1. Cosa quierre si Jehova para kanaton todo?

 BIEN alegre el man maridable si ya nace ya el diila anak. Pero maskin pa ta ama gayot el maga mayores con el diila baby, no quierre sila que esta lang le ansina. Gane, man lingasa gayot sila si gendeh engranda el diila baby. Na igual manera, alegre si Jehova cuando ya principia kita conoce con ele pero no quierre le que hasta alli ya lang kita. (1 Cor. 3:1) Gane, quierre le que “queda [kita] igual como un gente grande” o mature na espiritual.—1 Cor. 14:20.

2. Cosa kita hay considera na este articulo?

² Cosa quierre decir que queda mature na espiritual? Paquemodo kita puede hace con ese? Porque importante el duro espiritual comida para queda un mature Cristiano? Y porque kita debe evita el sobra confianza na cuerpo? Na este articulo, hay considera kita con el maga contestacion na este maga pregunta.

COSA QUIERRE DECIR QUE QUEDA MATURE NA ESPIRITUAL?

3. Cosa quierre decir que queda un mature Cristiano?

³ Na Biblia, el Griego palabra que yan translate “gente grande” quierre decir “mature,” “perfecto” y “completo.” a (1 Cor. 2:6) Ta queda kita mature Cristiano si gendeh mas kita bata na espiritual, sino ta queda ya un espiritual persona. Pero siempre, maskin pa ya alcanza ya kita con ese goal, debe kita continua progresa na espiritual. (1 Tim. 4:15) Todo kita, incluido el maga jovenes, puede queda mature na espiritual. Pero paquemodo kita puede sabe que mature el un Cristiano?

4. Cosa ta dale mira que mature el un Cristiano?

 ⁴ El un mature Cristiano ta sigui con el todo mandamiento del Dios y gendeh ta iscuji si cosa lang le quierre obedece. Pero cay imperfecto le, puede le siempre hace maga kamali. Maskin pa ansina, ta dale le mira cada dia que uyun el cosa le ta pensa y ta hace na querrer de Jehova. Ta dale le mira el nuevo personalidad y pirmi ta pricura tene el pensamiento del Dios. (Ef. 4:22-24) Ya hace le anad con el de suyu mismo cuerpo que hace maga decision base na maga ley y principio de Jehova poreso gendeh le necesita manada ley para dicta si cosa le hace. Y si ya hace le un decision, ta hace le esfuerzo para cumpli con ese.—1 Cor. 9:26, 27.

5. Cosa posible sucede na un Cristiano quien gendeh mature na espiritual? (Efeso 4:14, 15)

⁵ Pero, el un Cristiano quien gendeh mature na espiritual facil lang queda “victima del maldad del maga gente y del diila abilidad para engaña.” Baka creé lang le dayun con el maga falso noticia y con el maga apostata. b (Le con el Efeso 4:14, 15.) Pronto lang le man celos, causa peleajan, man sentimiento o cae na tentacion.—1 Cor. 3:3.

6. Porque semejante el pagka-mature na espiritual na un bata que ta engranda? (Mira tambien con el letrato.)

⁶ Como cosa ya menciona enante, el Biblia ta habla que el pagka-mature na espiritual semejante na un bata que ta engranda. Falta entendimiento el un bata poreso necesita le el proteccion y guia del un adulto. Para ilustra: Posible habla el un nana na de suyu anak que agarra con ele mientras ta travesa sila na calzada. Mientras ta engranda el bata, posible permiti con ele el de suyu nana que travesa solo-solo pero hay habla siempre con ele que con cuidao si ta travesa. Pero si adulto ya el bata, sabe ya le evita con el maga peligro na calzada. Igual si paquemodo el maga bata necesita el ayuda del maga adulto para evita maga peligro, el maga gendeh mature Cristiano necesita el ayuda del maga mature Cristiano para evita maga peligro na espiritual y para puede hace maga justo decision. Pero si ta hace maga decision el maga mature Cristiano, ta pensa sila con el maga principio na  Biblia para sabe el pensamiento de Jehova y despues, ta hace sila si cosa el justo.

7. Necesita ba el maga mature Cristiano con el ayuda del otro?

⁷ Quierre decir ba de este que el un mature Cristiano gendeh mas necesita el ayuda del otro? Gendeh. El maga mature Cristiano necesita siempre ayuda tiene vez. Pero, el un persona quien gendeh mature quierre que habla con ele el otro si cosa le debe hace o pidi con otro que hace el decision para con ele. Gendeh ansina el un mature Cristiano. Ta pidi le ayuda con otro quien tiene mas sabeduria y experiencia pero sabe le que responsable le na de suyu maga decision y debe le “lleva con el de suyu mismo carga.”—Gal. 6:5, NWT.

