1. Cosa ta dale mira el Biblia acerca con Jehova y porque este ta dale comforta kanaton?

QUIERRE ba tu que juzga contigo base na de tuyu color, ichura o grandor del de tuyu cuerpo? Asigurao que no quierre tu. Ta dale gayot kanaton comforta cay sabe kita que si Jehova gendeh ta juzga kanaton base na cosa ta puede mira el maga gente! Por ejemplo, cuando ya mira si Samuel con el maga anak hombre de Jese, nuay le mira con el cosa ya mira si Jehova. Ya habla si Jehova con Samuel que uno del maga anak de Jese hay queda rey de Israel. Pero quien gaha? Cuando ya mira si Samuel con el mayor anak de Jese, si Eliab, ele ya habla, “Asigurao que con ele ya iscuji si Jehova.” Dol rey el forma de Eliab. “Pero, si Jehova ya habla con Samuel: ‘No mira con el de suyu ichura y si paquemodo le de alto cay nuay yo con ele iscuji.’” Cosa el leccion? Si Jehova ya continua: “El mirada del gente base lang na cosa ta mira de suyu ojos, pero si Jehova ta mira con el corazon.”—1 Sam. 16:1, 6, 7.

2. Base na Juan 7:24, porque kita gendeh debe juzga con el un persona base na de suyu ichura? Ilustra.

² Como maga imperfecto gente, todo kita tiene tendencia que juzga con otro base na diila ichura. (Le con el Juan 7:24.) Pero poco lang kita cosa sabe acerca na un persona si mira lang kita con ele. Para ilustra, maskin el un bien sabe y experienciao doctor poco lang cosa sabe acerca na un paciente si mira lang le con ele. El doctor debe oi enbuenamente con el paciente si quierre le sabe si cosa maga enfermedad este tiene de antes, si cosa este ta sinti acerca na de suyu situacion o si cosa sintomas este tiene. Posible, manda pa gane man X-ray el doctor con el paciente. Cay si gendeh le se hace, posible puede le dale gendeh justo medicacion. Na igual manera, gendeh  gayot kita puede entende con el diaton maga hermano y hermana si mira lang kita con el diila ichura. Debe kita pricura entende si cosa sila clase de gente. Siempre, gendeh kita ta puede le con el corazon. Poreso, gendeh gayot kita puede entende kanila igual si paquemodo kanila ta entende si Jehova. Pero, puede kita hace esfuerzo para imita con Jehova. Paquemodo?

3. Paquemodo el maga ejemplo na Biblia na este articulo puede ayuda kanaton para imita con Jehova?

³ Paquemodo si Jehova ta trata con el de suyu maga siervo? Ta oi le kanila. Ta considera le con diila background y situacion. Y ta dale le mira compasion kanila. Mientras ta discuti kita si paquemodo se ya hace si Jehova con Jonas, Elias, Agar y Lot, mira kita si paquemodo kita puede imita con Jehova na diaton tratamiento na diaton maga hermano y hermana.

4. Porque posible negativo el diaton mirada con Jonas?

⁴ Cay no sabe kita el todo detalle acerca na situacion de Jonas, posible pensa kita que no puede con ele confia y desobediente pa gane. Ya ricibi le directa mandato estaba con Jehova que predica con el mensaje de juzgamiento na Nineve. Pero, en vez de obedece, si Jonas ya munta barco para na otro direccion, “para escapa con Jehova.” (Jon. 1:1-3) Dale pa ba tu otro oportunidad con Jonas para hace con ese assignment? Posible, gendeh ya. Pero, si Jehova ya hace con ese.—Jon. 3:1, 2.

5. Cosa tu ya aprende con Jonas na cosa le ya habla na Jonas 2:1, 2, 9?

⁵ Ya dale mira si Jonas si cosa le clase de gente na de suyu rezo. (Le con el Jonas 2:1, 2, 9.) Nuay duda, pirmi ta reza si Jonas con Jehova. El de suyu rezo cuando na barriga le del pescao puede kanaton ayuda entende que gendeh lang le un persona quien ya evita con el de suyu assignment. El de suyu maga palabra ta dale mira que ele humilde, sabe rindi gracias y determinao obedece con Jehova. Poreso, gendeh maka-estraña que si Jehova nuay man focus na kamali de Jonas. Sino, ya contesta le con el de suyu rezo y ya continua usa con ele como un profeta!

