1. Quien ya ayuda forma con el congregacion na Filipo?

CUANDO ya llega si apostol Pablo, Silas, Lucas y Timoteo na ciudad de Filipo, ya puede sila incuntra manada gente quien interesao na mensaje del Reino. Este cuatro activo hermano ya ayuda forma un congregacion y el todo dicipulo ya principia man junto-junto, posible na casa del un hermana, si Lidia.​—Act. 16:40.

2. Cosa dificultad ya enfrenta este congregacion?

² Nuay tarda, este nuevo congregacion ya experiencia dificultad. Ya hace manera si Satanas para el maga enemigo del verdad hay man contra con el predicacion del maga leal Cristiano. Ya arresta con Pablo y Silas, ya bijuquia y ya hace preso. Despues kanila larga, ya visita sila con el maga nuevo dicipulo y ya anima kanila. Despues, ya sale kanda Pablo, Silas y Timoteo pero si Lucas posible ya esta na ciudad. Cosa ya pasa con el congregacion que nuevo ya forma? Na ayuda del espiritu de Jehova, ya continua el maga hermano y hermana na diila servicio con Jehova. (Fil. 2:12) Poreso, tiene gayot razon si Pablo para queda alegre con este congregacion!

3. Como cosa ya escribi na Filipo 1:9-11, acerca na cosa ya reza si Pablo?

³ Maga diez año despues, ya escribi carta si Pablo con el congregacion de Filipo. Mientras ta le tu con el carta, puede tu dayun mira si paquemodo de hondo el amor de Pablo con el de suyu maga hermano. Ele ya escribi: “Ta ama yo con ustedes con el mismo amor que si Jesucristo ta ama con ustedes.” (Fil. 1:8) Ya escribi le que ta reza le para kanila. Ya pidi  le con Jehova que ayuda kanila que mas crici pa el diila amor, para asigura sila el maga cosas que mas importante, para queda limpio, evita hace luya con otro y continua tiene maga recto fruta. Asigurao man uyun tu que puede kita beneficia ahora na cosa ya habla si Pablo. Poreso, le kita si cosa ya escribi si Pablo con el maga de Filipo. (Le con el Filipo 1:9-11.) Despues, hay considera kita maga punto que ya menciona le y discuti si paquemodo kita puede aplica con el cada uno de este.

4. (a) Asegun na 1 San Juan 4:9, 10, paquemodo ya dale mira si Jehova que ta ama le kanaton? (b) Paquemodo de hondo debe el diaton amor con Dios?

⁴ Ya dale mira si Jehova que ta ama gayot le kanaton cuando ya imbia le con el de suyu Anak na tierra para muri y rescata con el diaton maga pecado. (Le con el 1 San Juan 4:9, 10.) El amor del Dios ya manda move kanaton para ama con ele. (Rom. 5:8) Paquemodo de hondo debe el diaton amor con Dios? Ya contesta si Jesus con ese pregunta cuando ya habla le con el un Fariseo: “Ama con el Señor, el dituyo Dios, con todo el dituyo corazon, con todo el dituyo alma y con todo el dituyo pensamiento.” (Mat. 22:36, 37) Quierre kita ama con Jehova con todo corazon. Y quierre kita que queda este mas hondo cada dia. Ya habla si Pablo con el maga de Filipo que el diila amor debe “ay sigui pa crici.” Cosa kita puede hace para mas queda hondo el diaton amor con Dios?

5. Paquemodo mas queda hondo el diaton amor?

⁵ Necesita kita conoce con Dios para puede kita ama con ele. El Biblia ta habla: “El quien gendeh ta ama no conoce con Dios, cay el Dios amor.” (1 Juan 4:8) Ya explica si apostol Pablo que hay queda mas hondo el diaton amor con Dios si tiene kita “saber y buen juicio” acerca con Ele. (Fil. 1:9) Cuando ya principia kita estudia con el Biblia, ya tiene kita amor con Dios maskin gendeh pa gayot kita bien conoce con ele. Despues, mientras ta aprende kita mas acerca con Jehova, mas ta queda hondo el diaton amor para con ele. Poreso, bien importante na diaton vida que regular estudia con el Palabra del Dios y medita con ese.​—Fil. 2:16.

6. Asegun na 1 San Juan 4:11, 20, 21, na cosa manera mas crici pa el diaton amor?

⁶ El bien grande amor del Dios para kanaton hay manda move kanaton para ama con el diaton maga hermano. (Le con el 1 San Juan 4:11, 20, 21.) Baka pensa kita que facil lang ama con el diaton maga hermano y hermana ciendo ta adora kita con Jehova y ta pricura imita con el de suyu maga buen calidad. Ta sigui kita con el ejemplo de Jesus quien ya ama gayot kanaton y ya dale de suyu vida para kanaton. Pero, tiene vez, baka tan dificil kita obedece con el mandamiento que ama con uno y otro. Considera un ejemplo na congregacion de Filipo.

