1-2. (a) Quien si Eunice y cosa dificultad le ya enfrenta como un nana? (b) Dale comento na letrato na cover.

 MASKIN pa nuay menciona el Biblia acerca na bautismo de Timoteo, puede kita imagina con el alegria que ya sinti el de suyu nana, si Eunice, na aquel dia. (Prov. 23:25) Imagina si paquemodo le de proud cuando ya mira le con Timoteo que parao na agua. Tan smile le mientras junto con ele parao si Loida, el aguela de Timoteo. Ya resulla hondo si Eunice mientras ya hace tusmuk con Timoteo na agua. Yan smile si Timoteo mientras ta hace con ele levanta na agua y el de suyu nana ya principia llura na alegria. Maskin pa dificil, ya tene buen exito si Eunice que enseña con el de suyu anak para ama con Jehova y con el De Suyu Anak, si Jesucristo. Cosa maga dificultad le ya enfrenta mientras ta enseña con el de suyu anak?

² Ya engranda si Timoteo que gendeh igual el religion del de suyu mayores. Griego el de suyu tata y Judio el de suyu nana y aguela. (Act. 16:1) Posible, teenager pa si Timoteo cuando si Eunice y Loida ya queda maga Cristiano. Pero, el de suyu tata nuay queda un Cristiano. Cosa religion iscuji si Timoteo? Posible, na edad ya le para hace de suyu mismo decision. Hay iscuji ba le el religion del de suyu tata? Hay sigui ba le con el tradicion del maga Judio que ya enseña con ele desde bata? O hay queda le siguidores de Jesucristo?

3. Asegun na Proverbio 1:8, 9, cosa el mirada de Jehova na trabajo que ta hace el maga nana para ayuda con el diila maga anak queda de suyu maga amigo?

³ El maga Cristiano nana tambien ahora ta ama con el diila familia. Bien quierre sila ayuda con el diila maga anak para cultiva  un cerca relacion con Jehova. Y el diaton Dios ta aprecia gayot con el diila esfuerzo. (Le con el Proverbio 1:8, 9.) Ya guia si Jehova con el manada nana mientras ta ayuda sila con el diila maga anak acepta con el verdad.

4. Cosa maga dificultad ta enfrenta el maga nana ahora?

⁴ Normal lang que tiene vez el un nana hay pensa si el de suyu maga anak hay iscuji sirvi con Jehova, igual na cosa ya hace si Timoteo. Sabe el maga mayores si paquemodo de grabe el pressure que ta enfrenta el diila maga anak na este mundo de Satanas. (1 Ped. 5:8) Omento pa, manada nana el tan dificil hace engranda con el diila maga anak cay nuay sila marido o el diila marido gendeh ta sirvi con Jehova. Por ejemplo, el un hermana que si Christine b ya habla: “Buen tata el de mio marido y ta ama le con el diamon familia pero gendeh le ta permiti conmigo que hace engranda con el diamon maga anak como maga Testigo de Jehova. Manada beses yo ya llura y ta pensa si el de mio maga anak hay sirvi ba con Jehova.”

5. Cosa kita discuti na este articulo?

⁵ Si un Cristiano nana tu, puede tu tene buen exito igual con Eunice. Na este articulo, hay discuti kita si paquemodo tu puede imita con el de suyu ejemplo y enseña con el de tuyu maga anak por medio na cosa tu ta habla y na cosa tu ta hace. Mira tambien kita si paquemodo si Jehova ayuda contigo.

6. Como cosa ya indica na 2 Timoteo 3:14, 15, paquemodo si Timoteo ya queda un Cristiano?

⁶ Cuando bata si Timoteo, ya hace todo el de suyu nana para enseña con ele acerca na Escritura, como cosa ta entende el maga Judio. Siempre, limitao lang el saber de Eunice cay no sabe le acerca con Jesucristo. Pero, el cosa ya aprende si Timoteo estaba na Escritura ya ayuda con ele para queda un Cristiano. Pero, hay queda ba gaha le un Cristiano? Como un joven, tiene le el derecho para iscuji si queda ba le un Cristiano. Asigurao, el un razon si porque le “ya cree” el verdad acerca con Jesus amo por causa na esfuerzo del de suyu nana. (Le con el 2 Timoteo 3:14, 15.) Bien alegre gayot si Eunice cay ya tiene le buen exito enseña con el de suyu anak acerca con Jehova maskin pa dificil. Ya vivi si Eunice asegun na de suyu nombre que estaba na un palabra que quierre decir “ganá.”

