1-2. Paquemodo kita puede sigui con el maga paso de Jesus? Ilustra.

IMAGINA que parte tu del un grupo quien ta camina na un peligroso lugar que tapao de nieve. Ta guia con ustedes el un experienciao guide. Mientras ta camina le, ta deja le rastro del de suyu pies na nieve. Despues del cuanto tiempo, gendeh mas tu ta puede mira con el guide! Pero, gendeh tu tan panic. Sino, etu y el de tuyu maga uban ta sigui enbuenamente con el rastro que ya deja el de ustedes guide.

² Como maga verdadero Cristiano, dol aquel tambien kita ta camina na un peligroso lugar​—este mal mundo. Bueno ya lang, ya dale kanaton si Jehova perfecto Guide​—el de suyu Anak, si Jesucristo, de quien paso puede kita sigui enbuenamente. (1 Ped. 2:21) Asegun na un referencia de Biblia, si Pedro ya compara aqui con Jesus na un guide. Igual con el un guide quien ya deja rastro, si Jesus ya deja tambien rastro de pies o paso que puede kita sigui. Considera kita con el tres pregunta acerca na de suyu maga paso​—cosa? porque? y paquemodo?

3. Cosa quierre decir que sigui con el paso del un persona?

³ Cosa quierre decir que sigui con el paso del un persona? Na Biblia, el palabra “camina” y “pies” tiene vez ta refiri con el cosa ta hace el un persona na de suyu vida. (Gen. 6:9; Prov. 4:26) El ejemplo que ta dale mira el un persona puede compara na rastro de pies o paso que ta deja le mientras ta camina le. Poreso para sigui con el paso del un persona, quierre decir que sigui con el de suyu ejemplo o imita con ele.

4. Cosa quierre decir que sigui con el maga paso de Jesus?

 ⁴ Entonces, cosa quierre decir que sigui con el maga paso de Jesus? Quierre decir de este que imita con el de suyu ejemplo. Na texto onde yan base este articulo, si apostol Pedro especifico yan comento con el buen ejemplo de Jesus cay ya puede le aguanta na maga sufrimiento. Pero, manada pa otro manera que puede kita imita con Jesus. (1 Ped. 2:18-25) Poreso, el manera de vida de Jesus​—el todo cosa le ya habla y ya hace—​amo un ejemplo que debe kita sigui.

5. El maga imperfecto gente ba puede gayot sigui con el perfecto ejemplo de Jesus? Explica.

⁵ Como maga imperfecto gente, puede ba gayot kita sigui con el ejemplo de Jesus? Si, puede. Acorda que ya anima kanaton si Pedro que sigui enbuenamente con el maga paso de Jesus y gendeh na perfecto manera. Si sigui kita enbuenamente con el de suyu maga paso​—ta hace kita el todo cosa kita puede hace como imperfecto gente—​ta aplica kita con el maga palabra de apostol Juan: “Vivi el mismo clase de vida ya vivi si Cristo.”​—1 Juan 2:6.

6-7. Porque kita puede habla que si sigui kita con el maga paso de Jesus hay queda kita mas cerca con Jehova?

⁶ Si sigui kita con el maga paso de Jesus, hay queda kita mas cerca con Jehova. Porque kita se puede habla? Una, ya dale mira buen ejemplo si Jesus si paquemodo vivi na manera que ta hace alegre con Dios. (Juan 8:29) Poreso si sigui kita con el maga paso de Jesus, hay hace kita alegre con Jehova. Y puede kita asigura que el diaton Tata na cielo hay queda cerca con aquellos quien ta hace esfuerzo para queda de suyu maga amigo.​—Sant. 4:8.

⁷ Ika-dos, ya imita si Jesus con el de suyu Tata na perfecto manera. Este el razon si  porque ya puede habla si Jesus: “Quien ya mira conmigo, ya mira ya tamen con el Tata.” (Juan 14:9) Si imita kita con el maga calidad y manera si paquemodo si Jesus ya trata con otro​—por ejemplo, el de suyu lastima para na un leproso, de suyu empatia con el un mujer quien tiene grabe enfermedad, de suyu compasion para na maga dolorido—​ta imita tambien kita con Jehova. (Mar. 1:40, 41; 5:25-34; Juan 11:33-35) Si mas imita kita con el maga calidad de Jehova, mas queda kita cerca con ele.

8. Explica si porque puede kita “gana” con el mundo si sigui kita con el maga paso de Jesus.

⁸ Si sigui kita con el maga paso de Jesus, gendeh kita permiti que este mal mundo hay hace perde con el diaton focus na diaton servicio con Jehova. Na ultimo noche del de suyu vida aqui na tierra, si Jesus ya puede habla: “Ya gana ya yo con el mundo.” (Juan 16:33) Quierre decir, nuay le permiti que influencia con ele el pensamiento, goal y accion del maga gente na este mundo. Nuay ulvida si Jesus el razon si porque con ele ya imbia aqui na tierra​—para vindica con Jehova. Quetal kita? Na este mundo, bien manada cosas que puede hace perde con el diaton focus na diaton servicio con Jehova. Pero si igual kita con Jesus quien yan focus na hacida del voluntad de Jehova, puede tambien kita “gana” con el mundo.​—1 Juan 5:5.

