1. Cosa maga espiritual goal kita puede hace?

 COMO maga verdadero Cristiano, ta ama gayot kita con Jehova. Quierre kita hace el diaton de con todo bueno para sirvi con ele. Pero para puede kita hace el todo para con Jehova, necesita kita hace maga espiritual goal, igual como cultiva maga buen calidad, aprende maga usable skill y busca manera para sirvi con otro. b

2. Porque kita debe hace maga espiritual goal y hace esfuerzo para alcanza con ese?

² Porque kita debe queda interesao que hace progreso na espiritual? Una, quierre kita hace alegre con el diaton amable Tata na cielo. Alegre si Jehova si ta mira le que ta usa kita enbuenamente con el diaton maga talento y abilidad na de suyu servicio. Puera con ese, quierre tambien kita progresa na espiritual para puede kita mas ayuda con el diaton maga hermano y hermana. (1 Tes. 4:9) Maskin pa ya dura ya kita na verdad, todo kita puede hace espiritual progreso. Mira kita si paquemodo kita puede hace con ese.

3. Asegun na 1 Timoteo 4:12-16, cosa ya anima si apostol Pablo con Timoteo que hace?

³ Cuando ya escribi si apostol Pablo con el de suyu primer carta con Timoteo, este joven hombre un experienciao anciano ya na ese tiempo. Maskin pa ansina, ya anima con ele si Pablo  que continua hace maga espiritual progreso. (Le con el 1 Timoteo 4:12-16.) Mientras ta pensa con el maga palabra de Pablo, puede tu nota que quierre le que progresa si Timoteo na dos manera: (1) cultiva maga buen calidad igual na amor, fe y pagka-limpio na moral, y (2) progresa na maga abilidad igual na lehida na publico, dalida de consejo y enseñada. Mientras ta considera con el ejemplo de Timoteo, mira kita si paquemodo kita progresa na espiritual si hace kita maga goal que puede kita alcanza. Hay discuti tambien kita cuanto manera que puede kita hace mas na diaton ministerio.

4. Asegun na Filipo 2:19-22, porque un usable siervo si Timoteo de Jehova?

⁴ Porque un usable siervo si Timoteo de Jehova? Por causa se na de suyu maga buen calidad. (Le con el Filipo 2:19-22.) Na cosa ya habla si Pablo, puede kita mira que si Timoteo humilde, leal, trabajador y puede con ele depende. Amable le y interesao gayot con el maga hermano y hermana. Como resulta, ya ama con ele si Pablo y nuay man alang-alang dale con ele maga dificil responsibilidad. (1 Cor. 4:17) Na igual manera, hay ama kanaton si Jehova y queda kita mas usable na congregacion si cultiva kita maga calidad que ta gusta le.—Sal. 25:9; 138:6.

5. (a) Paquemodo tu puede decidi si cosa buen calidad cultiva? (b) Como cosa ta dale mira na letrato, cosa ya hace el mas joven hermana para puede alcanza el goal que dale mira mas empatia con otro?

⁵ Iscuji un especifico goal. Reza y pensa acerca si cosa parte del de tuyu personalidad el necesita tu progresa. Iscuji un especifico calidad que quierre tu mejora. Por ejemplo, puede ba tu cultiva mas empatia o tene mas fuerte deseo para suporta con el maga hermano y hermana? Puede ba tu queda mas preparao para mentena paz y perdona con otro? Puede contigo ayuda si habla tu na un amigo con quien tu ta confia que dale contigo sugestion si paquemodo tu progresa.—Prov. 27:6.

6. Cosa tu puede hace para alcanza con el de tuyu goal que mejora na un calidad?

⁶ Hace esfuerzo para alcanza el de tuyu goal. Paquemodo tu se puede hace? El un manera amo si estudia tu enbuenamente con el calidad que quierre tu mejora. Pone kita que ya decidi tu que queda mas pronto perdona con otro. Puede tu principia si le tu y medita acerca na maga ejemplo na Biblia de aquellos  quien ya perdona con otro y de aquellos nuay. Considera el ejemplo de Jesus. Preparao le ya perdona con otro. (Luc. 7:47, 48) Nuay le man focus con el diila maga kamali sino ya mira le con el diila potencial. Gendeh igual con Jesus, el maga Fariseo “ta desprecia con otros.” (Luc. 18:9) Despues medita con este maga ejemplo, pregunta con el de tuyu mismo cuerpo: ‘Cosa yo ta mira na otro? Cosa maga calidad diila el ta iscuji yo man focus?’ Si tan dificil tu perdona con el un persona, pruba escribi con el todo de suyu buen calidad. Despues, pregunta con el de tuyu mismo cuerpo: ‘Paquemodo si Jesus ta mira con este persona? Hay perdona ba le con ele?’ Si hace kita se, puede kita cambia con el diaton pensamiento. Na principio, posible necesita kita hace grande esfuerzo para perdona con el un persona quien ya hace sinti duele kanaton. Pero si continua kita mejora na este aspeto, llega el tiempo mas pronto ya kita perdona con otro.

