1. Paquemodo si Hermano Russell y de suyu maga uban ya hace con el diila estudiada y porque este efectivo?

MAS de un siglo ya el ya pasa, yan junto-junto kanda Hermano C. T. Russell y de suyu maga uban, el un diutay grupo de maga estudiante del Palabra del Dios. Quierre sila mira si puede ba sila aprende si cosa deverasan ta enseña el Biblia acerca con Dios Jehova, Jesucristo, condicion del maga muerto y na rescate. Simple lang el diila manera de estudiada. Tiene quien pregunta y despues el grupo hay examina con el cada texto que relatao con ese topico. Despues, escribi sila si cosa sila ya aprende na diila research. Na bendicion de Jehova, este maga sincero Cristiano hermano ya puede discubri manada verdad na Biblia que importante hasta na diaton tiempo ahora.

2. Cosa posible el razon si porque ta tiene kita gendeh justo entendimiento na maga profecia na Biblia?

² Pero como cosa ya puede realiza aquel maga estudiante del Biblia, mas dificil entende con el un profecia na Biblia si compara na un enseñanza del Biblia. Porque? El un razon amo que mas puede entende con el un profecia mientras ta cumpli este o despues este cumpli. Pero tiene pa otro razon. Para puede entende enbuenamente con el un profecia, necesita kita considera con el contexto de ese. Si man focus lang kita na un aspeto del profecia y ignora con el los demas, posible kita tiene gendeh justo entendimiento. Dol amo este el cosa ya sucede na un profecia na libro de Joel. Man repaso kita con este profecia y discuti si porque necesita hace cambio na diaton entendimiento de este.

3-4. Hasta ahora, cosa el diaton entendimiento na profecia na Joel 2:7-9?

³ Le con el Joel 2:7-9. Ya predicta si Joel que el maga langgostas  hay destroza con el tierra del Israel. Ciendo el diente y sahgang de este igual del maga leon, este maga insecto hay come con el todo cosa sila mira! (Joel 1:4, 6) Por cuanto año, ya entende kita que este profecia ta predicta que el maga siervo de Jehova hay continua predica igual na un grupo de maga langgostas que gendeh puede sangga. Ya entende kita que este trabajo tiene grande efecto na “tierra” o na maga gente quien bajo na control del maga religioso lider. *

⁴ Si le lang kita con el Joel 2:7-9, dol justo este entendimiento. Pero si considera kita con el contexto del profecia, puede kita mira que tiene este otro cosa quierre decir. Considera kita con el cuatro razon si porque necesita cambia con el diaton entendimiento.

5-6. Cosa kita puede pregunta si le kita con el (a) Joel 2:20? (b) Joel 2:25?

⁵ Una, considera con el promesa de Jehova acerca con el maga langgostas: “Arria yo con el maga de-norte [maga langgostas] estaba con ustedes.” (Joel 2:20) Si el maga langgostas ta refiri con el maga Testigo de Jehova, quien ta obedece con el mandamiento de Jesus que predica y hace maga dicipulo, porque si Jehova promete que arria kanila? (Eze. 33:7-9; Mat. 28:19, 20) Claro que arria si Jehova, gendeh con el de suyu maga fiel siervo, sino con el un cosa o un persona quien ta maltrata con el de suyu maga siervo.

⁶ Para na ika-dos razon, considera con el cosa escribido na Joel 2:25. Si Jehova ya habla: “Hay debolbe yo con ustedes el cosa ya perde con ustedes na maga año que ya come el grupo de maga langgostas, maga langgostas que nuay alas, maga langgostas que fuerte come y maga langgostas que tan kutkut, el de mio grande grupo de maga soldao que ya imbia yo con ustedes.” Nota que si Jehova ya promete que “debolbe” le con el cosa ya destroza el maga langgostas. Si el maga langgostas ta refiri con el maga siervo de Jehova quien ta predica, quierre decir se que el diila mensaje ta causa perjuicio. Pero el deverasan, ese mensaje puede manda move con el maga malo para arripinti y puede salva con el diila vida. (Eze. 33:8, 19) Un bendicion gayot este para kanila!

7. Na Joel 2:28, 29, cosa el importancia del maga palabra “despues de ese”?

⁷ Le con el Joel 2:28, 29. Considera con el ika-tres razon—el sunod-sunod suceso que ya menciona na profecia. Ya puede ba tu nota que si Jehova ya habla: “Despues de ese, hay vacia yo con el de mio espiritu”; quierre decir, despues el maga langgostas cumpli con el diila trabajo? Si el maga langgostas ta refiri con el maga predicador del Reino del Dios, porque vacia si Jehova con el de suyu sagrao espiritu despues sila acaba con el diila predicacion? El deverasan, si nuay el ayuda del sagrao espiritu del Dios, gendeh gayot sila puede continua predica por manada año bajo na maga oposicion y restriccion na diila trabajo.