9. Cosa kita debe hace para esta na camino para na vida hasta para cuando?

⁹ Si sigui kita con el maga paso de Jesus, hay tiene kita vida hasta para cuando. Cuando el un rico joven hombre ya pregunta si cosa le necesita hace para tiene vida hasta para cuando, si Jesus ya habla: “Vene y sigui conmigo.” (Mat. 19:16-21) Para con el cuanto Judio quien gendeh ta creé que ele el Cristo, si Jesus ya habla: “Mi maga carnero . . . ta sigui conmigo. Ta dale yo canila vida hasta para cuando.” (Juan 10:24-29) Si Jesus ya habla con Nicodemo​—un miembro de Sanhedrin quien ya queda interesao na de suyu maga enseñanza—​que aquellos “quien ta cree con Ele” o ta demonstra fe con ele hay “tene Vida hasta para cuando.” (Juan 3:16) Ta demonstra kita fe con Jesus si ta aplica kita con el cosa le ya enseña y si ta imita con el cosa le ya hace. Si hace kita se, hay esta kita na camino para na vida hasta para cuando.​—Mat. 7:14.

10. Cosa kita debe hace para mas conoce con Jesus? (Juan 17:3)

¹⁰ Antes kita puede sigui enbuenamente con el maga paso de Jesus, debe kita conoce con ele. (Le con el Juan 17:3.) Un cosa este que debe kita continua hace. Debe kita continua aprende mas acerca con ele​—aprende acerca de suyu maga calidad, si paquemodo le ta  pensa y de suyu maga principio. Maskin paquemodo de tarda ya kita na verdad, debe kita continua hace esfuerzo para conoce con Jehova y con el de suyu Anak.

11. Cosa ta contene el cuatro Evangelio?

¹¹ Para ayuda kanaton conoce con el de suyu Anak, ya inclui si Jehova con el cuatro Evangelio na de suyu Palabra. El maga Evangelio ta contene el vida y ministerio de Jesus. Este ta habla kanaton si cosa si Jesus ya habla, ya hace y ya sinti. Este cuatro libro puede ayuda kanaton para “considera” enbuenamente con el ejemplo de Jesus. (Heb. 12:3) Puede kita habla que ta contene este maga paso de Jesus que ya deja le. Poreso si examina kita con este maga Evangelio, puede kita conoce mas con Jesus. Como resulta, puede kita sigui enbuenamente con el de suyu maga paso.

12. Cosa kita debe hace para mas beneficia con el maga Evangelio?

¹² Para mas beneficia kita con el maga Evangelio, mas pa na lehida el cosa kita debe hace. Necesita kita dale tiempo para estudia y medita enbuenamente con ese. (Compara na Josue 1:8, footnote.) Discuti kita con el dos sugestion que puede ayuda kanaton para medita con el maga Evangelio y aplica con el cosa kita ya le.

13. Paquemodo tu hace mas real contigo el maga Evangelio?

¹³ Una, hace mas real contigo el maga Evangelio. Usa con el de tuyu imaginacion para mira, oi y sinti con el cosa ya sucede. Para puede tu se hace, man research na maga publicacion estaba na organizacion de Jehova. Examina con el contexto​—el maga suceso antes o despues del cosa tu ta estudia. Mira maga informacion acerca na maga gente y lugar que ya menciona na ese istoria. Compara con el istoria que ta estudia tu na cosa ya escribi na otro Evangelio acerca con ese. Tiene vez, el un escritor del Evangelio ya inclui un especifico detalle que nuay menciona na otro.

14-15. Cosa kita debe hace para aplica con el cosa kita ya aprende na maga Evangelio?

 ¹⁴ Ika-dos, aplica con el maga Evangelio na de tuyu vida. (Juan 13:17) Despues tu estudia enbuenamente con el un istoria na Evangelio, pregunta na de tuyu mismo cuerpo: ‘Tiene ba leccion na este istoria que puede yo aplica na de mio vida? Paquemodo yo puede usa con este istoria para ayuda con otro?’ Pruba pensa con el un especifico individual y despues na amable y enbuenamente manera habla con ele el cosa tu ya aprende.

¹⁵ Considera kita con el un ejemplo si paquemodo kita puede aplica con este dos sugestion. Hay examina kita con el istoria del pobre viuda con quien si Jesus ya observa na templo.

16. Relata con el ecsena que escribido na Marcos 12:41.

¹⁶ Hace mas real con el istoria. (Le con el Marcos 12:41.) Imagina con este ecsena. Nisan 11 quel, del 33 C.E.​—nuay mas un semana antes el muerte de Jesus. Na ese dia, ya usa si Jesus con el mayoria del de suyu tiempo para enseña na templo. Pero, el maga religioso lider tan contra con ele. Una pa con ese, el cuanto diila ya cuestiona con el de suyu autoridad. El otro ya dale con ele maga pregunta que ta pensa sila que gendeh le puede contesta. (Mar. 11:27-33; 12:13-34) Despues, ya cambia si Jesus na otro parte del templo. Ahora, ta puede le mira con el maga cajon de contribucion poreso posible talli le na lugar que ta llama Patio del Maga Mujer. Ya sinta le y ya principia observa con el maga gente mientras ta pone sila diila maga contribucion na cajon. Ya puede le mira con el manada rico gente quien ta hace cae manada sencillo. Posible, cerca le poreso ta puede le oi que ta suena mientras ta cae el maga sencillo na cajon.