7. Harmonia na Proverbio 22:29, na cosa manera ta usa si Jehova con el maga ma-abilidad trabajador ahora?

⁷ El otro goal que puede tu hace amo que aprende un usable skill. Considera si paquemodo de manada trabajador el necesita para construi con el maga facilidad de Bethel, Assembly Hall y Kingdom Hall. Manada de este maga trabajador el ya aprende con el diila maga skill cuando ya trabaja sila junto con el maga experienciao hermano y hermana. Como cosa ta dale mira na letrato, el maga hermano y hermana ta aprende el maga skill que necesita para ayuda mentena con el maga Assembly Hall y Kingdom Hall. Por medio de este y na otro maga manera, si Dios Jehova, “el Rey eterno” y si Cristo Jesus, “el Rey del maga rey,” ta puede hace maga grande cosas por medio de este maga ma-abilidad trabajador. (1 Tim. 1:17; 6:15; le con Proverbio 22:29.) Quierre kita hace esfuerzo y usa con el diaton maga abilidad para dale gloria con Jehova, gendeh con el diaton mismo cuerpo.—Juan 8:54.

8. Paquemodo tu puede decidi si cosa skill tu aprende?

⁸ Iscuji un especifico goal. Cosa skill el puede tu aprende? Pregunta con el maga anciano na congregacion o posible na de ustedes circuit overseer si cosa skill el ta mira sila que puede tu tene. Si por ejemplo ya habla sila que necesita tu mejora con el de tuyu abilidad na converzada y enseñada, pidi kanila que ayuda contigo identifica si na cosa especifico aspeto tu necesita progresa. Despues, hace esfuerzo para mejora. Paquemodo tu con este hace?

9. Paquemodo tu puede alcanza con el de tuyu goal que aprende un skill?

⁹ Hace esfuerzo para alcanza con el de tuyu goal. Pone kita que quierre tu progresa con el de tuyu abilidad de enseñada. Puede tu estudia enbuenamente con el brosyur Progresa na De Tuyu Lehida y Enseñada. Si ya dale contigo un parte na midweek meeting, puede tu pidi con el un cualificao hermano que oi adelantao con el de tuyu presentacion y dale sugestion si paquemodo mejora con ese. Prepara adelantao con el de tuyu maga assignment para puede mira el otro que ta hace tu esfuerzo y puede confia contigo.—Prov. 21:5; 2 Cor. 8:22.

10. Dale un ejemplo si paquemodo kita progresa na un skill.

¹⁰ Paquemodo si el skill que quierre tu mejora amo un cosa que gendeh gayot tu bueno? No man luya! El un hermano que el nombre Garry yan dificil na lehida. Ta acorda le si paquemodo de maka-huya cuando ya pricura ele le suena na maga miting na congregacion. Pero, ya hace le esfuerzo para mejora. Ahora,  ele ya habla que por causa na training que ya ricibi le, ta puede ya le dale maga talk na Kingdom Hall y maga asemblea!

11. Igual con Timoteo, cosa puede ayuda kanaton para queda preparao na mas omento maga responsibilidad?

¹¹ Ya queda ba bueno si Timoteo na dalida talk y enseñada? Nuay menciona el Biblia. Pero asigurao, ya queda mas efectivo si Timoteo na de suyu maga responsibilidad cay ya sigui le con el consejo de Pablo. (2 Tim. 3:10) Na igual manera, si pricura kita tene maga skill, hay queda kita mas preparao para ricibi maga omento responsibilidad.

12. Paquemodo tu ya beneficia na servicio del otro?

¹² Todo kita ta beneficia na servicio del otro. Si yan hospital kita, alegre kita si ta visita el maga anciano quien ta sirvi na Hospital Liaison Committee o na Patient Visitation Group. Si ta enfrenta kita un dificil situacion na diaton vida, ta aprecia kita si el un amable anciano ta dale tiempo para oi y dale comforta kanaton. Si necesita kita ayuda na un Bible study, alegre kita si el un experienciao pioneer ya sigui kanaton na estudiada y ya dale maga sugestion. Todo este maga hermano y hermana alegre ayuda kanaton. Puede kita queda alegre si hace kita esfuerzo para sirvi con el diaton maga hermano. “Mas grande el alegria de aquel quien ta dale contra con el quien ta recivi,” ya habla si Jesus. (Act. 20:35) Si quierre tu hace pa mas na de tuyu servicio na este maga aspeto o na otro pa, cosa puede ayuda contigo para alcanza con el de tuyu maga goal?

13. Si ta hace un goal, cosa kita debe acorda?

¹³ No hace goal que gendeh especifico. Por ejemplo, puede tu pensa, ‘Quierre yo hace mas na congregacion.’ Pero, posible dificil sabe si paquemodo tu alcanza con ese goal y posible gendeh tambien tu puede sabe si cuando tu ya alcanza con ese. Poreso, iscuji un claro y especifico goal. Gane, puede tu escribi con el goal y si paquemodo tu ta plaña alcanza con ese.