7. Cosa kita puede aprende na consejo de Pablo con Evodia y Sintique?

⁷ Maga activo hermana kanda Evodia y Sintique quien “ya trabaja” junto con apostol Pablo. Pero maskin pa ansina, posible que ya tiene sila conflicto y gendeh mas man amiga. Na carta de Pablo para na congregacion donde ta sirvi este dos hermana, ya menciona le especifico con Evodia y Sintique y ya dale kanila consejo que “olvida el diila diferencia” y queda unido. (Fil. 4:2, 3) Ya sinti tambien si Pablo que necesita le habla con el entero congregacion: “Hace ustedes el maga cosa-cosa necesita hace sin reclamo ni discusion.” (Fil. 2:14) Asigurao que este franca y directa consejo de Pablo ya puede ayuda con este dos leal  hermana y con el entero congregacion para mas ama pa con uno y otro.

8. Cosa ta hace dificil para ama con el diaton maga hermano o hermana y cosa kanaton puede ayuda?

⁸ Igual con Evodia y Sintique, posible que bien dificil para kanaton que ama con otro cay tan focus kita na maga kamali que ya hace sila. Todo kita tan kamali cada dia. Si pirmi kita pensa con el kamali que ya hace el otro, mas man dificil kita ama kanila. Por ejemplo, baka consumi kita si nuay kanaton ayuda el un hermano limpia con el Kingdom Hall cay ya ulvida le. Si lista kita con el maga kamali que ya hace el diaton maga hermano, mas consumi kita y gendeh mas kita ama kanila. Si tiene tu igual ansina problema, mas bueno si pensa kita con este verdad: Ta mira si Jehova con el diaton maga kamali y del diaton maga hermano. Pero maskin pa de ese, ta ama siempre le kanaton y con el diaton hermano. Por causa con ese, necesita kita imita con el amor de Jehova y man focus na buen calidad del diaton maga hermano. Si hace kita esfuerzo para ama con el diaton maga hermano, mas queda kita unido kanila.​—Fil. 2:1, 2.

9. Cosa el cuanto “maga cosas que mas importante” que ya menciona si Pablo para na maga Cristiano de Filipo?

⁹ Ya guia el sagrao espiritu con Pablo para dale instruccion na maga de Filipo y con el todo maga Cristiano que “asigura el maga cosas que mas importante.” (Fil. 1:10, NW) Incluido na este importante cosas amo si paquemodo dale honor con el nombre de Jehova, el cumplimiento del de suyu maga promesa y el paz y unidad na congregacion. (Mat. 6:9, 10; Juan 13:35) Si mas importante este maga cosas na diaton vida, ta dale este mira que ta ama kita con Jehova.

10. Cosa kita debe hace para mira kanaton como limpio?

¹⁰ Si Pablo ya habla tambien que debe kita “queda limpio.” Gendeh este quierre decir que debe kita queda perfecto. Gendeh kita puede queda igual de limpio con Dios Jehova. Pero, hay mira kanaton si Jehova como limpio si hace kita el todo lo que puede para queda mas hondo el diaton amor y asigura el maga importante cosas. El un manera para dale kita mira diaton amor amo que evita hace luya con otro.

11. Porque kita debe evita hace luya con otro?

¹¹ Un serioso aviso el instruccion que evita hace luya con otro. Paquemodo kita puede hace luya con otro? Puede kita se hace por medio na clase de entretenimiento kita ta iscuji, mudada o el diaton clase de trabajo. Posible, nuay kita cosa ta hace malo. Pero si el cosa kita ta iscuji ta ofende con el conciencia del otro y ta hace este con ele luya, serioso se. Si Jesus ya habla que mas bueno pa si amarra kita un grande piedra na diaton pescuezo y buta kanaton na aplaya contra puede kita hace luya con el uno del de suyu carnero!​—Mat. 18:6.

12. Cosa kita puede aprende na ejemplo de este un man maridable pioneer?

¹² Nota si paquemodo ya aplica el un man maridable pioneer con el cosa ya habla si Jesus. Ta sirvi sila na un congregacion junto con el man maridable que nuevo lang ya bautiza y estaba na istricto familia. Ta pensa este nuevo bautizao que gendeh kita debe anda na cine para mira maga salida maskin pa aceptable este. Gendeh sila alegre cuando ya sabe sila que este man maridable pioneer ya anda mira cine. Despues de ese, ya descanza anay sila anda na cine hasta hay puede man train el conciencia de este nuevo maga dicipulo y queda balance. (Heb. 5:14) Na ansina  manera, ya dale mira este man maridable pioneer que ta ama sila con el diila maga nuevo hermano y hermana gendeh lang na palabra sino hasta na accion.​—Rom. 14:19-21; 1 Juan 3:18.

