Porque ya menciona si Jesus con el maga palabra de David na Salmo 22:1 antes le muri?

Antes muri si Jesus, ya menciona le con el maga palabra que puede incuntra na Mateo 27:46: “Dios mio, Dios mio! Por que ya abandona Uste conmigo?” Cuando ya habla este si Jesus, ya cumpli le con el maga palabra de salmista David na Salmo 22:1. (Mar. 15:34) Gendeh justo pensa que ya habla este si Jesus cay triste le cay nuay cosa ya hace si Jehova o cay temporario ya perde el de suyu fe. Ya entende gayot si Jesus si porque le necesita muri y conforme le hace con ese. (Mat. 16:21; 20:28) Sabe tambien le que na tiempo del de suyu muerte, necesita quita si Jehova con el maskin cosa “corral” alrededor con ele. (Job 1:10) Poreso, ya permiti si Jehova que sufri si Jesus para dale prueba que hay esta le fiel hasta na muerte maskin cosa pa el circumstancia.​—Mar. 14:35, 36.

Entonces, porque ya habla si Jesus con el maga palabra de este salmo? Maskin pa gendeh kita asigurao si porque, hay discuti kita con el maga posible razon. *

Por medio na este maga palabra, posible gaha que ta hace claro si Jesus que gendeh sangga si Jehova con el de suyu muerte? Si Jesus necesita paga con el rescate que nuay el ayuda de Jehova. Necesita le muri para “experiencia Le el muerte para el bien de todo el maga gente.”​—Heb. 2:9.

Cuando ya menciona le con el cuanto palabra na este salmo, posible gaha que quierre si Jesus que pensa el otro con el entero salmo?  Comon para con el maga Judio na aquel tiempo que man memorize con el maga salmo. Si hace kanila acorda con el un versiculo del salmo, natural lang que pensa sila dayun con el entero salmo. Si ese el cosa na pensamiento de Jesus, quierre decir que ya puede le ayuda con el de suyu maga Judio siguidores que acorda con el manada profecia na este salmo acerca na maga suceso durante el de suyu muerte. (Sal. 22:7, 8, 15, 16, 18, 24) Mas pa, el maga ultimo versiculo de este salmo ta alaba con Jehova y ta menciona que Rey ele del entero tierra.​—Sal. 22:27-31.

Cay ya habla le este maga palabra de David, posible gaha que ta hace claro si Jesus que inocente le? Antes muri si Jesus, el Sanhedrin ya hace con ele un ilegal llamada na corte y ya sentencia que ya comete le blasfemia. (Mat. 26:65, 66) Bien denoche con ese ya hace y nuay sigui con el maga ley de corte. (Mat. 26:59; Mar.14:56-59) Cuando ya pregunta si Jesus “Dios mio, Dios mio! Por que ya abandona Uste conmigo?” posible ta habla le que nuay le cosa ya hace malo y gendeh con ele conviene mata.

Posible gaha tambien que ya hace acorda si Jesus con otro que maskin pa ya permiti sufri con David, el escritor de este salmo, gendeh este quierre decir que ya perde si David el favor de Jehova? Cuando ya pregunta este si David, gendeh este quierre decir que falta le fe. Despues pregunta con ese, ya habla le que ta confia le que si Jehova hay salva con el De Suyu maga siervo y si Jehova ya continua bendici con ele. (Sal. 22:23, 24, 27) Na igual manera, maskin pa si Jesus, “el Anak de David,” ya sufri na estaca, gendeh se quierre decir que nuay mas le el favor de Jehova.​—Mat. 21:9.

Por medio na maga palabra de Jesus, posible gaha que ta dale le mira que bien triste le cay necesita quita si Jehova con el De Suyu proteccion para puede le dale mira con el de suyu integridad? Gendeh original proposito de Jehova que sufri y muri el de suyu Anak. Ya necesita lang se despues del primer rebelion. Nuay cosa malo ya hace si Jesus. Pero, necesita le sufri y muri para contesta con el maga issue que ya hace si Satanas y para dale el rescate que necesita para cumpra otravez con el cosa ya perde na maga gente. (Mar. 8:31; 1 Ped. 2:21-24) Puede lang este cumpli todo si temporario quita si Jehova con el de suyu proteccion con Jesus por primer vez na de suyu vida.

Posible gaha que ta ayuda si Jesus con el de suyu maga siguidores para pensa si porque ya permiti si Jehova con ele que muri na ansina manera? * Sabe si Jesus que este clase de muerte como un criminal na estaca hay causa con el manada para man luya. (1 Cor. 1:23) Si man focus el de suyu maga siguidores na deverasan razon si porque le ya muri, hay entende sila si cosa el importancia de este. (Gal. 3:13, 14) Como resulta, hay mira sila con ele como un Salvador y gendeh como un criminal.

Maskin cosa pa man el razon si porque ya habla si Jesus con este maga palabra, ya realiza le que el cosa le ta experiencia amo parte del voluntad de Jehova para con ele. Despues menciona con este salmo, si Jesus ya habla: “Cumplido ya todo.” (Juan 19:30; Luc. 22:37) Cay temporario ya quita si Jehova con el de suyu proteccion, ya permiti este con Jesus para cumpli con el todo cosa le necesita hace aqui na tierra. Ya permiti tambien este para cumpli le con el todo cosas que ya escribi acerca con ele “na Ley de Moises, na maga libro del maga Profeta y na maga Salmo.”​—Luc. 24:44.