Sabe Ba Tu?
Porque el maga gendeh Israelita ya queda maga soldao de Rey David?
INCLUIDO na maga estranjero soldao de David amo kanda Zelek el Ammonita, si Urias el Hitita y si Itma el Moabita. a (1 Cron. 11:39, 41, 46) Incluido tambien na maga soldao de David el “maga Keretita, maga Peletita y el 600 Gitita.” (2 Sam. 15:18) Ta sale que el maga Keretita y maga Peletita pariente del maga Filisteo. (Eze. 25:16) El maga Gitita estaba na Gat, un ciudad de maga Filisteo.—Jos. 13:2, 3; 1 Sam. 6:17, 18.
Porque ya permiti si David que queda de suyu maga soldao este maga estranjero? Cay sabe le que hay esta sila leal con ele y el mas importante, con Jehova. Por ejemplo, acerca na maga Keretita y maga Peletita, el The New Interpreter’s Dictionary of the Bible ya habla: “Ya esta sila leal con David maskin pa durante na de con todo dificil tiempo del de suyu rulanza.” Paquemodo se sila ya dale mira? Cuando “el todo maga hombre de Israel” ya deja con David para sigui con el “un hombre que ta causa gulu que el nombre Sheba,” el maga Keretita y Peletita ya esta leal con David y ya ayuda con ele para sangga con el rebellon de Sheba. (2 Sam. 20:1, 2, 7) Na otro ocasion, el anak de Rey David que si Adonias ya pricura rebata con el trono. Pero, el maga Keretita y Peletita ya esta leal con David y ya ayuda sila para queda sunod rey si Solomon, con quien ya iscuji si Jehova.—1 Rey 1:24-27, 38, 39.
El otro pa estranjero que ya esta gayot leal con David amo si Ittai el Gitita. Si Ittai y el de suyu 600 soldao ya suporta con Rey David cuando yan rebelde el de suyu anak que si Absalom y ya pricura engaña con el maga gente de Israel para man contra con el rey. Ya habla si David con Ittai que ciendo un estranjero le, gendeh si Ittai necesita ayuda con ele. Pero si Ittai ya habla: “Ta jura yo que mientras vivo si Jehova y mientras vivo el de mio rey, maskin onde man anda el de mio rey, muri man o vivi, hay esta yo junto contigo!”—2 Sam. 15:6, 18-21.
Leal si Ittai con David, el iscujido rey de Jehova
Maskin pa maga estranjero el maga Keretita, Peletita y el maga Gitita, sabe sila que si Jehova el deverasan Dios y si David el iscujido rey de Jehova. Asigurao alegre gayot si David cay tiene le maga leal uban quien yan junto con ele!
a El ley del Dios que escribido na Deuteronomio 23:3-6 ya prohibi con el maga Ammonita y Moabita que queda parte del congregacion de Israel. Pero, ta sale que este ley gendeh ta prohibi con el maga estranjero que asocia o queda junto na maga siervo del Dios sino este ley ta prohibi con el maga estranjero que queda legal miembro del nacion. Mira con el Insight on the Scriptures, Volume 1, p. 95.