14. Porque kita necesita queda preparao man adjust si ta hace maga goal?

¹⁴ Necesita tambien kita queda preparao man adjust si ta hace maga goal. Porque? Cay gendeh kita controlao con el diaton maga circumstancia. Para ilustra: Ya puede ayuda si apostol Pablo forma con el un nuevo congregacion na  ciudad de Tesalonica. Y asigurao, tiene le goal que esta alla y ayuda con aquellos maga nuevo Cristiano. Pero cay tiene tan contra, forzao ya sale si Pablo na aquel ciudad. (Act. 17:1-5, 10) Si ya esta si Pablo, posible le pone na peligro con el de suyu maga hermano. Pero, nuay descanza si Pablo. Sino, yan adjust le na de suyu nuevo circumstancia. Nuay dura, ya imbia le con Timoteo para dale el espiritual necesidad del maga nuevo Cristiano na Tesalonica. (1 Tes. 3:1-3) Sin duda, bien alegre gayot el maga de Tesalonica cay preparao si Timoteo anda onde con ele necesita.

15. Paquemodo el maga circumstancia que gendeh kita controlao puede afecta con el diaton maga goal? Ilustra.

¹⁵ Tiene kita cosa puede aprende na experiencia de Pablo na Tesalonica. Posible, ta pricura kita alcanza un privilegio pero por causa na maga circumstancia que gendeh kita controlao, gendeh kita puede alcanza con ese. (Ecl. 9:11) Si deverasan se na de tuyu situacion, queda preparao iscuji diferente goal que puede tu alcanza. Ese el cosa ya hace el un maridable que si Ted y Hiedi. Por causa na problema na salud, necesita sila sale na Bethel. Pero, el diila amor para con Jehova ya manda move kanila para busca otro manera para hace pa mas na diila ministerio. Una, ya sirvi sila como maga regular pioneer. Nuay dura, ya queda sila maga special pioneer y yan train con Ted para queda un substitute circuit overseer. Despues, ya cambia el age limit para na maga circuit overseer. Ya realiza si Ted y Hiedi que gendeh mas sila puede tene este privilegio. Maskin pa triste, sabe sila que puede sila sirvi con Jehova na otro maga manera. Si Ted ya habla, “Ya puede kame aprende que no man focus na un clase lang de servicio.”

16. Cosa leccion kita puede aprende na Galacia 6:4?

¹⁶ No puede kita controla con el todo cosa ta sucede na diaton vida. Poreso, importante que gendeh kita pensa que el diaton privilegio amo el ta hace kanaton valoroso o compara con el diaton maga privilegio na cosa tiene el otro. Si Hiedi ya explica, “Hay perde el de tuyu paz si compara tu con el de tuyu vida na cosa ta sucede na vida del otro.” (Le con el Galacia 6:4.) Importante que busca kita maga manera donde puede kita queda usable. c

17. Cosa tu puede hace para queda cualificao na maga privilegio?

¹⁷ Queda preparao ricibi maga privilegio por medio que hace simple con el de tuyu vida y evita maga debe que gendeh necesita. Hace maga diutay goal que puede contigo ayuda alcanza con el de tuyu maga grande  goal. Por ejemplo, si goal de tuyu que man regular pioneer, puede ba tu sirvi como continuous auxiliary pioneer ahora? Si goal de tuyu que sirvi como un siervo ministerial, puede ba tu dale mas tiempo na predicacion y visita con el maga enfermo y de edad na de ustedes congregacion? El experiencia que puede tu tene ahora puede ayuda contigo alcanza maga privilegio na futuro. Queda determinao que hace el de tuyu de con todo bueno na maskin cosa assignment que ya dale contigo.—Roma 12:11.

18. Cosa tu ya aprende na ejemplo de Beverley? (Mira tambien con el letrato.)

¹⁸ Maskin cosa pa el diaton edad, puede kita hace y alcanza maga espiritual goal. Considera con el ejemplo del un 75 año hermana que el nombre Beverley. Tiene le un grande problema na salud poreso tan dificil le camina. Pero, quierre le hace pa mas na campaña durante el Comemoracion. Poreso, ya hace le maga especifico goal. Cuando ya alcanza si Beverley con el de suyu maga goal na aquel campaña, bien alegre gayot le. El de suyu esfuerzo ya motiva tambien con otro que hace pa mas na ministerio. Ta aprecia si Jehova con el maga trabajo del diaton maga de edad hermano y hermana, maskin pa limitao el cosa sila ta puede hace por causa na diila circumstancia.—Sal. 71:17, 18.

19. Cosa el cuanto espiritual goal que puede kita hace?

¹⁹ Hace maga goal que puede tu alcanza. Cultiva el maga calidad que ta hace alegre con Jehova. Aprende maga skill que puede ayuda contigo queda mas usable na diaton Dios y na de suyu organizacion. Busca maga manera para mas sirvi con el de tuyu maga hermano y hermana. d Igual con Timoteo, na bendicion de Jehova “todo sila ay mira si paquemodo tu ta adelanta.”—1 Tim. 4:15.