6. Porque importante que oi kita enbuenamente con otro?

⁶ Para oi enbuenamente con otro, necesita kita queda humilde y paciencioso. Tiene tres razon si porque debe se kita hace. Una, ayuda se para gendeh dayun kita tiene negativo conclusion acerca na maga gente. Ika-dos,  puede kita sabe el sentido y motivo del diaton hermano y ayuda se kanaton para tiene mas empatia kanila. Y ika-tres, puede kita ayuda con el un persona para tiene cosa puede aprende acerca con el de suyu mismo cuerpo. Tiene vez, puede lang kita entende maskin con el diaton mismo emocion si habla se kita con otro. (Prov. 20:5) Un anciano na Asia ya admiti: “Ya acorda yo cuando ya converza dayun yo antes pa yo puede sabe con el todo detalle. Ya habla yo con el un hermana que necesita le progresa na calidad del de suyu comento na miting. Na uliji, ya sabe yo que ta tormenta gale ele le y necesita le hace grande esfuerzo para puede man comento.” Bien importante gayot para na cada anciano que “oi el verdad” antes dale consejo!—Prov. 18:13.

7. Cosa tu ya aprende na tratamiento de Jehova con Elias?

⁷ El cuanto del diaton maga hermano y hermana tan dificil habla si cosa sila ta sinti por causa na diila background, cultura o personalidad. Cosa kita hace para mas facil para kanila que habla kanaton si cosa gayot sila ta sinti? Acorda con el manera que ya trata si Jehova con Elias cuando ya escapa le con Jesabel. Ya alcanza pa manada dia antes ya puede habla si Elias con el de suyu Tata na cielo si cosa le ta sinti. Ya oi enbuenamente si Jehova. Despues, ya anima le con Elias y ya dale con ele importante trabajo. (1 Rey 19:1-18) Posible, necesita grande tiempo el diaton maga hermano y hermana antes puede converza kanaton pero este lang el manera para puede kita entende si cosa gayot sila deverasan ta sinti. Si imita kita con Jehova y queda paciencioso, puede kita ganá con el diila confianza. Despues, si preparao ya sila habla si cosa sila ta sinti, debe kita oi enbuenamente kanila.

8. Asegun na Genesis 16:7-13, paquemodo si Jehova ya ayuda con Agar?

⁸ Si Agar, el esclavo de Sarai, ya cambia el custumbre cuando ya queda le mujer de Abram. Ya queda priñada si Agar y despues nuay mas dale mira respeto con Sarai, quien nuay anak. Ya queda pa mas grabe el situacion—ya sale si Agar por causa na tratamiento de Sarai. (Gen. 16:4-6) Cay imperfecto kita, posible puede kita pensa que conviene lang con Agar el cosa con ele ya sucede. Pero, gendeh ansina el cosa ya sinti si Jehova con Agar. Ya imbia le con el de suyu angel para anda con Agar. Cuando ya mira el angel con Agar, ya ayuda le con ele para cambia de suyu custumbre y ya bendici con ele. Ya realiza si Agar que si Jehova ta mira con ele y sabe si cosa el de suyu situacion. Ya manda este move con ele para llama con Jehova “el Dios que ta mira el todo, . . . el quien ta mira conmigo.”—Le con el Genesis 16:7-13.

