1-2. Cosa ya sucede antes habla si Jesus con el de suyu maga ultimo palabra?

AGA quel del Nisan 14, 33 C.E. Despues falso acusa con Jesus y sentencia que culpable le na crimen que nuay le comete, ya gangguia con ele, ya maltrata y ya clava na estaca. Ya clava con el de suyu mano y pies. Ta sinti le duele cada vez le ta resulla y tan cuento. Pero, debe le converza cay tiene le cosa importante habla.

² Discuti kita con el maga palabra que ya habla si Jesus cuando pamurida ya le na estaca y el maga leccion que puede kita aprende con ese. Quierre decir, “oi [kita] con Ele.”​—Mat. 17:5.

3. Con quien posible ta refiri si Jesus cuando ya habla le: “Tata, perdona canila”?

³ Cosa ya habla si Jesus? Cuando ya clava con ele na estaca, si Jesus ya reza: “Tata, perdona canila.” Con quien perdona? Puede kita tiene idea na cosa le sunod ya habla: “No sabe sila si cosa sila ta hace.” (Luc. 23:33, 34) Posible, ta refiri si Jesus con el maga Romano soldao quien ya clava con el de suyu mano y pies. No sabe sila si quien gayot le. O posible ta refiri tambien le con el cuanto maga gente quien ya insisti que mata con ele pero ya demonstra fe con ele na uliji. (Act. 2:36-38) Nuay permiti si Jesus que el maga injusticia que ya experiencia le hay causa con ele para rabia y disculpa kanila. (1 Ped. 2:23) En vez, ya pidi le con Jehova que perdona con aquellos quien ya mata con ele.

4. Cosa kita puede aprende cuando ya perdona si Jesus con el maga tan contra con ele?

 ⁴ Cosa kita puede aprende na maga palabra de Jesus? Igual con Jesus, necesita kita queda preparao perdona con otro. (Col. 3:13) El cuanto, incluido ya el diaton maga pariente, posible tan contra kanaton cay gendeh sila ta entende con el cosa kita ta creé y el diaton manera de vida. Posible man imbusterias sila acerca kanaton, hace kanaton huya enfrente con otro, destroza con el diaton literatura o amenaza pa gane que hace sinti duele kanaton. En vez de esta rabiao, puede kita pidi con Jehova que ayuda con aquellos quien tan contra kanaton que acepta el verdad. (Mat. 5:44, 45) Tiene vez, baka man dificil kita perdona especialmente si ya experiencia kita grabe injusticia. Pero si esta kita rabiao y gendeh perdona kanila, ta hace kita sinti duele con el diaton mismo cuerpo. El un hermana ya explica: “Ya realiza yo que si ta perdona yo con otro, gendeh se quierre decir que aceptable conmigo el diila maga kamali o ta permiti yo que maltrata sila conmigo. Quierre decir lang de aquel que gendeh yo esta rabiao kanila.” (Sal. 37:8) Si ta decidi kita perdona, gendeh kita ta permiti con el maga negativo experiencia que continua kanaton hace rabiao.​—Ef. 4:31, 32.

5. Cosa ya promete si Jesus con el uno del maga criminal na estaca y porque le se ya hace promesa?

⁵ Cosa ya habla si Jesus? Tiene dos criminal na estaca na costao de Jesus. Del primero, ya gangguia sila dos con ele. (Mat. 27:44) Pero na uliji, nuay mas continua el uno kanila. Ya realiza le que si Jesus “noay cosa malo ya hace.” (Luc. 23:40, 41) Ya dale tambien le mira que ta creé le que resucita con Jesus y hay rula le como un rey llega el tiempo. Ya habla le con Jesus: “Acorda conmigo cuando ay anda Uste na de Uste Reino.” (Luc. 23:42) Claro gayot que tiene grande fe este persona! Si Jesus ya contesta con ele: “Ta asegura yo contigo . . . , ay esta tu [gendeh na Reino sino] na Paraiso junto comigo.” (Luc. 23:43) Nota que bien personal el promesa que ya hace si Jesus cay ya usa le con el maga palabra “yo,” “contigo,” “tu” y “comigo.” Cay sabe le que lastimoso el de suyu Tata, si Jesus ya dale esperanza con este criminal.​—Sal. 103:8.

