1. Na cosa kita convincido?

 COMO maga siervo de Jehova, sabe kita que ta ama le kanaton y quierre le que tene kita el de con todo buen vida. (Roma 8:35-39) Convincido tambien kita que tiene gayot beneficio si aplica kita con el maga principio na Biblia. (Isa. 48:17, 18) Pero, paquemodo si ya enfrenta kita maga problema que nuay kita expecta?

2. Cosa maga problema kita ta enfrenta y cosa kita posible pensa por causa con ese?

² Todo maga siervo de Jehova ta enfrenta problema. Por ejemplo, posible ya queda kita desmayao na un miembro del diaton familia. O ya tiene kita grabe enfermedad que ta limita con el cosa kita ta puede hace na servicio con Jehova. Baka ya queda kita victima del un natural calamidad. O gaha ta persigui kanaton por causa na diaton creencia. Si ta enfrenta kita ansina maga probanza, posible ta pensa kita: ‘Porque este ta sucede conmigo? Tiene ba yo cosa ya hace malo? Señal ba este que gendeh conmigo ta bendici si Jehova?’ Si ya sinti tu igual ansina, no man luya. Manada del maga leal siervo de Jehova ansina tambien ya sinti.—Sal. 22:1, 2; Hab. 1:2, 3.

3. Cosa kita puede aprende na Salmo 34:19?

³ Le con el Salmo 34:19. Nota con el dos importante punto na este salmo: (1) El maga recto persona ta enfrenta maga problema. (2) Ta ayuda kanaton si Jehova na diaton maga probanza. Paquemodo si Jehova ta ayuda kanaton? El un manera que ta hace le se amo que ta ayuda le kanaton que tene realistico mirada na diaton vida na este sistema. Deverasan, ya promete si Jehova que hay tene kita alegria na servicio con ele. Pero,  nuay le habla que gendeh kita tene maga problema na diaton vida ahora. (Isa. 66:14) Ta anima le kanaton que man focus na diaton futuro cuando hay tene kita el vida eterna que quierre le para kanaton. (2 Cor. 4:16-18) Mientras tanto, ta ayuda le kanaton para continua sirvi con ele cada dia.—Lam. 3:22-24.

4. Cosa kita hay discuti na este articulo?

⁴ Discuti kita si cosa kita puede aprende na ejemplo del maga fiel siervo de Jehova na tiempo del Biblia y na diaton tiempo ahora. Como cosa kita aprende, posible kita enfrenta maga problema que gendeh kita ta expecta. Pero si confia kita con Jehova, pirmi gayot le hay ayuda kanaton. (Sal. 55:22) Mientras considera kita con este maga ejemplo, pregunta con el de tuyu mismo cuerpo: ‘Cosa gaha el de mio reaccion si iyo el na ansina situacion? Paquemodo ese maga ejemplo puede hace fuerte con el de mio confianza con Jehova? Cosa maga leccion yo puede aplica na de mio vida?’

5. Cosa maga problema ya enfrenta si Jacob por causa con Laban? (Mira con el letrato na cover.)

⁵ El maga siervo de Jehova na tiempo del Biblia ya enfrenta maga problema que nuay sila expecta. Considera con Jacob. Ya manda con ele el de suyu tata que saca un mujer estaba na maga anak mujer de Laban que un pariente diila quien ta sirvi tambien con Dios. Ya asigura con ele el de suyu tata que bendici gayot con ele si Jehova. (Gen. 28:1-4) Poreso, ya obedece si Jacob. Ya sale le na Canaan y ya viaja para na lugar de Laban quien tiene dos anak mujer, si Lea y Raquel. Ya quierre si Jacob con el menor anak de Laban que si Raquel y ya conforma que trabaja con Laban por siete año para puede casa con Raquel. (Gen. 29:18) Pero, nuay sucede el cosa ta expecta si Jacob. Ya hace con ele loco si Laban y como resulta, ya casa le con el mayor anak de este que si Lea. Ya permiti si Laban que casa si Jacob con Raquel un semana despues si conforma este que trabaja por siete año pa. (Gen. 29:25-27) Yan maru tambien si Laban cuando ta trabaja con ele si Jacob. Todo-todo, 20 año ya sufri si Jacob na maltratamiento de Laban!—Gen. 31:41, 42.

