1. Cosa el espiritual paraiso y cosa kita debe determinao hace?

 TIENE un paraiso na tierra ahora que donde manada gente el ocupao ta hace maga buen cosas. Y millones diila el ta experiencia deverasan paz. Aquellos quien talli na ese paraiso determinao que nunca sale alli. Quierre sila que mas manada el man junto kanila na este especial lugar. Cosa este? El espiritual paraiso! a

2. Porque maka-bilib el espiritual paraiso?

² Maskin ta vivi kita ahora na malo y peligroso mundo de Satanas donde el maga gente ta odia con uno y otro, ya crea si Jehova un simbolico lugar donde tiene paz y unidad el de suyu maga siervo. (1 Juan 5:19; Rev. 12:12) Sabe el diaton amable Dios el mal efecto de este sistema de maga cosas na maga gente pero ta dale le seguridad na de suyu maga siervo para puede siempre sila progresa na espiritual. El de suyu Palabra ta refiri con el espiritual paraiso como un “refugio” y un “jardin que tiene pirmi quien ta rega.” (Isa. 4:6; 58:11) Na ayuda de Jehova, aquellos quien ta esta na este paraiso ta puede aguanta durante na este dificil ultimo maga dia.—Isa. 54:14; 2 Tim. 3:1.

3. Cosa el primer cumplimiento del Isaias capitulo 65?

³ Por medio con profeta Isaias, ya menciona si Jehova si cosa hay experiencia aquellos quien queda na espiritual paraiso. Puede kita incuntra con ese na Isaias capitulo 65, donde ya sucede el primer cumplimiento del 537 B.C.E. Aquel tiempo,  ya libra con el maga Judio desde na pagka-cautivo na Babilonia y ya bira na Jerusalem. Ya bendici si Jehova con el de suyu maga siervo y ya ayuda kanila que hace bonito otravez con el destrozao ciudad de Jerusalem y restora de este templo como el centro del puro adoranza na Israel.—Isa. 51:11; Zac. 8:3.

4. Cosa el segundo cumplimiento del Isaias capitulo 65?

⁴ El segundo cumplimiento na profecia de Isaias ya principia del 1919 C.E. cuando ya libra con el maga siervo de Jehova na pagka-cautivo na Grande Babilonia na moderno tiempo. Despues quel, el espiritual paraiso hinay-hinay ya queda ancho na entero mundo. El maga activo predicador del Reino ya establicia manada congregacion y ya dale mira maga Cristiano calidad. El maga hombre y mujer quien violente y tiene imoral manera de vida de antes, ya “visti el camisa del Nuevo Naturaleza [“personalidad,” NWT] creao na ichura del Dios.” (Ef. 4:24) Siempre, el manada bendicion que ya menciona si Isaias literal cumpli na nuevo mundo na futuro. Pero maskin ahora pa lang, ta experiencia ya kita manada bendicion. Mira kita si cosa el efecto del espiritual paraiso kanaton y si porque gendeh kita debe sale alli.

SI COSA TA EXPERIENCIA AQUELLOS NA ESPIRITUAL PARAISO

5. Como cosa ya promete na Isaias 65:13, cosa kita ta experiencia na espiritual paraiso?

⁵ Busug y refrescao. El profecia de Isaias ya dale mira si cosa el diferencia del vida de aquellos adentro na espiritual paraiso y de aquellos apuera de este. (Le con el Isaias 65:13.) Ta dale si Jehova abundancia espiritual comida na de suyu maga siervo. Ya dale le kanaton el de suyu sagrao espiritu, el de suyu Palabra y abundancia espiritual comida para puede kita “come . . . , toma . . . [y] queda alegre.” (Compara na Revelacion 22:17.) Pero, aquellos apuera del espiritual paraiso ‘con hambre, con sequia y ta sufri na huya.’ Nuay kanila quien ta puede dale el diila espiritual necesidad.—Amos 8:11.

6. Cosa ya usa na Joel 2:21-24 para refiri con el diaton espiritual provision y paquemodo kita ta beneficia con ese?

⁶ Na de suyu profecia, ya usa si Joel maga importante cosas igual na grano, vino y aceite de olivo para dale mira que bondadoso si Jehova ta dale con el De Suyu maga siervo el cosa sila necesita, incluido el espiritual comida. (Joel 2:21-24) Ta hace le se por medio na Biblia, maga publicacion que base na Biblia, diaton website, y na diaton maga miting, asemblea y convencion. Ta puede kita beneficia con este maga provision cada dia y como resulta, ta queda kita busug na espiritual y mas refrescao.

7. Cosa ta causa kanaton para tene “buen condicion de corazon”? (Isaias 65:14)

⁷ Alegre y contento. El maga siervo del Dios ta “grita con alegria” cay lleno de apresacion el diila corazon. (Le con el Isaias 65:14.) El maga verdad, maga promesa na Palabra del Dios y diaton esperanza base na sacrificio del Cristo ta causa para tene kita “buen condicion de corazon.” Si tan cuento kita acerca con este maga cosas na diaton maga espiritual hermano y hermana, ta hace se kanaton deverasan alegre!—Sal. 34:8; 133:1-3.