6. Cosa kita puede aprende na maga palabra de Jesus na criminal?

⁶ Cosa kita puede aprende na maga palabra de Jesus? Ya puede gayot imita si Jesus con el de suyu Tata. (Heb. 1:3) Si Jehova preparao perdona kanaton y dale kanaton mira lastima si deverasan kita ya arripinti na maga mal cosas que ya hace kita de antes y si ta demonstra kita fe que puede kita obtene el perdon na diaton maga pecado por medio na sacrificio de Jesucristo. (1 Juan 1:7) El cuanto posible tan dificil creé que perdona kanila si Jehova na maga kamali que ya hace sila de antes. Si ta sinti tu igual ansina, considera este: Antes muri si Jesus, ya dale le mira lastima con el criminal quien ta principia pa lang demonstra fe. Poreso, puede kita asigura que si Jehova hay dale mira lastima con el de suyu maga fiel siervo quien ta hace el todo cosa sila puede hace para obedece con el de suyu maga mandamiento.​—Sal. 51:1; 1 Juan 2:1, 2.

7. Cosa ya habla si Jesus con Maria y Juan, como ya menciona na Juan 19:26, 27 y porque se le ya habla?

⁷ Cosa ya habla si Jesus? (Le con el Juan 19:26, 27.) Malingasa si Jesus acerca con el  de suyu nana, quien posible viuda ya. El de suyu maga hermano y hermana posible puede dale con el de suyu material necesidad. Pero, quien dale el de suyu espiritual necesidad? Nuay habla el Biblia que maga dicipulo ya el de suyu maga hermano na ese tiempo. Pero, si Juan un fiel apostol y uno del maga cerca amigo de Jesus. Para con Jesus, espiritual familia de suyu aquellos quien tan junto con ele na adoranza con Jehova. (Mat. 12:46-50) Poreso por causa na de suyu amor para con Maria, ya pidi si Jesus con Juan que cuida con el de suyu nana cay sabe si Jesus que puede le dale con el espiritual necesidad de Maria. Ya habla si Jesus con el de suyu nana: “Este el dituyo anak.” Y con Juan, ya habla le: “Este el  dituyo nana.” Principia ese dia, si Juan ya queda como un anak con Maria y ya cuida con ele como de suyu nana. Ya dale gayot mira grande amor si Jesus con el precioso mujer quien ya cuida con ele desde bata le y quien ta para cerca con ele na dia del de suyu muerte.

8. Cosa kita puede aprende na maga palabra de Jesus con Maria y Juan?

⁸ Cosa kita puede aprende na maga palabra de Jesus? El diaton amistad para na diaton maga hermano y hermana na congregacion puede queda mas fuerte contra na diaton relacion na diaton maga familia. El diaton maga pariente posible man contra kanaton o baka abandona pa gane kanaton. Pero como cosa ya promete si Jesus, si esta kita cerca con Jehova y con el De Suyu organizacion, hay ricibi kita “cien veces mas pa” contra na cosa ya perde kanaton. Manada el quien queda igual diaton anak, nana o tata. (Mar. 10:29, 30) Cosa tu ta sinti cay parte tu del un espiritual familia quien unido na fe y amor​—amor para con Jehova y para na uno y otro?​—Col. 3:14; 1 Ped. 2:17.

9. Cosa kanaton ta habla el maga palabra de Jesus na Mateo 27:46?

⁹ Cosa ya habla si Jesus? Antes le muri, si Jesus ya grita: “Dios mio, Dios mio! Por que ya abandona Uste conmigo?” (Mat. 27:46) Nuay explica el Biblia si porque este ya habla si Jesus. Pero, considera si cosa kita puede aprende na de suyu maga palabra. El un cosa amo que ya cumpli si Jesus con el profecia na Salmo 22:1 por medio na cosa le ya habla. * Mas pa, el maga palabra de Jesus claro ya dale mira que si Jehova nuay pone “corral alrededor” del de suyu Anak. (Job 1:10) Ya entende si Jesus que ya permiti el de suyu Tata con el de suyu maga enemigo que pruba con el de suyu fe hasta na de suyu muerte. Nuay otro gente el quien ya puede experiencia con el probanza que ya experiencia si Jesus. Omento pa, el de suyu maga palabra ya dale prueba que inocente le na crimen que ya acusa con ele y gendeh con ele debe mata.

