1. Paquemodo ya dale mira el un bata que ta creé le na resureccion?

 EL UN bata hombre que si Matthew tiene un grabe enfermedad y necesita con ele opera manada beses. Cuando siete año le, ta mira le y el de suyu familia con el un programa na JW Broadcasting^®. Cuando cerca ya acaba el programa, ya mira sila con el un music video donde tan welcome con aquellos quien ya resucita. b Despues del programa, ya atraca si Matthew con el de suyu maga mayores, ya agarra con el diila mano y ya habla: “Ya mira ustedes? Maskin muri yo, hay vivi yo otravez por causa na resureccion. Espera lang ustedes conmigo; OK lang se.” Imagina si paquemodo de alegre el maga mayores cay tiene fuerte fe na resureccion el diila anak.

2-3. Porque bueno si pirmi kita pensa con el esperanza de resureccion?

² Bueno para kanaton si pirmi kita pensa con el promesa del Biblia acerca na resureccion na futuro. (Juan 5:28, 29) Porque? Cay no sabe kita si cuando kita tene un grabe enfermedad o si cuando bigla muri el un persona con quien kita ta ama. (Ecl. 9:11; Sant. 4:13, 14) El diaton esperanza na resureccion puede ayuda kanaton para enfrenta con ese maga probanza. (1 Tes. 4:13) El Escritura ta asigura kanaton que el diaton Tata na cielo conoce y ta ama gayot kanaton. (Luc. 12:7) Conoce gayot si Dios Jehova kanaton cay puede le resucita kanaton que igual siempre el diaton personalidad y memoria. Y ta ama gayot le kanaton cay ya dale le kanaton el oportunidad de vida eterna. Maskin muri man kita, hay resucita le kanaton!

³ Na este articulo, hay discuti kita una si porque kita puede creé na promesa de resureccion. Despues, hay examina kita con el istoria na Biblia donde puede mira el texto onde yan base  este articulo: “El dituyo hermano ay resucita.” (Juan 11:23) Y el ultimo, hay aprende kita si paquemodo kita hace fuerte el diaton fe na esperanza de resureccion.

4. Para creé na un promesa, na cosa kita debe queda convincido? Ilustra.

⁴ Para creé na un promesa, debe kita queda convincido que el quien ta hace con el promesa tiene el deseo y poder o abilidad para cumpli con ese. Para ilustra: Imagina que ya destroza el de tuyu casa por causa na un tifun. Ya llega el de tuyu amigo y ya promete, ‘Ayuda yo contigo construi otravez con el de tuyu casa.’ Sincero le y convincido tu que quierre gayot le ayuda contigo. Si sabe le construi y tiene maga tool, sabe tu que tiene tambien le el abilidad para ayuda contigo. Poreso, ta creé tu na de suyu promesa. Quetal si acerca na promesa del Dios de resureccion? Tiene ba gayot le el deseo y poder para cumpli con ese?

5-6. Porque kita puede asigura que tiene deseo si Jehova para resucita con el maga muerto?

⁵ Tiene ba deseo si Jehova para resucita con el maga muerto? Asigurao, tiene gayot. Ya guia le con el cuanto maga escritor del Biblia para escribi con el de suyu promesa de resureccion. (Isa. 26:19; Os. 13:14; Rev. 20:11-13) Y si ta hace promesa si Jehova, pirmi le se ta cumpli. (Jos. 23:14) Gane, quierre gayot hace vivi otravez si Jehova con el maga muerto. Porque se kita puede habla?

⁶ Considera con el maga palabra del patriarca que si Job. Asigurao le que maskin muri le, quierre si Jehova que vivi le otravez. (Job 14:14, 15, ftn.) Ansina tambien ta sinti si Jehova para na todo de suyu maga siervo quien ya muri. Quierre gayot le hace vivi otravez kanila con perfecto salud y alegria. Quetal aquellos billones quien ya muri que nuay tene el oportunidad para aprende el verdad acerca con Jehova? El diaton amable Dios quierre tambien resucita kanila. (Act. 24:15) Quierre le que tene sila el oportunidad para queda de suyu maga amigo y vivi hasta para cuando na tierra. (Juan 3:16) Claro, tiene gayot deseo si Jehova para resucita con el maga muerto.

