El un juramiento amo “un bien serioso, formal declaracion o promesa para hace un cosa, donde tiene vez ta menciona que el Dios . . . amo testigo.” Puede con este habla o escribi.

Posible, el cuanto pensa que malo jura cay si Jesus ya habla: “No gayot ustedes jura . . . Asigura que el de ustedes ‘Si’ quierre decir si, el de ustedes ‘Gendeh,’ gendeh, cay el sobra con ese ta sale con el uno que malo.” (Mat. 5:33-37, NWT) Siempre, sabe si Jesus que na Ley de Moises, necesita el maga Israelita jura na cuanto circumstancia y el maga fiel siervo del Dios ya hace maga juramiento. (Gen. 14:22, 23; Ex. 22:10, 11) Sabe tambien le que mismo si Jehova ya hace maga juramiento. (Heb. 6:13-17) Poreso, gendeh quierre decir de Jesus que gendeh gayot kita debe jura. Sino, ya dale le aviso con el maga gente que no jura acerca na maga cosas que gendeh importante o nuay valor. Debe kita pirmi cumpli con el diaton palabra cay amo se el cosa quierre si Jehova que hace kita.

Entonces, cosa tu debe hace si ya pidi contigo que hace un juramiento? Una, asigura que puede tu hace con el cosa tu hay jura. Si gendeh tu asigurao, mas bueno si gendeh ya lang tu hace con ese. El Palabra del Dios ta dale aviso: “Mas bueno pa si no tu promete contra promete pero gendeh tu puede cumpli.” (Ecl. 5:5) Sunod, considera con el maga principio na Escritura acerca na juramiento y despues, actua harmonia na de tuyu conciencia que base na Biblia. Cosa el cuanto de este maga principio?

El cuanto juramiento harmonia na voluntad del Dios. Por ejemplo, ta hace promesa el maga Testigo de Jehova si ta casa sila. Este maga promesa amo un clase de juramiento. Adelante del Dios y del otro maga testigo, el mujer y el hombre ta promete que hay ama, aprecia y respeta sila con uno y otro, y hay hace sila con ese “mientras [sila] dos vivo.” (El otro posible gendeh habla el igual maga palabra si ta casa sila pero ta hace sila siempre un promesa adelante con Dios.) Despues, hay declara kanila como marido y mujer y el diila matrimonio hay esta mientras vivo sila. (Gen. 2:24; 1 Cor. 7:39) Este arreglamiento propio, justo y harmonia na voluntad del Dios.

El cuanto juramiento contra na voluntad del Dios. El un verdadero Cristiano gendeh hace ansina juramiento, igual que usa maga armas para defende con el un nacion o gendeh mas sirvi con Dios. Contra se na mandamiento del Dios. El maga Cristiano debe “gendeh del mundo” poreso gendeh kita debe entramete na maga issue y conflicto de este.​—Juan 15:19; Isa. 2:4; Sant. 1:27.

El cuanto juramiento puede hace base na conciencia. Tiene vez, necesita kita pensa enbuenamente acerca con el consejo de Jesus que “devolve  . . . con Cesar el maga cosa-cosa de Cesar, y devolve tamen con Dios el maga cosa-cosa de Dios” antes decidi si hace un juramiento.​—Luc. 20:25.

Pone kita, por ejemplo, que el un Cristiano ta man apply para queda ciudadano (citizen) o para na un passport y ya sabe le que necesita le hace un juramiento de lealtad. Si na aquel nacion, ese juramiento quierre decir que actua le na manera que contra na ley del Dios, el de suyu conciencia que base na Biblia posible gendeh permiti con ele para hace con ese. Pero, posible permiti con ele el gobierno que cambia con el cuanto palabra na ese juramiento para gendeh le man conciencia hace con ese.

Ese juramiento de lealtad posible harmonia na principio que puede incuntra na Roma 13:1 que ta habla: “Todo el maga gente necesita obedece con el autoridad del gobierno.” Poreso, el un Cristiano posible decidi que gendeh malo jura y hace con el un cosa que daan ya ya pidi el Dios con el maga Cristiano.

Envuelto tambien el conciencia si ya pidi contigo que usa un cosa o hace un accion mientras ta jura. El maga Romano y maga Escita de antes ta jura por medio del diila maga espada que ta dale mira que ta usa sila el simbolo del un dios de guerra como un garantia que puede confia con el un persona. El maga Griego ta alza el diila un mano para na cielo si ta hace un juramiento. Na ansina manera, ta conoce sila que tiene un poderoso persona quien ta observa con el cosa ya habla y cosa ya hace, y con quien responsable el maga gente.

Siempre, el un siervo de Jehova gendeh hay jura na maskin cosa simbolo del nacion que conectao na falso adoranza. Pero, paquemodo si ya pidi contigo na corte que pone el de tuyu mano na un Biblia y jura que dale tu deverasan testimonia? Na ese situacion, puede tu decidi que hace con ese ciendo el Escritura ta habla que tiene maga fiel siervo quien ya jura mientras ta hace un accion. (Gen. 24:2, 3, 9; 47:29-31) Importante para acorda que si hace tu con ese juramiento, ta jura tu adelante con Dios que hay habla tu el verdad. Necesita tu queda preparao que habla el verdad na maskin cosa que hay pregunta contigo.

Cay valoroso kanaton el diaton relacion con Jehova, debe kita considera enbuenamente con el maskin cosa juramiento que hay hace kita, mientras ta asigura que gendeh se contra na diaton conciencia o na maga principio del Biblia. Si decidi tu hace un juramiento, debe tu asigura que cumpli tu con ese.​—1 Ped. 2:12.