1. Porque el cuanto tan dificil predica con otro na ministerio? (Mira tambien con el letrato.)

 COMO maga siervo de Jehova, ta predica kita con otro cay ta ama kita con el diaton Tata na cielo y quierre kita ayuda con el diaton projimo para conoce con ele. Manada publisher el quierre-quierre participa na trabajo predicacion. Pero para con otro, tan dificil sila tene alegria na este trabajo. Porque? Cay posible el cuanto huyain y nuay confianza converza na maga gente. Baka el otro tambien tan alang-alang anda na casa del otro si nuay kanila invita. Mientras el cuanto tiene miedo que baka rabia kanila el gente. Ya enseña tambien con el cuanto que evita confrontacion. Este maga hermano y hermana ta ama gayot con Jehova pero tan dificil sila predica na maga gente que no conoce sila. Maskin pa ansina, sabe sila que bien importante este trabajo poreso regular sila ta participa na predicacion. Asigurao bien alegre gayot si Jehova kanila!

2. Si tan dificil tu tene alegria na ministerio, porque tu gendeh debe man luya?

² Tiene vez ba tan dificil tu tene alegria na ministerio por causa na ese maga razon? Si ansina, no man luya. Si ta sinti tu que nuay tu confianza converza con otro, ta dale lang se mira que humilde tu y no quierre tu saca el atencion del otro. Ta dale tambien se mira que no quierre tu man purpiajan na otro gente. Mas pa, duele para kanaton si gendeh kanaton acepta el otro, especialmente si quierre kita ayuda kanila. Sabe gayot el de tuyu Tata na cielo el maga dificultad que ta enfrenta tu y quierre le ayuda contigo. (Isa. 41:13) Poreso na este articulo, hay considera kita cinco sugestion si paquemodo tu enfrenta  con ese maga dificultad y si paquemodo tene alegria na ministerio.

EL PALABRA DEL DIOS PUEDE HACE FUERTE CONTIGO

3. Cosa ya puede ayuda con profeta Jeremias para predica con otro?

³ Desde antes, el mensaje que estaba con Dios ya puede hace fuerte con el de suyu maga siervo para puede sila cumpli con el diila dificil assignment. Nota, por ejemplo, con el experiencia de profeta Jeremias. Tan alang-alang ele del primero cuando ya dale con ele si Jehova assignment que predica. Ele ya habla: “No sabe yo converza cay bata pa yo.” (Jer. 1:6) Cosa ya puede ayuda con ele cuando ya sinti le ansina? El cosa ya habla si Jehova ya hace fuerte con ele. Ya habla si Jeremias: “Ya queda este como un arde fuego adentro del de mio bukuk y no puede mas yo aguanta con este.” (Jer. 20:8, 9) Maskin pa dificil el assignment de Jeremias, el mensaje que ya manda con ele proclama amo el ya hace fuerte con ele para cumpli con ese.

4. Cosa el resulta si le kita con el Palabra del Dios y medita con ese? (Colosa 1:9, 10)

⁴ El Palabra del Dios puede hace fuerte con el maga Cristiano. Cuando ya escribi si apostol Pablo con el maga Cristiano na Colosa, ya habla le que si saca sila exacto sabeduria, puede este manda move kanila para “vivi un vida comforme con [Jehova]” mientras ta continua sila ‘produci todo clase de maga buen trabajo.’ (Le con el Colosa 1:9, 10.) Incluido na ese maga buen trabajo el predicacion del buen noticia. Entonces, si le kita con el Palabra del Dios y medita con ese, hay queda fuerte el diaton fe con Jehova y puede kita mas entende si porque importante que predica acerca na de suyu Reino.

5. Cosa tu puede hace para beneficia gayot na de tuyu lehida y estudiada del Biblia?

⁵ Para puede gayot tu beneficia na Palabra del Dios, no apura na de tuyu lehida, estudiada y meditacion. Dale bastante tiempo. Si por ejemplo ya puede tu le un texto que tan dificil tu entende, no ignora con ese. Sino, usa con el Watch Tower Publications Index o con el Research Guide for Jehovah’s Witnesses para busca informacion acerca con ese texto. Si dale tu bastante tiempo na de tuyu estudiada, hay queda fuerte el de tuyu confianza que verdad el Palabra del Dios. (1 Tes. 5:21) Si mas convincido tu, mas queda tu alegre habla con otro el cosa tu ya aprende.

 PREPARA ENBUENAMENTE PARA NA MINISTERIO

6. Porque kita debe prepara enbuenamente para na ministerio?

⁶ Si prepara tu enbuenamente para na ministerio, puede se ayuda contigo para queda mas comfortable converza con otro. Ya ayuda si Jesus con el de suyu maga dicipulo para queda preparao antes le imbia kanila na ministerio. (Luc. 10:1-11) Cay ya hace sila el cosa ya enseña si Jesus, el maga dicipulo ya queda bien alegre na cosa sila ya puede cumpli.—Luc. 10:17.

