1. Dale detalle si cosa ya sucede na primer milagro de Jesus.

 IMAGINA con el situacion que ya sucede na fin del 29 C.E. cuando ya principia si Jesus con el de suyu ministerio. Ya invita con Jesus, con el de suyu nana que si Maria y con el cuanto del de suyu maga dicipulo para na un casamiento na Cana, un barrio na norte parte del Nazaret. Amiga si Maria del familia del nuevo casao y ta sale que ta ayuda le atende con el maga visita. Pero, tiene cosa ya sucede que posible hace huya con el familia y con el nuevo casao​—ya acaba el vino. b Posible manada visita el ya llega que nuay sila expecta. Ya anda dayun si Maria con el de suyu anak y ya habla: “Noay mas sila vino.” (Juan 2:1-3) Cosa ya hace si Jesus? Ya hace le un milagro​—ya hace le “vino bueno” con el agua.​—Juan 2:9, 10.

2-3. (a) Cosa maga milagro ya hace si Jesus? (b) Cosa el beneficio si considera kita con el maga milagro que ya hace si Jesus?

² Ya hace pa manada otro milagro si Jesus durante el de suyu ministerio. c Ya usa le con el de suyu poder para ayuda con el miles de maga gente. Por ejemplo, na de suyu dos milagro donde ya dale le come con el 5,000 hombre y na uliji, con el 4,000 hombre, posible ya llega mas de 27,000 gente el  con quien le ya dale come si inclui kita con el maga mujer y maga bata que talla. (Mat. 14:15-21; 15:32-38) Na ese dos ocasion, ya cura tambien si Jesus con el manada enfermo. (Mat. 14:14; 15:30, 31) Asigurao que yan bilib gayot el maga gente cuando ya cura y ya dale kanila come si Jesus!

³ Manada kita cosa puede aprende na maga milagro de Jesus. Na este articulo, hay discuti kita con el cuanto leccion na aquel maga milagro que puede hace fuerte con el diaton fe. Despues, hay examina kita si paquemodo kita puede imita con el humildad y compasion de Jesus cuando ta hace le maga milagro.

4. El maga milagro de Jesus ta enseña kanaton maga leccion acerca con quien?

⁴ El maga milagro de Jesus ta enseña kanaton maga leccion gendeh lang acerca con ele sino acerca tambien na de suyu Tata. Por causa se cay con Jehova estaba el poder para puede hace con aquel maga milagro. El Maga Actividad 10:38 ta habla kanaton: “El Dios ya dale con [Jesus] el Espiritu Santo y el poder, y siendo el Dios talli con Ele, ya anda Le donde-donde, ya hace Le maga buen trabajo y ya cura con todo quien ya queda controlao del Demonio.” Acorda tambien que na todo cosa ya habla y ya hace si Jesus​—incluido el maga milagro que ya hace le​—perfecto le ya imita con el pensamiento y sentido del de suyu Tata. (Juan 14:9) Considera kita tres leccion que puede kita aprende na maga milagro de Jesus.

5. Cosa ya motiva con Jesus para hace maga milagro? (Mateo 20:30-34)

⁵ Una, ta ama gayot kanaton si Jesus y el de suyu Tata. Cuando taqui le na tierra, ya dale mira si Jesus si paquemodo de grande el de suyu amor para na maga gente. Ya usa le el de suyu poder para ayuda con aquellos quien ta sufri. Na un ocasion, el dos bulak hombre ya grita para pidi ayuda con ele. (Le con el Mateo 20:30-34.) Nota que si Jesus “ya tene lastima canila” y despues, ya cura kanila. El Griego palabra que yan translate “ya tene lastima” ta refiri na hondo compasion que ta sinti el un gente. Ese compasion que un expresion de amor amo tambien el ya motiva con Jesus para dale come con el maga con hambre y para cura con el un leproso. (Mat. 15:32; Mar. 1:41) Puede kita asigura que si Jehova, el Dios quien tiene “bien grande lastima,” y el de suyu Anak ta ama gayot kanaton y ta sinti duele si ta sufri kita. (Luc. 1:78; 1 Ped. 5:7) Asigurao que bien quierre sila que quita con el todo sufrimiento que ta experiencia el maga gente ahora!

6. Cosa poder ya dale el Dios con Jesus?

⁶ Ika-dos, ya dale poder el Dios con Jesus para solva con el todo problema del maga gente. Por medio na de suyu maga milagro, ya dale mira si Jesus que tiene le poder para solva con el todo problema que gendeh kita puede solva si kita-kita lang. Por ejemplo, tiene le el poder para quita con el causa del maga problema del maga gente​—el pecado y el maga efecto de este, incluido ya el enfermedad y muerte. (Mat. 9:1-6; Roma 5:12, 18, 19) El de suyu maga milagro ta dale mira que puede le cura con el “todo clase de emfermedad” y resucita pa gane con el maga muerto. (Mat. 4:23; Juan 11:43, 44) Tiene tambien le el poder para controla con el maga fuerte tifun y libra con el maga gente desde na maga mal espiritu. (Mar. 4:37-39; Luc. 8:2) Ta dale gayot kanaton comforta cay sabe kita que ya dale si Jehova ese clase de poder con el de suyu Anak!

