1. Cosa kita todo debe hace?

QUIERRE ba tu participa na un carrera que sabe tu que dificil, especialmente si enfermo o cansao tu? Posible gendeh. Pero, si apostol Pablo ya habla que el todo Cristiano entrao na un carrera. (Heb. 12:1) Y todo kita, joven man o de edad, mafuerza man o maluya, debe aguanta hasta na fin si quierre kita ricibi el premio que ya promete kanaton si Jehova.—Mat. 24:13.

2. Como cosa ta habla na 2 Timoteo 4:7, 8, porque ya puede dale consejo si Pablo?

² Puede dale si Pablo este consejo cay ya puede le “corre . . . el carrera hasta na fin.” (Le con el 2 Timoteo 4:7, 8.) Pero, cosa el carrera que ta discuti si Pablo?

3. Cosa el carrera que ta refiri si Pablo?

³ Tiene vez, si Pablo ta usa maga cosas que tiene que hace na maga juego na Grecia de antes para enseña importante leccion. (1 Cor. 9:25-27; 2 Tim. 2:5) Na manada ocasion, ya compara le con el vida del un Cristiano na un carrera. (1 Cor. 9:24; Gal. 2:2; Fil. 2:16) El un persona puede entra na este “carrera” si dedica le de suyu mismo cuerpo con Jehova y bautiza. (1 Ped. 3:21) Hay llega le na finish line si dale ya con ele si Jehova el premio de vida hasta para cuando.—Mat. 25:31-34, 46; 2 Tim. 4:8.

4. Cosa kita considera na este articulo?

⁴ Cosa el cuanto maga cosas na largo distancia carrera que ta semeja na vida como un Cristiano? Considera kita con el tres de este. Una, necesita kita sigui na justo camino; ika-dos,  debe kita man focus na finish line y el ika-tres, necesita kita continua corre maskin pa tiene maga dificultad.

5. Cosa manera de vida kita debe sigui y porque?

⁵ Para puede ricibi con el premio na un literal carrera, el maga runner debe sigui na ruta que ya dale kanila. Na igual manera, si quierre kita ricibi con el premio de vida hasta para cuando, debe kita sigui na ruta o manera de vida para na maga Cristiano. (Act. 20:24; 1 Ped. 2:21) Pero, quierre si Satanas y aquellos quien ta sigui con ele que gendeh kita sigui con ese. Quierre sila que continua kita “man junto canila.” (1 Ped. 4:4) Ta gangguia sila con el manera de vida que ya iscuji kita. Ta clama sila que mas bueno el diila manera de vida y hay resulta este na libertad. Pero, gendeh se deverasan.—2 Ped. 2:19.

6. Cosa tu ya aprende na ejemplo de Brian?

⁶ Aquellos quien ya vivi igual con aquellos bajo na influencia del mundo de Satanas ya puede realiza que gendeh este ta resulta na libertad sino na pagka-esclavo. (Roma 6:16) Considera con el ejemplo de Brian. El de suyu mayores ya anima con ele que sigui con el manera de vida de maga Cristiano. Pero cuando teenager pa le, yan duda le si queda ba le alegre na ese clase de vida. Si Brian ya decidi sigui con aquellos quien ta vivi uyun na querrer de Satanas. “Nuay yo puede realiza que el libertad que ta busca yo hay causa conmigo para queda addict na maga peligroso cosas,” ele ya habla. “Ya llega el tiempo, ta usa yo droga, ta toma sobra alcoholico tomada y ta vivi imoral vida. Adentro de cuanto año, ya pruba pa yo otro droga que mas fuerte y peligroso y ya queda addict con ese. . . . Ya principia yo vende droga para puede suporta con el de mio vicio.” Na uliji, si Brian ya decidi vivi asegun na maga principio de Jehova. Ya cambia le con el de suyu manera de vida y ya bautiza del 2001. Ahora, deverasan le alegre cay ta sigui le con el manera de vida para na maga Cristiano. *

7. Asegun na Mateo 7:13, 14, cosa el dos camino que talli adelante kanaton?

⁷ Bien importante que iscuji kita con el justo camino onde pasa! Si Satanas quierre que todo kita hay descanza corre na malisud camino que ta guia “para na vida” y anda na ancho camino donde mayoria del maga gente ahora el ta pasa. Mas quierre el maga gente con ese camino y mas facil alli pasa. Pero, ta guia este “para na destruccion.” (Le con el  Mateo 7:13, 14.) Para esta na justo camino y gendeh perde el focus, debe kita confia con Jehova y oi con ele.

8. Si tumba el un runner, cosa le ta hace?

⁸ El maga runner na largo distancia carrera pirmi ta mira adelante del camino para gendeh sila man tisut. Pero, puede siempre sila tumba por causa na otro runner o si pisa sila na agujero. Si tumba sila, ta levanta sila otravez y ta continua corre. Tan focus sila, gendeh na cosa ya hace tumba kanila, sino na finish line y na premio que quierre sila ganá.

