Na ese situacion, hay mira el congregacion con el primer matrimonio como ya termina ya cuando ya casa otravez el hombre y hay mira con el nuevo matrimonio como valido. Para entende con el maga razon si porque kita puede dale este conclusion, considera kita con el cosa ya habla si Jesus acerca na divurcio y si casa otravez el un persona.

Como cosa ta habla na Mateo 19:9, ya identifica si Jesus si cosa el solamente valido razon para termina con el un matrimonio. Ele ya habla: “El hombre quien ta separta con su mujer​—fuera lang si por causa de immoralidad​—y ta casa con otro mujer, ta comete adulterio.” Na maga palabra de Jesus, puede kita aprende (1) que el sexual imoralidad amo el solamente valido razon estaba na Biblia para termina con el un matrimonio y man divurcio y (2) que el un hombre quien tan divurcio con el de suyu mujer que gendeh base na Biblia y ta casa con otro ta comete adulterio. a

Quierre decir ba del maga palabra de Jesus que el hombre quien ya comete sexual imoralidad y yan divurcio con el de suyu mujer puede ya casa otravez base na Biblia? Gendeh ansina na todo situacion. Si ya comete adulterio el marido, el mujer que amo el inocente puede decidi si perdona ba le con el de suyu marido o gendeh. Si nuay le perdona con el de suyu marido y yan divurcio sila, puede sila dos casa otravez si ya completa ya el proceso de divurcio.

Pero, posible que quierre preserva el mujer con el diila matrimonio poreso ya habla le con el de suyu marido que perdona le con este. Pero, paquemodo si el marido quien ya comete adulterio gendeh interesao na perdon del de suyu mujer y quierre siempre man divurcio con este? Cay quierre perdona el mujer con el de suyu marido y continua el diila matrimonio, el marido gendeh puede casa otravez base na Biblia. Si continua le hace con el cosa le quierre y casa con otro persona maskin pa nuay con ele permiti el Biblia, ta comete le adulterio otravez. El maga anciano hay forma otravez un judicial committee para mira con el de suyu caso.​—1 Cor. 5:1, 2; 6:9, 10.

Si el un hombre ya casa otravez maskin pa nuay con ele permiti el Biblia, cosa el mirada del congregacion na primer matrimonio y con el nuevo matrimonio? Base na Biblia, valido ba siempre el primer matrimonio? Puede ba siempre decidi el mujer que perdona o gendeh con el de suyu marido de antes? Hay mira ba con el man maridable na nuevo matrimonio como ta continua comete adulterio?

Del antes, ta mira el congregacion con el man maridable na nuevo matrimonio como ta continua comete adulterio si el inocente marido o mujer vivo pa, nuay casa otravez y nuay comete sexual imoralidad. Pero, nuay menciona si Jesus acerca con el inocente marido o mujer cuando ya discuti le acerca con el un persona que yan divurcio y ya casa otravez. Sino, ya explica le que si el un hombre yan divurcio con el de suyu mujer maskin pa nuay con este permiti na Biblia y despues  ya casa otravez con el otro persona, este hombre ya comete adulterio. Na este situacion, ciendo yan divurcio el hombre y ya casa otravez, que ya habla si Jesus que dol igual lang como ya comete le adulterio, ya termina el diila primer matrimonio.

Si el un hombre yan divurcio con el de suyu mujer y ya casa otravez, gendeh mas posible para con el inocente mujer que perdona o gendeh con el de suyu marido. Poreso, gendeh mas le necesita hace con el dificil decision que perdona ba o gendeh con el de suyu marido de antes. Mas pa, el mirada del congregacion con este nuevo matrimonio gendeh ta depende si el inocente mujer ya muri, ya casa otravez o ya comete sexual imoralidad. b

Na ejemplo arriba, el marido ya comete adulterio que ya causa para man divurcio sila. Pero, paquemodo si el marido nuay comete adulterio pero yan divurcio con el de suyu mujer y ya casa otravez? O paquemodo si nuay comete sexual imoralidad el marido antes el divurcio pero ya hace se despues del divurcio y acabar ya casa otravez maskin pa conforme con ele perdona el de suyu mujer? Na este maga ejemplo, cay yan divurcio y ya casa otravez el marido que igual lang como ya comete le adulterio, hay termina el diila matrimonio de antes. Ese nuevo matrimonio valido y legal. Como cosa ya habla na Noviembre 15, 1979, issue del The Watchtower, pagina 32, “ya entra le ahora na un nuevo matrimonio y gendeh le puede basta termina con este y bira con el de suyu primer mujer; ya termina ya el diila primer matrimonio cay yan divurcio le, ya comete adulterio y ya casa otravez.”

Este cambio na diaton entendimiento gendeh quierre decir que gendeh mas sagrao el matrimonio o gendeh serioso pecado el adulterio. Si el un hombre yan divurcio con el de suyu mujer maskin pa gendeh este base na Biblia y despues ya casa otro persona maskin pa nuay con ele permiti el Biblia, el maga anciano hay forma un judicial committee cay ya comete le adulterio. (Si el de suyu nuevo mujer un Cristiano, hay forma tambien el maga anciano un judicial committee cay este mujer ya comete adulterio.) Maskin pa gendeh ta mira con el man maridable na nuevo matrimonio como ta continua comete adulterio, el hombre gendeh queda cualificao na maga especial privilegio na congregacion por manada año hasta gendeh mas queda destorbao el maga gente na cosa le ya hace o hasta bira el diila respeto con ele. Antes con ele dale maskin cosa privilegio, el maga anciano hay considera con el presente circumstancia del de suyu mujer de antes y maskin quien menor de edad anak con quien posible ya abandona el marido.​—Mal. 2:14-16.

Ciendo bien serioso el consequencia si el un persona man divurcio que gendeh base na Biblia y casa otravez, sabio el maga Cristiano si imita sila con Jehova y mira como sagrao con el matrimonio.​—Ecl. 5:4, 5; Heb. 13:4.