1. Onde estaba el diaton abilidad para converza?

 EL DIATON abilidad para converza amo un regalo estaba na diaton amable Dios. Cuando ya crea con el primer gente, si Adan, puede le usa maga palabra para comunica con el de suyu Tata na cielo. Puede tambien le hace maga nuevo palabra para omenta de suyu vocabulario. Ya usa si Adan con ese abilidad para hace con el de suyu assignment que nombra con el todo maga animal. (Gen. 2:19) Y asigurao, bien alegre gayot le cuando por primer vez yan cuento le con el otro gente​—el de suyu bonita mujer, si Eva!​—Gen. 2:22, 23.

2. Na cosa manera nuay usa enbuenamente con el palabra de antes y na presente?

² Nuay tarda, ese regalo de converzada nuay usa enbuenamente. Si Satanas Diablo yan imbusterias con Eva y ese imbusterias ya causa con el maga gente para peca y queda imperfecto. (Gen. 3:1-4) Si Adan nuay usa enbuenamente con ese regalo cuando ya disculpa le con Eva​—y gane maskin con Jehova​—por causa na de suyu mismo kamali. (Gen. 3:12) Si Cain yan imbusterias con Jehova despues le mata con el de suyu hermano, si Abel. (Gen. 4:9) Despues del cuanto tiempo, un descendiente de Cain que si Lamek ya hace un poem que ta dale mira el violencia na de suyu tiempo. (Gen. 4:23, 24) Quetal na diaton tiempo ahora? Puede kita observa que tiene vez el maga lider de politica gendeh ta tiene huya usa maga gendeh bueno palabra na publico. Y mayoria del maga salida ahora ta contene maga mal palabra. El maga estudiante ta oi con ese na escuela y el maga adulto ta oi tambien con ese na trabajo. Makatriste cay ese maga gendeh bueno palabra ta dale lang mira el bajo principio de moralidad y converzada que puede kita mira na este mundo.

3. Na cosa kita debe tene cuidao y cosa kita considera na este articulo?

³ Si gendeh kita tene cuidao, posible man anad kita oi maga  gendeh bueno palabra que principia tambien kita usa con ese. Siempre, como maga Cristiano, quierre kita hace alegre con Jehova poreso nunca kita usa maga mal palabra. Pero, debe tambien kita usa con el regalo de converzada na buen manera​—para alaba con el diaton Dios. Na este articulo, hay considera kita si paquemodo kita con ese hace (1) na ministerio, (2) na maga miting na congregacion y (3) si tan cuento kita con otro. Pero una, considera kita si porque importante con Jehova el diaton converzada.

4. Asegun na Malaquias 3:16, porque importante con Jehova el diaton converzada?

⁴ Le con el Malaquias 3:16. Si Jehova ya escribi na “libro de recuerdo” el maga nombre de aquellos el converzada ta dale mira que tiene sila miedo con ele y ta medita con el de suyu nombre. Ya puede ba tu pensa si porque? El diaton converzada ta revela si cosa el na diaton corazon. Si Jesus ya habla: “El boca ta comversa lang si cosa ta sale na corazon.” (Mat. 12:34) El cosa kita ta iscuji para man cuento ta dale mira si paquemodo de grande el diaton amor con Jehova. Y quierre si Jehova que aquellos quien ta ama con ele hay vivi hasta para cuando con alegria na nuevo mundo.

5. (a) Cosa el coneccion del diaton adoranza na cosa kita ta habla? (b) Como cosa puede mira na letrato, cosa kita debe realiza acerca na diaton converzada?

⁵ El manera del diaton converzada puede determina si aceptable ba el diaton adoranza con Jehova. (Sant. 1:26) El cuanto de aquellos quien gendeh ta ama con Dios ta converza na rabiao, gendeh bueno y orgulloso manera. (2 Tim. 3:1-5) Asigurao, no quierre kita queda igual kanila. Quierre kita hace alegre con Jehova na diaton converzada. Pero, queda ba alegre si Jehova si usa kita maga buen palabra na diaton maga miting o na ministerio pero gendeh bueno el diaton manera de converzada na diaton familia si nuay otro quien ta mira y ta oi?​—1 Ped. 3:7.

6. Cosa el buen resulta cay ta converza si Kimberly na buen manera?

⁶ Si ta usa kita enbuenamente con el regalo de converzada, ta dale kita mira que ta adora  kita con Jehova. Ta ayuda kita con aquellos alrededor kanaton para mira el diferencia “entre del quien ta sirvi con Dios y del quien gendeh ta sirvi con ele.” (Mal. 3:18) Este el cosa ya sucede con Hermana Kimberly. b Yan assign con ele que hace project junto con el de suyu un classmate na high school. Despues sila trabaja junto, ya puede nota el classmate de Kimberly que diferente le na otro maga estudiante. Gendeh le ta habla mal cosas acerca con otro, ta converza le na buen manera y gendeh le ta habla malo. Yan bilib el classmate de Kimberly y na uliji, ya conforma este man Bible study. Asigurao, alegre si Jehova si ta converza kita na manera que puede ayuda con el maga gente para queda interesao na verdad!

