1-2. Porque si Jesus ya queda malingasa?

NA ULTIMO dia de Jesus como un gente, ya queda le malingasa. Gendeh tarda, hay experiencia le grabe muerte bajo na mano del maga mal gente. Pero gendeh lang se el razon si porque malingasa si Jesus. Bien grande el amor de Jesus para na de suyu Tata y quierre le hace alegre con ele. Sabe si Jesus que si esta le fiel bajo na ese dificil probanza, puede le ayuda vindica con el nombre de Jehova. Ta ama tambien si Jesus con el maga gente y sabe le que el esperanza de vida hasta para cuando ta depende si esta le fiel hasta na de suyu muerte.

² Maskin bajo na grabe stress, si Jesus tiene siempre paz. Ya habla le con el de suyu maga apostoles: “El dimio paz ta dale yo con ustedes.” (Juan 14:27) Tiene le “el paz del Dios”​—el tranquilidad que ta resulta cay el un persona tiene precioso relacion con Jehova. Ese paz ya ayuda con Jesus para gendeh mas man lingasa.​—Fil. 4:6, 7.

3. Cosa kita examina na este articulo?

³ Nuay ni uno kanaton quien puede experiencia el cosa ya sucede con Jesus pero todo quien ta sigui con ele hay enfrenta maga probanza. (Mat. 16:24, 25; Juan 15:20) Y igual con Jesus, tiene vez tan lingasa kita. Cosa kita puede hace para gendeh sobra man lingasa y gendeh perde el diaton paz na pensamiento? Hay examina kita tres cosas que ya hace si Jesus durante de suyu ministerio aqui na tierra y mira kita si paquemodo puede imita con ele si ta enfrenta kita maga probanza.

4. Base na 1 Tesalonica 5:17, dale cuanto ejemplo que ta dale mira que pirmi ta reza si Jesus na ultimo dia del de suyu vida aqui na tierra.

⁴ Le con el 1 Tesalonica 5:17. Pirmi ta reza si Jesus na ultimo dia del de suyu vida aqui na tierra. Cuando ya dale le mira con el de suyu maga dicipulo si paquemodo comemora con el de suyu muerte usando el pan y vino, ya reza le. (1 Cor. 11:23-25) Antes sila sale na lugar donde sila ya celebra el Pascua, ya reza si Jesus junto na de suyu maga dicipulo. (Juan 17:1-26) Cuando ya llega sila na Monte del Maga Olivo, ya reza si Jesus manada beses. (Mat. 26:36-39, 42, 44) Y el ultimo maga palabra ya habla si Jesus antes le muri amo un rezo. (Luc. 23:46) Por medio na rezo, ya inclui si Jesus con Jehova na cada importante suceso na ultimo dia del de suyu vida.

5. Porque ya falta el coraje del maga apostoles?

⁵ El un razon si porque si Jesus ya puede aguanta na de suyu probanza amo cay ya confia le con el de suyu Tata por medio na rezo. Pero el maga apostoles, nuay continua reza de aquel noche. Como resulta, ya falta el diila coraje cuando ya experiencia sila probanza. (Mat. 26:40, 41, 43, 45, 56) Si ta enfrenta kita maga probanza, puede lang kita esta fiel si imita kita con el ejemplo de Jesus y continua reza. Cosa kita puede pidi na rezo?

6. Paquemodo el fe ayuda kanaton para mentena el paz?

⁶ Puede kita reza con Jehova para “omenta el [diaton] fe.” (Luc. 17:5; Juan 14:1) Necesita kita fe por causa cay si Satanas hay pruba con el todo ta sigui con Jesus. (Luc. 22:31) Paquemodo el fe ayuda kanaton mentena el paz si ta llega maga problema? Si ya hace kita el todo lo que puede para enfrenta con el maga  probanza, el fe hay manda move kanaton para entrega con Jehova el diaton maga lingasa. Cay ta confia kita que mas sabe le si cosa debe hace que kanaton, tiene kita paz na pensamiento y corazon.​—1 Ped. 5:6, 7.

7. Cosa tu ya aprende na cosa ya habla si Robert?

⁷ El rezo ayuda kanaton para mentena el diaton paz na pensamiento maskin cosa pa maga probanza kita ta enfrenta. Considera con el ejemplo del mas de 80 año y un fiel anciano, si Robert. Ele ya habla: “El consejo na Filipo 4:6, 7 ya puede ayuda conmigo para enfrenta con el manada probanza na de mio vida. Tiene yo problema na financial. Y temporario ya perde el de mio privilegio como un anciano.” Cosa ya puede ayuda con Robert para mentena el paz na pensamiento? “Ta reza dayun yo si ta sinti yo que ta principia ya yo man lingasa,” ya habla le. “Ta creé yo que si pirmi y hondo el de mio rezo, mas ta tiene yo paz na pensamiento.”