10. Cosa maga leccion kita puede aprende na maga palabra de Jesus na de suyu Tata?

¹⁰ Cosa kita puede aprende na maga palabra de Jesus? El un leccion amo que gendeh kita debe expecta con Jehova que protege kanaton na maga dificultad que ta pruba con el diaton fe. Igual si paquemodo ya pruba con Jesus hasta na de suyu muerte, debe tambien kita queda preparao para dale mira que fiel kita maskin pa mata kanaton. (Mat. 16:24, 25) Pero, puede kita asigura que el Dios gendeh hay permiti que experiencia kita probanza que mas pa na cosa kita puede aguanta. (1 Cor. 10:13) El otro leccion que puede kita aprende amo que igual con Jesus, posible tambien kita experiencia maga injusticia. (1 Ped. 2:19, 20) El maga gente tan contra kanaton, gendeh por causa cay tiene kita cosa malo ya hace, sino por causa cay gendeh kita parte del mundo y tan testigo kita acerca con el verdad. (Juan 17:14; 1 Ped. 4:15, 16) Ya entende si Jesus si porque con ele ya permiti sufri si Jehova. Pero, el maga fiel siervo quien bajo na probanza ta pensa tiene vez si porque si Jehova ya permiti con el maga cosas que ta sucede. (Hab. 1:3) El diaton lastimoso y paciencioso Dios sabe que gendeh sila falta fe. Necesita sila el comforta que ele lang puede dale.​—2 Cor. 1:3, 4.

11. Porque ya habla si Jesus con el maga palabra na Juan 19:28?

¹¹ Cosa ya habla si Jesus? (Le con el Juan 19:28.) Porque si Jesus ya habla: “Con sequia yo”? Ya habla le se “para cumpli el Escritura”​—el profecia que puede incuntra na Salmo 22:15. Este ta habla: “El de mio fuerza ya seca igual na un tinaja de lodo pandayan; el de mio lenggua yan pilit na de mio encias.” Mas pa despues del todo sufrimiento de Jesus, incluido ya el grabe dolor na estaca, asigurao que bien con sequia le. Necesita le ayuda para perde el de suyu sequia.

12. Cosa kita puede aprende na maga palabra de Jesus “con sequia yo”?

¹² Cosa kita puede aprende na maga palabra de Jesus? Nuay pensa si Jesus que mahina le si habla le si cosa le ta sinti. Y debe tambien kita habla si cosa kita ta sinti. Posible, yan anad kita que gendeh habla con otro si cosa kita necesita. Pero si llega el tiempo que necesita kita ayuda, gendeh kita debe man alang-alang pidi ayuda con otro. Por ejemplo si un de edad kita o nuay buen salud, baka necesita kita pidi con el un amigo que lleva kanaton na grocery o na doctor. Si tan luya kita, baka necesita kita pidi con el un anciano o otro mature amigo para oi kanaton o anima kanaton por medio de maga “buen palabra.” (Prov. 12:25) Acorda kita que el diaton maga hermano y hermana ta ama kanaton y quierre sila ayuda kanaton na “tiempo de dificultad.” (Prov. 17:17) Pero, no puede sila le diaton pensamiento. Posible, gendeh sila sabe que necesita kita ayuda si gendeh kita habla kanila.

13. Cosa ya puede cumpli si Jesus cay ya mentena le con el de suyu integridad hasta na muerte?

¹³ Cosa ya habla si Jesus? Maga alas tres de tarde del Nisan 14, si Jesus suena ya habla: “Cumplido ya todo.” (Juan 19:30) Cuando pamurida ya le, si Jesus ya acaba ya hace con el maga cosas que quierre si Jehova que hace le. Cay ya mentena si Jesus con el de suyu integridad hasta na de suyu muerte, manada le cosa ya puede cumpli. Una, ya dale le prueba que imbustero si Satanas. Ya dale mira si Jesus que el un perfecto gente puede mentena con el de suyu integridad maskin cosa pa con ele hace si Satanas. Ika-dos, ya dale si Jesus de suyu vida como un rescate. Cay ya sacrificia le con el de suyu vida, ya hace este posible para na maga imperfecto gente para tiene relacion con Dios y tiene el esperanza que vivi hasta para cuando. Ika-tres, ya dale prueba si Jesus que recto el soberania de Jehova y ya limpia con el nombre del de suyu Tata.

