1. Cosa tu hace para tiene buen amistad con el un persona?

MAS mucho, el primer cosa que necesita hace para tiene buen amistad con el un persona amo que dale tiempo para man junto con ele. Mientras tan cuento ustedes acerca na cosa ustedes ta pensa y ta sinti, hay queda ustedes man amigo. Pero gendeh facil que tiene buen amistad con Jesus. Porque?

2. Cosa el primer dificultad que ta enfrenta kita?

² El primer dificultad amo que nuay kita personal conoce con Jesus. Manada Cristiano del primer siglo el nuay tambien mira con ele. Pero maskin pa ansina, si apostol Pedro ya habla: “Maskin noay pa ustedes mira con Ele, ta ama ya ustedes con Ele. Y maskin gendeh pa ustedes ta puede mira con Ele, ta cree ya ustedes con Ele.” (1 Ped. 1:8) Entonces, posible que tiene kita buen amistad con Jesus maskin pa nuay kita personal mira con ele.

3. Cosa el ika-dos dificultad que ta enfrenta kita?

³ El ika-dos dificultad amo que gendeh kita ta puede man cuento con Jesus. Si ta reza kita, directa kita tan cuento con Jehova. Deveras, ta reza kita na nombre de Jesus pero gendeh kita directa tan cuento con ele. Gane, no quierre si Jesus que reza kita con ele. Porque man? Cay el rezo amo un forma de adoranza y con Jehova lang kita debe adora. (Mat. 4:10) Maskin pa ansina, puede siempre kita dale mira que ta ama kita con Jesus.

4. Cosa el ika-tres dificultad y cosa kita discuti na este articulo?

 ⁴ El ika-tres dificultad amo que si Jesus ta queda na cielo poreso gendeh gayot kita puede man junto con ele. Pero, puede siempre kita conoce con Jesus maskin pa gendeh kita junto con ele. Man repaso kita cuatro cosas que puede kanaton ayuda para queda y esta amigo de suyu. Pero una, examina kita si porque importante que tiene kita buen amistad con el Cristo.

5. Porque kita debe queda amigo de Jesus? (Mira tambien con el cajon “ El Buen Amistad con Jesus Hay Resulta na Buen Amistad con Jehova” y “ Tiene Balance Mirada con Jesus.”)

⁵ Debe kita queda amigo de Jesus si quierre kita tiene buen relacion con Jehova. Porque? Considera con este dos razon. Una, si Jesus ya habla con el de suyu maga dicipulo: “El Tata mismo ta ama con ustedes por causa cay ya ama ustedes conmigo.” (Juan 16:27) Ya habla tambien le: “Noay quien ay puede anda con el Tata si gendeh por medio dimio.” (Juan 14:6) Si pricura kita queda amigo de Jehova pero gendeh kita amigo de Jesus, igual lang se como ta pricura kita entra na un building que gendeh ta pasa na puerta. Ya usa si Jesus un semejante ilustracion cuando ya habla le que ele “el puerta para del maga carnero.” (Juan 10:7) El ika-dos razon amo que si Jesus ta imita gayot con el calidad del de suyu Tata. Ya habla le con el de suyu maga dicipulo: “Quien ya mira conmigo, ya mira ya tamen con el Tata.” (Juan 14:9) Poreso, el un importante manera para conoce kita con Jehova amo si estudia kita con el vida de Jesus. Mientras ta aprende kita acerca con Jesus, hay queda hondo el diaton amor con ele. Y mientras ta queda kita mas cerca con Jesus,  hay queda mas hondo el diaton amor para con el de suyu Tata.

6. Cosa el otro razon si porque kita debe tiene buen relacion con Jesus? Explica.

⁶ Debe kita tiene buen relacion con Jesus para contesta con el diaton maga rezo. Quierre decir de este que gendeh lang kita habla “na nombre de Jesus” na punta del diaton rezo. Debe kita entende si paquemodo si Jehova ta usa con Jesus para contesta con el diaton maga rezo. Si Jesus ya habla con el de suyu maga apostoles: “Maskin cosa ustedes ay pidi na mi Nombre ay hace yo.” (Juan 14:13) Maskin pa si Jehova el ta oi y ta contesta con el diaton maga rezo, ya dale le autoridad con Jesus para hace el De Suyu querrer. (Mat. 28:18) Poreso, antes el Dios contesta con el diaton maga rezo, mira le una si ya aplica ba kita con el consejo de Jesus. Por ejemplo, si Jesus ya habla: “Si ta perdona ustedes con el maga culpa de otros, el de ustedes Tata na cielo ay perdona tamen con ustedes. Pero si gendeh ustedes ta perdona con otros, el de ustedes Tata na cielo gendeh tamen ay perdona el de ustedes maga culpa.” (Mat. 6:14, 15) Poreso, bien importante que trata kita con otro na manera que ta trata kanaton si Jehova y si Jesus!

