1. Porque kita tan comento na maga miting?

 PORQUE kita ta atende na maga miting na congregacion? El primer razon amo para alaba con Jehova. (Sal. 26:12; 111:1) Ta atende tambien kita na maga miting para puede kita anima con uno y otro na este maga dificil tiempo. (1 Tes. 5:11) Si ta alza kita con el diaton mano y ta dale comento, ta puede kita hace con ese dos cosas.

2. Cuando kita puede man comento na diaton maga miting?

² Cada semana, tiene kita maga oportunidad para man comento na diaton maga miting. Por ejemplo, durante el weekend, puede kita participa na Estudiada del El Torre de Guardia. Na diaton maga midweek miting, puede kita man comento durante el Espiritual Tesoro, Estudiada del Congregacion na Biblia y na otro pa maga parte donde tiene discusion.

3. Cosa maga dificultad kita posible enfrenta y paquemodo puede ayuda el Maga Hebreo 10:24, 25?

³ Todo kita quierre alaba con Jehova y anima con el diaton maga hermano y hermana. Pero posible, tan dificil kita dale comento. Baka ta nervia kita dale comento o quierre kita man comento pero gendeh kanaton tanto ta llama. Cosa puede ayuda kanaton? Nota si cosa ya escribi si apostol Pablo na maga Hebreo. Cuando ya discuti le con el importancia del maga miting, ya habla le que debe kita man focus que “dale animo con uno y otro.” (Le con el Maga Hebreo 10:24, 25.) Si acorda kita que puede anima con otro el diaton maga expresion de fe maskin pa simple este, ta ayuda este para gendeh  kita tanto nervia dale comento. Y si gendeh kanaton tanto ta llama, puede siempre kita queda alegre cay puede man comento el otro na congregacion.​—1 Ped. 3:8.

4. Cosa tres punto kita discuti na este articulo?

⁴ Na este articulo, hay discuti kita una si paquemodo kita puede anima con uno y otro na diutay congregacion donde poco lang el ta atende y puede man comento. Despues, hay considera kita si paquemodo kita puede anima con uno y otro na grande congregacion donde manada el ta alza mano para man comento. Y na uliji, hay discuti kita si paquemodo kita puede asigura que el cosa kita ta habla na diaton comento ta anima con otro.

5. Paquemodo kita puede anima con uno y otro si poco lang el ta atende?

⁵ Na un diutay congregacion o grupo, poco lang el maga hermano y hermana con quien puede iscuji para man comento. Tiene vez, posible necesita pa espera el conductor antes tiene quien alza mano. Como resulta, dol ta queda boring el miting y asigurao gendeh ese ta puede anima con el maga quien ta atende. Cosa tu puede hace? Queda preparao que pirmi alza mano. Si hace tu se, puede tu motiva con otro que mas man comento tambien.

6-7. Cosa kita puede hace para gendeh tanto nervia dale comento?

⁶ Paquemodo si ta nervia gayot tu que dale comento? Manada el ta sinti igual ansina. Pero para mas puede anima con el de tuyu maga hermano y hermana, puede tu busca manera para menora el de tuyu nervios. Paquemodo tu hace con ese?

⁷ Puede ayuda contigo si man repaso tu con el maga sugestion na cuanto maga issue del El Torre de Guardia. b Por ejemplo, prepara enbuenamente. (Prov. 21:5) Si mas familiar tu na material, mas comfortable tu puede dale comento. Mas pa, hace corto con el de tuyu maga comento. (Prov. 15:23; 17:27) Posible gendeh tu tanto nervia si corto lang el de tuyu comento. Si uno o dos sentence lang este, mas puede con ese entende el maga hermano y hermana contra si dale tu largo comento que bien manada punto. Si dale tu corto comento na de tuyu mismo maga palabra, ta dale tu mira que ya prepara tu enbuenamente y ya puede gayot tu entende con el material.

