1-2. Cosa kita necesita hace mientras ta espera con el nuevo mundo?

 TA APRECIA kita con el promesa de Jehova que hay cambia le con este sistema de maga cosas y hay tene ya un nuevo mundo. (2 Ped. 3:13) Deverasan, no sabe kita si cuando se sucede. Pero el evidencia ta indica que gendeh mas kita necesita dura espera.​—Mat. 24:32-34, 36; Act. 1:7.

² Mientras tanto, maskin ya dura ya kita na verdad, todo kita necesita hace fuerte con el diaton fe na ese promesa. Porque? Cay maskin fuerte el diaton fe, puede se man luya. Gane, si apostol Pablo ya habla que si falta el diaton fe, igual se na “pecado que ta sangga [con] el di aton paso.” (Heb. 12:1, El Nuevo Testamento) Para gendeh man luya el diaton fe, necesita kita regular man repaso con el evidencia que ta dale prueba que cerca ya llega el nuevo mundo.​—Heb. 11:1.

3. Cosa kita hay discuti na este articulo?

³ Na este articulo, hay discuti kita con el tres cosas que puede kita hace para queda fuerte el diaton fe na promesa de Jehova acerca na un nuevo mundo: (1) medita con el rescate, (2) pensa acerca na poder de Jehova y (3) participa na maga espiritual actividad. Despues, hay discuti kita si paquemodo el mensaje de Jehova con Habacuc puede hace fuerte con el diaton fe ahora. Pero, considera kita una con el cuanto situacion que posible kita ta enfrenta ahora donde necesita kita fuerte fe na promesa de nuevo mundo.

 MAGA SITUACION DONDE NECESITA FUERTE FE

4. Cosa el maga decision donde necesita kita fuerte fe?

⁴ Cada dia, ta hace kita maga decision donde necesita kita fuerte fe. Por ejemplo, ta hace kita maga decision acerca na diaton maga asosacion, entretenimiento, educacion, matrimonio, maga anak y secular trabajo. Pregunta kita con el diaton mismo cuerpo: ‘El de mio maga decision ba ta dale mira que asigurao yo que temporario lang este sistema y gendeh dura hay cambia con este el nuevo mundo del Dios? O ta decidi yo igual con aquellos quien ta vivi na manera que dol nuay vida hasta para cuando?’ (Mat. 6:19, 20; Luc. 12:16-21) Hay puede kita hace maga buen decision si hace kita fuerte con el diaton fe que bien cerca ya llega el nuevo mundo.

5-6. Porque kita necesita fuerte fe si ta experiencia maga problema? Ilustra.

⁵ Ta enfrenta tambien kita maga probanza donde necesita kita fuerte fe. Posible, ta experiencia kita persecucion, grabe enfermedad o otro maga cosas que puede kanaton causa para man luya. Na primero, baka determinao gayot kita enfrenta con el maga problema. Pero si ta tarda este​—igual na mayoria del maga problema​—necesita kita fuerte fe para puede kita aguanta y continua sirvi con Jehova con alegria.​—Roma 12:12; 1 Ped. 1:6, 7.

⁶ Durante el un probanza, posible kita sinti que dol gendeh mas llega el nuevo mundo de Jehova. Quierre decir ba de este que maluya el diaton fe? Posible gendeh. Considera con el un ilustracion. Durante el un fuerte tifun, posible kita sinti que dol gendeh mas abuya otravez el sol. Pero sabe kita que abuya siempre se. Na igual manera, si tan luya kita por causa na maga problema, posible kita sinti que dol gendeh mas llega el nuevo mundo. Pero si fuerte el diaton fe, sabe kita que cumpli gayot el maga promesa del Dios. (Sal. 94:3, 14, 15; Heb. 6:17-19) Si tiene kita ansina clase de confianza, puede kita continua hace prioridad con el adoranza con Jehova na diaton vida.

7. Cosa clase de pensamiento el debe kita evita?

⁷ Considera otro pa situacion donde necesita kita fuerte fe​—na trabajo predicacion. Manada gente con quien kita ta predica el “Buen Noticia” ta sinti que imposible llega el nuevo mundo. (Mat. 24:14; Eze. 33:32) No quierre kita que el diila mirada hay influencia kanaton. Para gendeh se sucede, necesita kita continua hace fuerte con el diaton fe. Considera kita tres manera si paquemodo kita puede hace con ese.

MEDITA CON EL RESCATE

8-9. Na cosa manera queda fuerte el diaton fe si medita kita con el rescate?

⁸ El un manera que puede kita hace fuerte con el diaton fe amo si medita kita con el rescate. El rescate ta asigura kanaton que hay cumpli el Dios con el de suyu maga promesa. Si ta pensa kita enbuenamente si porque ya dale con el rescate y si cosa ya sacrificia si Jehova, ta hace kita fuerte con el diaton fe que hay cumpli gayot el promesa del Dios de vida eterna na un bonito mundo. Porque se kita puede habla?