7-8. Porque kita puede asigura que tiene poder si Jehova para resucita con el maga muerto?

⁷ Tiene ba tambien poder si Jehova para resucita con el maga muerto? Si! Ele “el Todopoderoso.” (Rev. 1:8) Poreso, tiene le poder para ganá contra con el maskin cosa enemigo, maskin con el muerte. (1 Cor. 15:26) Este verdad ta dale kanaton fuerza y comforta. Considera con el experiencia de Hermana Emma Arnold. Ele y el de suyu familia ya experiencia maga grabe probanza na diila fe durante el Guerra Mundial II. Para dale comforta con el de suyu anak mujer cay ya muri el diila maga familia y amigo na Nazi concentration camp, si Emma ya habla: “Si gendeh puede vivi otravez el maga muerto, quierre decir mas poderoso el muerte contra con Dios. Pero imposible se.” Asigurao, nuay maskin cosa el mas poderoso pa contra con Jehova! El todopoderoso Dios quien ya crea con el vida tiene el poder para hace vivi otravez con el maga muerto.

⁸ El otro razon si porque kita puede habla que puede resucita el Dios con el maga muerto amo cay nuay limitacion el de suyu memoria. Ta llama le con el cada estrellas na de este nombre. (Isa. 40:26) Ta acorda tambien le con aquellos quien ya muri. (Job 14:13; Luc. 20:37, 38) Facil lang le puede acorda maskin con el maga diutay detalle de aquellos con quien le hay resucita, incluido el diila ichura, personalidad y el diila maga experiencia na vida.

9. Porque tu ta creé con el promesa de Jehova acerca na resureccion?

 ⁹ Claro, puede kita creé na promesa de Jehova acerca na resureccion cay sabe kita que tiene le el deseo y el poder para cumpli con ese. Considera con el otro razon si porque kita puede creé con este promesa de resureccion: Cay ya hace ya se si Jehova de antes. Ya dale poder si Jehova con el cuanto fiel hombre, incluido con Jesus, para resucita con el cuanto maga individual. Examina kita con el uno na maga resureccion que ya hace si Jesus que puede mira na Juan capitulo 11.

10. Cosa ya sucede cuando ta predica si Jesus na otro lao parte del Jordan y cosa le ya hace? (Juan 11:1-3)

¹⁰ Le con el Juan 11:1-3. Imagina si cosa ya sucede na Betania cerca na fin del 32 C.E. Tiene maga cerca amigo si Jesus na este barrio​—si Lazaro y el de suyu dos hermana, si Maria y Marta. (Luc. 10:38-42) Pero, ya enferma si Lazaro y yan lingasa el de suyu maga hermana. Ya imbia sila un mensaje con Jesus que aquel tiempo talla na otro lao parte del Jordan que maga dos dia el viaje si camina estaba na Betania. (Juan 10:40) Maka-triste cay ya muri ya si Lazaro cuando ya llega el mensajero con Jesus. Maskin sabe si Jesus que ya muri ya el de suyu amigo, ya esta siempre le na aquel lugar por dos dia y despues, yan viaje para na Betania. Poreso cuando ya llega si Jesus, cuatro dia ya muerto si Lazaro. Pero, tiene cosa hay hace si Jesus que puede beneficia el de suyu maga amigo y dale gloria con Dios.​—Juan 11:4, 6, 11, 17.

11. Cosa leccion kita puede aprende na este istoria?

¹¹ Puede kita aprende un leccion na este istoria. Considera este: Cuando ya imbia mensaje si Maria y Marta con Jesus, nuay sila pidi con ele que anda na Betania. Ya habla lang sila que enfermo el de suyu amigo. (Juan 11:3) Cuando ya muri si Lazaro, puede era resucita si Jesus con ele maskin lejos le. Pero, ya iscuji siempre si Jesus anda na Betania para man junto con el de suyu maga amiga que si Maria y Marta. Tiene ba tu un amigo quien hay anda ayuda contigo maskin gendeh tu pidi ayuda? Si tiene, puede tu confia que hay ayuda le contigo na “tiempo de dificultad.” (Prov. 17:17) Igual con Jesus, ojala queda kita ansina clase de amigo con otro! Ahora, bira kita na istoria y mira si cosa sunod ya sucede.