9. Porque ya trata enbuenamente si Jehova con Agar?

⁹ Cosa ya mira si Jehova con Agar? Sabe le el background de Agar y el todo cosa ya sucede con ele. (Prov. 15:3) Un Egipcio si Agar y ta queda na un Hebreo familia. Ta sinti ba le tiene vez como un estranjero? Tan miss ba le con el de suyu familia y diila lugar? Gendeh lang le el mujer de Abram. El cuanto fiel hombre de antes ya tiene mas de un mujer. Pero, gendeh se el original proposito de Jehova. (Mat. 19:4-6) Poreso, gendeh maka-estraña que ese situacion hay causa serioso problema igual na selos y sentimiento na familia. Sabe si Jehova que gendeh justo el cosa ya hace si Agar cuando nuay le respeta con Sarai. Pero, ya entende tambien si Jehova con el sentido y circumstancia de Agar poreso ya trata le enbuenamente con ele.

10. Cosa kita hace para mas conoce con el diaton maga hermano y hermana?

 ¹⁰ Puede kita imita con Jehova si pricura kita entende con uno y otro. Aprende mas acerca con el de tuyu maga hermano y hermana. Man cuento kanila antes y despues del miting, man junto kanila na ministerio y si posible, invita kanila para come. Si hace tu se, baka puede tu discubri que el un hermana que dol gendeh friendly huyain gale, el un hermano que pensaba tu materialistico hospitable gale o el un familia que atrasao ta llega na miting ta enfrenta gale oposicion. (Job 6:29) Siempre, gendeh kita debe ‘entramete na maga cosas’ del otro gente. (1 Tim. 5:13, El Nuevo Testamento) Pero, bueno si tiene kita cosa sabe acerca na diaton maga hermano y hermana y si cosa el diila maga experiencia. Puede este ayuda para mas entende kita kanila.

11. Porque importante que conoce el maga anciano con el maga hermano y hermana?

¹¹ Necesita sabe especialmente el maga anciano con el background del maga hermano y hermana con quien sila ta sirvi. Considera con el ejemplo de Artur que un circuit overseer. Ele y el un anciano ya visita con el un hermana que dol huyain. “Ya sabe kame que el de suyu marido ya muri cuanto año despues sila casa,” ya habla si Artur. “Maskin pa na maga dificultad, ya puede le hace engranda con el de suyu dos anak mujer que fuerte na espiritual. Pero ahora, gendeh ya le tanto ta puede mira y depress. Maskin pa ansina, el de suyu amor y fe con Jehova ya esta fuerte. Ya realiza kame que manada kame cosa puede aprende na buen ejemplo de este hermana.” (Fil. 2:3) Este circuit overseer ya sigui con el ejemplo de Jehova. Conoce si Jehova con el de suyu maga fiel siervo y sabe le el dolor que ta sinti sila. (Ex. 3:7) Si conoce el maga anciano con el maga hermano y hermana, mas puede sila ayuda kanila.

12. Na cosa manera el un hermana que si Yip Yee ya beneficia cuando ya conoce le con el un hermana?

¹² Si conoce tu con el un hermano o hermana que ta consumi tu, posible mas puede tu entende con el de suyu situacion. Considera con este un ejemplo. “Bien suena converza el un hermana na diamon congregacion,” ya habla si Yip Yee, quien ta queda na Asia. “Dol nuay le modo. Pero cuando yan junto kame na ministerio, ya sabe yo que ya ayuda gale le vende pescao con el de suyu mayores na tianggue de antes. Necesita le converza suena para manada quien cumpra.” Si Yip Yee ya omenta: “Ya aprende yo que para puede yo entende con el de mio maga hermano y hermana, necesita yo sabe con el diila background.” Ta necesita  esfuerzo para conoce mas con el de tuyu maga hermano y hermana. Pero, si sigui tu con el consejo del Biblia que abri con el de tuyu corazon, ta imita tu con Jehova quien ta ama “todo el maga gente.”—1 Tim. 2:3, 4; 2 Cor. 6:11-13.

