miedo pa gane.

11. Paquemodo posible convinci kanaton el diaton maga pariente o amigo que gendeh obedece con el Palabra del Dios?

¹¹ El amor para con Dios y na de suyu Palabra hay ayuda kanaton para obedece con Jehova si el diaton maga pariente o amigo ta convinci kanaton que participa na maga practica acerca na maga muerto que gendeh base na Biblia. Posible, hace sila huya kanaton y habla que nuay kita amor o respeto con el ya muri. O baka habla sila que hace sinti duele el maga muerto con el maga vivo por causa na cosa kita ta hace. Paquemodo kita puede defende con el verdad na Biblia? Considera si paquemodo tu puede aplica con el siguiente principio na Biblia.

12. Cosa maga practica acerca na maga muerto el claro que gendeh base na Biblia?

¹² Queda determinao “desaleja” na maga creencia y practica que gendeh base na Biblia. (2 Cor. 6:17) Na un nacion na Caribbean, manada el ta creé que si muri el un gente, el de suyu “alma” posible esta na tierra y castiga con aquellos  quien ya maltrata con ele. Ese “alma” posible pa gane “lleva perjuicio na comunidad,” ya habla el un referencia. Un practica ya na Africa que tapa con el maga espejo na casa del ya muri y hace bira con el maga letrato para na dindin. Cosa el razon? Cay para gendeh puede mira el muerto con el de suyu ichura. Como maga siervo de Jehova, gendeh gayot kita ta creé o ta participa na maskin cosa practica que ta suporta con el maga imbusterias de Satanas!​—1 Cor. 10:21, 22.

13. Si gendeh tu asigurao acerca na un practica, cosa tu debe hace como cosa ta habla na Santiago 1:5?

¹³ Si gendeh tu asigurao acerca na un practica, reza con Jehova y pidi de suyu sabeduria. (Le con el Santiago 1:5.) Y despues, puede tu man research na diaton maga publicacion. Si necesita, puede tu consulta con el maga anciano na de ustedes congregacion. Gendeh sila habla contigo si cosa tu debe hace pero puede sila contigo ayuda busca maga principio na Biblia que aplicable na de tuyu situacion, como cosa ta discuti aqui. Si hace tu con este, ta puede tu man train con el de tuyu mismo cuerpo para “distingui el bueno y el malo.”​—Heb. 5:14.

14. Cosa el maga manera para puede kita evita ofende con otro?

¹⁴ “Hace todo para dale honor con Dios. Y no hace nada que puede ofende.” (1 Cor. 10:31, 32, El Nuevo Testamento) Si ta decidi kita si participa ba na un practica o gendeh, debe tambien kita pensa si paquemodo este afecta na conciencia del otro, especialmente del diaton maga hermano y hermana na fe. No quierre gayot kita que tiene quien man luya por causa na diaton decicion! (Mar. 9:42) Y no quierre tambien kita ofende con el maga gendeh siervo de Jehova. El diaton amor hay manda move kanaton para con respeto converza kanila y ta dale se gloria con Jehova. Asigurao que no quierre kita pelea con otro o gangguia con el diila tradicion. Acorda que grande el cosa puede hace el diaton amor. Si dale kita mira amor, consideracion y respeto, posible kita hace blando con el corazon de aquellos tan contra kanaton.

15-16. (a) Porque mas bueno si habla tu con otro si cosa tu ta creé? Dale un ejemplo. (b) Porque aplicable kanaton el cosa ya habla si Pablo na Roma 1:16?

¹⁵ Manda sabe na de ustedes comunidad que uno tu del maga Testigo de Jehova. (Isa. 43:10) Si tiene quien ya muri na de ustedes familia, posible que mas facil para contigo enfrenta con ese si sabe ya daan el de tuyu maga pariente y vecinos que un Testigo de Jehova tu. Si Francisco que de Mozambique ya escribi: “Cuando iyo y el de mio mujer, si Carolina, ya  sabe el verdad, ya habla kame con el diamon familia que gendeh mas kame ta adora maga muerto. Ya pone na probanza con el diamon decicion cuando ya muri el hermana de Carolina. Un practica ya kanamon que dale baña con el muerto durante el un ritual. Y despues, el de con todo cerca familia debe durmi por tres noche na lugar donde ya vacia con el agua que ya usa cuando ya dale baña con el muerto. Ta clama el otro que ta hace este para gendeh kanila rabia el espiritu del ya muri. Ta expecta el familia de Carolina que ele el durmi alla.”