8. Na cosa manera diferente el maga mature Cristiano con uno y otro?

⁸ Igual si paquemodo otro-otro el ichura del maga adulto, otro-otro tambien el maga calidad del maga mature Cristiano. Posible el otro mas sabio, mas animoso, mas bondadoso y mas lastimoso. Mas pa, si ta enfrenta semejante situacion el dos mature Cristiano, posible diferente el diila decision pero uyun siempre se na maga principio na Biblia. Ta sucede este especialmente si necesita sila hace maga decision que base na diila conciencia. Poreso, ta evita sila juzga con el decision del otro. Sino, ta pricura sila esta unido.—Roma 14:10; 1 Cor. 1:10.

PAQUEMODO EL UN CRISTIANO QUEDA MATURE NA ESPIRITUAL?

9. Automatico ba kita ta queda mature na espiritual? Explica.

⁹ Natural lang para na un bata que engranda y queda adulto mientras ta pasa el tiempo pero gendeh ansina si acerca na pagka-mature na espiritual. Por ejemplo, el maga hermano y hermana na Corinto ya acepta con el buen noticia, ya bautiza, ya ricibi el sagrao espiritu y ya beneficia na cosa ya enseña kanila si apostol Pablo. (Act. 18:8-11) Pero, cuanto año despues del diila bautismo, manada siempre kanila el gendeh mature na espiritual. (1 Cor. 3:2) Cosa kita puede hace para gendeh se sucede kanaton?

10. Paquemodo kita queda mature na espiritual (San Judas 20)

¹⁰ Para queda mature na espiritual, necesita kita tene el deseo para queda mature. Aquellos quien quierre “esta nuay experiencia” o bata na espiritual gendeh gayot progresa. (Prov. 1:22) No quierre kita queda igual con aquellos maga adulto quien ta depende siempre na diila mayores para hace decision para kanila. Sino, quierre kita queda responsable na diaton mismo espiritualidad. (Le con el San Judas 20.) Si quierre tu queda mature na espiritual, reza con Jehova que dale contigo “el voluntad y el fuerza para hace todo maga cosa-cosa.”—Fil. 2:13.

11. Cosa puede ayuda kanaton para queda mature na espiritual? (Efeso 4:11-13)

¹¹ Gendeh ta expecta si Jehova que queda kita mature na espiritual na diaton mismo esfuerzo lang. El maga anciano na congregacion preparao ayuda kanaton para queda mature na espiritual. Como resulta, el diila “costumbre y pensamiento y sentido ay queda igual . . . di Jesucristo.” (Le con el Efeso 4:11-13, El Nuevo Testamento.) Ta dale tambien si Jehova el de suyu sagrao espiritu para ayuda kanaton tene “el pensamiento de Cristo.” (1 Cor. 2:14-16) Mas pa, ya dale el Dios el cuatro Evangelio para sabe kita el pensamiento de Jesus, si cosa le ya habla y ya hace cuando taqui le na tierra. Si imita tu con el pensamiento y accion de Jesus, puede tu queda mature na espiritual.

 IMPORTANTE EL DURO ESPIRITUAL COMIDA

12. Cosa el “primero maga leccion acerca de Cristo”?

¹² Para queda mature na espiritual, gendeh lang kita debe aprende acerca na “primero maga leccion acerca de Cristo” que ta refiri con el maga importante enseñanza acerca con el Cristo. El cuanto ejemplo de este amo el arripintimiento, fe, bautismo y resureccion. (Heb. 6:1, 2) Ese maga enseñanza amo el fundacion del Cristianidad. Poreso, amo se el cosa ya enseña si apostol Pedro cuando ya predica le con el maga gente durante el Pentecostes. (Act. 2:32-35, 38) Debe kita acepta con este maga enseñanza para queda dicipulo del Cristo. Gane, ya habla si Pablo que aquellos quien gendeh ta creé con el resureccion gendeh maga deverasan Cristiano. (1 Cor. 15:12-14) Pero, gendeh kita debe queda contento na maga simple enseñanza lang del Biblia.

13. Cosa kita debe hace para beneficia na duro espiritual comida que ya menciona na Maga Hebreo 5:14? (Mira tambien con el letrato.)

¹³ Gendeh igual na maga simple verdad, incluido na duro espiritual comida el maga ley y principio de Jehova que ta ayuda kanaton para entende si cosa le ta pensa. Para beneficia na ese comida, debe kita estudia, medita y aplica con el cosa kita ya aprende na Palabra del Dios. Si hace kita se, ta aprende kita hace maga decision que ta hace alegre con Jehova. c—Le con el Maga Hebreo 5:14.