8. Cosa el dos na de con todo notable calidad que puede mira na espiritual paraiso?

⁸ El dos na de con todo notable calidad que puede mira na espiritual paraiso amo el amor y unidad del maga siervo de Jehova. Este unidad ta dale kanaton idea si cosa el vida na nuevo mundo que mas pa na cosa ta experiencia el maga siervo de Jehova ahora. (Col.  3:14) El un hermana ya relata si cosa le ya puede nota na maga siervo de Jehova cuando primer vez le ya conoce kanila: “No sabe yo si paquemodo queda alegre maskin talli yo junto na de mio familia. Ya puede yo mira por primer vez el deverasan amor na maga Testigo de Jehova.” Aquellos quien quierre queda deverasan alegre y contento necesita esta na espiritual paraiso. Maskin cosa pa ta pensa el maga gente acerca na maga siervo de Jehova, tiene kita un buen nombre o reputacion junto con aquellos quien ta sirvi con ele.—Isa. 65:15.

9. Cosa ya promete el Isaias 65:16, 17 acerca na maga problema que ta experiencia kita ahora?

⁹ Calmao y tiene paz. El Isaias 65:14 ya habla que aquellos quien ya iscuji esta apuera del espiritual paraiso “hay llura por causa na dolor del . . . corazon y man llantos . . . por causa na tristeza.” Pero cosa tambien sucede con el maga cosas que ya causa dolor y tristeza con el maga siervo del Dios? Gendeh dura, “hay ulvida ya” con ese maga cosas y ‘hay perde na vista del Dios.’ (Le con el Isaias 65:16, 17.) Hay quita si Jehova con el diaton maga problema y gendeh mas kita acorda maskin con el dolor que ya causa se kanaton.

10. Porque tu puede habla que un bendicion que queda parte del organizacion del Dios? (Mira tambien con el letrato.)

¹⁰ Ahora pa lang, ta sinti kita alivio si ta atende na maga miting cay ta puede kita man relax y ta ulvida con el diaton maga problema na este mal mundo. Puede tambien kita ayuda con el diaton maga hermano y hermana que sinti calmao si ta dale kita mira amor, alegria, paz, pagka-bueno y pagka-calmao que incluido na fruta del espiritu del Dios. (Gal. 5:22, 23) Un bendicion gayot que queda parte del organizacion del Dios! Aquellos quien esta na espiritual paraiso hay puede mira el completo cumplimiento de “un nuevo cielo y un nuevo tierra.”

11. Asegun na Isaias 65:18, 19, cosa el efecto kanaton del espiritual paraiso que ya crea si Jehova?

¹¹ Lleno de apresacion. Ya habla si Isaias que manada kita razon para ‘queda alegre’ na espiritual paraiso. Si Jehova el ya crea con este. (Le con el Isaias 65:18, 19.) Poreso, ta usa le kanaton para ayuda con el maga gente que sale na organizacion de este mundo y para ayuda kanila queda parte del espiritual paraiso! Ta aprecia gayot kita con el maga bendicion que ta experiencia kita cay talli kita na verdad y ta motiva este kanaton que habla con otro acerca con ese.—Jer. 31:12.

12. Cosa tu ta sinti na maga promesa que ya menciona na Isaias 65:20-24 y porque?

 ¹² Alegre y ta aprecia tambien kita con el esperanza que tiene kita cay parte kita del espiritual paraiso. Pensa con el todo cosa que puede kita mira y hace na nuevo mundo del Dios! El Biblia ya promete: “Nuay mas nuevo nacido bata . . . el vivi lang por cuanto dia y el maga de edad hay tene ya bien largo vida.” “Hay planta [kita] maga casa y queda . . . alla y hay siembra [kita] maga uvas y come con el fruta de ese.” “Gendeh [kita] trabaja que nuay provecho” cay hay “bendici si Jehova” kanaton. Ya promete le que dale le kanaton un alegre vida con deverasan proposito. “Antes pa [kita] llama,” sabe ya le si cosa ta necesita el cada uno kanaton y hay “satisfecha [le] el deseo del todo vivo.”—Isa. 65:20-24; Sal. 145:16.

13. Cosa ya habla na Isaias 65:25 acerca na maga cambio que ta hace el maga gente na diila vida si principia sila sirvi con Jehova?

¹³ Tiene paz y protegido. Na ayuda del espiritu del Dios, manada de aquellos quien tiene umalin custumbre el ya puede hace maga cambio na diila vida. (Le con el Isaias 65:25.) Ya puede sila quita con el diila maga gendeh buen custumbre de antes. (Roma 12:2; Ef. 4:22-24) El deverasan, imperfecto siempre el maga siervo del Dios poreso hay continua siempre kita hace maga kamali. Pero ya hace si Jehova unido con el todo clase de maga gente y como resulta, tiene sila paz y unidad. (Tito 2:11) Un milagro este que solamente el Todopoderoso Dios lang el puede hace!