7. Paquemodo puede ayuda si Eunice con el de suyu anak para progresa despues del bautismo?

⁷ El bautismo amo un importante cosa na vida de Timoteo pero tan lingasa siempre si Eunice. Cosa hace si Timoteo na de suyu vida? Hay man junto ba le na mal asosacion? Hay entra ba le escuela na Atenas y acepta con el enseñanza del maga pagano filosofia que ta enseña alla? Hay hace ba le usik con el de suyu tiempo, fuerza y pagka-joven para queda esclavo del riqueza? Gendeh puede hace decision si Eunice para con Timoteo pero puede le ayuda con ele. Paquemodo? Puede le continua hace esfuerzo para enseña con el de suyu anak que ama con Jehova y aprecia con Jesus. Gendeh lang el maga mayores quien tiene marido o mujer que gendeh ta sirvi con Jehova el ta enfrenta maga dificultad. Maskin el maga mayores quien na verdad ya tan dificil enseña con el diila maga anak que queda fiel siervo de Jehova. Cosa puede aprende el maga mayores na ejemplo de Eunice?

8. Paquemodo el un nana puede ayuda con el de suyu Testigo marido para cuida con el espiritual necesidad del diila maga anak?

⁸ Estudia con el Biblia junto con el de tuyu maga anak. Maga hermana, si na verdad el de ustedes marido, quierre si Jehova que ayuda  ustedes con ele para cuida el espiritual necesidad del de ustedes maga anak. El un manera que puede ustedes con este hace amo si pirmi ustedes suporta con el de ustedes De Familia Adoranza. Habla maga positivo cosas acerca na ese arreglamiento y pensa si cosa ustedes puede hace para queda relax y alegre el familia durante ese tiempo. Posible, puede ustedes ayuda con el de ustedes marido que plaña hace un especial study project acerca na Biblia. Omento pa, si el cuanto del de ustedes maga anak na edad ya para beneficia na personal estudiada del libro Queda Alegre Hasta Para Cuando!, posible puede ustedes ayuda con el de ustedes marido para man Bible study kanila.

9. Cosa puede ayuda con el un nana quien gendeh Testigo el marido?

⁹ Cuanto del maga nana el necesita man Bible study con el diila maga anak cay solo lang sila ta cuida con el diila maga anak o gendeh Testigo el diila marido. Si ansina el de tuyu situacion, no sobra man lingasa. Hay ayuda contigo si Jehova. Usa con el maga efectivo tool que ya dale le por medio na de suyu organizacion para man Bible study con el de tuyu maga anak. Puede tu pregunta con el otro maga experienciao mayores si paquemodo sila ya usa con ese maga tool na diila de familia adoranza. c (Prov. 11:14) Puede tambien si Jehova ayuda contigo para man cuento con el de tuyu maga anak. Pidi con ele que ayuda contigo para usa maga justo pregunta para sabe si cosa el na diila pensamiento y corazon. (Prov. 20:5) El un simple pregunta igual na ‘Cosa maga dificultad tu ta enfrenta na escuela?’ puede ayuda para sabe tu mas acerca kanila.

10. Cosa el otro manera que puede tu ayuda con el de tuyu maga anak aprende acerca con Jehova?

¹⁰ Busca diferente manera para enseña con el de tuyu maga anak acerca con Jehova. Man cuento acerca con Jehova y el manada buen cosas que ya hace le para contigo. (Deut. 6:6, 7; Isa. 63:7) Importante este especialmente si gendeh tu puede regular man Bible study con el de tuyu maga anak na casa. Si Christine que ya menciona enante ya habla: “Poco lang el oportunidad para discuti maga espiritual cosas poreso si llega se, ta usa yo con ese enbuenamente. Ta camina kame o tan bangca para man cuento acerca na maga bonito creacion de Jehova y acerca na manada espiritual cosas. Si tiene ya juicio el de mio maga anak, ta anima yo kanila que sila mismo estudia con el Biblia.” Omento pa, man cuento maga positivo cosas acerca na organizacion de Jehova y acerca na maga hermano y hermana. No habla mal cosas acerca na maga anciano. El cosa tu ta habla acerca na maga anciano puede determina si el de tuyu maga anak hay atraca kanila si necesita sila ayuda.