6. Cosa pa otro maga problema ya enfrenta si Jacob?

⁶ Ya enfrenta pa si Jacob otro maga problema. Ya tiene le un grande familia pero gendeh pirmi tan uyun el de suyu maga anak con uno y otro. Gane, ya vende sila con el diila mismo hermano que si Jose para queda un esclavo. El dos anak de Jacob que si Simeon y Levi ya lleva tambien verguenza na diila familia y na nombre de Jehova. Mas pa, el mujer de Jacob que si Raquel ya muri cuando ta pari este con el diila segundo anak. Y por causa na grabe escasez, forzao ya cambia si Jacob para na Egipto maskin pa viejo ya le.—Gen. 34:30; 35:16-19; 37:28; 45:9-11, 28.

7. Paquemodo si Jehova ya dale mira que tiene si Jacob el De Suyu favor?

⁷ Maskin pa na ese todo maga problema, nunca ya perde el fe de Jacob con Jehova y na De Suyu maga promesa. Como resulta, ya dale mira si Jehova que tiene si Jacob el De Suyu favor. Por ejemplo, maskin ya hace con ele loco si Laban, ya bendici si Jehova con Jacob manada material cosas. Y asigurao, ya rindi gayot gracias si Jacob con Jehova cuando ya puede le mira otravez con el de suyu anak que si Jose que pensaba le ya dura ya muerto. Cay tiene cerca relacion si Jacob con Jehova, ya puede le aguanta con este maga problema. (Gen. 30:43; 32:9, 10; 46:28-30) Si mentena kita un cerca relacion con Jehova, puede tambien kita aguanta na maga problema.

8. Cosa si Rey David quierre hace?

 ⁸ Nuay puede hace si Rey David con el todo cosa le quierre hace na servicio con Jehova. Por ejemplo, quierre gayot le construi un templo para con el de suyu Dios. Ya habla le se con profeta Natan. Si Natan ya contesta: “Hace con el maskin cosa que talli na de tuyu corazon cay junto contigo el verdadero Dios.” (1 Cron. 17:1, 2) Asigurao, ya puede gayot anima con David ese maga palabra. Posible ya principia le dayun man plano para con este grande proyecto.

9. Cosa ya hace si David cuando ya ricibi le un maka-triste noticia?

⁹ Pero nuay tarda, ya bira el profeta de Jehova y ya lleva un maka-triste noticia. “Na aquel mismo noche,” ya habla si Jehova con Natan que gendeh si David el construi con el templo. Sino, el uno del de suyu maga anak el hace con ese. (1 Cron. 17:3, 4, 11, 12) Cosa ya hace si David cuando ya ricibi le ese mensaje? Yan adjust le el de suyu goal. Ya colecta le sen y maga materiales que puede usa el de suyu anak, si Solomon, na ese proyecto.—1 Cron. 29:1-5.

10. Paquemodo si Jehova ya bendici con David?

¹⁰ Despues habla con David que gendeh ele el quien construi con el templo, ya hace dayun si Jehova un contrata con David. Ya promete le que el uno na maga descendiente de David hay rula hasta para cuando. (2 Sam. 7:16) Na nuevo mundo, durante el Un Mil Año Rulanza, hay queda bien alegre si David si sabe le que el Rey que si Jesus amo uno del de suyu maga descendiente! Este ta dale kanaton mira que maskin gendeh kita ta puede hace el cosa kita quierre na servicio con Jehova ahora, posible hay dale el Dios kanaton otro maga bendicion que gendeh kita ta expecta.

11. Cosa bendicion ya ricibi el maga Cristiano del primer siglo maskin pa nuay llega el Reino na tiempo que ta expecta sila? (Maga Actividad 6:7)

¹¹ El maga Cristiano del primer siglo ya enfrenta tambien maga problema que nuay sila expecta. Por ejemplo, quierre gayot sila que llega el Reino del Dios pero no sabe sila si cuando se sucede. (Act. 1:6, 7) Cosa sila ya hace? Ya esta sila ocupao na trabajo predicacion. Mientras ta predica sila na mas manada lugar, claro sila ya puede mira que ta bendici si Jehova con el diila esfuerzo.—Le con el Maga Actividad 6:7.

12. Cosa ya hace el maga Cristiano del primer siglo cuando ya tiene escasez de comida?

¹² De antes, ya tiene grabe escasez de comida “na entero mundo.” (Act. 11:28) Ya queda tambien afectao el maga Cristiano del primer siglo. Imagina si cosa el efecto de este kanila. Asigurao yan lingasa el maga mayores si paquemodo sila dale el necesidad del diila familia. Y quetal el maga jovenes quien ta plaña hace pa mas na diila ministerio? Ya pensa ba sila que gendeh ya lang anay porsigui hace con ese? Maskin cosa man el diila situacion, yan adjust el maga Cristiano. Ya continua sila hace el cosa sila puede hace na ministerio y alegre ya imbia maga material ayuda na maga hermano y hermana na Judea.—Act. 11:29, 30.