17. Cosa ya hace el pobre viuda que ya menciona na Marcos 12:42?

¹⁷ Le con el Marcos 12:42. Despues del cuanto tiempo, ya puede nota si Jesus con el un mujer. Un “pobre viuda” ele. (Luc. 21:2) Bien dificil el de suyu vida. Posible, tan dificil le maskin para obtene el de suyu maga necesidad. Maskin pa ansina, ya anda le na uno del maga cajon y ya pone dos diutay sencillo que posible nuay suena cuando ya cae este na cajon. Sabe si Jesus si cosa le ya hace cae​—dos lepta sencillo, el de con todo diutay sencillo que ta usa na aquel tiempo. Gane, gendeh este bastante maskin para cumpra un bilug maya, uno del maga de con todo barato pajaro que ta vende para come.

18. Asegun na Marcos 12:43, 44, cosa ya habla si Jesus acerca na contribucion del viuda?

¹⁸ Le con el Marcos 12:43, 44. Yan bilib gayot si Jesus con este viuda. Poreso ya llama le con el de suyu maga dicipulo, ya insiña con el viuda y ya habla: “Este pobre viuda, ya pone na alcancia mas mucho pa que con el los demas.” Despues, ya explica le: “Todo sila [especialmente el maga rico gente] ya pone el cen que ta sobra canila pero, ele maskin bien pobre gayot le, ya pone todo el que tiene y que necesita le para vivi.” Cuando este fiel viuda ya dale con el de suyu ultimo sen na ese dia, ya confia le con Jehova que cuida con ele.​—Sal. 26:3.

19. Cosa importante leccion kita puede aprende na cosa ya habla si Jesus acerca na pobre viuda?

¹⁹ Aplica con el istoria na de tuyu vida. Pregunta na de tuyu mismo cuerpo, ‘Cosa leccion yo puede aprende na cosa ya habla si Jesus acerca na pobre viuda?’ Pensa acerca con ese viuda. Asigurao ya pensa le que era mas grande pa el cosa le ya puede dale con Jehova. Pero, ya hace le el cosa le puede hace. Ya dale le el de suyu de con todo bueno con  Jehova. Y sabe si Jesus que el de suyu contribucion precioso na ojos del de suyu Tata. Este el un importante leccion para kanaton: Alegre si Jehova si ta dale kita con ele el diaton de con todo bueno​—diaton con todo corazon y con todo alma servicio. (Mat. 22:37; Col. 3:23) Alegre si Jehova si ta mira le kanaton que ta hace el todo que puede kita hace! Ese principio puede aplica na tiempo y fuerza que ta usa kita na diaton adoranza, incluido ya na ministerio y na atendida de maga miting.

20. Paquemodo tu puede aplica con el leccion acerca con el viuda? Dale un ejemplo.

²⁰ Paquemodo tu puede aplica con el leccion acerca con el viuda? Pruba pensa con el maga especifico individual con quien tu puede anima y hace acorda kanila que alegre si Jehova na diila maga esfuerzo. Por ejemplo, tiene ba tu conoce un de edad hermana quien posible tan conciencia o ta sinti nuay sirvi cay nuay mas le buen salud o fuerza para hace el maga cosas que ta puede le hace del otro na ministerio? O puede ba tu pensa con el un hermano que tiene grabe enfermedad quien tan luya cay gendeh mas le ta puede anda na Kingdom Hall para na miting? Puede tu ayuda con este maga individual si usa tu maga palabra que ta ‘ayuda crici el diila fe.’ (Ef. 4:29) Habla kanila el maga bonito leccion que ya aprende kita acerca na pobre viuda. El de tuyu maga palabra puede hace acorda kanila que alegre si Jehova si ta dale kita con ele el diaton de con todo bueno. (Prov. 15:23; 1 Tes. 5:11) Si comenda tu con otro cay ya dale sila el diila de con todo bueno con Jehova​—maskin paquemodo pa man ese de diutay—​ta sigui tu enbuenamente con el maga paso de Jesus.

21. Cosa tu determinao hace?

²¹ Ta rindi kita gracias cay el maga Evangelio ya dale bien manada detalle acerca na vida de Jesus que puede ayuda kanaton para imita con ele y sigui enbuenamente con el de suyu maga paso. Puede kita hace un proyecto na diaton personal estudiada o durante el De Familia Adoranza acerca na maga Evangelio. Acorda kita que para mas beneficia na cosa kita ta estudia, necesita kita hace mas real con el istoria y aplica con ese na diaton vida. Puera que imita con el cosa ya hace si Jesus, necesita kita oi con el cosa le ya habla. Na siguiente articulo, hay considera kita si cosa kita puede aprende na maga ultimo palabra de Jesus antes le muri.