1. Paquemodo si Jehova ya organiza con el de suyu maga siervo del primer siglo?

 CADA vez ta dale assignment si Jehova con el de suyu maga siervo, ta expecta le que hace sila con ese na organizao manera. (1 Cor. 14:33) Por ejemplo, quierre el Dios que puede predica con el buen noticia na todo parte del tierra. (Mat. 24:14) Ya encarga si Jehova ese trabajo con Jesus. Y ya asigura si Jesus que puede hace con ese na organizao manera. Del primer siglo, cuando ya establicia maga congregacion na otro-otro lugar, ya iscuji tambien maga anciano para guia y dale direccion. (Act. 14:23) Na Jerusalem, el un grupo de maga apostoles y anciano amo el ta hace maga decision y ta sigui con ese el todo congregacion. (Act. 15:2; 16:4) Cay ya obedece sila con el maga instruccion que ya dale kanila, el maga congregacion ‘ya queda mas fuerte el fe y el diila maga miembro ya omenta.’—Act. 16:5.

2. Desde 1919, paquemodo si Jehova ya guia y ya dale espiritual comida con el de suyu maga siervo?

² Ta continua si Jehova organiza con el de suyu maga siervo ahora. Desde 1919, ya usa si Jesus con el un grupo de maga iscujido hombre para organiza con el trabajo predicacion y dale espiritual comida na de suyu maga siguidores. a (Luc. 12:42) Claro que ta bendici gayot si Jehova con el diila trabajo.—Isa. 60:22; 65:13, 14.

3-4. (a) Ilustra si cosa el beneficio cay organizao kita. (b) Cosa kita considera na este articulo?

 ³ Si gendeh kita organizao, gendeh kita puede hace con el trabajo que ya dale kanaton si Jesus. (Mat. 28:19, 20) Por ejemplo, imagina que nuay teritorio el congregacion; el todo puede predica maskin onde sila quierre. Baka na cuanto teritorio bira-bira ta predica el diferente publisher pero nuay quien ta predica na otro teritorio. Ta puede pa ba tu pensa otro manera que ta beneficia kita cay organizao kita?

⁴ Igual si paquemodo ya organiza si Jesus con el de suyu maga siguidores cuando taqui le na tierra, ta continua le organiza kanaton ahora. Na este articulo, considera kita con el ejemplo que ya dale mira si Jesus y si paquemodo el diaton organizacion ta sigui con el de suyu ejemplo. Discuti tambien kita si paquemodo kita puede dale mira apresacion na organizacion de Jehova.

EL DIATON ORGANIZACION TA SIGUI CON EL EJEMPLO DE JESUS

5. Cosa el un manera que ta sigui kita na ejemplo de Jesus? (Juan 8:28)

⁵ El cosa ya hace y ya habla si Jesus estaba na de suyu Tata na cielo. Igual na ejemplo de Jesus, base na Palabra del Dios el maga enseñanza y direccion del organizacion de Jehova. (Le con el Juan 8:28; 2 Tim. 3:16, 17) Pirmi kanaton ta hace acorda que le y aplica con el cosa kita ya aprende na Biblia. Cosa el maga beneficio cay ya sigui kita con este consejo?

6. Cosa el un manera que ta beneficia kita si ta estudia kita con el Biblia?

⁶ Ta beneficia gayot kita si ta estudia kita con el Biblia usando el diaton maga publicacion. Por ejemplo, si ta ricibi kita direccion estaba na organizacion, ta puede kita compara con ese na cosa ta enseña el Biblia. Si ta puede kita mira que base na Escritura ese direccion, mas ta queda fuerte el diaton confianza na organizacion de Jehova.—Roma 12:2.

7. Acerca na cosa ya predica si Jesus y paquemodo el organizacion de Jehova ta sigui con el de suyu ejemplo?

⁷ Ya predica si Jesus “el buen Noticia del Reino de Dios.” (Luc. 4:43, 44) Mas pa, ya manda tambien si Jesus con el de suyu maga dicipulo que predica acerca el Reino. (Luc. 9:1, 2; 10:8, 9) Ahora, el todo quien parte del organizacion de Jehova ta predica con el mensaje del Reino maskin onde pa sila ta queda o maskin paquemodo pa de manada el diila responsibilidad.