7. Quien beneficia na rescate de Jesus?

⁷ Aquellos lang quien tiene cerca relacion con Jesus el beneficia na de suyu rescate. Porque kita se sabe? Si Jesus ya habla que hay ‘dale le de suyu vida’ para con el de suyu maga amigo. (Juan 15:13) El maga fiel gente quien ya vivi antes vene si Jesus na tierra necesita aprende acerca con ele y ama con ele. Ese maga hombre y mujer igual con Abraham, Sara, Moises y Rahab hay resucita. Pero maskin pa maga recto siervo sila de Jehova, necesita siempre sila tiene buen amistad con Jesus para tiene vida hasta para cuando.—Juan 17:3; Act. 24:15; Heb. 11:8-12, 24-26, 31.

8-9. Como cosa ya habla na Juan 15:4, 5, cosa kita puede hace si amigo kita de Jesus y porque importante que esta kita unido con ele?

⁸ Alegre kita trabaja junto con Jesus mientras ta predica y ta enseña con el buen noticia del Reino. Cuando na tierra si Jesus, ta enseña le. Y desde ya bira le na cielo, si Jesus como el cabeza del congregacion, ta continua guia con el trabajo predicacion y enseñada. Ta mira y ta aprecia le con el de tuyu esfuerzo para ayuda con el mas manada gente que posible para conoce con ele y con el de suyu Tata. Gane, el solamente manera para puede kita cumpli con ese trabajo amo por medio na ayuda de Jehova y de Jesus.—Le con el Juan 15:4, 5.

⁹ El Palabra del Dios claro ta enseña kanaton que debe kita tiene y mentena con el diaton amor para con Jesus para puede kita hace alegre con Jehova. Ahora, considera kita con el cuatro cosas que puede kita hace para queda maga amigo de Jesus.

10. Cosa el primer cosa que debe hace para tiene buen amistad con Jesus?

¹⁰ (1) Conoce con Jesus. Puede kita hace con este si le kita con el libro de Mateo, Marcos, Lucas y Juan na Biblia. Mientras ta medita kita con el vida de Jesus na Biblia, hay ama y respeta kita con ele por causa na de suyu buen tratamiento na maga gente. Por ejemplo, maskin pa ele el diila Amo, nuay le trata con el de suyu maga dicipulo como maga esclavo. En vez, ya habla le kanila si cosa le ta pensa y ta sinti. (Juan 15:15) Cuando triste sila, triste tambien si Jesus y ya llura junto kanila. (Juan 11:32-36) Maskin el de suyu maga contrario ya puede mira que amigo le de  aquellos quien ya acepta con el de suyu mensaje. (Mat. 11:19) Si imita kita si paquemodo ya trata si Jesus con el de suyu maga dicipulo, hay tiene kita mas buen relacion con otro, mas queda kita contento y alegre y mas aprecia kita con el Cristo.

11. Cosa el ika-dos cosa que debe hace para queda amigo de Jesus y porque este importante?

¹¹ (2) Pensa y actua igual con Jesus. Si sabe y ta imita kita si paquemodo le ta pensa, mas queda kita cerca con ele. (1 Cor. 2:16) Paquemodo kita puede imita con Jesus? Nota con este un ejemplo. Mas ta pensa si Jesus si paquemodo ayuda con otro contra hace una con el de suyu mismo cuerpo. (Mat. 20:28; Roma 15:1-3) Cay amo se el na de suyu pensamiento, conforme le hace sacrificio y perdona con otro. Nuay le dayun rabia na cosa ya habla el otro acerca con ele. (Juan 1:46, 47) Y nuay le permiti que el kamali del otro de antes hay afecta con el de suyu tratamiento kanila. (1 Tim. 1:12-14) Si Jesus ya habla: “Ay sabe todo el maga gente cay ustedes dimio maga dicipulo: Si tiene ustedes amor con uno y otro.” (Juan 13:35) Pregunta na de tuyu mismo cuerpo, “Ta sigui ba yo con el ejemplo de Jesus y ta hace el todo lo que puede para mentena con el paz na de mio maga hermano y hermana?”

