1. Cosa debe hace el maga Cristiano para hace acaba con el carrera para na vida?

EL MAGA Cristiano entrao na carrera para na vida. Nuevo man kita na carrera o ya dura ya, necesita kita continua corre hasta na finish line. El consejo de apostol Pablo para na maga Cristiano na Filipo puede anima kanaton que hace acaba con el diaton carrera. El cuanto del maga miembro na ese congregacion del primer siglo ta sirvi ya con Jehova por cuanto año cuando ya ricibi sila el carta de Pablo. Fiel ya sila ta sirvi con Jehova pero ya hace kanila acorda si Pablo que necesita sila aguanta y continua na diila servicio. Quierre le que continua sila sigui con el de suyu ejemplo que “corre . . . para na fin.”​—Fil. 3:14.

2. Porque justo gayot na tiempo el consejo de Pablo para na maga de Filipo?

² Justo gayot na tiempo el consejo de Pablo para na maga de Filipo. Ya enfrenta oposicion este congregacion desde primero. Ya principia este cuando kanda Pablo y Silas ya “vene . . . na Macedonia” y ya llega sila na Filipo del maga 50 C.E. (Act. 16:9) Ya puede sila incuntra con el un mujer, si Lidia, quien “ya pone gayot atencion [kanila] y el Señor ya abri su corazon” para oi con el buen noticia. (Act. 16:14) Nuay dura, ya bautiza con ele junto con el todo quien ta queda na de suyu casa. Pero el Diablo ya causa dayun problema. El maga gente ya lleva con Pablo y con Silas na autoridad del ciudad y ya acusa kanila que ta causa gulu. Como resulta, ya latiga con Pablo y Silas, ya hace preso y na uliji, ya manda kanila sale na ciudad. (Act. 16:16-40) Ya descanza ba sila? Nuay gayot! Quetal el maga hermano y hermana na este congregacion que nuevo ya forma? Ya puede tambien sila aguanta! Asigurao que ya puede gayot anima kanila el buen ejemplo que ya dale mira kanda Pablo y Silas.

3. Cosa ya realiza si Pablo y cosa maga pregunta kita considera?

 ³ Determinao si Pablo que aguanta. (2 Cor. 4:16) Pero sabe le que para puede hace acaba con el carrera para na vida, necesita le esta focus na de suyu goal. Cosa kita puede aprende na ejemplo de Pablo? Cosa el cuanto maga ejemplo del maga moderno fiel siervo ahora quien ya dale mira que puede kita aguanta maskin tiene pa maga problema? Y paquemodo el diaton esperanza puede ayuda kanaton para hace fuerte con el diaton determinacion que aguanta?

4. Paquemodo ya esta activo si Pablo maskin pa na de suyu circumstancia?

⁴ Considera el esfuerzo de Pablo cuando ya escribi le carta na maga de Filipo. Preso ele na un casa na Roma. Gendeh le puede sale para predica. Maskin pa ansina, bien ocupao ele predica con el maga visita y escribi carta para na maga lejos congregacion. Ahora, manada tambien Cristiano el no puede sale na casa pero ta hace el todo lo que puede para predica con el buen noticia con aquellos quien ta visita kanila. Ta escribi tambien sila carta para con aquellos con quien no puede kita predica na personal.

5. Asegun na Filipo 3:12-14, cosa ya puede ayuda con Pablo para esta focus na de suyu goal?

⁵ Nuay permiti si Pablo que perde el de suyu focus por causa na maga cosa le ya puede cumpli o na maga kamali que ya hace le de antes. Gane, ya habla le que ‘gendeh le pone atencion con el maga cosa que ya pasa ya antes’ para puede le ‘pone todo de suyu esfuerzo para alcanza aquel maga cosa que nuay pa pasa.’ (Le con el Filipo 3:12-14, El Nuevo Testamento.) Cosa posible puede causa para perde el focus de Pablo? El una amo el maga cosa le ya puede cumpli antes le queda un Cristiano. Pero, ta mira le con aquel como maga “basura.” (Fil. 3:3-8) Ika-dos, maskin pa ya sinti le culpable cay ya persigui le con el maga Cristiano de antes, nuay le permiti con el cosa le ta sinti que hace descanza con el de suyu servicio con Jehova. Y ika-tres, nuay ele man razon que bastante ya el cosa le ya hace para con Jehova. Tiene buen resulta el ministerio de Pablo maskin pa ya hace con ele preso, ya gulpia, ya guerria piedra, ya sumi el barco donde le ya munta y falta comida y ropa. (2 Cor. 11:23-27) Pero maskin pa na todo cosa le ya puede cumpli y ya experiencia, sabe si Pablo que necesita le continua sirvi con Jehova. Y amo tambien se el cosa kita debe hace.