13. Base na Genesis 19:15, 16, cosa ya hace el maga angel cuando yan dulug siempre si Lot y porque?

¹³ Na critical tiempo na vida de Lot, nuay dayun le sigui con el maga instruccion de Jehova. Ya visita con Lot el dos angel y ya habla con ele que lleva con el de suyu familia apuera del Sodoma. Porque? Ya habla sila: “Destroza kame con este lugar.” (Gen. 19:12, 13) Pagka-alamañana, na casa pa siempre si Lot y el de suyu familia. Poreso, el maga angel ya dale ya tambien aviso con Lot. Pero, “yan dulug siempre le.” Puede kita pensa que nuay queber si Lot na cosa ya manda si Jehova y desobediente pa gane. Pero, si Jehova nuay descanza ayuda con ele. Cay “si Jehova ya dale con ele mira compasion,” el maga angel ya agarra con el mano del familia de Lot y ya lleva kanila apuera del ciudad.—Le con el Genesis 19:15, 16.

14. Cosa el posible razon si porque ya dale mira compasion si Jehova con Lot?

¹⁴ Posible, ya dale mira compasion si Jehova con Lot por causa na cuanto razon. Baka nuay dayun sale si Lot na de suyu casa cay ya tiene le miedo con el maga gente apuera del ciudad. Y tiene pa otro maga peligro. Posible, ya sabe si Lot acerca na dos rey quien ya cae na agujero que lleno de asfalto cerca alla. (Gen. 14:8-12) Como un marido y tata, asigurao que yan lingasa si Lot acerca na de suyu familia. Mas pa, rico si Lot poreso posible que tiene le bonito casa na Sodoma. (Gen. 13:5, 6) Siempre, gendeh se razon para gendeh dayun obedece con Jehova. Pero, nuay man focus si Jehova con el kamali de Lot y ya considera con ele como un “hombre bueno.”—2 Ped. 2:7, 8.

15. En vez de juzga con el cosa ya hace el un persona, cosa kita debe hace?

¹⁵ En vez de juzga con el cosa ya hace el  un persona, pricura entende con ele. Amo se el cosa ya hace si Veronica, un hermana na Europe. “Tiene un hermana que dol pirmi nuay na mood,” ele ya habla. “Quierre le pirmi queda solo. Tiene vez, ta tiene yo miedo atraca con ele. Pero ya puede yo pensa, ‘Si talli yo na de suyu situacion, hay necesita yo amiga.’ Poreso, ya decidi yo que pregunta con ele si cosa le ta sinti. Y ya principia le habla conmigo si cosa le deverasan ta sinti! Ahora, mas ta entende ya yo con ele.”

16. Porque kita debe reza que ayuda kanaton cultiva empatia?

¹⁶ El solamente persona quien puede gayot kanaton entende amo si Jehova. (Prov. 15:11) Poreso, pidi con ele que ayuda contigo mira si cosa le ya puede mira con otro y para entende si paquemodo dale mira compasion kanila. El rezo ya puede ayuda con el un hermana que si Anzhela para mas dale mira empatia con otro. Tiene un hermana na diila congregacion que tan dificil sila man junto. Si Anzhela ya admiti: “Bien facil lang busca mali con aquel hermana y evita con ele. Pero, ya pidi yo con Jehova que ayuda conmigo para entende con este hermana.” Ya contesta ba si Jehova con el rezo de Anzhela? Ele ya continua: “Yan junto kame na ministerio y despues yan cuento por cuanto hora. Con compasion yo ya oi con ele. Ahora, mas grande ya el de mio amor con ele y determinao ayuda con ele.”

17. Cosa kita debe determinao hace?

¹⁷ Gendeh tu puede iscuji si con quien hermano y hermana lang tu dale mira compasion. Todo sila ta enfrenta maga problema igual con Jonas, Elias, Agar y Lot. Na cuanto situacion, sila mismo el ya causa con el diila mismo problema. Pero el deverasan, ta sucede tambien se kanaton todo. Poreso, justo lang que pidi kanaton si Jehova que dale mira empatia con uno y otro. (1 Ped. 3:8) Si obedece kita con Jehova, ta puede kita ayuda para tiene unidad entre na diaton maga hermano y hermana na entero mundo. Poreso, ojala determinao kita oi, conoce y dale mira compasion con el diaton maga hermano y hermana.