Winston, pabor relata kanamon si paquemodo tu ya sabe el verdad.

Ya engranda yo na un gendeh religioso familia na un sementera na Queensland, Australia. Por causa cay bien lejos el diamon lugar, nuay yo ledia na otro maga gente puera na de mio familia. Cuando maga 12 año yo, ya principia yo busca con Dios. Ya reza yo que puede yo sabe el verdad acerca con ele. Ya sale yo kanamon y ya puede incuntra trabajo na Adelaide, South Australia. Na edad de 21, ya conoce yo con Pam cuando tan vacacion yo na Sydney. Ya relata le conmigo acerca na un grupo de British-Israel quien ta clama que el maga de Britain descendiente del maga perdido tribo de Israel. Ese grupo ta habla que aquel maga tribo amo el diez tribo na parte norte del reino de Israel que ya queda cautivo del 740 B.C.E. Cuando ya bira yo na Adelaide, ya habla yo se con el de mio uban na trabajo quien ta principia estudia el Biblia junto na maga Testigo de Jehova. Despues kame man cuento por cuanto hora mas mucho acerca na maga creencia del maga Testigo de Jehova, ya puede yo realiza que ya contesta con el de mio rezo. Ya aprende yo el verdad acerca na de mio Creador y na de suyu Reino! Ya incuntra yo el “perlas” que bien valoroso.​—Mat. 13:45, 46.

Pam, ya principia tambien tu busca el perlas cuando joven pa. Paquemodo tu ya incuntra con ese?

Ya engranda yo na un religioso familia na pueblo del Coffs Harbour, New South Wales. El de mio mayores y el de mio lola y lolo ta creé na enseñanza del grupo de British-Israel. El de mio menor hermano, mayor hermana, iyo y de mio maga primo y prima ya engranda que ta creé que el Dios afavor con el maga gente quien el tatarabuelo amo maga de Britain. Pero gendeh yo convincido  con ese creencia y ta sinti yo que gendeh yo cerca con Dios. Cuando 14 año yo, ya anda yo na diferente iglesia, incluido el Anglican, Baptist y Seventh-day Adventist. Pero nuay sila puede ayuda conmigo conoce con Dios.

El de mio familia ya cambia na Sydney donde ya conoce yo con Winston cuando tan vacacion le alla. Como cosa le ya habla, el diamon discusion ya resulta que ya estudia le con el Biblia junto na maga Testigo de Jehova. Despues, el de suyu maga carta lleno de maga texto! Ta admiti yo que malingasa yo del una y rabiao pa gane. Pero hinay-hinay ya puede yo pensa que el cosa le ta escribi amo el verdad acerca con Dios.

Del 1962, ya cambia yo na Adelaide para queda cerca con Winston. Ya hace le manera para junto yo queda na un maridable Witness​—kanda Thomas y Janice Sloman​—maga misionario na Papua New Guinea. Bien bueno gayot sila conmigo; 18 año lang yo aquel tiempo y grande el diila ayuda na de mio espiritualidad. Poreso, ya principia tambien yo estudia con el Palabra del Dios y nuay tarda, ya queda yo convincido que ya incuntra ya yo el verdad. Despues del diamon casamiento de Winston, ya principia dayun kame un alegre vida na servicio con Jehova. Maskin pa na maga dificultad, este clase de vida mas ya hace grande con el diamon apreciacion na perlas que ya incuntra kame.

Winston, pabor relata kanamon si cosa ya sucede na primer año del de tuyu servicio con Jehova.

Despues del diamon casamiento de Pam, ya principia si Jehova dale kanamon maga especial assignment na de suyu servicio. (1 Cor. 16:9) El una amo por medio de Hermano Jack Porter quien ya sirvi como un circuit overseer na diamon diutay congregacion. (Un miembro tambien le del Branch Committee na Australasia ahora.) Si Jack y el de suyu mujer, si Roslyn, ya anima kanamon que man regular pioneer​—un privilegio que yan enjoy kame por cinco año. Cuando 29 año yo, ya sirvi kame de Pam na circuit work na South Pacific Islands que bajo na Fiji branch de aquel tiempo. El maga isla amo el American Samoa, Samoa, Kiribati, Nauru, Niue, Tokelau, Tonga, Tuvalu y Vanuatu.