8. Como cosa ya habla na Juan 8:29, cosa el otro razon si porque si Jesus tiene paz na pensamiento?

⁸ Le con el Juan 8:29. Tiene si Jesus paz na pensamiento maskin bajo na persecucion cay sabe le que ta hace le alegre con el de suyu Tata. Ya esta le obediente maskin dificil quel para con ele. Ya ama le con el de suyu Tata y el servicio con Jehova amo el de con todo importante na de suyu vida. Antes le ya vene aqui na tierra, ele el “buen trabajador” del Dios. (Prov. 8:30) Y cuando taqui le na tierra, activo le ya enseña con otro acerca con el de suyu Tata. (Mat. 6:9; Juan 5:17) Ese trabajo ya dale con Jesus grande alegria.​—Juan 4:34-36.

9. Porque kita tiene paz na pensamiento si ocupao kita na trabajo predicacion?

 ⁹ Puede kita imita con Jesus si obediente kita con Jehova y “continua hace mucho buen trabajo para con el Señor.” (1 Cor. 15:58, El Nuevo Testamento) Si ‘usa kita todo diaton tiempo para predica,’ hay tiene kita mas positivo mirada na diaton maga problema. (Act. 18:5) Por ejemplo, el maga gente na diaton ministerio mas grande pa el problema que kanaton. Pero cuando ya aprende sila ama con Jehova y ya aplica con el de suyu consejo, mas ya queda enbuenamente el diila vida y ya queda alegre. Cada vez ta mira kita que ta sucede se, mas ta queda kita asigurao que si Jehova hay cuida kanaton. Y ese puede ayuda kanaton para puede kita mentena el diaton paz na pensamiento. Ya puede se experiencia el un hermana quien ya sinti nuay valor y depress. “Si ocupao yo na ministerio,” ya habla le, “mas ta puede yo controla con el de mio emocion y mas ta sinti yo alegre. Cay si talli yo na ministerio, ta sinti yo que mas cerca yo con Jehova.”

10. Cosa tu ya puede aprende na cosa ya habla si Brenda?

¹⁰ Considera tambien el ejemplo del un hermana, si Brenda. Ele y el de suyu anak mujer tiene un bien serioso enfermedad. Necesita le man wheelchair cay nuay le tanto fuerza y gendeh le ta puede camina. Tiene vez, ta predica le casa en casa pero mas mucho ta predica le por medio de carta. Ya habla pa le: “Cuando ya entende yo y ya acepta que nuay cura el de mio enfermedad na este sistema, ya puede yo man focus na de mio ministerio. Gane si ta predica yo, gendeh yo ta pensa con el de mio maga lingasa. En vez, ta puede yo concentra con aquellos con quien yo ya predica na diamon teritorio y ayuda kanila. Y si ta predica yo, pirmi yo ta pensa con el de mio esperanza na futuro.”

11-13. (a) Paquemodo el maga apostoles y el otro ya dale mira que deverasan amigo sila de Jesus? (b) Cosa el efecto con Jesus del de suyu maga amigo?

¹¹ Durante del entero ministerio de Jesus, el maga fiel apostoles ya dale mira que sila deverasan amigo de Jesus. Sila el clase de amigo que ya habla na Biblia: “Tiene un amigo que leal pa na un hermano.” (Prov. 18:24) Ese amigo precioso con Jesus. Durante de suyu ministerio, nuay ni uno na de suyu hermano el ya pone fe con ele. (Juan 7:3-5) Gane, el de suyu maga pariente ya pensa pa que ya queda ya le loco. (Mar. 3:21) Pero el maga fiel apostoles deverasan amigo de Jesus. Poreso na noche antes ya muri si Jesus, ya habla le kanila: “Ustedes amo el quien ya esta firmi junto conmigo na dimio maga sufrimiento.”​—Luc. 22:28.

¹² Maskin pa tan kamali el maga apostoles de Jesus, nuay le man focus con ese sino ya mira le que tiene sila fe con ele. (Mat. 26:40; Mar. 10:13, 14; Juan 6:66-69) Na ultimo noche que junto si Jesus kanila antes le muri, ya habla le con este maga leal apostoles: “Ta llama yo con ustedes maga amigo cay ya manda yo con ustedes sabe todo el que ya oi yo con mi Tata.” (Juan 15:15) Nuay duda, el maga amigo de Jesus ya puede gayot anima con ele. El ayuda que ya dale sila na de suyu ministerio ya dale alegria con Jesus.​—Luc. 10:17, 21.