6. Cosa el cuanto “maga cosas que ya pasa ya antes” que necesita kita ulvida?

⁶ Paquemodo kita puede imita con el ejemplo de Pablo para ‘gendeh kita pone atencion con el maga cosa que ya pasa ya antes’? El cuanto kanaton posible ta sinti siempre culpable por causa na maga culpa que ya puede kita hace de antes. Si ansina kita ta sinti, puede kita hace parte del diaton personal estudiada el rescate de Jesucristo. Si estudia kita, medita y reza acerca con este topico, puede este ayuda kanaton para gendeh sinti que culpable pa kita. Posible ayuda se kanaton para gendeh mas kita castiga con el diaton mismo cuerpo na maga culpa que ya perdona ya si Jehova. Considera el otro leccion que puede kita aprende con Pablo. El cuanto posible ya sale na diila trabajo que tiene grande sueldo para puede hace una con el interes del Reino. Si ya hace se kita, puede ba kita ulvida con el maga cosas que ya pasa ya y gendeh desea maga cosas que posible era kita tiene? (Num. 11:4-6; Ecl. 7:10) Posible incluido na “maga cosas que ya pasa ya antes” el maga cosa que ya puede kita cumpli na servicio con Jehova o el maga  probanza que ya puede kita aguanta de antes. Siempre, si pensa kita si paquemodo si Jehova ya bendici y ya suporta kanaton de antes, puede este ayuda para mas queda kita cerca con el diaton Tata. Pero, no quierre kita pensa que bastante ya el cosa kita ya hace para con Jehova.​—1 Cor. 15:58.

7. Asegun na 1 Corinto 9:24-27, cosa kita necesita hace para ganá na carrera para na vida? Ilustra.

⁷ Ya entende si Pablo con el palabra de Jesus: “Trabaja ustedes embuenamente.” (Luc. 13:23, 24) Sabe si Pablo que igual con Jesus, necesita le hace esfuerzo hasta na fin. Poreso ya compara le na un carrera con el diaton vida como maga Cristiano. (Le con el 1 Corinto 9:24-27.) El un runner tan focus lang na finish line y gendeh ta pone atencion na otro pa cosa. Por ejemplo, el maga runner posible corre na maga camino que tiene maga tienda y otro pa maga cosas que puede causa para perde el diila focus. Puede ba tu imagina que el un runner hay descanza para chequia con el maga display na bentana del tienda? Gendeh le se hace si quierre le ganá! Igual na carrera para na vida, necesita tambien kita evita maga cosa que hace perde el diaton focus. Si esta kita focus na diaton goal y hace esfuerzo igual con Pablo, puede tambien kita ganá con el premio!

8. Cosa tres dificultad kita considera ahora?

⁸ Considera kita ahora tres maga probanza que puede kanaton hace luya. El una amo si gendeh ta sucede el cosa kita ta expecta. El ika-dos, si ta queda kita maluya cay de edad ya. Y el ika-tres, si ta experiencia kita problema que gendeh ta perde. Puede kita beneficia si aprende kita si paquemodo el otro ya puede aguanta na este maga situacion.​—Fil. 3:17.