7. Paquemodo kita puede prepara para na ministerio? (Mira tambien con el letrato.)

⁷ Paquemodo kita puede prepara para na ministerio? Necesita kita pensa si paquemodo kita habla el verdad na efectivo manera na diaton mismo maga palabra. Grande tambien ayuda si prepara kita adelantao si paquemodo kita contesta con el dos o tres comon reaccion del maga gente na diaton teritorio. Acabar, si ta predica ya kita, puede kita esta calmao, man smile y queda friendly.

8. Na cosa manera el maga Cristiano ta semeja na tinaja de lodo pandayan na ilustracion de apostol Pablo?

⁸ Ya usa si apostol Pablo un ilustracion para dale mira si cosa el diaton papel na trabajo predicacion. Ele ya habla: “Came igual lang como el maga tinaja de lodo pandayan donde ta guarda este maga riqueza.” (2 Cor. 4:7) Cosa este riqueza? Ta refiri este con el predicacion del mensaje acerca na Reino que ta puede salva vida del gente. (2 Cor. 4:1) Cosa el maga tinaja de lodo pandayan? Ta representa se con el maga siervo del Dios quien ta lleva el buen noticia con otro. Na tiempo de Pablo, el maga negociante ta usa tinaja de lodo pandayan para pone maga valuable cosas, igual na comida, vino y sen. Na igual manera, ya encarga tambien kanaton si Jehova el valuable mensaje de buen noticia. Na de suyu ayuda, puede kita tene el necesita fuerza para puede continua predica ese mensaje.

PIDI CORAJE POR MEDIO NA REZO

9. Cosa puede ayuda kanaton si ta experiencia kita miedo na gente o miedo que baka gendeh acepta con el diaton mensaje? (Mira tambien con el letrato.)

⁹ Tiene vez, posible experiencia kita miedo na gente o miedo que baka gendeh acepta con el diaton mensaje. Si sinti kita ansina, cosa puede ayuda kanaton? Acorda con el rezo del  maga apostoles cuando ya prohibi kanila predica. En vez deja que ganá kanila el miedo, ya pidi sila con Jehova que ayuda kanila ‘para gendeh sila tene miedo anuncia el de suyu Palabra.’ Ya contesta dayun si Jehova con el diila rezo. (Act. 4:18, 29, 31) Si tiene kita miedo na gente, debe tambien kita pidi ayuda con Jehova por medio na rezo. Pidi con Jehova que ayuda contigo que ganá con el de tuyu miedo por medio na de tuyu amor para na maga gente.

10. Paquemodo si Jehova ta ayuda kanaton para cumpli con el diaton papel como de suyu maga Testigo? (Isaias 43:10-12)

¹⁰ Ya iscuji kanaton si Jehova para queda el de suyu maga Testigo y ya promete le que ayuda le kanaton para tene coraje cumpli con el diaton papel. (Le con el Isaias 43:10-12.) Nota con el cuatro manera que ta hace le con ese. Una, junto kanaton si Jesus si ta predica kita con el buen noticia. (Mat. 28:18-20) Ika-dos, ta usa tambien si Jehova maga angel para ayuda kanaton. (Rev. 14:6) Ika-tres, ya dale si Jehova kanaton el de suyu sagrao espiritu para hace acorda kanaton el maga cosas que ya aprende kita. (Juan 14:25, 26) Y ika-cuatro, ya dale kanaton si Jehova maga hermano y hermana quien puede man junto kanaton. Na ayuda de Jehova y suporta del diaton maga hermano y hermana, tiene kita el todo cosa kita necesita para puede cumpli con el diaton ministerio.

QUEDA POSITIVO Y MAN ADJUST

11. Paquemodo tu puede predica na mas manada gente na ministerio? (Mira tambien con el letrato.)

¹¹ Tan luya ba tu na predicacion si mas mucho na maga casa nuay gente? Puede tu pregunta na de tuyu mismo cuerpo: ‘Onde el maga gente na este tiempo?’ (Act. 16:13) ‘Na trabajo ba sila o ya anda man compra?’ Si ansina, gendeh gaha mas manada gente con quien tu puede predica si man street witnessing tu? El un hermano, si Joshua, ya habla, “Ta tiene yo oportunidad predica si ta camina na maga lugar onde ta anda man compra el maga gente y na otro pa maga de publico lugar.” Ele y el de suyu mujer, si Bridget, ya puede tambien converza na mas manada gente si ta anda sila predica na maga casa maga alas seis para alas ocho del noche y si Domingo tarde.—Ef. 5:15, 16.