12. Cosa ya promete si Jesus con Marta y porque le puede creé con este promesa? (Juan 11:23-26)

¹² Le con el Juan 11:23-26. Ya puede sabe si Marta que cerca ya si Jesus na Betania. Ya anda le dayun hace encuentro con ele y ya habla: “Si taqui lang Uste antes, mi hermano noay pa era muri.” (Juan 11:21) Deveras, puede era le cura con Lazaro. Pero, mas pa con ese el cosa quierre hace si Jesus. Ele ya promete: “El dituyo hermano ay resucita.” Ya dale pa le otro razon con Marta para creé na este promesa cuando ya habla le: “Yo amo el Resureccion y el Vida.” Si, ya dale poder el Dios con Jesus para resucita con el maga muerto. Del primero, ya resucita le con el un bata mujer nuay  lang dura despues este muri y ya resucita tambien le con el un joven hombre na dia que ya muri este. (Luc. 7:11-15; 8:49-55) Pero, puede ba le resucita con el un persona quien por cuatro dia ya muerto y tan buluk ya el cuerpo?

13. Asegun na Juan 11:32-35, cosa el reaccion de Jesus cuando ya mira le que ta llura si Maria y el otro? (Mira tambien con el letrato.)

¹³ Le con el Juan 11:32-35. Imagina si cosa sunod ya sucede. Si Maria, el otro hermana de Lazaro, ya hace encuentro con Jesus. Ya repiti le con el cosa ya habla el de suyu hermana: “Señor, si taqui lang Uste antes, mi hermano noay pa era muri.” Ele y el otro bien dolorido. Cuando ya mira y ya oi si Jesus que ta llura sila, ya sinti gayot le bien triste. Por causa na de suyu compasion na de suyu maga amigo y amiga, ya llura le. Ta entende le si paquemodo de duele para na un persona si muri el de este familia o amigo. Asigurao, quierre le quita con el causa del diila luha!

14. Cosa kita puede aprende acerca con Jehova na reaccion de Jesus na llurada de Maria?

¹⁴ El reaccion de Jesus na llurada de Maria ta enseña kanaton que si Jehova amo un Dios de compasion. Porque se kita puede habla? Como cosa kita ya aprende del ya pasa articulo, igual gayot el pensamiento y sentido de Jesus na de suyu Tata. (Juan 12:45) Ciendo ya puede kita le que tiene gayot grande compasion si Jesus na de suyu maga amigo y amiga poreso le ya llura, puede kita habla que tiene tambien gayot grande lastima si Jehova si ta mira le que ta llura kita. (Sal. 56:8) Asigurao por causa con ese, quierre tu queda mas cerca con el diaton lastimoso Dios.

15. Asegun na Juan 11:41-44, cosa ya sucede na tumba de Lazaro? (Mira tambien con el letrato.)

¹⁵ Le con el Juan 11:41-44. Ya llega si Jesus na tumba de Lazaro y ya pidi con el maga gente que quita con el piedra que ta tapa con este. Nuay conforma si Marta cay asigurao tiene ya quel mal olor. Si Jesus ya contesta: “Gendeh ba ya habla yo contigo cay si ay cree tu ay puede tu mira el gloria del Dios?” (Juan 11:39, 40) Despues quel, ya mira si Jesus arriba na cielo y ya reza na publico. Quierre le dale todo el gloria con Jehova na cosa sunod sucede. Despues, si Jesus ya grita: “Lazaro! Sale afuera!”  Y ya camina pa-apuera na tumba si Lazaro! Ya puede hace si Jesus con el un cosa que ta pensa el otro que imposible.​—Mira con el study note del Juan 11:17.