8. Con quien ta representa el maga langgostas na Revelacion 9:1-11? (Mira con el letrato na cover.)

⁸ Le con el Revelacion 9:1-11. Ahora, considera kita con el ika-cuatro razon. Del antes, ya habla kita que el maga langgostas que ya menciona na Joel ta representa con el diaton trabajo predicacion por causa na semejante profecia na libro de Revelacion. Este profecia ta menciona acerca na  un grupo de maga langgostas que tiene cara de gente y tiene “dol corona de oro” na diila cabeza. (Rev. 9:7) Ta hace sila sinti duele “con aquellos lang maga gente [maga enemigo del Dios] quien noay el marca del Dios na diila frente” adentro del cinco meses, el largor del vida del un langgostas. (Rev. 9:4, 5) Justo este ta refiri con el maga iscujido siervo de Jehova. Con animo sila ta proclama con el juzgamiento del Dios contra na este mal sistema de maga cosas. Como resulta, ta causa este dolencia con aquellos quien ta suporta con ese.

9. Cosa el diferencia del maga langgostas que ya mira si Joel na maga langgostas que ya menciona si Juan?

⁹ Deveras, ta semeja el profecia na Revelacion y na Joel. Pero, bien grande el diferencia de este dos profecia. Considera: Na profecia de Joel, el maga langgostas ya destroza con el maga siembra. (Joel 1:4, 6, 7) Na vision de Juan, ya habla con el maga langgostas que “no destroza con el maga sacate o maga siembra.” (Rev. 9:4) Si Joel ya mira que el maga langgostas ya sale estaba na norte. (Joel 2:20) El maga langgostas que ya mira si Juan ya sale estaba na hondura. (Rev. 9:2, 3) Ya arria con el maga langgostas na profecia de Joel. Na Revelacion, nuay arria con el maga langgostas sino ya permiti kanila hace acaba con el diila trabajo. Nuay menciona na Biblia que gendeh kanila ta aproba si Jehova.—Mira con el cajon “ Maga Profecia Acerca na  Maga Langgostas—Semejante Pero Diferente.”

10. Dale un ejemplo na Biblia que ta dale mira que el maga langgostas que ya menciona si Joel y si Juan puede representa na diferente cosa.

¹⁰ El grande diferencia na este dos profecia ayuda kanaton para entende que este dos nuay coneccion. Quierre decir ba de este que el maga langgostas que ya menciona si Joel diferente na maga langgostas que ya menciona na Revelacion? Si. Na Biblia, el un simbolo puede tiene otro cosa quierre decir si usa con este na diferente manera. Por ejemplo, na Revelacion 5:5, ya llama con Jesus “el Leon del tribo de Juda” mientras na 1 Pedro 5:8, ya compara con el Diablo na “un leon que ta gruñi.” Ciendo el cuatro punto que ya discuti kita tan contra na diaton presente entendimiento, ta dale este mira que el profecia de Joel ta refiri na otro cosa. Cosa este?

11. Paquemodo el Joel 1:6 y 2:1, 8, 11 puede ayuda kanaton entende si con quien ta refiri el maga langgostas?

¹¹ Si examina kita enbuenamente con el contexto del profecia de Joel, puede kita entende que el profeta ta predicta acerca na un ataque militar. (Joel 1:6; 2:1, 8, 11) Si Jehova ya habla que usa le con el de suyu “grande grupo de maga soldao” (maga soldao de Babilonia) para castiga con el maga desobediente Israelita. (Joel 2:25) Justo lang que llama “maga de-norte” con el maga soldao ciendo el maga de Babilonia hay ataca con el Israel estaba na norte. (Joel 2:20) Este maga soldao ya compara na un bien organizao grupo de maga langgostas. Acerca kanila, si Joel ya habla: “El cada [soldao] ta adelanta. . . . Ataca sila na ciudad, brinca na maga pader. Subi sila na maga casa y pasa na maga bentana igual na maga ladron.” (Joel 2:8, 9) Ta puede ba tu imagina con el ecsena? Maskin onde, tiene maga soldao. Nuay onde puede esconde. Nuay quien puede escapa con el maga soldao de Babilonia!

12. Paquemodo ya cumpli el profecia de Joel acerca na maga langgostas?

¹² Igual na maga langgostas, el maga de Babilonia (o maga Caldeo) ya ataca con el ciudad de Jerusalem del 607 B.C.E. El Biblia ta habla: “El rey del maga Caldeo . . . ya mata por medio de espada con el diila maga joven hombre . . . , nuay le sinti lastima con el maga soltero o dalaga, viejo o enfermo. El Dios ya dale todo na de suyu mano. Ya quema le con el casa del verdadero Dios, ya hace tumba con el pader de Jerusalem, ya quema con el todo durable torre de este y ya destroza con el todo valoroso cosas.” (2 Cron. 36:17, 19) Cuando el maga de Babilonia ya acaba destroza con el Jerusalem, el maga gente ya puede habla: “Un abandonao tierra este que nuay gente y animal y ya dale este con el maga Caldeo.”—Jer. 32:43.