7. Cosa tu determinao hace na regalo de converzada estaba con Dios?

⁷ Todo kita quierre converza na manera que ta dale honor con Jehova y queda cerca con el diaton maga hermano y hermana. Poreso, considera kita ahora con el cuanto practical manera donde puede kita continua queda ejemplo na diaton converzada.

8. Cosa ejemplo ya dale si Jesus kanaton na de suyu manera de converzada na ministerio?

⁸ Converza na buen manera y con respeto si tiene quien manda rabia contigo. Durante el ministerio de Jesus, falso ya acusa con ele como un gente burrachon, tragon, ta trabaja para con el Diablo, gendeh ta sigui con el Ley de Sabbath y nuay respeto con Dios. (Mat. 11:19; 26:65; Luc. 11:15; Juan 9:16) Pero, nuay contesta si Jesus na rabiao manera. Igual con Jesus, gendeh kita debe man balus si tiene man cuento kanaton na gendeh buen manera. (1 Ped. 2:21-23) Siempre, gendeh se facil hace. (Sant. 3:2) Cosa puede ayuda kanaton?

9. Cosa puede ayuda kanaton para controla con el diaton converzada si ta predica kita?

⁹ Pricura no rabia si converza el householder na gendeh buen manera. El un hermano que si Sam ya habla, “Ta pricura yo man focus que bien necesita oi el householder con el verdad y na de suyu potencial que cambia.” Tiene vez, rabiao el householder por causa lang cay ya anda kita na gendeh justo tiempo. Si ya puede kita man cuento con el un persona que rabiao, puede kita hace el cosa ya hace si Hermana Lucia. Puede kita hace corto rezo, pidi con Jehova que ayuda kanaton esta calmao y gendeh habla maga cosas que gendeh bueno y nuay respeto.

10. Asegun na 1 Timoteo 4:13, cosa debe el diaton goal?

¹⁰ Queda mas efectivo maestro. Un experienciao ministro si Timoteo pero maskin pa ansina, necesita le continua progresa na espiritual. (Le con el 1 Timoteo 4:13.) Paquemodo kita queda mas efectivo maestro na ministerio?  Debe kita prepara enbuenamente. Bueno ya lang, manada kita maga tool que puede ayuda kanaton para queda mas buen maestro. Puede contigo ayuda el informacion na brosyur Progresa na De Tuyu Lehida y Enseñada y el seccion “Queda Mas Efectivo na Ministerio” na Vida y Ministerio de Cristiano—Workbook de Miting. Ta usa ba tu con este maga publicacion? Si ta prepara kita enbuenamente, gendeh kita tanto nervia y mas con confianza kita si converza.

11. Paquemodo el cuanto Cristiano ya queda mas buen maestro?

¹¹ Puede tambien kita queda mas buen maestro si observa kita con otro na congregacion y aprende na diila ejemplo. Si Sam que ya menciona enante ya pregunta con el de suyu mismo cuerpo si cosa ya puede ayuda con el cuanto Cristiano para queda buen maestro. Ya estudia le con el diila manera de enseñada y despues, ya pricura imita kanila. El un hermana que si Talia ta pone gayot atencion con el maga experienciao speaker si ta dale sila con el diila public talk. Como resulta, ya aprende le si paquemodo converza y discuti con el maga topico que comon ta pregunta na ministerio.

12. Cosa maga dificultad ta enfrenta el cuanto?

¹² Todo kita puede ayuda para tene buen exito el diaton maga miting na congregacion si con gana kita canta y dale maga preparao comento. (Sal. 22:22) El cuanto tan dificil canta o dale comento na publico. Ansina ba tu? Si ansina, hay queda tu interesao sabe si cosa ya puede ayuda con otro para ganá con el diila miedo.

13. Cosa posible puede ayuda contigo para canta con todo corazon na maga miting?

¹³ Canta con todo corazon. El de con todo importante razon si porque kita ta canta na diaton maga miting amo para alaba con Jehova. El un hermana que si Sara gendeh ta considera con el de suyu mismo cuerpo que bien bueno canta. Pero, quierre le alaba con Jehova por medio na cancion. Poreso si ta prepara le para na maga miting, ta prepara tambien le con el maga cancion. Tan practice le canta con el maga cancion y ta pricura mira si cosa el coneccion del maga palabra del cancion na topico que hay discuti na miting. “Ya ayuda este conmigo para mas man focus na maga palabra y gendeh na de mio abilidad de cantada,” ya habla le.

14. Si huyain tu, cosa contigo puede ayuda para man comento na maga miting?

¹⁴ Regular man comento. Deverasan, dificil este para na cuanto. “Ta nervia gayot yo si tan cuento enfrente del otro maga gente, maskin pa el otro gendeh con este ta puede nota cay calmao lang el de mio voz,” ya explica si Talia que ya menciona enante. “Poreso, bien dificil para conmigo que man comento.” Pero, nuay  se sangga con Talia para dale comento. Si ta prepara le para na miting, ta pone le na de suyu pensamiento que el primer comento debe corto y directa el contestacion na pregunta. Ele ya habla: “Quierre decir de este que OK lang si el de mio contestacion corto, simple y directa na punto cay amo este el clase de contestacion que ta busca el conductor.”