7-8. (a) Cosa kita puede asigura por causa na maga milagro de Jesus? (b) Cosa milagro tu ta espera gayot sucede na nuevo mundo?

 ⁷ Ika-tres, puede gayot kita asigura que hay cumpli el maga promesa na futuro bajo na Reino del Dios. El maga milagro que ya hace si Jesus cuando taqui le na tierra ta enseña kanaton si cosa le hace na entero tierra como el Rey del Reino del Dios. Considera si cosa kita cerca ya experiencia bajo na rulanza del Cristo. Hay tene kita perfecto salud cay hay quita le con el todo clase de enfermedad y defecto que ta experiencia el maga gente. (Isa. 33:24; 35:5, 6; Rev. 21:3, 4) Gendeh mas kita queda con hambre o queda victima de maga calamidad. (Isa. 25:6; Mar. 4:41) Hay queda gayot kita alegre cay hay mira kita otravez con el diaton maga familia y amigo quien hay resucita estaba na “maga sepultura.” (Juan 5:28, 29) Cosa milagro tu ta espera gayot sucede na nuevo mundo?

⁸ Cuando ya hace le maga milagro, ya dale mira si Jesus grande humildad y compasion​—maga calidad que debe kita imita. Considera kita dos ejemplo y el una amo el casamiento na Cana.

9. Cosa ya hace si Jesus na un casamiento? (Juan 2:6-10)

⁹ Le con el Juan 2:6-10. Cuando ya acaba el vino na casamiento, obligao ba si Jesus que hace milagro? Gendeh. Nuay profecia que el Mesias hay produci vino por medio de un milagro.  Pero, imagina si cosa tu sinti si nuay mas cosa para toma el maga visita na de tuyu mismo casamiento. Asigurao ya tene compasion si Jesus para con el familia, especialmente con el nuevo casao, y no quierre que man huya sila. Poreso como cosa ya menciona na principio de este articulo, ya hace le un milagro. Ya hace le buen clase de vino con el maga 390 litro de agua. Posible, ya dale si Jesus ansina de manada vino para tiene pa cosa usa na futuro el nuevo casao o puede pa gane sila vende con ese para tene sen. Asigurao ya aprecia gayot quel sila!

10. Cosa el cuanto importante detalle que ya menciona na Juan capitulo 2? (Mira tambien con el letrato.)

¹⁰ Considera con el cuanto importante detalle que ya menciona na Juan capitulo 2. Ya nota ba tu que gendeh si Jesus el ya llena de agua con el maga tinaja? No quierre le que guinda con ele el atencion poreso ya habla le con el maga ayudante que llena con el maga tinaja. (Versiculo 6, 7) Y despues le hace vino con el agua, gendeh si Jesus el ya lleva con el vino con el encargao na celebracion. Sino, ya habla le con el maga ayudante que hace con ese. (Versiculo 8) Asigurao, nuay tambien saca vino si Jesus y para adelante del maga visita y habla, ‘Pruba ustedes con el vino que ya hace yo!’

11. Cosa kita puede aprende na milagro de Jesus?

¹¹ Cosa kita puede aprende na milagro de Jesus cuando ya hace le vino con el agua? Puede kita aprende un leccion acerca na humildad. Nuay man hambug si Jesus acerca con aquel milagro; gane, nunca le yan hambug acerca na maskin cosa que ya puede le hace. En vez, humilde le y ya dale el todo gloria con el de suyu Tata. (Juan 5:19, 30; 8:28) Si imita kita con Jesus y tene humilde mirada na diaton mismo cuerpo, gendeh kita man hambug acerca na cosa kita ta puede hace. Maskin cosa man kita ta puede hace na servicio con Jehova, gendeh kita conviene man hambug acerca na diaton mismo cuerpo sino man hambug kita cay bien marvelloso el Dios con quien kita ta sirvi. (Jer. 9:23, 24) Dale kita con ele el honor que debe para con ele. Cay si nuay el ayuda de Jehova, tiene ba kita cosa puede cumpli?​—1 Cor. 1:26-31.

12. Cosa el otro manera que puede kita imita con el humildad de Jesus? Ilustra.

¹² Considera otro manera que puede kita imita con el humildad de Jesus. Imagina con este ecsena: El un anciano ya dale grande tiempo para ayuda con el un joven siervo ministerial para prepara con el de suyu primer public talk. Como resulta, el joven hermano ya puede dale enbuenamente con el de suyu talk y ya puede gayot este anima con el congregacion. Despues del miting, tiene quien ya atraca con el anciano y ya habla: ‘Bonito gayot el de suyu talk no?’ Hay habla ba el anciano: ‘Si, pero bien grande tiempo yo ya dale para ayuda con ele’? O dale le mira humildad y habla: ‘Si, bonito gayot y bien proud yo con ele’? Si humilde kita, gendeh kita pensa que debe kanaton alaba para na maga buen cosas que ya hace kita para con otro. Contento ya kita cay sabe kita que ta mira y ta aprecia si Jehova con el cosa kita ta hace. (Compara na Mateo 6:2-4; Heb. 13:16) Asigurao, alegre si Jehova si ta imita kita con el humildad de Jesus​—1 Ped. 5:6.