¹³ Puera na maga apostoles, tiene tambien otro maga amigo y amiga si Jesus quien ya ayuda con ele na trabajo predicacion y na otro practical manera. El los demas ya invita con ele na casa para come. (Luc. 10:38-42; Juan 12:1, 2) El otro yan viaje junto con ele y ya dale el de suyu maga necesidad. (Luc.  8:3) Si Jesus tiene maga amigo quien quierre ayuda con ele cay sabe sila que ayuda tambien kanila si Jesus. Ya hace le buen cosas para kanila y gendeh le ta expecta que hace sila mas pa na cosa sila puede hace. Perfecto si Jesus pero ya aprecia le con el suporta que ya dale el de suyu maga imperfecto amigo. Y asigurao kita que ya puede gayot sila ayuda para tiene paz na pensamiento si Jesus.

14-15. Paquemodo kita tiene maga buen amigo y paquemodo sila puede ayuda kanaton?

¹⁴ El maga buen amigo hay ayuda kanaton para esta leal con Jehova. Y el buen manera para tiene kita maga buen amigo amo queda un buen amigo tambien. (Mat. 7:12) Por ejemplo, el Biblia ta anima kanaton que usa kita con el diaton tiempo y fuerza para ayuda con otro, especialmente con aquellos quien ta necesita. (Ef. 4:28) Puede ba tu pensa si con quien tu puede ayuda na de ustedes congregacion? Puede ba tu compra maga necesidad de aquellos quien gendeh mas puede sale na casa cay de edad ya y enfermo? Puede ba tu dale comida con el un familia que tiene problema na financial? Si sabe tu usa con el jw.org^® website y JW Library^® app, puede ba tu ayuda con otro na congregacion si paquemodo usa con ese? Si ocupao kita ayuda con otro, mas queda kita alegre.​—Act. 20:35.

¹⁵ El diaton maga amigo hay suporta kanaton si enfrenta kita maga problema y ayuda kanaton para mentena con el diaton paz na pensamiento. Igual con Elihu quien ya oi cuando ya habla si Job el de suyu maga probanza, el diaton maga amigo puede ayuda kanaton si con paciencia sila oi mientras ta  habla kita el cosa kita ta sinti. (Job 32:4) Gendeh kita expecta que el diaton maga amigo habla kanaton si cosa kita hace pero bueno para kanaton si oi kita con el diila consejo que base na Biblia. (Prov. 15:22) Y igual con Rey David quien humilde ya acepta con el ayuda del de suyu maga amigo, debe tambien kita acepta ayuda que ta dale el diaton maga amigo. (2 Sam. 17:27-29) Ese maga buen amigo regalo gayot estaba con Jehova.​—Sant. 1:17.

16. Asegun na Filipo 4:6, 7, cosa el solamente manera para puede kita obtene paz? Explica.

¹⁶ Le con el Filipo 4:6, 7. Porque ya habla si Jehova kanaton que puede kita obtene el paz que ta dale le por medio “con Cristo Jesus”? Cay puede lang kita tiene y mentena paz na pensamiento y corazon si ta entende kita y tiene fe na papel que cumpli si Jesus. Por ejemplo, por medio del rescate de Jesus, puede perdona con el todo diaton pecado. (1 Juan 2:12) Ta dale gayot este alivio! Como Rey na Reino del Dios, si Jesus hay termina el todo sufrimiento que ya causa si Satanas y de suyu sistema. (Isa. 65:17; 1 Juan 3:8; Rev. 21:3, 4) Un bonito esperanza gayot para kanaton! Y maskin pa ya dale kanaton si Jesus un dificil trabajo, ta suporta le kanaton hasta na ultimo maga dia de este sistema. (Mat. 28:19, 20) Ta dale este kanaton coraje! Bien importante el alivio, esperanza y coraje para tiene kita paz na pensamiento.

17. (a) Paquemodo el un Cristiano puede mentena paz na pensamiento? (b) Como cosa ya promete na Juan 16:33, cosa kita puede hace?

¹⁷ Entonces, paquemodo tu mentena paz na pensamiento maskin ta experiencia tu grabe probanza? Puede tu se hace si imita tu con el cosa ya hace si Jesus. Una, reza y continua reza maskin cosa pa sucede. Ika-dos, obedece con Jehova y queda activo na predicacion maskin pa dificil se hace. Y el ika-tres, acepta ayuda na de tuyu maga amigo para puede enfrenta maga probanza. Despues, el paz del Dios hay guarda con el de tuyu pensamiento y corazon. Y igual con Jesus, hay puede tu ganá na maskin cosa probanza.​—Le con el Juan 16:33.