8. Cosa privilegio kita tiene?

⁸ Ta mira kita como un privilegio que predica con el verdad acerca na Reino del Dios! Gendeh todo tiene este privilegio. Por ejemplo, cuando taqui si Jesus na tierra, nuay le permiti con el maga mal espiritu que habla el verdad acerca con ele. (Luc. 4:41) Ahora, antes puede participa na ministerio el un persona junto na maga siervo de Jehova, debe anay le queda cualificao. Ta dale kita mira que ta aprecia gayot kita con el privilegio que predica si ta habla kita con el maga gente acerca na Reino del Dios maskin onde y maskin cuando que puede kita hace con ese. Igual con Jesus, quierre gayot kita siembra y rega con el similla de verdad na corazon del maga gente.—Mat. 13:3, 23; 1 Cor. 3:6.

9. Paquemodo el diaton organizacion ya manda conoce con el nombre del Dios?

⁹ Ya manda conoce si Jesus con el nombre del Dios. Na de suyu rezo para na de suyu Tata na cielo, si Jesus ya habla: “Ya manda yo canila conoce el de Uste Nombre.” (Juan 17:26) Igual con Jesus, el organizacion de Jehova ta  hace el todo que posible para ayuda con otro conoce el nombre del Dios. El un manera que ya puede se hace el organizacion amo por medio del New World Translation of the Holy Scriptures. Este traduccion del Biblia ya restora na justo lugar con el nombre del Dios. Ya traduci con ese entero Biblia o el cuanto parte de este na mas de 270 lengguaje. Na Appendix A4 y A5 de este traduccion, puede tu le maga detalle acerca na restoracion del nombre del Dios na Biblia. El Appendix C que puede incuntra na Study Bible ta dale mucho evidencia si porque debe aparece 237 beses el nombre del Dios na Cristiano Griego Escritura.

10. Cosa tu ya aprende na cosa ya habla el un mujer de Myanmar?

¹⁰ Igual con Jesus, quierre kita ayuda con el mas manada gente para conoce con el nombre del Dios. Cuando ya sabe el un 67 año mujer de Myanmar si cosa el nombre del Dios, ya llura le y ya habla: “Ahora lang gayot yo ya sabe que Jehova gale el nombre del Dios. . . . Ya enseña ustedes conmigo el de con todo importante cosa que debe yo sabe.” Como cosa ta dale mira este experiencia, puede gayot tene grande efecto na vida del un gente si sabe le el nombre del Dios.

CONTINUA DALE MIRA APRESACION NA ORGANIZACION

11. Paquemodo puede dale mira apresacion el maga anciano na organizacion de Jehova? (Mira tambien con el letrato.)

¹¹ Cosa el un manera que puede dale mira el maga anciano que ta aprecia sila con el organizacion del Dios? Si ta ricibi direccion, necesita con este le enbuenamente el maga anciano y hace el todo para aplica con este. Por ejemplo, ta ricibi sila instruccion gendeh lang si paquemodo dale el diila maga parte na miting y si paquemodo reza na congregacion sino si paquemodo tambien cuida con el maga carnero del Cristo. El maga anciano quien ta sigui con el direccion del organizacion ta ayuda con el maga hermano y hermana que sinti que ta ama y ta cuida kanila si Jehova.

12. (a) Porque kita debe obedece y somete con aquellos quien ta guia? (Hebreo 13:7, 17) (b) Porque kita debe man focus na maga positivo calidad del maga anciano?

¹² Si ta ricibi kita direccion estaba na maga anciano, debe kita sigui con ese con todo corazon. Si hace kita se, ta ayuda kita para queda mas facil el trabajo de aquellos quien ta guia. El Biblia ta anima kanaton que obedece y somete kanila. (Le con el Hebreo 13:7, 17, NWT.) Pero tiene vez, gendeh este facil hace. Porque? Cay gendeh perfecto el maga anciano. Pero, si man focus kita na diila maga gendeh buen custumbre en vez na diila maga positivo calidad, ta ayuda kita con el diaton maga enemigo. Porque se kita puede habla? Cay si perde el diaton confianza na maga anciano, hay perde tambien el diaton confianza na organizacion del Dios y amo se el cosa quierre el diaton maga enemigo. Cosa kita hace para puede identifica y resisti con el maga imbusterias del diaton maga enemigo?

NO DEJA CON OTRO QUE HACE PERDE EL DE TUYU APRESACION

13. Paquemodo el maga enemigo del Dios ta hace malo con el de suyu organizacion?

¹³ El maga enemigo del Dios ta pricura hace sale que malo el maga positivo aspeto del diaton organizacion. Por ejemplo, ya aprende kita na Escritura que quierre si Jehova que limpio na fisical, moral y espiritual el de suyu maga siervo. Ta manda le quita na congregacion con aquellos quien ta continua hace si cosa el malo y gendeh ta arripinti. (1 Cor. 5: 11-13; 6:9, 10) Ta obedece kita con ese mandamiento na Escritura. Pero por causa con ese, el maga tan contra kanaton ta habla que gendeh kita amable, ta juzga con el maga gente y bien istricto.