8. Cosa el mirada de Jehova si ta hace kita el diaton de con todo bueno para dale comento?

⁸ Paquemodo si ya pruba ya tu hace con el cuanto de este maga sugestion pero ta nervia gayot siempre tu dale mas de uno o dos comento? Puede tu asigura que ta aprecia si Jehova con el de tuyu maga esfuerzo cay ta hace tu el cosa tu puede hace. (Luc. 21:1-4) Para puede dale el de tuyu de con todo bueno, gendeh quierre decir que necesita tu hace mas pa na cosa tu puede hace. (Fil. 4:5, NWT) Determina si cosa tu puede hace, hace goal y reza que queda tu calmao. Na primero, puede tu hace goal que dale un corto comento.

9. Porque posible dificil dale comento na maga grande congregacion?

⁹ Si manada publisher na de ustedes congregacion, posible enfrenta tu otro dificultad. Siguro, bien manada maga hermano  y hermana el ta alza mano poreso baka gendeh contigo tanto ta puede llama. Por ejemplo, quierre-quierre man comento si Danielle na maga miting. c Ta mira le con este como parte del de suyu adoranza, un manera para anima con otro y ta ayuda este con ele para mas acorda con el maga verdad na Biblia. Pero cuando ya cambia le na un mas grande congregacion, gendeh mas con ele tanto ta puede llama. Gane tiene vez, gendeh ele ta puede man comento maskin una vez. “Yan luya yo,” ya habla le. “Ya sinti yo que sayang cay nuay yo puede tene el privilegio que man comento. Cuando pirmi quel ta sucede, ya pensa yo que baka intencional quel.”

10. Cosa kita puede hace para tene mas grande chansa que man comento?

¹⁰ Ya puede ba tambien tu sinti igual na cosa ya sinti si Danielle? Si ansina, baka pensa tu que gendeh mas man comento y oi ya lang na miting. Pero, no descanza pricura man comento. Cosa tu puede hace? Baka puede ayuda contigo si prepara tu manada comento para na cada miting. Si gendeh contigo llama para man comento na principio del estudiada, tiene siempre tu oportunidad para man comento. Si ta prepara para na Estudiada del El Torre de Guardia, pensa si cosa el coneccion del cada parapo na tema del articulo. Si hace tu se, posible puede tu hace maga buen comento para na entero leccion. Mas pa, puede tambien tu prepara que man comento na maga parapo que ta discuti maga hondo verdad na Biblia que mas dificil explica. (1 Cor. 2:10) Porque? Cay posible poco lang el man comento na ese parte del leccion. Pero paquemodo si maskin ya aplica ya tu con este maga sugestion, nuay siempre contigo llama despues del cuanto maga miting? Puede tu atraca con el conductor antes el miting y habla con ele si cosa pregunta tu quierre contesta.

11. Cosa kanaton ta anima hace el Filipo 2:4?

¹¹ Le con el Filipo 2:4. Ya guia el Dios con apostol Pablo para anima con el maga Cristiano que mira el bien del otro. Paquemodo kita puede aplica con ese consejo na diaton maga miting? Acorda que gendeh lang kita el quierre participa sino el otro tambien.

12. Cosa el un buen manera para anima con otro na maga miting? (Mira tambien con el letrato.)

 ¹² Pensa este: Si tan cuento tu con el de tuyu maga amigo, etu ya lang ba pirmi el ta converza y nuay mas sila oportunidad para man cuento? Siempre gendeh! Quierre tu que man cuento tambien sila. Na igual manera, si na miting kita, quierre kita que mas manada el man comento. Gane, el uno na maga de con todo buen manera para anima con el diaton maga hermano y hermana amo si dale kita kanila chansa para man comento cay un expresion se del diila fe. (1 Cor. 10:24) Considera kita si paquemodo kita hace con ese.

13. Cosa kita hace para mas manada el quien puede man comento?

¹³ El un cosa que puede kita hace amo dale corto comento para mas manada el quien puede participa. El maga anciano y otro maga experienciao publisher puede dale mira buen ejemplo na este aspeto. Maskin corto el de tuyu comento, evita discuti bien manada punto. Si discuti tu con el todo punto na parapo, nuay mas cosa para man comento el otro. Por ejemplo, na este parapo, dos sugestion el ya dale​—dale corto comento y evita discuti bien manada punto. Si etu el primero quien man comento na este parapo, puede tu dale un punto lang.