13. Explica si cosa quierre decir del Jeremias 16:16, 18.

¹³ Maga 200 año despues del profecia de Joel, si Jehova ya usa con Jeremias para predicta otro detalle acerca na este ataque. Si Jehova ya habla que el maga soldao hay busca gayot con el maga Israelita quien envuelto na mal practica y hay cuji gayot kanila todo. “‘Hay llama yo manada pescador,’ ya declara si Jehova, ‘y hay pesca sila kanila. Despues de ese, hay llama yo manada pajareador y hay busca sila kanila na cada monte y cada gulud y na maga rajadura del grande piedra. Hay castiga yo kanila por causa na diila kamali y pecado.’” El maga Israelita quien nuay arripinti gendeh gayot puede esconde na maga soldao de Babilonia, maskin anda pa sila na mar y na buuk.—Jer. 16:16, 18.

14. Del cuando ya cumpli el Joel 2:28, 29?

¹⁴ Tiene buen noticia si Joel. El tierra hay queda otravez productivo. (Joel 2:23-26) Y na futuro, hay tiene abundancia espiritual comida. “Hay vacia yo con el de mio espiritu na todo clase de gente,” ya habla si Jehova, “y el de ustedes maga anak hombre y anak mujer hay predicta . . . Y maskin na de mio maga hombre y mujer esclavo hay vacia yo con el de mio espiritu.” (Joel 2:28, 29) Nuay vacia con el espiritu del Dios cuando ya bira el maga Israelita na diila lugar estaba na Babilonia. Sino, ya sucede este cuanto siglo pa ya pasa, del Pentecostes 33 C.E. Paquemodo kita se ya sabe?

15. Asegun na Maga Actividad 2:16, 17, cosa cambio ya hace si Pedro na Joel 2:28 y cosa este ta indica?

¹⁵ El sagrao espiritu ya guia con apostol Pedro para aplica con el Joel 2:28, 29 na un especial ocasion que ya sucede na dia de Pentecostes. Maga alas nueve del aga, tiene ya sucede un milagro. Ya vacia con el sagrao espiritu que ya manda move con aquellos quien ya ricibi con ese para converza acerca “del maga grande maga cosa-cosa que ya hace el Dios.” (Act. 2:11) Bajo na guia del sagrao espiritu, si Pedro ya usa otro maga palabra cuando ya menciona le con el profecia de Joel. Ya nota ba tu con el cambio que ya hace le? (Le con el Maga Actividad 2:16, 17.) Nuay usa si Pedro con el maga palabra “despues de ese” igual na profecia de Joel, sino ele ya habla: “Na ultimo maga dias” que ta refiri na ultimo maga dia del Judio sistema de maga cosas. Na ese tiempo, hay vacia con el espiritu del Dios “con todo el maga gente.” Este ta indica que ya pasa pa el cuanto tiempo antes ya cumpli el profecia de Joel.

16. Cosa el efecto del espiritu del Dios na trabajo predicacion del primer siglo y na diaton tiempo ahora?

 ¹⁶ Despues vacia el Dios con el de suyu espiritu na maga Cristiano del primer siglo, ya principia sila con el trabajo predicacion que hay cubri na entero mundo. Cuando ya escribi si apostol Pablo con el de suyu carta para na maga de Colosa, del maga año 61 C.E., puede le habla que el buen noticia ya puede ya predica “con todo el maga gente na mundo.” (Col. 1:23) Na tiempo de Pablo, el “mundo” ta refiri con el cuanto parte del mundo que puede anda el maga gente. Na ayuda del sagrao espiritu de Jehova, el trabajo predicacion na diaton tiempo ahora mas grande ta puede cubri—“na entero parte del mundo”!—Act. 13:47; mira con el cajon “ Hay Vacia Yo con el De Mio Espiritu.”

17. Cosa el diaton entendimiento ahora na profecia de Joel acerca na maga langgostas?

¹⁷ Cosa el ya cambia? Tiene kita ahora mas justo entendimiento na profecia que puede incuntra na Joel 2:7-9. Claro que este maga versiculo ta refiri, gendeh con el diaton trabajo predicacion, sino con el cosa ya hace el maga soldao de Babilonia na Jerusalem del 607 B.C.E.

18. Cosa el nuay cambia na maga siervo de Jehova?

¹⁸ Cosa el nuay cambia? El maga siervo de Jehova ta continua predica con el buen noticia maskin onde y na otro-otro manera. (Mat. 24:14) El gobierno gendeh puede sangga kanaton para cumpli con el mandato que predica. Y na bendicion de Jehova, mas activo kita ahora y con animo ta predica con el buen noticia del Reino del Dios! Humilde kita ta continua depende con Jehova que ayuda kanaton entende con el maga profecia na Biblia. Ta confia kita que na justo tiempo, guia le kanaton para “na verdad completo”!—Juan 16:13.