14. Paquemodo ya queda deverasan el Isaias 65:25 na vida del un hermano?

¹⁴ Puede ba gayot cambia el maga gente con el diila custumbre? Pensa con este experiencia. Na edad de 20, el un joven hombre entra’y sale ya na preso. Violente le y tiene le imoral clase de vida. Yan preso le cay ta ruba le maga coche, ta entra ruba na maga casa y otro pa maga serioso crimen. Valiente le y nuay con quien tan atras. Cuando primer vez le ya sabe el verdad na Biblia y ya principia atende na maga miting del maga Testigo de Jehova, ya queda le convincido que tiene ya proposito el de suyu vida—adora con Jehova na espiritual paraiso. Cuando bautizao ya le, pirmi le ta pensa que deverasan gayot para con ele el Isaias 65:25. Ya cambia gayot el de suyu custumbre; del antes violente le igual na leon pero ahora calmao ya le igual na un carnero.

15. Porque quierre kita que man junto kanaton el otro na espiritual paraiso y paquemodo kita puede hace con ese?

¹⁵ El Isaias 65:13 ta principia na maga palabra: “Este el cosa ya habla el Soberano Señor Jehova.” Na fin del versiculo 25, puede kita le con el maga palabra “ya habla si Jehova.” Pirmi ta sucede el cosa le ta habla. (Isa. 55:10, 11) Ta existi ya el espiritual paraiso ahora. Por causa con Jehova, tiene kita un espiritual familia que nuay onde puede compara. Puede kita experiencia paz y esta protegido na este violente mundo cay parte kita de este familia. (Sal. 72:7) Por causa con ese, quierre kita ayuda con todo maga gente para man junto kanaton. Puede kita este hace si hace kita prioridad que hace maga dicipulo.—Mat. 28:19, 20.

AYUDA CON OTRO QUE MAN JUNTO KANATON NA ESPIRITUAL PARAISO

16. Paquemodo ta queda interesao el maga gente na espiritual paraiso?

¹⁶ Todo kita tiene cosa puede hace para ayuda con otro que queda interesao na espiritual paraiso. Puede kita hace con este si imita kita con Jehova. Gendeh le ta forza con el maga  gente que queda parte del de suyu organizacion. Sino, amable le ta “guia” kanila para con ele. (Juan 6:44, El Nuevo Testamento; Jer. 31:3) Natural lang que quierre queda cerca el maga gente con Jehova si sabe sila acerca na de suyu maga bonito calidad. Paquemodo el diaton maga bonito calidad y buen conducta puede ayuda con otro que queda interesao na espiritual paraiso?

17. Paquemodo kita puede ayuda con otro que queda interesao na espiritual paraiso?

¹⁷ El un manera para queda interesao el otro na espiritual paraiso amo si trata kita enbuenamente y con amor con el maga hermano y hermana. Si tiene quien nuevo ya atende na diaton miting, quierre kita que sinti sila igual na cosa ya sinti el maga gendeh Cristiano cuando ya atende sila na miting na Corinto de antes. Ya habla sila: “Deverasan gayot el Dios taqui con ustedes.” (1 Cor. 14:24, 25; Zac. 8:23) Poreso, debe kita continua sigui con el consejo que “tene paz” con uno y otro. —1 Tes. 5:13.

18. Cosa posible puede ayuda con otro para queda interesao na diaton organizacion?

¹⁸ Debe kita pirmi mira con el diaton maga hermano y hermana igual si paquemodo si Jehova ta mira kanila. Puede se kita hace si man focus kita na diila maga bonito calidad y gendeh na diila maga imperfeccion que na uliji, hay perde lang. Puede kita solva con el maskin cosa problema na diaton maga hermano y hermana con amor si pirmi kita trata kanila “con cariño, y perdona con uno y otro.” (Ef. 4:32) Como resulta, hay queda interesao na espiritual paraiso aquellos quien quierre que trata kanila na ansina manera. b

 ESTA ADENTRO DEL ESPIRITUAL PARAISO

19. (a) Como cosa ya puede mira na cajon “ Ya Sale Sila Pero Ya Bira,” cosa el cuanto ya habla despues sila bira na espiritual paraiso? (b) Cosa kita debe determinao hace? (Mira tambien con el letrato.)

¹⁹ Ta aprecia gayot kita con el diaton espiritual paraiso! Mas bonito ya gayot este ahora y mas manada el quien ta esta alli. Ojala continua kita aprecia con el espiritual paraiso que ya crea si Jehova para kanaton. Aquellos quien quierre queda refrescao, contento, calmao y protegido debe hace esfuerzo para queda parte del espiritual paraiso y nunca deja con ese! Pero, debe kita queda con cuidao cay ta hace gayot manera si Satanas para sale kita alli. (1 Ped. 5:8; Rev. 12:9) Gendeh kita debe permiti que sucede se. Ojala hace kita el todo para mentena el pagka-bonito, pagka-limpio y paz del espiritual paraiso.