ISTORIA DE VIDA
“Bien Alegre Ya Yo Ahora na Ministerio!”
YA ENGRANDA yo na barrio de Balclutha, na South Island de New Zealand. Cuando bata yo, ya sinti yo cerca con Jehova y ya gusta que talli yo na verdad. Quierre-quierre yo atende na maga miting y ta sinti yo protegido y alegre si junto na congregacion. Maskin pa huyain yo, alegre yo participa na ministerio cada semana. Gendeh yo ta tiene miedo predica na de mio maga schoolmate y con otro. Proud yo queda uno del maga Testigo de Jehova y cuando 11 año yo, ya dedica yo con el de mio vida con Dios.
YA PERDE EL DE MIO ALEGRIA
Maka-triste que cuando ya queda yo teenager, yan luya el de mio relacion con Jehova. Ya mira yo que dol ta puede lang hace el de mio maga schoolmate con el cosa sila quierre hace y quierre tambien yo ansina. Ya sinti yo que bien istricto el maga ley del de mio mayores y el maga principio na Biblia y cansao hace con el maga espiritual actividad. Maskin pa sabe yo que deverasan si Jehova, ya sinti yo que gendeh yo cerca con ele.
Pero para evita yo queda gendeh activo, ya pricura yo predica maskin paquemodo. Si ta predica yo, gendeh yo ta prepara. Poreso, tan dificil yo principia o continua man cuento na householder. Como resulta, gendeh productivo el de mio ministerio y gendeh yo alegre. Mas ya queda yo negativo. Ya pregunta yo na de mio mismo cuerpo, ‘Paquemodo se sila ta hace cada semana y cada mes?’
Cuando ya queda yo 17, quierre gayot yo queda independiente. Poreso yan empaque yo de mio bag, ya sale na casa y ya cambia na Australia. Cuando ya sale yo, ya queda gayot triste el de mio mayores. Malingasa sila pero ta pensa sila
que hay continua lang yo na de mio espiritual rutina.Na Australia, mas ya queda maluya el de mio espiritualidad. Gendeh mas regular el de mio atendida na miting. Ya queda yo cerca na maga jovenes quien igual conmigo, alegre atende na maga miting pero pagka-alamañana, ta toma y ta baila na maga nightclub. Si ta pensa yo con el de mio maga pasada, ya realiza yo que el de mio un pies na verdad pero el otro na mundo. Y gendeh yo comfortable na maskin uno alli.
UN IMPORTANTE LECCION QUE NUAY YO EXPECTA
Maga dos año despues, ya puede yo conoce con el un hermana quien nuay realiza que ya puede le ayuda conmigo que pensa si cosa yo ta hace na de mio vida. Ta queda yo na un casa junto con el cuatro single hermana y ya invita kame con el circuit overseer y de suyu mujer, si Tamara, que esta na diamon casa por un semana. Mientras ta hace el de suyu marido con el de suyu trabajo na congregacion, ya dale tiempo kanamon si Tamara y alegre le junto kanamon. Ya gusta yo se. Normal lang le y facil lang con ele man cuento. Gendeh gayot maka-creé que bonito gale man junto na un persona maskin pa bien focus le na espiritual.
Bien con gana gayot si Tamara. El de suyu amor na verdad y para na ministerio ya manda move conmigo que imita con ele. Alegre le hace el todo para con Jehova, mientras iyo, triste cay gendeh yo ta hace el todo na de mio servicio. El de suyu pagka-positivo y deverasan alegria ya tiene gayot grande efecto na de mio vida. El de suyu ejemplo ya manda conmigo pensa con el un importante verdad na Biblia: Quierre si Jehova que todo kita sirvi con ele “con alegria.”—Sal. 100:2.
YA BIRA OTRAVEZ EL DE MIO AMOR NA MINISTERIO
Quierre yo el alegria que ya experiencia si Tamara pero para sucede se, necesita yo hace maga grande cambio. Ya necesita yo largo tiempo pero na uliji, ya principia yo hace maga diutay cambio. Ya principia yo prepara para na ministerio y yan auxiliary pioneer tiene maga tiempo. Ya puede este ayuda para menora el de mio nervios
y tiene confianza na cuerpo. Cay mas ya usa yo con el Biblia na ministerio, ya experiencia yo el deverasan alegria. Nuay dura, cada mes ya yo yan auxiliary pioneer.Ya principia yo queda cerca na maga amigo y amiga que tiene diferente edad, quien tiene buen espiritualidad y alegre na diila servicio con Jehova. El diila buen ejemplo ya ayuda conmigo examina con el de mio prioridad y para tiene un buen espiritual rutina. Mas ya gusta yo con el ministerio y na uliji, ya sirvi yo como un regular pioneer. Despues del manada año, por primer vez ya sinti yo alegre y comfortable na congregacion.