14. Con quien estaba el maga falso istoria acerca na diaton organizacion?

¹⁴ Entende si quien deverasan ta ataca kanaton. Con Satanas Diablo estaba el maga falso istoria. Ele el “tata del imbusterias.” (Juan 8:44; Gen. 3:1-5) Poreso, puede kita expecta que hay usa si Satanas con aquellos quien ta suporta con ele para hace calayat maga falso istoria acerca na organizacion de Jehova. Ya sucede este del primer siglo.

15. Cosa ya hace el maga religioso lider con Jesus y con el de suyu maga siguidores?

¹⁵ Del primer siglo, aquellos quien ta suporta con Satanas ya habla maga imbusterias acerca con el Anak del Dios y na maga milagro que ta hace le. Por ejemplo, cuando ya puede arria maga demonio si Jesus, ya habla el maga religioso lider que ese poder estaba con el “rey del maga Demonio.” (Mar. 3:22) Ya acusa tambien sila con Jesus que ya comete blasfemia y ya influencia con el maga gente para manda mata con ele. (Mat. 27:20) Mas pa, cuando ya predica el maga siguidores del Cristo con el buen noticia, aquellos quien tan contra kanila “ya hace convinci con el maga [gente] y ya envenena el diila maga pensamiento” para persigui sila con el maga Cristiano. (Act.14:2, 19) Acerca na Maga Actividad 14:2, el The Watchtower de Deciembre 1, 1998, ya habla: “Puera que nuay sila acepta con el mensaje que ta predica el maga Cristiano, aquellos maga Judio quien tan contra kanila ya habla tambien maga imbusterias acerca na maga Cristiano para gendeh kanila creé el maga Gentil.”

16. Cosa kita debe acorda si puede kita oi maga falso istoria?

 ¹⁶ Hasta ahora tan imbusterias siempre si Satanas. Ta continua le “engaña con el entero mundo.” (Rev. 12:9) Si puede tu oi maga negativo istoria acerca na diaton organizacion o na maga hermano quien ta guia, acorda si cosa ya hace el maga enemigo del Dios con Jesus y con el maga dicipulo del primer siglo. Ahora, el maga gente ta persigui y ta habla maga imbusterias acerca na maga siervo de Jehova como cosa ya daan ya predicta el Biblia. (Mat. 5:11, 12) Gendeh kanaton puede engaña el maga falso istoria si sabe kita si con quien se deverasan estaba y si protege kita con el diaton mismo cuerpo. Paquemodo se kita puede hace?

17. Cosa kita puede hace para evita con el maga peligro que ta causa el maga falso istoria? (2 Timoteo 1:13) (Mira tambien con el cajon “ Si Cosa Hace si Ya Puede Kita Oi Maga Falso Istoria.”)

¹⁷ No pone atencion na maga falso istoria. Si apostol Pablo ya dale claro instruccion si cosa debe hace si puede kita oi maga falso istoria. Ya habla le con Timoteo que “manda con el los demas del maga gente que no . . . pone atencion con el maga cuento-cuento” y “na maga cuento malo.” (1 Tim. 1:3, 4; 4:7) Posible pone na boca el un bata con el cosa le pipina na piso pero gendeh se hace el un adulto cay sabe le si cosa el peligro. Gendeh tambien kita ta pone atencion na maga falso istoria cay sabe kita si con quien se estaba. Ta oi lang kita con el “buen insiñanza” de verdad.—Le con el 2 Timoteo 1:13.

18. Paquemodo kita dale mira que ta aprecia kita con el organizacion de Jehova?

¹⁸ Ya considera kita tres lang na manada manera que ta imita el organizacion del Dios con Jesus. Mientras ta estudia tu con el Biblia, nota con el otro pa maga manera que el organizacion ta sigui con el ejemplo de Jesus. Ayuda con el maga hermano y hermana na de ustedes congregacion para mas aprecia con el organizacion. Y para continua demonstra el de tuyu apresacion, fiel sirvi con Jehova y esta cerca na organizacion que ta usa le para cumpli el de suyu voluntad. (Sal. 37:28) Ojala continua kita aprecia con el privilegio que tiene kita que queda parte del maga amable y leal siervo de Jehova.