⁹ Bueno, cosa ba ya sacrificia si Jehova? Ya imbia le estaba na cielo con el de suyu unico Anak con quien gayot le ta ama para nace como un perfecto gente. Cuando na tierra si Jesus, ya experiencia le con el todo clase de dificultad. Despues, ya sufri le y ya muri. Grande gayot el cosa ya sacrificia si Jehova! El diaton amable Dios nunca hay permiti que  sufri y muri el de suyu Anak para lang dale kanaton un bonito vida por corto tiempo. (Juan 3:16; 1 Ped. 1:18, 19) Cay grande ya sacrificia si Jehova, hay asigura le que hay vivi gayot kita hasta para cuando na nuevo mundo.

PENSA ACERCA NA PODER DE JEHOVA

10. Asegun na Efeso 3:20, cosa ta puede hace si Jehova?

¹⁰ El segundo manera para puede kita hace fuerte con el diaton fe amo si pensa kita acerca na poder de Jehova. Tiene le poder para cumpli con el todo cosa le ya promete. Deverasan, na mirada del maga gente, dol imposible que vivi kita hasta para cuando na un nuevo mundo. Pero acorda que manada promesa si Jehova que nunca puede cumpli el maga gente. Puede le se hace cay ele el Todopoderoso Dios. (Job 42:2; Mar. 10:27) Poreso, gendeh kita ta estraña si ta hace le maga extraordinario promesa.​—Le con el Efeso 3:20.

11. Dale un ejemplo del maga extraordinario promesa del Dios. (Mira con el cajon “ El Cuanto Maga Extraordinario Promesa que Ya Cumpli.”)

¹¹ Considera con el cuanto cosas que ya promete si Jehova na de suyu maga siervo de antes que dol imposible sucede. Ya asigura le con Abraham y Sara que hay tene sila anak maskin de edad ya sila. (Gen. 17:15-17) Ya habla tambien le con Abraham que hay dale le con el de suyu maga descendiente el lugar de Canaan. Dol imposible cumpli este promesa cay manada año ya queda esclavo el maga descendiente de Abraham, el maga Israelita, na Egipto. Pero, ya sucede quel. Na uliji, ya habla tambien si Jehova que hay tene un anak si Elisabet maskin de edad ya este. Mas pa, ya habla le con Maria, quien un virgen, que pari este un anak hombre. Por medio con este, hay cumpli tambien el otro promesa que ya hace si Jehova na jardin de Eden miles de año ya el ya pasa.​—Gen. 3:15.

12. Cosa ta asigura kanaton el Josue 23:14 y Isaias 55:10, 11 acerca na poder de Jehova?

¹² Si ta pensa kita con el todo promesa que ya hace si Jehova y si paquemodo le ya cumpli con ese, ta queda kita convincido que tiene le grande poder. Como resulta, el diaton fe na de suyu promesa acerca na nuevo mundo ta queda mas fuerte. (Le con el Josue 23:14; Isaias 55:10, 11.) Mas ta puede kita ayuda con otro para entende que gendeh imposible cumpli el promesa acerca na nuevo mundo. Acerca na promesa de nuevo cielo y nuevo tierra, si Jehova mismo ya habla: “Deverasan y asigurao el cosa-cosa yo ta conversa.”​—Rev. 21:1, 5.

PARTICIPA NA MAGA ESPIRITUAL ACTIVIDAD

13. Paquemodo el diaton maga miting na congregacion puede hace fuerte con el diaton fe? Explica.

¹³ El ika-tres manera que puede kita hace fuerte con el diaton fe amo si dale kita tiempo para participa na maga espiritual actividad. Por ejemplo, considera si paquemodo kita ta beneficia na diaton maga miting na congregacion. Si Anna, quien por cuanto decada ya full-time ta sirvi na diferente maga assignment, ya habla: “El maga miting ta ayuda conmigo para mentena con el de mio fuerte fe. Maskin el speaker gendeh tanto bueno enseña o nuay menciona maga nuevo cosas, pirmi yo ta puede oi un cosa que ta ayuda conmigo para mas entende con el un verdad na Biblia y ta hace este fuerte con el de mio fe.” b Asigurao, ta ayuda tambien kanaton si ta puede kita oi con el comento del diaton maga hermano y hermana na miting.​—Roma 1:11, 12; 10:17.

14. Paquemodo el ministerio ta hace fuerte con el diaton fe?

 ¹⁴ Ta queda tambien fuerte el diaton fe si ta participa kita na ministerio. (Heb. 10:23, NWT) Si Barbara, quien ta sirvi con Jehova por mas de 70 año ya, ya habla: “Ta queda gayot fuerte el de mio fe si ta participa yo na trabajo predicacion. Si mas tan cuento yo con otro acerca na maga bonito promesa de Jehova, mas ta queda fuerte el de mio fe.”