De aquel tiempo, cuanto na maga gente alla na maga lejos isla desconfiao na maga Testigo de Jehova poreso debe kame queda alisto y con cuidao. (Mat. 10:16) Diutay el maga congregacion y na cuanto congregacion, nuay kame onde puede durmi. Poreso, ya pidi kame na maga gente alla na barrio si puede ba kame esta junto kanila y bueno gayot sila kanamon.

Winston, bien interesao tu na trabajo de translation. Paquemodo tu ya tiene se interes?

Ese tiempo, el maga hermano y hermana na Tonga tiene lang cuanto tract y booklet na lengguaje de Tongan. Na ministerio, ta usa sila con el English edicion de libro The Truth That Leads to Eternal Life para na Bible study. Poreso durante el cuatro semana clase del maga anciano, tres anciano el ya conforma man translate con el libro Truth na Tongan maskin pa limitao lang el diila English. Si Pam el yan type con el manuscript y ya imbia se kame na branch del United States para man print. El entero proyecto ya acaba maga ocho semana. Maskin pa gendeh ansina de bueno el calidad del translation, ese publicacion ya puede ayuda mucho maga gente quien ta converza Tongan para aprende el verdad. Gendeh kame translator de Pam pero ese experiencia ya ayuda para tiene kame interes na ese trabajo.

Pam, cosa el diferencia del vida na isla y na Australia?

Bien otro gayot! Tiene maga lugar que tan dificil kame por causa na namuk, sobra calor, raton, enfermedad y tiene vez, escasez de comida. Pero acabar el dia, ta sinti kame bien relax mientras ta mira con el mar estaba na diamon casa que hacido de nipa y nuay dindin. Tiene vez si bien claro el luna, ta puede kame mira con el forma del maga coco y con el luna que ta reflecta na mar. Ta manda este move kanamon  para medita y reza. Como resulta, ta puede kame man focus na maga positivo cosas en vez na maga negativo.

Quierre-quierre kame na maga bata cay bien alegre y bien curioso sila si ta mira kanamon maga blanco foreigner. Cuando ya visita kame na Niue, un bata hombre el ya agarra con el mapelo brazo de Winston y ya habla, “Quierre-quierre yo con el de tuyu pluma.” Claro que nuay pa gayot le puede mira mapelo brazo y no sabe tambien le si cosa con ese ta llama!

Bien duele para kanamon mira con el malisud situacion del maga gente alla. Bonito el diila lugar pero gendeh bastante el asistencia para na salud y escasez tambien sila na agua para toma. Pero, gendeh tan lingasa el maga hermano. Normal lang se para kanila. Alegre sila cay junto sila con el diila maga familia, tiene sila lugar para na miting y ta puede sila alaba con Jehova. El diila ejemplo ya ayuda kanamon para man focus na mas importante cosas y hace simple con el diamon vida.

Tiene vez, Pam, ta saca tu agua y ta prepara comida que nuevo para contigo. Paquemodo tu se ya hace?

Ta rindi yo gracias con el de mio tata cay ya enseña le conmigo manada cosas igual si paquemodo arde fuego, cuci y hace maga cosas maskin limitao lang na material. Cuando ya visita kame na Kiribati, ya esta kame na diutay casa que nipa el techo, corales el piso y caña el dindin. Para puede yo cuci, ya hace yo agujero na piso para arde fuego y ya pone bonote para arde. Para saca agua, tan pila yo junto na maga mujer de alla. Ta saca sila agua usando el palo que dos metro el largor que tiene amarro na punta igual como bingit. Pero en vez de gancho (hook) el na punta del amarro, ya pone sila lata. Tan relevajan sila usa con ese y ta busca timing para si move sila con el diila mano, hay inclina el lata y llena este de agua. Pensaba yo facil lang se hace pero cuando de mio ya turno, cuanto beses yo ya hace con este pero tan lutao lang el lata na agua! Despues conmigo re el maga mujer, uno kanila ya ayuda conmigo. Bueno y ta ayuda gayot sila conmigo.

Tan enjoy gayot ustedes na de ustedes assignment na isla. Puede ba ustedes man share kanamon cuanto experiencia que gendeh ustedes puede ulvida?