¹⁶ Cosa ya hace si Francisco y el de suyu mujer? Si Francisco ya habla: “Cay ta ama kame con Jehova y quierre hace alegre con ele, nuay kame conforma participa na aquel practica. Bien rabiao el familia de Carolina. Ya acusa sila kanamon que nuay kame respeto na muerto y ya habla kanamon que gendeh mas sila visita o ayuda kanamon. Ciendo ya habla ya kame del primero si cosa kame ta creé, nuay mas kame discuti con este cuando bien rabiao sila. Ya defende kanamon el cuanto del diamon pariente y ya habla que ya explica ya kame daan si cosa diamon decicion. Na uliji, gendeh ya rabiao el maga pariente de Carolina y ya puede kame hace bira diamon buen amistad. Gane el cuanto kanila, ta anda na diamon casa para pidi publicacion que base na Biblia.” Ojala gendeh kita tiene huya defende con el verdad acerca na muerte.​—Le con el Roma 1:16.

17. Cosa puede ayuda kanaton para queda un verdadero amigo con el diaton dolorido hermano o hermana na fe?

¹⁷ Si tiene quien ya muri na familia del diaton hermano o hermana na fe, debe kita pricura queda un “verdadero amigo . . . , un hermano quien ya nace para na tiempo de dificultad.” (Prov. 17:17) Paquemodo kita queda un “verdadero amigo” especialmente si tiene quien ta convinci con el diaton dolorido hermano o hermana na fe que participa na maga practica que gendeh base na Biblia? Considera con el dos principio na Biblia que puede ayuda kanaton para dale comforta con ele.

18. Porque ya llura si Jesus y cosa kita puede aprende na de suyu ejemplo?

¹⁸ “Llora junto con aquellos quien ta llora.” (Rom. 12:15) Posible que no sabe kita si cosa habla con el un persona quien dolorido. Tiene vez, mas grande el efecto del diaton luha contra  na diaton maga palabra. Ya llura kanda Maria, Marta y el otro cuando ya muri el diila hermano y amigo, si Lazaro. Cuando ya llega si Jesus cuatro dia despues, “ya llora” tambien le maskin pa sabe le que hay resucita le con Lazaro. (Juan 11:17, 33-35) Cuando ya llura si Jesus, ya dale le mira si cosa ta sinti el de suyu Tata na muerte de Lazaro. Ya puede tambien mira kanda Maria y Marta que ta ama kanila si Jesus y ya dale se comforta kanila. Na igual manera, si el diaton maga hermano ta sinti que ta ama kita kanila, gendeh sila pensa que solo-solo sila. En vez, puede sila sinti que tiene sila maga amigo alrededor kanila quien ta ama y ta suporta kanila.

19. Si ta dale kita comforta con el un dolorido hermano, na cosa maga manera kita puede aplica con el Eclesiastes 3:7?

¹⁹ “Tiempo de silencio y tiempo para converza.” (Ecl. 3:7) El otro manera para dale comforta con el un dolorido hermano amo si ta oi kita con ele. Deja con ele man cuento si cosa le deverasan ta sinti y no sinti duele na de suyu maga palabra. (Job 6:2, 3) Posible que grabe el stress que ta experiencia le por causa na pressure del de suyu maga pariente que gendeh siervo de Jehova. Poreso, reza junto con ele. Pidi con el “quien ta oi con el rezo” que hace con ele fuerte y ayuda para puede le pensa enbuenamente. (Sal. 65:2) Si permiti el de ustedes circumstancia, le junto con el Biblia. O le un articulo que justo na circumstancia estaba na diaton maga publicacion como istoria de vida del diaton maga hermano.

20. Cosa kita discuti na siguiente articulo?

²⁰ Un grande privilegio gayot sabe el verdad acerca na maga muerto y el bien bonito futuro para de aquellos na sepultura! (Juan 5:28, 29) Entonces, por medio na diaton palabra y accion, defende kita con el verdad na Biblia y habla se con otro si tiene oportunidad. El siguiente articulo hay discuti con el otro manera que ta usa si Satanas para gendeh sabe el maga gente acerca el verdad—el espiritismo. Hay mira kita si porque necesita kita evita maga practica y entretenimiento que tiene que hace con este tactica del Diablo.