11. Asegun na Santiago 3:18, porque importante que mentena el paz na casa?

¹¹ Mentena paz na casa. Pirmi dale mira que ta ama tu con el de tuyu marido y con el de tuyu maga anak. Man cuento acerca con el de tuyu marido na buen manera y con respeto, y man train con el de ustedes maga anak que hace tambien igual ansina. Si hace tu este, puede tu mentena paz y queda mas facil para con el de tuyu maga anak que aprende acerca con Jehova. (Le con el Santiago 3:18.) Considera con el ejemplo de Jozsef, quien ta sirvi como un special pioneer na Romania. Mientras ta engranda le, el de suyu tata ya hace dificil para con ele, para con el de suyu nana y para con el de suyu maga hermano y hermana que sirvi con Jehova. Si Jozsef ya habla: “El de mio  nana ta pricura mentena el paz na casa. Si mas grabe el tratamiento del de mio tata, mas ta dale mira bueno el de mio nana con ele. Si ta puede le nota que tan dificil kame respeta y obedece con el diamon tata, ta discuti le kanamon el Efeso 6:1-3. Despues, habla le kanamon el maga bonito calidad del diamon tata y ta hace entende kanamon si porque kame debe aprecia con ele. Ya ayuda se para tiene paz el diamon familia.”

12. Asegun na 2 Timoteo 1:5, cosa el efecto del ejemplo de Eunice con Timoteo?

¹² Le con el 2 Timoteo 1:5. Si Eunice ya dale mira buen ejemplo con Timoteo. Asigurao, ya enseña le con Timoteo que si tiene le deverasan fe, necesita le hace accion. (Sant. 2:26) Asigurao, ya mira si Timoteo que el cosa ta hace el de suyu nana amo por causa na de suyu fuerte amor para con Jehova. Ya mira tambien si Timoteo que el servicio con Jehova amo el ta hace alegre con el de suyu nana. Cosa el efecto del ejemplo de Eunice con Timoteo? Si apostol Pablo ya habla que tiene fuerte fe si Timoteo igual con el de suyu nana. Nuay lang este basta sucede. Ya observa si Timoteo con el ejemplo del de suyu nana y ya decidi que imita con ele. Na igual manera, manada nana ahora el ya alcanza el corazon del miembro del diila familia maskin ‘gendeh mas ta converza ni un palabra.’ (1 Ped. 3:1, 2) Puede tambien tu se hace. Paquemodo?

13. Porque debe hace prioridad del un nana el de suyu relacion con Jehova?

¹³ Hace el de tuyu relacion con Jehova el de tuyu prioridad. (Deut. 6:5, 6) Igual na mayoria del maga nana, ta hace tu manada sacrificio. Ya sacrificia tu el de tuyu tiempo, sen, durmida y otro cosas para dale el fisical necesidad del de tuyu maga anak. Pero, gendeh tu debe queda bien ocupao hace con ese maga cosas que ta sacrificia ya tu con el de tuyu relacion con Jehova. Dale tiempo para regular reza, hace con el de tuyu personal estudiada na Biblia y para na maga miting na congregacion. Si hace tu se, hay queda fuerte el de tuyu espiritualidad y ta dale tu buen ejemplo con el de tuyu familia y con otro.

14-15. Cosa tu ya aprende na ejemplo de Leanne, Maria y João?

¹⁴ Considera con el cuanto ejemplo del maga jovenes quien ya aprende ama con Jehova y confia con ele cay ya observa sila con el diila nana. El anak mujer de Christine que si Leanne ya habla: “Gendeh kame ta puede man Bible study si talli na casa el diamon tata. Pero, si Mamang pirmi ta atende na maga miting. Maskin pa poco lang el cosa kame sabe acerca na Biblia, el de suyu accion ya ayuda kanamon para tiene fuerte fe. Sabe kame que este el verdad antes pa kame puede atende na maga miting.”

¹⁵ Si Maria que el tata tiene vez ta castiga con el familia cay ta atende na maga miting ya habla: “El de mio nana amo el de con todo animoso hermana que ya conoce yo. Como un bata, tiene vez gendeh yo ta hace con el maga cosas cay tiene yo miedo si cosa habla el otro. Pero si ta mira yo si paquemodo de animoso el de mio nana y si paquemodo le pirmi ta hace una con Jehova na de suyu vida, ya ayuda se conmigo para ganá con el miedo na gente.” Si João que el tata gendeh ta permiti con el familia que tene espiritual discusion na casa ya habla: “Siguro, el cosa gayot ya ayuda conmigo amo que si Mamang preparao sacrificia con el todo cosas​—puera con el de suyu amor para con Jehova​—para hace alegre con el de mio tata.”