9. Cosa posible el efecto si gendeh ta sucede el cosa kita ta expecta?

⁹ Si gendeh ta sucede el cosa kita ta expecta. Natural que ta esperanza gayot kita con el maga promesa de Jehova na futuro. Gane, cuando el un profeta de Jehova, si Habacuc, ya habla que bien quierre le que quita ya si Jehova con el maldad na Juda, ya habla con ele si Jehova que “continua expecta.” (Hab. 2:3)  Pero, si dol ta atrasa el cosa kita ta expecta, puede se causa para perde el diaton gana y man luya pa gane. (Prov. 13:12) Ya sucede este con el cuanto hermano del maga año 1914. Na ese tiempo, manada del maga iscujido Cristiano ta expecta que subi sila na cielo del 1914. Cuando nuay se sucede, cosa ya hace el maga fiel hermano y hermana?

10. Cosa ya hace el un man maridable cuando nuay sucede el cosa sila ta expecta?

¹⁰ Considera el buen ejemplo del dos leal Cristiano quien ya enfrenta con ese probanza. Ya bautiza con Hermano Royal Spatz na edad de 20 año del 1908. Asigurao gayot le que gendeh mas dura hay subi ya le na cielo. Gane del 1911, cuando ya pidi le el mano del un hermana, si Pearl, na casamiento, ya habla le con este: “Sabe ya tu si cosa sucede na 1914. Si casa man kita, mas bueno si casa ya ta mas temprano!” Ya descanza ba este man maridable na carrera para na vida cuando nuay sila ricibi el diila premio del 1914? Nuay, cay yan focus sila sirvi leal con Jehova, gendeh na diila premio. Determinao sila continua na carrera para na vida. Y despues del cuanto decada, si Royal y Pearl ya esta activo y fiel hasta na fin del diila vida aqui na tierra. Asigurao ta esperanza tu que hay limpia si Jehova con el de suyu reputacion, dale mira que justo el de suyu rulanza y cumpli con el de suyu maga promesa. Puede tu asigura que hay sucede este na justo tiempo de Jehova. Mientras tanto, ojala esta kita ocupao na servicio con Dios y gendeh man luya si gendeh pa ta sucede el cosa kita ta expecta.

11-12. Porque puede kita siempre continua sirvi con Jehova maskin pa maluya ya el diaton cuerpo? Dale ejemplo.

¹¹ Si ta queda kita maluya cay de edad ya. Gendeh igual na un literal runner, gendeh tu necesita esta fuerte na fisical para continua progresa na espiritual. Gane, manada el maluya na fisical pero determinao siempre sila progresa na espiritual. (2 Cor. 4:16) Por ejemplo, 88 año ya si Hermano Arthur Secord * y maluya ya el cuerpo despues sirvi na Bethel por 55 año. Un dia, ya atraca el un nurse quien ta cuida con ele. Ya mira este con ele y ya habla: “Brother Secord, manada ya tu cosa ya hace para con Jehova.” Pero si Arthur gendeh tan focus na cosa le ya puede hace. Ya mira le con el nurse, yan smile y ya contesta: “Si, justo tu. Pero gendeh importante el cosa kita ya puede cumpli, el mas importante amo el cosa kita puede hace ahora.”

¹² Posible ya dura ya tu ta sirvi con Jehova y ahora gendeh mas tu ta puede hace el maga cosas igual de antes por causa na de tuyu salud. Si ansina el de tuyu situacion, no man  luya. Puede tu asigura que ta aprecia si Jehova con el maga trabajo que ya puede tu hace del antes. (Heb. 6:10) Y acorda que el diaton amor con Jehova gendeh tan base na cosa kita ta puede hace ahora na servicio con ele. Sino puede kita dale mira si paquemodo de hondo el diaton amor con Jehova si esta kita positivo y hace el todo lo que puede. (Col. 3:23) Ta entende si Jehova con el diaton limitacion y gendeh le kanaton ta pidi mas na cosa kita puede dale.​—Mar. 12:43, 44.

13. Paquemodo el experiencia de Anatoly y Lidiya puede anima kanaton que continua sirvi con Jehova maskin pa na manada probanza?