YA PUEDE YO INCUNTRA UN PERMANENTE UBAN
Un año despues, ya puede yo conoce con Alex, un bueno y sincero persona quien ta ama con Jehova y con el ministerio. Ta sirvi le como un siervo ministerial y tan pioneer por seis año. Por cuanto tiempo, ya sirvi tambien si Alex na Malawi donde tiene grande necesidad. Alla, yan junto le na maga misionario quien maga buen ejemplo y quien ya anima con ele que continua hace una con el Reino.
Del 2003, ya casa kame de Alex y ya continua kame sirvi full-time desde aquel tiempo. Manada bonito leccion kame ya aprende y ya bendici kanamon si Jehova na diferente manera.
OMENTO MAGA BENDICION
Predicacion na Gleno, Timor-Leste
Del 2009, ya invita kanamon para sirvi como maga misionario na Timor-Leste, un diutay nacion na Indonesian archipelago. Espantao kame, excited y tiene miedo. Cinco meses despues, ya llega kame na centro del nacion, na Dili.
Cuando ya cambia kame alla, necesita kame hace maga grande cambio na diamon vida. Necesita kame man adjust na nuevo cultura, lengguaje, comida y manera de vida. Na ministerio, manada beses kame ta puede mira maga gente que pobre, nuay o falta el educacion y con quien ya maltrata. Y ya puede kame mira manada maga *
gente quien tiene problema na fisical y emocion por causa na guerra y violencia.Bien bonito gayot el ministerio! Por ejemplo, ya puede yo conoce con el un triste 13 año bata mujer que si Maria. * Ya muri el de suyu nana cuanto año pa lang el ya pasa y ralo lang le ta puede mira con el de suyu tata. Igual na manada maga bata que igual de suyu edad, nuay direccion el vida de Maria. Ya puede yo acorda con el tiempo que ta llura le mientras ta habla si cosa le ta sinti. Pero, nuay yo idea na cosa le ta habla cay gendeh pa yo tanto ta entende con el de suyu lengguaje. Ya reza yo con Jehova y ya pidi que ayuda conmigo que puede anima con Maria y despues ya le yo maga texto para dale comforta con ele. Adentro na cuanto año, ya puede yo mira si paquemodo el verdad ya cambia con el custumbre, ichura y vida de Maria. Ya bautiza le y ahora ta conduci ya le de suyu mismo maga Bible study. Ahora, parte ya si Maria na un grande espiritual familia quien ta ama con ele.
Ta bendici si Jehova con el trabajo na Timor-Leste. Maskin pa mayoria del maga publisher ya bautiza del ya pasa lang diez año, manada kanila ta sirvi ya como maga pioneer, siervo ministerial o anciano. El otro tan voluntario na remote translation office y ta asisti para produci espiritual comida na diila maga lengguaje. Ta hace gayot conmigo alegre si ta oi yo ta canta sila na maga miting, si ta mira yo con el diila maga smile na cara y si ta observa con el diila progreso na espiritual.
Junto con Alex, para sale distribui invitacion de Comemoracion
ESTE EL DE CON TODO ALEGRE VIDA
Bien diferente el diamon assignment na Timor-Leste na diamon vida na Australia pero bien alegre yo na este vida. Tiene maga tiempo que ta munta kame bus que lleno de gente, pescao seco y maga gulay estaba na tianggue. Na otro maga dia, ta conduci kame Bible study na un diutay y caliente casa que tierra lang el piso mientras pasa-pasa el maga manok. Pero maskin pa na maga dificultad, manada beses ta puede yo pensa, ‘Bien bonito gayot este experiencia!’
Pa-andada na diamon teritorio
Si ta pensa yo con el de mio pasada, ta rindi gayot yo gracias con el de mio mayores quien ya hace el todo para enseña conmigo el maga principio de Jehova y ya suporta conmigo maskin pa cuando yan dificil yo na de mio espiritualidad cuando teenager yo. Deverasan gayot conmigo el Proverbio 22:6. Si Mamang y Papang proud kanamon de Alex y alegre sila mira que ta usa kanamon si Jehova. Desde 2016, ta sirvi kame na circuit work na teritorio del Australasia branch.
Ta dale mira un video de Caleb y Sophia na maga alegre bata de Timor-Leste
Dol gendeh maka-creé que ya queda yo nuay gana na predicacion de antes. Bien alegre ya yo ahora na ministerio! Ya puede yo realiza que maskin cosa pa pasa na diaton vida, hay queda lang kita deverasan alegre si con todo corazon kita sirvi con Dios. El ya pasa 18 año que ta sirvi yo con Jehova junto con Alex amo el de con todo alegre tiempo na de mio vida. Ya puede ya yo entende ahora que deverasan gayot el cosa ya habla el salmista David con Jehova: “Todo aquellos quien ta hace refugio contigo hay queda alegre; hay grita sila pirmi con alegria. . . . Y aquellos quien ta ama con el de tuyu nombre hay queda alegre.”—Sal. 5:11.
Bien bonito gayot enseña con el Biblia na maga humilde gente!