16. Cosa posible el efecto del ejemplo del un nana con otro?

 ¹⁶ Maga nana, acorda que el de ustedes ejemplo ta afecta con otro. Paquemodo? Considera con el efecto del ejemplo de Eunice con apostol Pablo. Ele ya escribi que el fe de Timoteo “ya esta una con . . . Eunice.” (2 Tim. 1:5) Del cuando una ya puede mira si Pablo con el fe de Eunice? Posible, durante el de suyu primer viaje como un misionario que ya conoce le con Loida y Eunice na Listra y posible ya ayuda le kanila para queda maga Cristiano. (Act. 14:4-18) Cuando ya escribi carta si Pablo con Timoteo​—maga 15 año despues​—ta acorda pa siempre si Pablo con el cosa ya hace si Eunice y ya usa con ele como un buen ejemplo de fe que puede imita! Claro que el de suyu ejemplo ya anima gayot con Pablo y posible con el otro maga Cristiano del primer siglo. Si solo-solo tu ta hace engranda con el de tuyu maga anak o gendeh Testigo el de tuyu marido, puede tu asigura que el de tuyu ejemplo de fe ta hace fuerte y ta motiva con aquellos alrededor contigo.

17. Cosa tu debe hace si dol nuay efecto el de tuyu training na de tuyu anak?

¹⁷ Paquemodo si dol nuay efecto na de tuyu anak el de tuyu esfuerzo? Acorda que necesita tiempo para man train con el un anak. Como cosa ta dale mira na letrato, si siembra tu un similla, posible tiene vez ta pensa tu si hay crici ba este y fruta. Maskin pa gendeh tu asigurao si fruta este, ta continua siempre tu rega agua con este para crici. (Mar. 4:26-29) Na igual manera,  como un nana, posible tiene vez ta pensa tu si ta puede ba tu alcanza con el corazon del de tuyu maga anak. Gendeh tu puede controla con el decision que hace sila. Pero, si continua tu hace el todo que puede tu para man train kanila, ta dale tu kanila el de con todo buen oportunidad para queda maga amigo del Dios.​—Prov. 22:6.

18. Paquemodo si Jehova puede ayuda con el de tuyu maga anak para queda amigo de suyu?

¹⁸ Desde na tiempo del Biblia, ya ayuda si Jehova con el manada jovenes para queda maga amigo de suyu. (Sal. 22:9, 10) Puede tambien le ayuda con el de tuyu maga anak para queda fuerte na espiritual, si ese el diila deseo. (1 Cor. 3:6, 7) Maskin pa el de tuyu maga anak dol gendeh ta sirvi con Jehova con todo corazon, hay continua le ama kanila. (Sal. 11:4) Si dale sila mira maskin diutay señal que “tiene [sila] justo condicion de corazon,” preparao le ayuda kanila para queda de suyu amigo. (Act. 13:48, NWT; 2 Cron. 16:9) Posible, ayuda le contigo habla el justo cosas na justo tiempo​—na tiempo que bien necesita se oi el de tuyu maga anak. (Prov. 15:23) O puede le manda move con el un hermano o hermana na congregacion para dale mira personal interes kanila. Maskin pa queda ya adulto el de tuyu maga anak, posible hace bira si Jehova na diila pensamiento el cosa tu ya enseña kanila de antes. (Juan 14:26) Si continua tu man train con el de tuyu maga anak por medio na palabra y ejemplo, hay bendici contigo si Jehova.

19. Porque tu puede asigura que hay tene tu el favor de Jehova?

¹⁹ El amor de Jehova para contigo gendeh ta depende na decision que hace el de tuyu maga anak. Ta ama le contigo cay ta ama tu con ele. Si solo tu ta hace engranda con el de tuyu maga anak, si Jehova ya promete que hay queda le Tata na de tuyu maga anak y hay protege le contigo. (Sal. 68:5) Gendeh tu puede controla si iscuji ba el de tuyu maga anak que hace justo decision o gendeh. Pero si continua tu confia na ayuda de Jehova y hace el de tuyu de con todo bueno, hay tene tu el de suyu favor.