14. Cosa kita debe determinao hace cada dia? Explica.

¹⁴ Cosa kita puede aprende na maga palabra de Jesus? Debe kita queda determinao que mentena con el diaton integridad cada dia. Considera con el cosa ya habla si Hermano Maxwell Friend, quien ya sirvi como un instructor na Watchtower Bible School of Gilead. Na de suyu talk acerca na lealtad na un international assembly, si Hermano Friend ya habla: “No deja para mañana el cosa tu puede hace o habla ahora. Asigurao ba tu que vivo pa tu mañana? Vivi cada dia que dol amo ya se el ultimo dia que puede tu dale mira que conviene tu vivi hasta para cuando.” Ojala vivi kita cada dia que dol amo ya se el diaton ultimo oportunidad para mentena con el diaton integridad! Como resulta maskin pa muri kita, puede kita habla, “Jehova, ya puede yo hace el todo cosa yo puede hace para mentena con el de mio integridad, para dale prueba que imbustero si Satanas y para vindica con el de tuyu nombre y con el de tuyu soberania.”

15. Asegun na Lucas 23:46, na cosa asigurao si Jesus?

¹⁵ Cosa ya habla si Jesus? (Le con el Lucas 23:46.) Si Jesus ya habla con confianza: “Tata, na de Uste maga mano ta entrega yo mi espiritu.” Sabe si Jesus que el de suyu futuro ta depende con Jehova y asigurao le que hay acorda con ele el de suyu Tata.

16. Cosa tu ya aprende na experiencia del un 15 año Witness?

¹⁶ Cosa kita puede aprende na maga palabra de Jesus? Esta leal con Jehova maskin pa na peligro el de tuyu vida. Para hace se, debe tu “confia con Jehova con todo de tuyu corazon.” (Prov. 3:5) Considera con el ejemplo de Joshua, un 15 año Witness quien tiene grabe enfermedad. Nuay le acepta maga curada que ta viola con el ley del Dios. Antes le muri, ya habla le con el de suyu nana: “Mang, cuida conmigo si Jehova. . . . Puede yo contigo este habla Mang con confianza: Sabe yo que si Jehova hay hace conmigo vivi otravez na resureccion. Ya puede ele le con el de mio corazon y ta ama gayot yo con ele.” * El cada uno kanaton debe pregunta na diaton mismo cuerpo, ‘Si hay enfrenta yo probanza na de mio fe que ta pone na peligro con el de mio vida, hay esta ba yo leal con Jehova y confia que hay acorda le conmigo?’

17-18. Cosa maga leccion kita ya puede aprende? (Mira tambien con el cajon “ Maga Leccion na Maga Ultimo Palabra de Jesus.”)

¹⁷ Manada kita leccion puede aprende na maga ultimo palabra de Jesus! Ya hace este acorda kanaton que necesita kita perdona con otro y confia que hay perdona kanaton si Jehova. Tiene kita un bonito espiritual familia de maga hermano y hermana quien preparao ayuda kanaton. Pero si necesita kita ayuda, debe kita pidi se kanila. Sabe kita que si Jehova hay ayuda kanaton aguanta na maskin cosa probanza. Y ya puede kita mira que bien importante que vivi cada dia que dol amo ya se el ultimo dia que dale kita mira el diaton integridad y confia que hay resucita kanaton si Jehova si muri kita.

¹⁸ Manada gayot kita cosa puede aprende na cosa ya habla si Jesus cuando pamurida le na estaca! Si aplica kita con el maga leccion que ya aprende kita, hay obedece kita con el cosa ya habla si Jehova acerca con el de suyu Anak: “Oi ustedes con Ele.”​—Mat. 17:5.