13. Cosa maga bendicion ya ricibi el maga Cristiano durante el escasez?

¹³ Cosa maga bendicion ya ricibi el maga Cristiano durante el escasez? Aquellos quien ya ricibi material ayuda ya puede mira que ta suporta kanila si Jehova. (Mat. 6:31-33) Asigurao ya queda sila mas cerca na diila maga hermano y hermana quien ya ayuda kanila. Y aquellos quien ya ayuda o ya dale donacion ya experiencia alegria cay ya dale sila ayuda. (Act. 20:35) Ya bendici si Jehova kanila todo cay conforme sila man adjust.

14. Cosa ya sucede con Bernabe y apostol Pablo, y cosa el resulta? (Maga Actividad 14:21, 22)

 ¹⁴ Manada beses ya persigui con el maga Cristiano del primer siglo y tiene vez, na maga tiempo que nuay sila expecta. Considera si cosa ya sucede con Bernabe y con apostol Pablo cuando ta predica sila na Listra. Del una, enbuenamente kanila ya ricibi el maga gente y ya oi kanila. Pero na uliji, el cuanto na ese mismo maga gente ya guerria piedra con Pablo y ya deja con ele que muri cay tiene cuanto quien “ya convinci . . . con el maga gente para man contra con el maga Apostol.” (Act. 14:19) Pero, ya continua predica si Bernabe y Pablo na otro lugar. Cosa el resulta? “Mucho del maga gente ya queda maga dicipulo,” y el maga palabra y ejemplo de este dos apostoles ya puede hace fuerte con el diila maga hermano y hermana. (Le con el Maga Actividad 14:21, 22.) Manada el ya beneficia cay nuay descanza si Bernabe y Pablo maskin pa bigla sila ya enfrenta persecucion. Basta gendeh lang kita descanza na trabajo que ya dale kanaton si Jehova, hay bendici le kanaton.

15. Cosa tu ya aprende na ejemplo de Hermano A. H. Macmillan?

¹⁵ Antes el año 1914, tiene cosa ta expecta el maga siervo de Jehova. Por ejemplo, considera con Hermano A. H. Macmillan. Igual na manada aquel tiempo, ya pensa si Hermano Macmillan que cerca ya le subi na cielo. Na un talk que ya dale le del Septiembre 1914, ya habla le: “Siguro este ya el ultimo discurso publico que hay dale yo.” Siempre, gendeh quel amo el de suyu ultimo talk. Na uliji, si Hermano Macmillan ya escribi: “Siguro el cuanto kanamon dayun lang ya pensa que derepente kame subi na cielo.” Ele ya omenta: “El cosa kame necesita hace amo esta ocupao na trabajo del Señor.” Ya esta gayot ocupao si Hermano Macmillan. Activo le na ministerio. Ya tiene le el privilegio que anima con el manada maga hermano quien yan preso por causa na diila neutralidad. Y ya continua le atende na maga miting de congregacion maskin pa cuando de edad ya le. Cosa beneficio ya ricibi si Hermano Macmillan cay ya usa le enbuenamente con el de suyu tiempo mientras ta espera con el de suyu premio? Nuay dura antes le muri del 1966, ele ya escribi: “Nuay gayot man luya el de mio fe.” Un buen ejemplo gayot le que puede kita todo imita—especialmente si dura ya kita ta experiencia con el un problema!—Heb. 13:7.

16. Cosa problema ya enfrenta kanda Herbert Jennings y de suyu mujer que nuay sila expecta? (Santiago 4:14)

¹⁶ Manada maga siervo de Jehova el ya tiene maga problema na salud que nuay sila expecta. Por ejemplo, na de suyu istoria de vida, ya menciona si Hermano Herbert Jennings b si paquemodo sila del de suyu mujer yan enjoy con el diila assignment como maga misionario na Ghana. Pero ya llega el tiempo, ya puede sila sabe que tiene le un grabe mood disorder. Usando el maga palabra na Santiago 4:14, ya habla si Hermano Jennings que el de suyu nuevo situacion amo igual na un “mañana” que nuay sila expecta. (Le.) Ya escribi le: “Necesita kame acepta con el realidad poreso ya sale kame na Ghana y ya deja con el manada del diamon maga cerca amigo alla y ya bira na Canada [para busca cura].” Ya ayuda si Jehova con Hermano Jennings y con el de suyu mujer para continua na diila fiel servicio maskin pa na problema que ta enfrenta sila.