14. Cosa kita considera si ta decidi si cuanto beses alza mano? (Mira tambien con el letrato.)

¹⁴ Pensa enbuenamente si cuanto beses tu alza de tuyu mano. Si pirmi kita alza con el diaton mano, posible sinti el conductor que necesita gayot que pirmi llama kanaton maskin pa nuay pa puede man comento el otro. Puede se causa con otro para gendeh mas alza mano.​—Ecl. 3:7.

15. (a) Cosa kita debe hace si nuay kanaton llama para man comento? (b) Paquemodo el maga conductor puede dale mira consideracion con todo? (Mira con el cajon “ Si Etu el Quien Ta Conduci.”)

¹⁵ Si manada publisher el ta alza mano durante el estudiada, posible gendeh kita  manada beses puede man comento. Tiene vez, posible gendeh gayot kanaton puede llama el conductor. Baka sinti kita triste pero gendeh kita debe man sentimiento si nuay kanaton llama.​—Ecl. 7:9.

16. Paquemodo kita puede anima con aquellos quien yan comento?

¹⁶ Maskin nuay tu tanto puede man comento, puede tu oi enbuenamente con el comento del otro y comenda kanila despues del miting. El de tuyu comendacion puede anima con el de tuyu maga hermano y hermana igual si paquemodo puede anima kanila el de tuyu maga comento. (Prov. 10:21) Claro que un manera tambien este para puede anima con uno y otro.

17. (a) Paquemodo puede ayuda el maga mayores con el diila maga anak para prepara maga comento que justo na diila edad? (b) Asegun na video, cosa el cuatro cosas que necesita hace si ta prepara comento? (Mira tambien con el footnote.)

¹⁷ Cosa pa kita puede hace para anima con uno y otro na diaton maga miting? Si un mayores tu, ayuda con el de tuyu maga joven anak que prepara maga comento que justo na diila edad. (Mat. 21:16) Tiene vez, maga serioso cosas el ta discuti na estudiada, igual na maga problema na matrimonio o acerca na moralidad. Pero posible, tiene siempre maga parapo que puede man comento el maga bata. Ayuda tambien con el de tuyu  maga anak para entende si porque posible gendeh kanila pirmi llama si alza sila diila mano. Si hace tu este, puede este ayuda kanila para gendeh man luya si con otro ya llama y gendeh kanila.​—1 Tim. 6:18. d

18. Paquemodo kita puede evita que guinda kanaton el atencion del otro si tan comento kita? (Proverbio 27:2)

¹⁸ Todo kita puede prepara maga comento que ta honra con Jehova y ta anima con el diaton maga hermano y hermana. (Prov. 25:11) Maskin pa tiene vez posible kita relata un corto personal experiencia, debe kita evita sobra man cuento acerca na diaton mismo cuerpo. (Le con el Proverbio 27:2; 2 Cor. 10:18) En vez, quierre kita que el maga ta atende hay man focus con Jehova, na de suyu Palabra y con el de suyu maga siervo. (Rev. 4:11) Siempre, si ta pidi el parapo que dale kita personal comento, justo lang que hace kita con ese. El un ejemplo de este puede mira na sunod parapo.

19. (a) Cosa el resulta si dale kita mira consideracion con todo quien ta atende? (Roma 1:11, 12) (b) Cosa tu personal ya aprecia acerca na dalida de comento na maga miting?

¹⁹ Nuay maga especifico ley acerca na dalida de maga comento pero todo kita puede hace esfuerzo y asigura que el diaton maga comento ta puede anima con otro. Posible necesita kita hace esfuerzo que mas man comento. O gaha necesita kita queda contento na maga oportunidad que tiene kita para man comento y queda alegre que el otro ta puede tambien man comento. Si man focus kita na bien del otro na diaton maga miting na congregacion, todo kita puede “dale animo con uno y otro.”​—Le con el Roma 1:11, 12, El Nuevo Testamento.