¹³ Si ta experiencia kita problema que gendeh ta perde. El cuanto del maga siervo de Jehova ya puede experiencia maga dificultad y persecucion por cuanto decada. Por ejemplo, 12 año lang si Anatoly Melnik * cuando ya arresta con el de suyu tata, ya hace preso y ya lleva na Siberia. Mas de 7,000 kilometro el distancia de este na de suyu familia na Moldova. Despues del un año, ya lleva tambien na Siberia con Anatoly, con el de suyu nana y con el de suyu lolo y lola. Nuay dura, ya puede sila atende na maga miting na otro barrio, pero necesita sila camina 30 kilometro na bien frio temperatura por causa na snow. Nuay dura, ya hace preso con Hermano Melnik por tres año que lejos con el de suyu mujer, si Lidiya, y diila un año anak mujer. Maskin pa por cuanto año sila ya enfrenta dificultad, si Anatoly y el de suyu familia ya continua sirvi fiel con Jehova. Ahora, 82 año ya si Anatoly y ta sirvi como un miembro del Branch Committee na Central Asia. Igual con Anatoly y Lidiya, ojala hace kita el todo lo que puede y continua aguanta na servicio con Jehova igual de antes.​—Gal. 6:9.

14. Cosa ya realiza si Pablo que necesita le hace para puede alcanza de suyu goal?

¹⁴ Asigurao si Pablo que puede le hace acaba el de suyu carrera y alcanza el de suyu goal. Como un iscujido Cristiano, ta esperanza le que puede le “saca el premio que el Dios ya llama [con ele] para recivi.” Pero, para puede le alcanza con ese goal, ya realiza le que necesita le “corre . . . para na fin.” (Fil. 3:14) Ya usa si Pablo un bonito ilustracion para ayuda con el maga de Filipo man focus na diila goal.

15. Paquemodo ya usa ilustracion si Pablo para anima con el maga Cristiano na Filipo para continua corre hasta na fin?

¹⁵ Ya hace acorda si Pablo con el maga de Filipo  que maga ciudadano sila de cielo. (Fil. 3:20) Porque importante que acorda se sila? Na aquel maga tiempo, el maga gente quierre gayot queda un ciudadano de Roma cay manada este beneficio. * Pero, el maga iscujido Cristiano ciudadano del mas alto gobierno que puede dale mas manada maga beneficio. Bien grande gayot el diferencia si compara con el beneficio del maga ciudadano de Roma. Por causa de ese, ya anima si Pablo con el maga de Filipo, hablando: “Vivi firmi ustedes un vida comforme con el Evangelio de Cristo.” (Fil. 1:27) El maga iscujido Cristiano ahora, ta dale mira buen ejemplo mientras ta continua alcanza con el diila goal que vivi hasta para cuando na cielo.

16. Na cielo man el diaton esperanza o na tierra, cosa kita debe continua hace asegun na Filipo 4:6, 7?

¹⁶ Na cielo man el diaton esperanza o na paraiso tierra, necesita kita continua corre hasta llega na fin. Maskin cosa man el diaton circumstancia, gendeh kita debe pensa con el cosa ya pasa ya y no permiti con el maskin cosa que hace descanza con el diaton servicio con Jehova. (Fil. 3:16) Posible ya dura ya kita ta espera que cumpli si Jehova con el de suyu maga promesa o baka maluya ya kita cay de edad ya. Y posible ya puede kita enfrenta con el maga probanza y maga persecucion por cuanto año. Maskin cosa man el situacion, “no ustedes man lingasa.” Sino, manda sabe el de ustedes maga lingasa con Dios por medio de rezo y hay dale le el paz que mas pa na cosa kita puede imagina.​—Le con el Filipo 4:6, 7.

17. Cosa kita considera na siguiente articulo?

¹⁷ Igual con el un runner quien ta hace gayot esfuerzo para llega na finish line, ojala esta kita focus na diaton goal que puede hace acaba con el carrera para na vida. Maskin cosa man permiti el diaton circumstancia, ojala continua kita hace esfuerzo para progresa hasta llega el maga promesa na futuro. Cosa kita puede hace para continua corre na justo direccion? El siguiente articulo hay ayuda kanaton hace maga justo prioridad y para puede kita “asigura el maga cosas que mas importante.”​—Fil. 1:9, 10, NW.