17. Paquemodo el maga hermano y hermana ya beneficia na ejemplo de Hermano Jennings?

 ¹⁷ El cosa ya menciona si Hermano Jennings na de suyu istoria de vida ya puede gayot ayuda con otro. El un hermana ya escribi: “Ya puede gayot conmigo anima el cosa yo ya le na este articulo. . . . Cuando ya le yo que necesita deja si Hermano Jennings con el de suyu assignment para busca cura na de suyu enfermedad, ya ayuda quel conmigo para tene balance mirada na de mio situacion.” Na igual manera, el un hermano ya escribi: “Despues sirvi como un anciano por diez año, necesita yo deja con el de mio privilegio cay ya tiene yo enfermedad na pensamiento. Ya sinti yo que ya falla gayot yo poreso ya queda dificil para conmigo que le maga articulo acerca na istoria de vida. . . . Pero el esfuerzo de Hermano Jennings para continua na de suyu servicio ya puede gayot anima conmigo.” Este ta hace acorda kanaton que si aguanta kita na maga problema, puede se anima con otro. Maskin ya sucede el maga cosas que nuay kita expecta, puede siempre kita mentena con el diaton fe, aguanta y queda un buen ejemplo para con otro.—1 Ped. 5:9.

18. Como cosa ya ilustra na maga letrato, cosa tu ya aprende na ejemplo del un viuda na Nigeria?

¹⁸ El maga calamidad igual na COVID-19 pandemic ya afecta gayot con el manada del maga siervo de Jehova. Por ejemplo, poco ya lang gayot el comida y sen del un viuda na Nigeria. Un aga, el de suyu anak ya pregunta con ele si cosa sila come si ya acaba ya el ultimo chupa de arroz que tiene sila. Ya habla el hermana con el de suyu anak que nuay mas sila sen o comida pero debe sila imita con el viuda de Sarepta—prepara con el ultimo comida que ya queda y completamente confia con Jehova. (1 Rey 17:8-16) Antes pa sila pensa acerca si cosa sila come na media dia, ya ricibi sila un package de ayuda estaba na maga hermano y hermana. Tiene este comida que bastante para kanila por mas de dos semana. Ya habla el  hermana que nuay le expecta que ya oi gale gayot si Jehova con el cosa le ya habla con el de suyu anak. Deverasan, si confia kita con Jehova si ta enfrenta kita maga problema que gendeh kita ta expecta, puede kita queda mas cerca con ele.—1 Ped. 5:6, 7.

19. Cosa persecucion ya enfrenta si Aleksey Yershov?

¹⁹ Na reciente maga año, manada del diaton maga hermano y hermana el ya experiencia persecucion que posible nuay sila expecta. Considera con Hermano Aleksey Yershov, quien ta queda na Russia. Del 1994, cuando ya bautiza si Hermano Yershov, tiene libertad el maga siervo de Jehova na diila lugar. Pero na uliji, ya cambia el situacion na Russia. Del 2020, ya entra el maga polis na casa de Hermano Yershov y ya confisca con el manada na de suyu maga gamit. Despues del cuanto meses, ya planta caso el gobierno contra con ele. Y el mas duele alla amo que el quien ya dale maga video recording onde yan base con el caso amo el persona quien ya pretende por mas de un año que interesao le estudia con el Biblia. Que bien traidor gayot!

20. Paquemodo ya hace fuerte si Hermano Yershov con el de suyu relacion con Jehova?

²⁰ Tiene ba buen resulta el cosa ya experiencia si Hermano Yershov? Si. Ya queda mas fuerte el de suyu relacion con Jehova. “Mas pirmi kame ahora ta reza del de mio mujer,” ele ya habla. “Sabe yo que gendeh yo puede aguanta con este situacion si nuay el ayuda de Jehova.” Ele ya omenta: “El personal estudiada ta puede ayuda conmigo si tan luya yo. Ta medita yo con el ejemplo del maga fiel siervo de antes. Tiene manada istoria na Biblia que ta dale mira que bien importante que esta calmao y dale mira confianza con Jehova.”

21. Cosa kita ya aprende na este articulo?

²¹ Cosa kita ya aprende na este articulo? Tiene vez, ta experiencia kita maga problema que gendeh kita ta expecta. Maskin pa ansina, pirmi ta ayuda si Jehova con el de suyu maga siervo si ta confia sila con ele. El texto onde yan base el tema de este articulo ta habla: “Manada el dificultad del un recto pero si Jehova ta salva con ele na este todo.” (Sal. 34:19) Ojala continua kita man focus, gendeh na diaton maga problema, sino na ayuda y poder de Jehova. Si hace kita se, igual con apostol Pablo puede kita habla: “Tiene yo fuerza para enfrenta todo cosas por causa con ele quien ta dale conmigo poder.”—Fil. 4:13, NWT.