Winston: Tarda tambien kame ya puede aprende el diila manera de vida alla. Por ejemplo, si ta dale kanamon come el maga hermano alla, ta dale sila todo comida que tiene sila. Del primero, no sabe kame que debe kame deja comida para kanila. Poreso, ya come kame todo que ya dale sila kanamon! Cuando ya sabe kame que ansina el situacion, ya deja ya kame comida para kanila. Maskin pa ansina el ya sucede, el maga hermano ta entende kanamon. Y excited gayot sila mira kanamon na tiempo del diamon visitada kanila cada seis mes o mas pa. Puera na maga hermano que de alla, kame lang el maga Witness que conoce sila de antes.

El diamon visitada ya dale tambien buen testigo na comunidad. Mucho maga de alla ta pensa que el maga hermano lang el quien ya inventa con el diila religion. Poreso cuando ya visita el un ministro y el de suyu mujer que de otro nacion, ya puede sila realiza que deverasan el diaton organizacion y yan bilib sila.

Pam: Uno del de mio favorito experiencia amo cuando talla kame na un congregacion na Kiribati que poco lang maga hermano y hermana. El solamente anciano alla amo si Itinikai Matera quien ya cuida gayot kanamon. Un dia, ya visita le kanamon llevando un basket que tiene un huevos. “De ustedes este,” ya habla le. Ralo lang kame puede come huevos de manok aquel tiempo. Ese simple manera de pagka-bondadoso ya dale gayot kanamon alegria.

Despues del cuanto año, ya malpari tu Pam. Cosa ya puede ayuda contigo para puede enfrenta con ese?

Ya queda yo priñada del 1973 cuando talla kame de Winston na South Pacific. Ya decidi  kame bira na Australia y despues del cuatro meses, ya malpari yo. Bien dolorido kame de Winston. Mientras ta pasa el tiempo, hinay-hinay ta perde el dolor na de mio corazon pero nuay pa gayot este completamente perde hasta ya puede kame ricibi el Abril 15, 2009, issue del The Watchtower. Tiene pregunta na “Questions From Readers” ta habla: “Tiene pa ba esperanza resucita el maga bata que ya muri adentro na barriga del nana?” Ese articulo ya asigura kanamon que si Jehova hay decidi si cosa hace y pirmi le ta hace si cosa el justo. Hay quita le con el todo dolor que ta experiencia kame na este mundo que lleno de maldad mientras ta guia le con el de suyu Anak para ‘destroza el maga trabajo de Satanas.’ (1 Juan 3:8) Aquel mismo articulo ya ayuda tambien kanamon para mas aprecia con el precioso “perlas” que tiene kame como maga siervo de Jehova! Paquemodo ya lang si nuay se esperanza?

Despues yo malpari, ya bira kame sirvi full-time. Ya sirvi kame na Australia Bethel por cuanto mes y despues, ya bira kame na circuit work. Del 1981, despues sirvi por cuatro año na New South Wales y Sydney, ya invita kanamon na Australia branch que amo ta llama de antes. Aqui kame ta sirvi hasta ahora.

Winston, ya puede ba ayuda contigo el de tuyu experiencia na South Pacific Islands na de tuyu trabajo como miembro del Branch Committee na Australasia?

Si, na mucho manera. Una, el Australia ya el ta mira con el trabajo na American Samoa y Samoa. Despues, yan merge con el branch de New Zealand y Australia. Ahora el teritorio que bajo na Australasia branch amo el Australia, American Samoa y Samoa, el Cook Islands, New Zealand, Niue, Timor-Leste, Tokelau y Tonga​—y ya tiene yo privilegio que visita na cuanto de ese maga lugar como un representante del branch. El de mio maga experiencia na trabajo junto con el maga fiel hermano y hermana na ese maga isla ya ayuda gayot conmigo na de mio servicio aqui na branch office.

Como conclusion, quierre lang yo habla que base na diamon experiencia por cuanto año, ya realiza kame que gendeh lang maga de edad el ta busca con Dios. El maga jovenes ta busca tambien con ese “perlas” que bien valoroso​—maskin pa gendeh interesao el otro miembro del diila familia. (2 Rey 5:2, 3; 2 Cron. 34:1-3) Asigurao gayot que si Jehova un amable Dios quien quierre que obtene vida el maga jovenes y de edad!

Cuando ya principia kame de Pam busca con Dios mas de 50 año ya pasa, no sabe gayot kame si cosa el resulta. El verdad acerca na Reino un precioso perlas gayot! Bien determinao kame que esta kanamon ese precioso perlas!