9. Cosa kita debe hace si yan tisut kita?

⁹ Na diaton carrera, posible kita man tisut manada beses y man kamali na diaton palabra o accion. O posible, el diaton uban na carrera puede hace sinti duele kanaton. Gendeh mas kita debe espanta si sucede se. Imperfecto kita todo y igual ta corre na malisud camino que ta guia para na vida. Poreso tiene vez, “man bangga” gayot kita con otro. Si Pablo ya admiti que tiene vez, puede kita “tiene reclamo” con uno y otro. (Col. 3:13) Pero, en vez que man focus na cosa ya hace tisut kanaton, man focus kita con el premio adelante. Si tumba kita, levanta y continua corre. Si rabia kita, man sentimiento y descanza corre, gendeh kita llega na finish line y obtene el premio. Omento pa, baka queda lang kita sanggadura con otro quien ta pricura corre na malisud camino para na vida.

10. Paquemodo kita evita queda sanggadura con otro?

¹⁰ El otro manera para puede kita evita queda sanggadura na diaton uban na carrera amo si permiti kita kanila hace si cosa sila quierre en vez de pirmi insisti con el cosa kita quierre. (Roma 14:13, 19-21; 1 Cor. 8:9, 13) Na este aspeto, gendeh kita igual na maga literal runner. Tan competencia sila con uno y otro y el cada runner ta pricura ganá con el premio para con el de suyu mismo cuerpo lang. Este maga runner ta pensa lang con el diila mismo interes. Poreso, hay pricura sila rimpuja con otro para man una sila. Pero gendeh igual kanila, gendeh kita tan competencia con uno y otro. (Gal. 5:26; 6:4) El diaton goal amo que ayuda con el mas manada  si posible para llega na finish line junto kanaton y obtene con el premio de vida. Poreso, ta pricura kita aplica con el consejo de Pablo que “no [kita] busca el interes lang del [diaton] mismo, sino busca el interes del los demas.”—Fil. 2:4.

11. Onde tan focus el un runner y porque?

¹¹ Puera que ta mira sila con el camino adelante kanila, el maga literal runner tan focus tambien na finish line. Maskin pa gendeh sila ta puede mira con este, ta puede sila imagina con el diila mismo cuerpo que ta llega na finish line y ta ricibi el premio. Ta esta sila determinao cay pirmi sila ta pensa con el premio.

12. Cosa ya promete kanaton si Jehova?

¹² Na diaton carrera, si Jehova ya promete con el de suyu maga siervo un asigurao premio si completa sila con el carrera—vida hasta para cuando na cielo o na paraiso tierra. El Escritura ta dale kanaton detalle acerca na este maga premio para puede kita imagina si paquemodo de bonito el diaton vida na futuro. Si pirmi kita pensa con el diaton esperanza, mas queda kita determinao aguanta.

13. Cosa el diaton ventaja contra na maga literal runner?

¹³ El maga runner na juego na Grecia necesita aguanta con el maga dificultad igual na cansancia y dolencia. Pero, todo sila ta depende lang na diila training y na diila mismo fuerza. Igual con ese maga runner, ya ricibi tambien kita training si paquemodo corre na carrera. Pero, tiene kita ventaja si compara kanila. Puede kita saca fuerza con Jehova y nuay limitacion el de suyu ayuda. Si confia kita con ele, ya promete le que man train le kanaton y hace fuerte kanaton!—1 Ped. 5:10.

14. Paquemodo el 2 Corinto 12:9, 10 puede ayuda kanaton enfrenta maga dificultad?

¹⁴ Ya enfrenta manada maga dificultad si Pablo. Puera na insulto y persecucion que ya ricibi le, ya sinti tambien le luya na fisical y ya tiene “tunuk na pellejo.” (2 Cor. 12:7, El Nuevo Testamento) Pero, en vez de mira con ese maga dificultad como razon para descanza, ya mira le con ese como oportunidad para confia con Jehova. (Le con el 2 Corinto 12:9, 10.) Cay tiene si Pablo ese clase de custumbre, si Jehova ya ayuda con ele enfrenta con el todo de suyu maga probanza.

15. Cosa kita experiencia si imita kita con Pablo?

¹⁵ Posible, insulta y persigui tambien kanaton por causa na diaton fe. Posible tambien que enferma kita o sinti cansancia. Pero si imita kita con Pablo, el cada uno de ese dificultad puede queda oportunidad para experiencia kita con el amable suporta de Jehova.

16. Maskin pa nuay tu buen salud, cosa tu puede hace?

¹⁶ Acustao ya lang ba tu na cama o sintao na wheelchair? Maluya ya ba de tuyu tuhud o gendeh mas claro el vista? Si ansina, puede ba tu corre junto con aquellos maga joven y tiene buen salud? Si, puede! Manada del maga de vejez y enfermo el ta corre siempre na camino para na vida. Gendeh sila con este puede hace na diila mismo fuerza lang. Sino, ta saca sila fuerza con Jehova por medio na oida na maga miting por medio de telepono o mirada na maga miting por medio de video streaming. Y ta participa sila na trabajo de hacida de dicipulo si ta predica sila na maga doctor, nurse y diila pariente.