15. Paquemodo el personal estudiada ta hace fuerte con el diaton fe? (Mira tambien con el maga letrato.)

¹⁵ Considera otro espiritual actividad que ta hace fuerte con el diaton fe: personal estudiada. El un hermana que si Susan ya habla que tan schedule le si cosa estudia y ya puede se ayuda con ele. Ele ya habla: “Cada Domingo, ta estudia yo con el Estudiada del El Torre de Guardia que hay discuti na sunod semana. Cada Lunes y Martes, ta prepara yo para na midweek miting. Na otro maga dia, ta hace yo con el de mio personal study project.” Cay pirmi le ta sigui con el de suyu schedule de estudiada, ya continua queda fuerte el fe de Susan. Si Irene, quien ta sirvi na world headquarters por cuanto decada ya, ya habla que ta queda fuerte el de suyu fe si ta estudia le maga profecia na Biblia. Ele ya habla: “Tan bilib gayot yo cay ta cumpli maskin el maga diutay detalle na maga profecia de Jehova.” c

“ASIGURAO GAYOT ESTE CUMPLI”

16. Porque aplicable kanaton ahora el asiguranza de Jehova con Habacuc? (Maga Hebreo 10:36, 37)

¹⁶ El cuanto maga siervo de Jehova ta espera por largo tiempo con el fin del sistema de maga cosas. Na mirada del maga gente, bien tarda cumpli el maga promesa del Dios. Pero sabe si Jehova si cosa ta sinti el de suyu maga siervo. Gane, ya asigura le con profeta Habacuc: “El vision ta espera pa con el iscujido tiempo de este y ta apura este para na fin de  este. Maskin pa tarda este, continua expecta con este! Cay asigurao gayot este cumpli. Gendeh este hay atrasa!” (Hab. 2:3) Ese ba asiguranza del Dios para con Habacuc lang? O aplicable tambien se para kanaton ahora? Bajo na guia de Jehova, si apostol Pablo ya aplica con ese maga palabra na maga Cristiano quien ta espera gayot con el nuevo mundo. (Le con el Maga Hebreo 10:36, 37.) Poreso, puede kita asigura que maskin pa dol bien tarda cumpli el promesa del Dios, “asigurao gayot este cumpli. Gendeh este hay atrasa!”

17. Paquemodo ya aplica el un hermana con el consejo de Jehova con Habacuc?

¹⁷ Manada siervo de Jehova el ya aplica con el de suyu consejo que “continua expecta”​—maskin cuanto decada ya se sila ta hace. Por ejemplo, si Louise ya principia sirvi con Jehova del 1939. Ele ya habla: “Aquel tiempo, pensaba yo llega el Armagedon antes yo acaba entra escuela na high school. Pero, nuay quel sucede. Adentro na manada año, el lehida na maga istoria na Biblia acerca na maga gente quien ya espera con Jehova ya ayuda conmigo para espera tambien que cumpli el de suyu maga promesa. Ya le yo acerca con Noe, Abraham, Jose y otro pa. Cay ya continua yo espera y el otro, ya ayuda se kanamon para queda convincido que cerca ya gayot el nuevo mundo.” Tan uyun tambien con ese el manada siervo de Jehova quien ta sirvi con ele por largo tiempo ya!

18. Paquemodo el creacion puede hace fuerte con el diaton fe que hay llega gayot el nuevo mundo?

¹⁸ Deverasan, nuay pa llega el nuevo mundo. Pero pensa acerca con el cuanto maga cosas que ta existi ahora​—el maga estrellas, pono, animal y gente. Convincido kita todo que deverasan este maga cosas maskin pa gendeh este ta existi de antes. Ya queda lang este posible cay ya crea kanila si Jehova. (Gen. 1:1, 26, 27) Proposito tambien del diaton Dios que hace un nuevo mundo. Hay cumpli le con ese proposito. Na nuevo mundo, el maga gente hay tene vida eterna con perfecto salud. Igual na universo ahora, hay queda tambien un realidad el nuevo mundo na iscujido tiempo del Dios.​—Isa. 65:17; Rev. 21:3, 4.

19. Paquemodo tu puede hace fuerte con el de tuyu fe?

¹⁹ Mientras tanto, usa con el cada oportunidad que tiene tu para hace fuerte con el de tuyu fe. Cultiva apresacion para na rescate. Pensa acerca na poder de Jehova. Participa na maga espiritual actividad. Si hace tu se, puede tu queda uno de “aquellos quien, por medio diila fe y paciencia, [hay] hereda el Promesa.”​—Heb. 6:11, 12; Roma 5:5.