EL LINGASA igual como pesades na diaton corazon. (Prov. 12:25) Ya experiencia ba tu grabe pressure por causa na lingasa na vida? Ya puede ba tu sinti que dol gendeh ya tu puede aguanta? Si ansina, gendeh tu solo. Manada kanaton el posible ta cuida maga enfermo, ya muri el pariente o amigo, ya experiencia natural calamidad o ta enfrenta otro maga situacion que ta causa kanaton para man luya na fisical, mental y emocional. Pero, cosa kanaton puede ayuda si tan lingasa kita? a

Manada kita cosa puede aprende acerca si paquemodo enfrenta con el lingasa si considera kita con el ejemplo de Rey David. Ya experiencia le manada dificultad y gane tiene tiempo, na peligro el de suyu vida. (1 Sam. 17:34, 35; 18:10, 11) Paquemodo si David ya enfrenta con el lingasa? Paquemodo kita puede imita con el de suyu ejemplo?

Ya enfrenta manada probanza si David na un tiempo lang. Considera, por ejemplo, con el cosa ya sucede cuando ta escapa le con Rey Saul. Cuando si David y el de suyu maga soldao ya bira na diila campo, ya discubri sila que el diila maga enemigo ya saca con el diila maga cosas, ya quema con el diila casa y ya saca con el diila familia. Cosa el reaccion de David? “Ya llura suena si David y el maga hombre junto con ele hasta nuay mas ya sila fuerza para llura.” Ya omenta pa el lingasa de David cuando el maga hombre con quien le ta confia ya “plaña guerria piedra con ele.” (1 Sam. 30:1-6) Ahora, ya enfrenta tres grande problema si David na un tiempo lang: Na peligro el de suyu familia, el maga hombre quierre mata con ele y si Rey Saul ta hace pa siempre apas con ele. Poreso, imagina con el lingasa que ya sinti si David!

Cosa sunod ya hace si David? Ya hace le dayun “fuerte con el de suyu mismo cuerpo na ayuda de Jehova el de suyu Dios.” Paquemodo si David posible ya hace con este? Sabe kita que si David ta pidi ayuda con Jehova na rezo y ta pensa si paquemodo si Jehova ya ayuda con ele de antes. (1 Sam. 17:37; Sal. 18:2, 6) Sabe si David que necesita le pidi el direccion de Jehova poreso ya pregunta le con Jehova si cosa le debe hace. Despues ricibi si David el direccion de Jehova, ya actua le dayun. Como resulta, ya bendici si Jehova con ele y con el maga hombre junto con ele y ya puede sila saca oleh con el diila familia y maga propiedad. (1 Sam. 30:7-9, 18, 19) Ya puede ba tu nota si cosa el tres accion que ya hace si David? Ya reza le con Jehova, ya pensa si paquemodo si Jehova ya ayuda con ele de antes y ya actua asegun na direccion de Jehova. Paquemodo kita puede imita con David? Considera con el tres manera.

1. Reza. Cada vez kita man lingasa, puede kita reza con Jehova para na ayuda y sabeduria. Puede ayuda para sinti kita alivio si reza kita y habla el todo cosas con ele. O puede kita hace corto y silencio rezo si ese lang el ta permiti na diaton circumstancia. Cada vez ta pidi kita ayuda con Jehova, ta dale kita mira confianza igual con David quien ya habla: “Si Jehova el de mio grande piedra y el de mio fortaleza, el quien ta salva conmigo. El de mio Dios amo el de mio piedra,  el de mio refugio.” (Sal. 18:2) Tiene ba gayot cosa ta puede hace el rezo? El un pioneer hermana que el nombre Kahlia ya habla: “Despues yo reza, ta tene yo paz. El rezo ya puede ayuda conmigo para pensa igual con Jehova y mas ya queda grande el de mio confianza con ele.” Poreso, el rezo amo un bonito regalo estaba con Jehova que puede ayuda kanaton para enfrenta con el lingasa.

2. Pensa. Si acorda tu con el de tuyu vida de antes, puede ba tu pensa maga probanza que ya puede tu aguanta por medio lang na ayuda de Jehova? Si pensa kita si paquemodo si Jehova ya ayuda kanaton y con el de suyu maga siervo de antes, hay tene kita paz y queda grande el diaton confianza con ele. (Sal. 18:17-19) “Tiene yo un lista de maga rezo que ya contesta si Jehova,” ya habla el un anciano que si Joshua. “Ya hace este acorda conmigo el maga tiempo cuando ya pidi yo con Jehova un especifico cosa y ya dale le el cosa yo necesita.” Si pensa kita si cosa ya si Jehova ya hace para kanaton, hay tene kita el fuerza para enfrenta con el lingasa.

3. Actua. Antes kita decidi si cosa hace na un situacion, puede kita busca na Palabra del Dios el de con todo buen guia que puede kita confia. (Sal. 19:7, 11) Manada ta habla que si tan research sila acerca na un particular texto, mas ta puede sila entende si paquemodo el texto puede aplica na diila vida. El un anciano que si Jarrod ya explica: “Si tan research yo, ta ayuda este conmigo para mira con el todo aspeto del un versiculo y entende si cosa si Jehova ta habla conmigo. Ya ayuda este conmigo para queda convincido na cosa yo ya le y actua asegun na de suyu guia.” Si ta pidi kita el direccion de Jehova estaba na Escritura y ta aplica con ese direccion, mas facil kita puede enfrenta con el lingasa.

Ya entende si David que necesita le el ayuda de Jehova para puede enfrenta con el lingasa. Ya aprecia gayot le con el suporta de Jehova y ya manda este move con ele para habla: “Por medio na poder del Dios puede yo subi na pader. El verdadero Dios amo el quien ta dale conmigo fuerza.” (Sal. 18:29, 32) Posible, ta sinti kita que bien dificil el diaton problema igual na un bien alto pader. Pero na ayuda de Jehova, puede kita subi con el maskin cosa pader de probanza! Si reza kita con Jehova, pensa con el todo cosa le ya hace para kanaton y actua asegun na de suyu direccion, puede kita asigura que hay dale le kanaton el fuerza y sabeduria que necesita kita para enfrenta con el diaton maga lingasa!