12. Cosa el un manera para determina si cosa el maga gente ta creé o si cosa el diila maga lingasa?

 ¹² Si nuay tanto interes el maga gente na mensaje, pricura determina si cosa sila ta creé o si cosa el diila maga lingasa. Si kanda Joshua y Bridget ta usa con el maga pregunta na tract na diila introduccion. Por ejemplo, si ta usa sila con el tract Cosa el Biblia Para Contigo?, ta habla sila: “Para con el cuanto gente, el Biblia amo un libro estaba con Dios pero el otro gendeh asigurao con ese. Cosa el de tuyu opinion?” Por medio con ese, mas mucho, ta puede sila man cuento con el maga gente.

13. Porque kita puede siempre tene buen exito na diaton ministerio maskin pa nuay quien ya acepta con el diaton mensaje? (Proverbio 27:11)

¹³ Maskin cosa man el resulta del diaton predicacion, puede siempre kita tene buen exito na diaton ministerio. Porque? Cay ya hace kita el cosa ya manda kanaton si Jehova y si Jesus—predica. (Act. 10:42) Maskin pa nuay kita con quien ya puede man cuento o nuay quien ya acepta con el diaton mensaje, puede siempre kita queda alegre cay sabe kita ya puede kita hace alegre con el diaton Tata na cielo.—Le con el Proverbio 27:11.

14. Porque alegre kita si el otro publisher ya puede incuntra interesao na teritorio?

¹⁴ Puede tambien kita queda alegre si el otro publisher ya puede incuntra interesao na teritorio. El Torre de Guardia ya compara con el diaton trabajo igual como ta busca bata que ya perde. Manada el ta ayuda busca con ele, gendeh lang na un lugar. Cuando ya incuntra con el bata, ya queda alegre el todo, gendeh lang el persona quien ya puede incuntra con ele. Na igual manera, el trabajo que hace dicipulo ta necesita esfuerzo gendeh lang del un persona sino del todo. Necesita el ayuda del todo para puede cubri con el teritorio. Y si tiene interesao quien ya principia atende miting, hay queda alegre el todo.

MAN FOCUS NA DE TUYU AMOR PARA CON JEHOVA Y NA DE TUYU PROJIMO

15. Si aplica kita con el Mateo 22:37-39, paquemodo se puede ayuda kanaton para queda mas con gana na ministerio? (Mira tambien con el letrato.)

¹⁵ Puede kita queda mas con gana na trabajo predicacion si man focus kita na diaton amor con Jehova y na diaton projimo. (Le con el Mateo 22:37-39.) Imagina si paquemodo  de alegre si Jehova si ta mira le kanaton ta predica y si paquemodo de alegre el maga gente si principia sila estudia con el Biblia! Acorda tambien que aquellos quien acepta con el diaton mensaje hay obtene salvacion.—Juan 6:40; 1 Tim. 4:16.

16. Paquemodo kita puede tene alegria na diaton ministerio maskin pa gendeh kita puede sale na diaton casa? Dale maga ejemplo.

¹⁶ Gendeh ba tu ta puede sale na casa por cuanto razon? Si ansina, man focus na cosa tu puede hace para dale mira el de tuyu amor con Jehova y na de tuyu projimo. Durante el COVID-19 pandemic, na casa lang si Samuel y el de suyu mujer, si Dania. Durante na aquel maga dificil tiempo, regular sila tan telephone witnessing, ta escribi carta y ta conduci Bible study por medio na Zoom. Ya puede predica si Samuel con aquellos con quien le tan junto na clinic onde le ta ricibi cura para na cancer. Ya habla le: “El maga dificultad puede kanaton hace luya na pensamiento, fisical y espiritual. Necesita kita busca manera para tene alegria na diaton servicio con Jehova.” Durante ese tiempo, ya tumba si Dania y como resulta, gendeh le ta puede levanta na cama por tres meses. Despues, adentro de seis meses, na wheelchair lang le. Ya habla si Dania: “Ya pricura yo hace el todo asegun na de mio circumstancia. Ya puede yo predica na un nurse quien ta mira conmigo y con aquellos quien tan deliver maga cosas na diamon casa. Ya puede tambien yo predica con el un mujer quien ta trabaja na un medical company.” Limitao el cosa ya puede hace kanda Samuel y Dania por causa na diila circumstancia pero ya hace sila el cosa sila puede hace y ya queda sila alegre por causa con ese.

17. Paquemodo queda mas efectivo el maga sugestion na este articulo?

¹⁷ Mas efectivo el maga sugestion que ya discuti na este articulo si usa tu junto con ese todo. El cada sugestion igual como un ingrediente que ya usa na un potaje. Si hace junto-junto con el todo ingrediente na un potaje, hay queda gayot se sabroso. Si aplica tu con el todo sugestion, hay queda tu mas preparao para enfrenta con el maga negativo pensamiento y tene mas grande alegria na ministerio.