14. Paquemodo ya ayuda si Pablo con el maga de Corinto para queda mature na espiritual?

¹⁴ El maga Cristiano quien gendeh mature tan dificil hace justo decision si nuay maga especifico ley na Biblia acerca con ese. Como resulta, posible sila pensa que puede lang sila hace maskin cosa sila quierre. El cuanto posible busca ley maskin gendeh necesita. Por ejemplo, ta sale que el maga Cristiano na Corinto ya pidi con Pablo que dale kanila ley acerca si puede ba sila come con el maga comida que ya ofrece na idolo. En vez habla kanila si cosa hace, ya hace acorda si Pablo que el cada uno tiene conciencia y puede sila ‘usa el diila libertad’ para iscuji. Ya menciona le cuanto principio que ayuda kanila para hace decision que gendeh sila man conciencia  y gendeh hace tisut con otro. (1 Cor. 8:4, 7-9) Na ese manera, ya ayuda si Pablo con el maga de Corinto para queda mature na espiritual y usa con el diila mismo entendimiento en vez depende lang con otro o busca maga ley.

15. Paquemodo ya ayuda si Pablo con el maga Hebreo Cristiano para progresa na espiritual?

¹⁵ Puede kita aprende otro importante leccion na cosa ya escribi si Pablo para na maga Hebreo Cristiano. El cuanto kanila nuay continua progresa na espiritual; gane, “emvez era dale come [kanila] comida duro, necesita dale pa [kanila] leche.” (Heb. 5:12) Nuay sila aprende y acepta con el maga nuevo cosas que ta enseña kanila si Jehova por medio na congregacion. (Prov. 4:18) Por ejemplo, manada del maga Judio Cristiano el ta sigui siempre con el Ley de Moises maskin pa maga 30 año ya el ya pasa cuando ya termina con ese por medio na sacrificio del Cristo. (Roma 10:4; Tito 1:10) Bastante ya era el 30 año para puede sila entende que gendeh mas sila necesita sigui con el Ley! Asigurao, el maskin quien le con el inspirao carta de Pablo para na maga Hebreo puede habla que este libro ta contene gayot duro espiritual comida. Amo gayot quel el cosa sila necesita para hace fuerte con el diila fe que mas bueno el nuevo arreglamiento para na adoranza y para dale kanila el coraje que continua predica maskin pa na oposicion del maga Judio.—Heb. 10:19-23.

EVITA TENE SOBRA CONFIANZA NA CUERPO

16. Puera que progresa na espiritual, cosa pa kita debe hace?

¹⁶ Debe kita hace esfuerzo para queda mature na espiritual y mentena con ese. Para puede se hace, debe kita evita tene sobra confianza na cuerpo. (1 Cor. 10:12) Debe kita “examina el [diaton] cuerpo” para asigura que ta continua kita progresa.—2 Cor. 13:5.

17. Paquemodo ya hace claro el carta de Pablo para na maga de Colosa que importante esta mature na espiritual?

¹⁷ Na de suyu carta para na maga de Colosa, ya dale mira otravez si Pablo que importante esta mature na espiritual. Maskin pa maga mature Cristiano ya sila, ya dale aviso kanila si Pablo que no sale engañao na maga idea del mundo. (Col. 2:6-10) Si Epafras, quien conoce gayot con el maga hermano y hermana na  aquel congregacion, pirmi ta reza que “esta [sila] firmi fuerte y perfecto” o mature na espiritual. (Col. 4:12) Cosa el punto? Sabe si Pablo y si Epafras que para esta mature na espiritual el un persona, necesita le hace esfuerzo y pidi el ayuda del Dios. Quierre sila que el maga de Colosa hay esta mature na espiritual maskin pa na maga dificultad que ta enfrenta sila.

18. Cosa posible sucede con el un mature Cristiano? (Mira tambien con el letrato.)

¹⁸ Ya dale aviso si Pablo con el maga Hebreo que puede perde permanente el favor del Dios con el un mature Cristiano. Puede queda bien duro el corazon del un Cristiano que donde gendeh mas le arripinti y ricibi el perdon del Dios. Bueno ya lang, nuay se sucede con el maga Hebreo Cristiano. (Heb. 6:4-9) Quetal aquellos ya queda gendeh activo o yan disfellow ahora pero arripinti na uliji? Si arripinti sila, ta dale sila mira que diferente sila con aquellos ya menciona si Pablo. Siempre, si bira sila con Jehova, necesita sila el ayuda que ta dale le. (Eze. 34:15, 16) Puede pidi ayuda el maga anciano con el un experienciao Testigo para ayuda kanila hace bira el diila espiritualidad.

19. Cosa goal kita debe tene?

¹⁹ Si goal de tuyu que queda un mature Cristiano, puede tu se alcanza! Continua beneficia na maga duro espiritual comida y hace uyun el de tuyu pensamiento na pensamiento de Jehova. Y si ya queda ya tu mature na espiritual, hace el todo para esta tu un mature Cristiano.