16. Paquemodo el istoria na Juan capitulo 11 ta hace fuerte con el diaton fe na resureccion?

¹⁶ El istoria que puede mira na Juan capitulo 11 ta hace fuerte con el diaton fe na esperanza de resureccion. Paquemodo? Acorda con el promesa de Jesus con Marta: “El dituyo hermano ay resucita.” (Juan 11:23) Igual na de suyu Tata, tiene si Jesus el deseo y poder para cumpli con ese promesa. El de suyu llurada ta dale mira que tiene le grande deseo para resucita con el maga muerto y quita con el dolor que ta causa el muerte. Y aquel tiempo cuando ya camina pa-apuera na tumba si Lazaro, ya dale tambien prueba si Jesus que tiene le poder para resucita con el maga muerto. Pensa tambien si cosa ya habla si Jesus con Marta: “Gendeh ba ya habla yo contigo cay si ay cree tu ay puede tu mira el gloria del Dios?” (Juan 11:40) Tiene kita maga razon para creé que hay sucede gayot el promesa del Dios de resureccion. Pero, cosa kita puede hace para queda mas fuerte el diaton fe na este esperanza?

17. Cosa kita debe acorda si ta le kita acerca na maga resureccion na Biblia?

¹⁷ Le y medita acerca na maga resureccion de antes. Na Biblia, tiene ocho istoria de maga gente quien ya vivi otravez aqui na tierra. c Examina con el cada istoria. Mientras ta hace tu se, acorda que maga deverasan gente sila​—maga hombre, mujer y bata. Busca maga leccion que puede tu aprende. Pensa acerca si paquemodo el cada ejemplo ta dale mira el deseo y poder del Dios para hace vivi otravez con el maga muerto. Y asigura que medita con el de con todo importante resureccion​—el resureccion de Jesus. Acorda que manada el quien ya puede mira que ya vivi le otravez y este ta dale  prueba que justo el diaton creencia na resureccion.​—1 Cor. 15:3-6, 20-22.

18. Paquemodo tu puede beneficia na diaton maga cancion acerca na resureccion? (Mira tambien con el footnote.)

¹⁸ Beneficia na “maga cancion espiritual” que ta menciona acerca na esperanza de resureccion. d (Ef. 5:19) Este maga cancion ta hace fuerte con el diaton fe na este esperanza. Oi con el maga cancion, man practice canta con ese y discuti si cosa quierre decir del lyrics durante na de ustedes de familia adoranza. Pone se na de tuyu pensamiento y corazon. Como resulta, si guinda na peligro el de tuyu vida o si ya muri el de tuyu familia o amigo, el espiritu de Jehova hay ayuda contigo para acorda con ese maga cancion para puede se dale contigo comforta y fuerza.

19. Cosa kita puede imagina acerca na resureccion? (Mira con el cajon “ Cosa Tu Hay Pregunta Kanila?”)

¹⁹ Usa con el de tuyu imaginacion. Si Jehova ya dale kanaton abilidad para imagina con el diaton mismo cuerpo na nuevo mundo. El un hermana ya explica: “Pirmi yo ta imagina con el de mio mismo cuerpo na nuevo mundo que dol ta puede yo ole con el maga rosas que ta florea na Paraiso.” Imagina que puede tu man cuento con el maga fiel hombre y mujer na tiempo del Biblia. Con quien tu quierre mira? Cosa tu pregunta con ele? Imagina tambien que puede tu mira otravez con el de tuyu familia o amigo quien ya muri. Pensa acerca si cosa tu una habla kanila, si paquemodo tu abraza kanila y el alegria que hay tene tu si mira tu kanila.

20. Cosa debe el diaton determinacion?

²⁰ Ta rindi gayot kita gracias na promesa de Jehova acerca na resureccion! Puede kita asigura que hay sucede este cay tiene deseo y poder si Jehova para cumpli con este. Ojala queda kita determinao que continua hace fuerte con el diaton fe na este precioso esperanza. Si hace kita se, hay queda kita mas cerca con el diaton Dios quien ya promete con el cada uno kanaton, ‘Hay resucita aquellos con quien tu ta ama!’