15. Cosa kita debe acorda acerca na diaton maga comento?

¹⁵ Maskin el maga Cristiano quien gendeh huyain posible tiene vez gendeh man comento. Porque? El un hermana que si Juliet ya explica, “Tiene vez, tan alang-alang yo man comento cay ta sinti yo que el de mio comento bien simple y gendeh bonito.” Pero, acorda que quierre si Jehova que dale kita el diaton de con todo buen comento que puede kita dale. c Ta aprecia gayot le con el diaton determinacion que alaba con ele na maga miting na congregacion y gendeh permiti con el diaton miedo que sangga kanaton.

16. Cosa clase de converzada el debe kita evita?

¹⁶ Evita con el todo clase de ‘insulto de palabra.’ (Ef. 4:31) Como ya menciona enante, gendeh debe habla malo el un Cristiano. Pero, tiene otro forma de palabra que necesita tambien kita tene cuidao. Por ejemplo, necesita kita tene cuidao que gendeh habla mal cosas acerca na maga gente de otro cultura, tribo o nacionalidad. Omento pa, no quierre kita hace sinti duele con otro por medio na maga palabra de insulto. El un hermano ya admiti: “Tiene vez, ta habla yo maga cosas que pensaba yo maka-risas y gendeh peligroso pero gendeh gale quel bueno y ta sinti duele el otro. Mientras ta pasa el tiempo, grande ayuda gayot el de mio mujer cay ta habla le conmigo na privado si el de mio converzada gendeh bueno y ta hace sinti duele con ele y con otro.”

17. Harmonia na Efeso 4:29, paquemodo kita puede anima con otro?

¹⁷ Converza na manera que puede anima con otro. Comenda en vez de busca mali con otro o reclama. (Le con el Efeso 4:29.) Manada cosa debe rindi gracias el maga Israelita pero pirmi sila ta reclama. Si pirmi kita ta reclama, puede este causa con otro para reclama tambien. Acorda que el un negativo report estaba na diez espia ya causa con “el todo Israelita [para] murmura contra con Moises.” (Num. 13:31–14:4) Pero si comenda kita con otro, puede este ayuda para queda mas alegre el todo. Puede kita asigura que el comendacion que ya ricibi el anak mujer de Jefte que estaba na de suyu maga amiga, ya puede gayot anima con ele para esta na de suyu assignment. (Juez  11:40) Si Sara que ya menciona enante ya habla, “Si ta dale kita comendacion, ta manda kita sinti con otro que ta ama kanila si Jehova y tiene sila lugar na de suyu organizacion.” Poreso, busca oportunidad para dale sincero comendacion.

18. Base na Salmo 15:1, 2, porque kita debe habla el deverasan y cosa el incluido aqui?

¹⁸ Habla si cosa el deverasan. Gendeh kita puede hace alegre con Jehova si gendeh kita honesto. Ta odia le con el todo clase de imbusterias. (Prov. 6:16, 17) Maskin pa manada gente ahora el ta considera que normal lang man imbusterias, ta evita kita con ese cay ya habla si Jehova que gendeh se justo. (Le con el Salmo 15:1, 2.) Siempre, ta evita kita directa man imbusterias pero ta evita tambien kita esconde maga informacion que posible causa con otro para tene gendeh justo conclusion.

19. Na cosa pa kita necesita tene cuidao?

¹⁹ Evita hace calayat chismis. (Prov. 25:23; 2 Tes. 3:11) Si Juliet que ya menciona arriba ya explica si cosa el efecto del chismis con ele. Ele ya habla: “Gendeh ta puede anima conmigo si ta oi yo chismis y ta perde el de mio confianza con el persona quien ta hace chismis. Mas pa, paquemodo yo sabe que gendeh tambien le tan chismis conmigo na otro?” Si ta mira tu que ta queda ya chismis el cuento, man cuento maga positivo cosas.​—Col. 4:6.

20. Cosa tu determinao hace acerca na de tuyu converzada?

²⁰ Ciendo ta vivi kita na un mundo donde manada gente el ta habla malo, debe kita hace esfuerzo para asigura que el diaton converzada ta hace alegre con Jehova. Acorda que el converzada amo un regalo estaba con Jehova y importante con ele si paquemodo kita ta usa con ese. Hay bendici le con el diaton esfuerzo para man cuento na positivo manera na ministerio, na maga miting y si tan cuento kita con otro. Si termina ya con el influencia de este mal sistema, mas facil ya para kanaton que honra con Jehova por medio na diaton palabra. (Jud. 15) Mientras tanto, queda determinao que hace alegre con Jehova por medio na “maga palabra del [de tuyu] boca.”​—Sal. 19:14.