13. Cosa ya mira si Jesus cerca na ciudad de Naim y cosa le ya hace? (Lucas 7:11-15)

¹³ Le con el Lucas 7:11-15. Imagina con este ecsena que ya sucede del 31 C.E. Ta viaja si Jesus para na Naim, un ciudad na Galilea que cerca na Sunem donde si profeta Eliseo  ya resucita con el anak del un mujer maga 900 año ya el ya pasa. (2 Rey 4:32-37) Cuando cerca ya si Jesus na grande puerta del ciudad, ya puede le mira un intierro que pasalida na ciudad. Bien maka-triste el situacion cay ya muri el unico anak del un viuda. Pero gendeh solo el viuda; junto con ele el bien manada gente estaba na diila ciudad. Tiene cosa ya hace si Jesus para con este dolorido nana​—ya resucita le con el anak de este! Este el primero na tres resureccion que ya hace si Jesus que ya menciona na Evangelio.

14. Cosa el cuanto importante detalle na Lucas capitulo 7? (Mira tambien con el letrato.)

¹⁴ Considera con el cuanto importante detalle na Lucas capitulo 7. Ya nota ba tu que “ya mira” si Jesus con el dolorido nana y despues, “ya tene Le lastima con ele”? (Versiculo 13) Posible, ya mira si Jesus que ta llura este nana mientras ta camina cerca na cuerpo del de suyu anak y ya causa este con Jesus para sinti compasion con ele. Pero, nuay lang basta sinti lastima si Jesus con el nana sino ya dale le mira compasion con este. Yan cuento le con este na amable manera y ya habla: “No mas llora.” Despues, tiene pa le cosa ya hace para ayuda. Ya resucita si Jesus con el anak y “ya entrega con ele con su nana.”​—Versiculo 14, 15.

15. Cosa kita puede aprende na milagro de Jesus?

¹⁵ Cosa kita puede aprende cuando ya resucita si Jesus con el anak del viuda? Ya aprende kita que necesita kita dale mira compasion con el maga dolorido. Siempre, gendeh kita puede resucita con el maga muerto igual na cosa ya hace si Jesus. Pero igual con Jesus, puede kita cultiva compasion para con el maga dolorido si dale kita tiempo para observa kanila. Puede kita dale mira compasion si ayuda kita y dale comforta kanila por medio na diaton palabra y accion. d (Prov. 17:17; 2 Cor. 1:3, 4; 1 Ped. 3:8) Maskin el maga simple palabra y accion puede gayot ayuda kanila.

16. Como cosa ya ilustra na letrato, cosa tu ya aprende na experiencia del un nana que nuevo lang ya muri el anak?

 ¹⁶ Considera un experiencia. Cuanto año ya el ya pasa, mientras ta canta na un miting na congregacion, ya puede nota el un hermana que ta llura el un nana que cerca con ele. El cancion aquel tiempo amo acerca na esperanza de resureccion y nuevo lang ya muri el joven anak mujer de este nana. El hermana ya anda dayun, yan agbay con el nana y ya canta el cancion junto con ele. El nana ya habla na uliji: “Ta ama gayot yo con el maga hermano y hermana.” Alegre gayot le cay ya anda le na aquel miting. “Puede kita ricibi ayuda si na Kingdom Hall kita,” ya habla le. Puede kita asigura que ta nota y ta aprecia si Jehova maskin el maga simple cosas que ta hace kita para dale mira compasion con el maga dolorido quien “bien triste.”​—Sal. 34:18.

17. Cosa kita ya aprende na este articulo?

¹⁷ Puede gayot kita beneficia si estudia kita con el maga istoria na Evangelio acerca na maga milagro de Jesus. Ta enseña este que ta ama gayot kanaton si Jehova y Jesus, que si Jesus tiene poder para solva con el todo problema del gente y que puede gayot kita asigura que bien cerca ya kita experiencia el maga bendicion que hay lleva el Reino. Mientras ta examina kita con aquel maga istoria, puede kita medita si paquemodo imita con el maga calidad de Jesus. Puede tu hace un personal study project con el otro maga milagro de Jesus o considera con ese na de ustedes De Familia Adoranza. Mira si cosa maga leccion tu puede aprende y despues, habla tambien se con otro. Si hace tu con ese, puede gayot se anima contigo y con otro!​—Roma 1:11, 12.

18. Cosa kita discuti na sunod articulo?

¹⁸ Cerca na fin del ministerio de Jesus, ya hace le con el de suyu ika-tres y ultimo resureccion que ya menciona na Biblia. Pero, diferente este resureccion cay ya resucita le con el de suyu amigo y otro el situacion de este. Cosa maga leccion kita puede aprende na Evangelio acerca na este milagro? Y paquemodo kita puede hace fuerte con el diaton fe na esperanza de resureccion? El sunod articulo hay considera con ese maga pregunta.