17. Cosa ta sinti si Jehova con aquellos tiene fisical limitacion?

¹⁷ No permiti que el de tuyu maga fisical limitacion hay hace luya contigo y manda contigo pensa que gendeh mas tu puede  corre na carrera de vida. Ta ama contigo si Jehova por causa na de tuyu fe y con el todo cosas que ya hace tu para con ele. Mas ta necesita tu ahora con el de suyu ayuda y gendeh le abandona contigo. (Sal. 9:10) Sino, hay queda le mas cerca contigo. Nota con el cosa ya habla el un hermana que tiene problema na salud: “Cay mas ta omenta el de mio problema na salud, gendeh mas yo tanto ta puede predica con otro. Pero sabe yo que el de mio diutay esfuerzo ta puede hace alegre con Jehova y ta hace se alegre conmigo.” Si ta sinti tu luya, acorda que gendeh tu solo. Pensa con el ejemplo de Pablo y acorda con el cosa le ya habla: “Ta encontra yo alegria na dimio maga emfermedad, . . . cay cuando maluya yo, entonces amo ta queda yo mafuerza.”—2 Cor. 12:10.

18. Cosa el otro dificultad que ta enfrenta el cuanto?

¹⁸ Tiene del cuanto quien ta corre na camino de vida ta enfrenta otro pa dificultad. Posible, ta enfrenta sila maga problema que gendeh ta puede mira y entende el otro. Por ejemplo, tiene sila depression o sobra malingasa. Porque bien dificil el cosa ta enfrenta este maga siervo de Jehova? Cay si el un persona tiene quebrao brazo o sintao ya lang na wheelchair, todo el ta puede mira con el de suyu problema y puede este manda move kanila para ayuda. Pero, posible que gendeh puede mira que ta sufri aquellos quien ta enfrenta problema na emocion o na pensamiento. El diila dificultad igual lang con aquellos tiene quebrao brazo o pies, pero posible gendeh sila ta ricibi el igual amable ayuda que ta necesita sila.

19. Cosa kita puede aprende na ejemplo de Mepiboset?

¹⁹ Si tiene tu maga limitacion y ta sinti que gendeh contigo ta entende el otro, puede contigo anima el ejemplo de Mepiboset. (2 Sam. 4:4) Tiene le fisical limitacion y ya juzga con ele si Rey David. Gendeh culpa de Mepiboset si porque este ya sucede con ele. Maskin pa ansina, nuay le permiti que hace este con ele negativo. Ya aprecia le con el maga buen cosas que ya sucede na de suyu vida. Ya rindi le gracias con el pagka-bueno que ya demonstra si David con ele del antes. (2 Sam. 9:6-10) Poreso, cuando ya juzga con ele si David, ya considera le con el entero situacion. Nuay le permiti que el kamali de David causa con ele para rabia. Y nuay le disculpa con Jehova na cosa ya hace si David. Si Mepiboset yan focus na cosa le puede hace para suporta con el iscujido rey de Jehova. (2 Sam. 16:1-4; 19:24-30) Ya manda escribi si Jehova con el buen ejemplo de Mepiboset na Biblia para na bien diaton.—Roma 15:4.

20. Cosa el efecto del lingasa na cuanto, pero cosa sila puede asigura?

 ²⁰ Por causa na sobra lingasa, el cuanto maga hermano y hermano ta sinti sobra nervios y huya si tan junto con otro. Posible, dificil para kanila que man junto na manada gente, pero ta continua sila atende na maga miting, asemblea y convencion. Tan lisud sila converza con aquellos no conoce sila, pero ta converza siempre sila con otro na ministerio. Si ansina el de tuyu situacion, puede tu asigura que gendeh tu solo. Manada el ta sinti igual contigo. Acorda que ta aprecia si Jehova con el de tuyu maga esfuerzo. Gane, ciendo ta continua tu aguanta, un prueba se que ta bendici le contigo y ta dale le el fuerza que necesita tu. * (Fil. 4:6, 7; 1 Ped. 5:7) Si ta sirvi tu con Jehova maskin pa tiene tu limitacion na fisical y emocional, puede tu asigura que ta hace tu alegre con Jehova.

21. Na ayuda de Jehova, cosa kita todo puede hace?

²¹ Bueno ya lang que tiene diferencia na literal carrera y na carrera que ya discuti si Pablo. Na literal carrera na tiempo na Biblia, uno lang el quien ta ganá. Pero el todo quien fiel ta continua sigui na manera de vida para na maga Cristiano amo el ricibi con el premio de vida hasta para cuando. (Juan 3:16) Y na literal carrera, debe na condicion el cuerpo del maga runner, cay si gendeh, baka gendeh sila puede ganá na carrera. Pero na diaton carrera, maskin pa manada kanaton el tiene fisical limitacion, ta continua siempre kita aguanta. (2 Cor. 4:16) Na ayuda de Jehova, todo kita hay puede hace acaba con este carrera!