13. Paquemodo kita puede causa con otro para comete culpa?

¹³ El otro manera que puede kita hace luya con otro amo si causa kita con ele para comete culpa. Paquemodo este sucede? Considera con este situacion. Despues del largo tiempo y grande esfuerzo, ya puede controla el un Bible study con el de suyu vicio de tomada. Ya decidi le que gendeh mas le toma otravez alcoholico tomada. Ya hace le manada cambio na de suyu vida y ya bautiza. Na uliji, ya invita con ele el un hermano para na un especial ocasion y ya ofrece con ele alcoholico tomada y ya habla: “Cristiano ya tu ahora; tiene ya tu el espiritu de Jehova. Uno del maga aspeto del sagrao espiritu amo el control del cuerpo. Si puede tu controla con el de tuyu cuerpo, poco lang tu puede toma.” Maka-triste el resulta si este nuevo hermano hay oi con el mal consejo y bira otravez na de suyu vicio!

14. Paquemodo kanaton puede ayuda el diaton maga miting para aplica con el instruccion na Filipo 1:10?

¹⁴ Puede kanaton ayuda na manada manera el diaton maga miting para aplica con el instruccion na Filipo 1:10. Una, el cosa kita ta discuti na diaton maga miting ta dale mira si cosa el mas importante con Jehova. Ika-dos, ta aprende kita si paquemodo aplica con el cosa kita ya aprende para queda kita limpio. Y ika-tres, ta anima este kanaton “para ama  y hace maga trabajo bueno.” (Heb. 10:24, 25) Si ta anima kanaton el diaton maga hermano y hermana, mas crici el diaton amor para kanila y para con Dios. Si con todo corazon kita ta ama con Dios y con el diaton maga hermano y hermana, hace gayot kita el todo lo que puede para evita hace luya con otro.

15. Cosa quierre decir que queda “lleno del maga recto fruta”?

¹⁵ Ya reza si Pablo que el maga de Filipo hay queda “lleno del maga fruta del santidad [“recto fruta,” NW].” (Fil. 1:11) Asigurao que incluido na este “recto fruta” el diila amor para con Jehova y na de suyu maga siervo. Incluido tambien aqui que habla con otro acerca con el diila fe con Jesus y diila bonito esperanza. El Filipo 2:15 ya usa con el expresion “brilla como el maga estrellas.” Ta hace este kanaton acorda que ya llama si Jesus con el de suyu maga dicipulo como “el luz del mundo.” (Mat. 5:14-16) Ya manda tambien le con el de suyu maga siguidores que “hace maga dicipulo” y ele ya habla kanila que man “testigo . . . hasta na fin del Mundo.” (Mat. 28:18-20; Act. 1:8) Ta fruta kita “recto fruta” si activo kita ta participa con este bien importante trabajo.

16. Paquemodo ta dale mira el Filipo 1:12-14 que puede kita siempre predica maskin pa na dificil situacion? (Mira con el letrato na cover.)

¹⁶ Maskin cosa man el diaton situacion, puede siempre kita predica. Tiene vez, el maga cosa que posible sangga kanaton para declara el buen noticia amo pa el ta queda manera para puede kita predica. Por ejemplo, si apostol Pablo preso na un casa na Roma cuando ya escribi le con el carta para na maga de Filipo. Pero maskin pa preso si Pablo, nuay le descanza predica con el maga guardia y con el maga visita. Activo ta predica si Pablo maskin  pa na de suyu situacion y ya dale este confianza y coraje con el maga hermano “para anuncia sin miedo el Palabra del Dios.”​—Le con el Filipo 1:12-14; 4:22.

17. Paquemodo el diaton maga hermano y hermana ya puede continua predica maskin pa na dificil situacion?

¹⁷ Manada del diaton maga hermano y hermana ta dale mira coraje igual con Pablo. Ta queda sila na lugar donde gendeh sila puede predica na publico o na casa en casa poreso ya busca sila otro manera para predica el buen noticia. (Mat. 10:16-20) Na uno de ese maga lugar, el un circuit overseer ya dale sugestion con el cada publisher que predica con el diila maga pariente, vecinos, schoolmate, uban na trabajo y con el maga conoce sila. Adentro del dos año, ya omenta el numero del congregacion na ese circuito. Posible ta queda kita na lugar que puede kita predica na publico. Pero, puede kita aprende un importante leccion na ejemplo del diaton maga hermano y hermana: Pirmi busca manera para participa na ministerio y asigurao hay dale si Jehova contigo el abilidad para continua predica maskin na dificil situacion.​—Fil. 2:13.

18. Cosa kita debe determinao hace?

¹⁸ Ahora ya el tiempo para queda determinao aplica con el consejo que puede incuntra na carta de Pablo para na maga de Filipo. Debe kita asigura el mas importante cosas, queda limpio, evita hace luya con otro y tiene recto fruta. Na ansina manera, hay crici el diaton amor y dale este honor con el diaton amable Tata, si Jehova.