12. Cosa el ika-tres cosa que debe hace para queda amigo del Cristo y paquemodo se kita hace?

¹² (3) Suporta con el maga hermano del Cristo. Para con Jesus, el cosa kita ta hace para con el de suyu maga iscujido hermano amo tambien kita ta hace con ele. (Mat. 25:34-40) El primer manera que ta suporta kita con el maga iscujido amo si ta hace kita el todo para participa na predicacion del Reino y na hacida de dicipulo que ya manda si Jesus con el de suyu maga siguidores. (Mat. 28:19, 20; Act. 10:42) Por causa na ayuda del “otro maga carnero,” el maga hermano del Cristo puede cumpli con el trabajo predicacion na entero mundo. (Juan 10:16) Si parte tu del otro maga carnero, cada vez tu ta participa na este trabajo, ta dale tu mira amor na maga iscujido y con Jesus.

13. Paquemodo kita puede aplica con el consejo de Jesus na Lucas 16:9?

¹³ Puede tambien kita queda amigo de Jehova y de Jesus si usa kita con el diaton sen para suporta con el trabajo que ta guia sila. (Le con el Lucas 16:9.) Por ejemplo, puede kita dona para na trabajo na entero mundo. Ta usa con este maga donacion para na predicacion del buen noticia na maga lejos lugar, construi y mentena maga facilidad que ta suporta con el verdadero adoranza y para asisti con aquellos quien ya experiencia calamidad y otro pa suceso. Puede tambien kita dona sen para na gastos na diaton mismo congregacion y ayuda con aquellos tiene necesidad. (Prov. 19:17) Este el cuanto manera que puede kita suporta con el maga hermano del Cristo.

14. Como cosa ta dale mira na Efeso 4:15, 16, cosa el ika-cuatro cosa que debe hace para queda amigo de Jesus?

¹⁴ (4) Suporta con el maga arreglamiento na congregacion. Queda kita mas cerca con Jesus como el cabeza del congregacion si coopera kita con aquellos con quien le ya iscuji para guia kanaton. (Le con el Efeso 4:15, 16.) Por ejemplo, ta pricura kita asigura que puede gayot usa con el todo Kingdom Hall. Para puede este hace, ya hace junto con el cuanto congregacion na otro maga congregacion y ya cambia con el cuanto teritorio. Por causa de este, ya puede evita el organizacion que gasta mas grande sen. Pero, ya afecta este con el cuanto maga publisher quien necesita man adjust na nuevo circumstancia. Posible que ese maga fiel publisher  cuanto año ya ta sirvi na un congregacion y ya queda ya bien cerca na maga hermano y hermana alla. Pero ahora, ya pidi kanila que sirvi na otro congregacion. Si Jesus bien alegre mientras ta mira con este maga leal dicipulo que ta sigui con este arreglamiento!

15. Paquemodo kita queda mas cerca con Jesus na futuro como maga amigo y amiga?

¹⁵ Tiene esperanza aquellos maga iscujido por medio de sagrao espiritu que man junto con Jesus hasta para cuando y rula junto con ele na Reino del Dios. Personal gayot sila man junto con el Cristo—mira, converza y tiene grande tiempo junto con ele. (Juan 14:2, 3) Aquellos quien vivi hasta para cuando aqui na tierra hay ricibi tambien con el amor y atencion de Jesus. Maskin pa gendeh sila puede mira con Jesus, hay queda sila mas cerca como man amigo y amiga mientras ta vivi sila na Paraiso que ya puede hace posible si Jehova y si Jesus.—Isa. 9:6, 7.

16. Cosa el diaton maga bendicion cay amigo kita de Jesus?

¹⁶ Cuando ya acepta kita con el invitacion de Jesus que queda de suyu maga amigo, ya ricibi kita manada bendicion. Por ejemplo, ta experiencia kita de suyu amor y suporta ahora. Tiene kita oportunidad vivi hasta para cuando. Y mas importante, el diaton buen amistad con Jesus hay resulta na de con todo importante amistad—un cerca relacion con Jehova. Un privilegio gayot que queda amigo de Jesus!