PODEROSO el fe. Por ejemplo, quierre si Satanas destroza con el diaton relacion con Jehova pero el fe puede kanaton ayuda “para hace apaga con el maga pana de fuego del Demonio.” (Ef. 6:16) Si tiene kita fe, puede kita aguanta na maga problema maskin igual pa este na monte de grande. Si Jesus ya habla con el de suyu maga dicipulo: “Si tiene ustedes fe igual lang de grande como un pipita de mustaza, ay puede ustedes habla con este monte, ‘Sale aqui y anda alla,’ y ay anda se.” (Mat. 17:20) Ciendo el fe puede hace fuerte con el diaton relacion con Jehova, debe kita considera con este maga pregunta: Cosa el fe? Cosa el efecto del diaton condicion de corazon na diaton fe? Paquemodo kita puede hace fuerte con el diaton fe? Y con quien kita debe demonstra fe?​—Rom. 4:3.

El fe gendeh lang basta ta creé si cosa ta habla el Biblia o ta acepta que deverasan este cay maskin “el maga demonio ta cree tamen ese y ta tembla gayot sila.” (Sant. 2:19) Entonces, cosa el fe?

Asegun na Biblia, el fe tiene dos aspeto. Una, “el fe amo el garantia del maga cosa-cosa que ta esperanza kita.” (Heb. 11:1a) Si tiene tu fe, ta creé gayot tu que deverasan el todo cosa ta habla si Jehova y hay cumpli gayot este. Por ejemplo, ya habla si Jehova con el maga Israelita: “Si puede ustedes destroza con el de mio contrata acerca na dia y con el de mio contrata acerca na noche, para sangga con el llegada del dia y del noche na justo tiempo de este, na ese tiempo lang destroza el de mio contrata con David que de mio siervo.” (Jer. 33:20, 21) Ta tiene ba tu miedo que gendeh mas subi y abaja el sol y perde ya el dia y noche? Si gendeh tu tan duda con el law of nature que amo ta causa para continua man bira-bira el mundo na axis de este y na sol, man duda ba tu que el quien ya hace con ese ley gendeh puede cumpli con el de suyu promesa? Siempre, gendeh!​—Isa. 55:10, 11; Mat. 5:18.

Ika-dos, el fe amo “el conviccion del maga cosa-cosa que gendeh ta puede mira.” Quierre decir, el fe amo “el conviccion” o el evidencia que maka-convinci na maga cosas que gendeh ta puede mira el diaton ojos pero deverasan. (Heb. 11:1b) Na cosa manera? Pone kita que ya pregunta contigo el un bata, ‘Porque tu sabe que tiene aire?’ Maskin no puede tu mira con el aire, puede tu menciona con el bata maga evidencia que tiene gayot aire igual como si ta resulla kita, el efecto del aire na maga pono y otro pa. Si queda convincido el bata na ese maga evidencia, puede le entende que posible creé con el maga cosas maskin gendeh kita ta puede mira. Na igual manera, el fe base na deverasan evidencia.​—Rom. 1:20.

Ciendo base na evidencia el fe, el un persona debe una tiene “el completo conocimiento del verdad.” (1 Tim. 2:4) Pero gendeh se bastante. Si apostol Pablo ya escribi: “Tiene kita fe na di aton corazon.” (Rom. 10:10, El Nuevo Testamento) Gendeh lang debe creé el un persona con el verdad sino aprecia tambien le con este. Na  ese lang manera puede le demonstra fe y actua harmonia na verdad. (Sant. 2:20) Si el un persona nuay apreciacion na verdad, posible gendeh le creé maskin pa tiene claro evidencia cay no quierre le cambia el cosa le ta creé o cay quierre le hace el cosa le quierre. (2 Ped. 3:3, 4; Jud. 18) Poreso, na tiempo del Biblia, gendeh todo quien ya puede mira con el maga milagro el ya demonstra fe. (Num. 14:11; Juan 12:37) El sagrao espiritu del Dios ta produci lang fe na maga persona quien ta ama si cosa el verdad.​—Gal. 5:22; 2 Tes. 2:10, 11.

Si Rey David amo el uno del maga tiene fuerte fe. (Heb. 11:32, 33) Pero, gendeh todo na familia de David el tiene fuerte fe. Por ejemplo, na un ocasion el mayor hermano de David, si Eliab, nuay demonstra fe cay ya regaña le con David cuando yan lingasa este na cosa ya habla si Goliat. (1 Sam. 17:26-28) Nuay quien ya nace que tiene ya daan fe o ya hereda na de suyu maga mayores, poreso el fe de David amo un resulta del de suyu buen relacion con Dios.

Na Salmo 27, ya revela si David si paquemodo le ya tiene fuerte fe. (V. 1) Ya medita si David con el de suyu experiencia de antes y si paquemodo si Jehova ya trata con el de suyu maga enemigo. (V. 2, 3) Ya aprecia gayot le con el arreglamiento de Jehova para na adoranza. (V. 4) Si David ya adora con Dios na tabernaculo junto con el maga siervo del Dios. (V. 6) Ya atraca le con Jehova na rezo. (V. 7, 8) Quierre tambien si David que enseña con ele acerca na camino del Dios. (V. 11) Bien importante el fe con David poreso ya pregunta le: “Onde ya gaha yo ahora si nuay yo fe?”​—V. 13.

Puede tu tiene fuerte fe igual con David si imita tu con el pensamiento y custumbre que ya menciona na Salmo 27. Ciendo base na exacto saber el fe, si mas estudia tu con el Palabra del Dios y maga publicacion, mas facil tu puede dale mira con este aspeto del fruta del espiritu del Dios. (Sal. 1:2, 3) Dale tiempo para medita si ta estudia tu. Si medita tu con el cosa tu ta estudia, mas queda hondo el de tuyu apreciacion con Jehova. Mientras ta queda hondo el de tuyu apreciacion con Jehova, mas queda fuerte el de tuyu deseo que demonstra fe por medio de adora con ele na miting y declara el de tuyu esperanza con otro. (Heb. 10:23-25) Ta demonstra tambien kita fe si ta “reza [kita] pirmi y no perde el animo.” (Luc. 18:1-8) Poreso, “reza pirmi” con Jehova y confia que “Ele ta cuida con ustedes.” (1 Tes. 5:17; 1 Ped. 5:7) El fe manda move kanaton para hace si cosa el justo y si hace kita si cosa el justo, mas queda fuerte el diaton fe.​—Sant. 2:22.

Na noche antes muri si Jesus, ya habla le con el de suyu maga dicipulo: “Ustedes ta cree con Dios, entonces cree tamen conmigo.” (Juan 14:1)  Poreso, necesita kita demonstra fe gendeh lang con Jehova sino pati con Jesus. Paquemodo tu demonstra fe con Jesus? Considera kita tres manera.

Una, pensa como personal regalo del Dios contigo el rescate. Si apostol Pablo ya habla: “Ta vivi yo por medio del fe con el Anak del Dios, quien ya ama conmigo y ya dale su cuerpo para muri por causa dimio.” (Gal. 2:20) Si ta demonstra tu fe con Jesus, convincido tu que puede ayuda contigo el rescate, ya hace este posible para perdona con el de tuyu maga culpa, dale contigo esperanza vivi hasta para cuando y el de con todo grande prueba del amor del Dios para contigo. (Rom. 8:32, 38, 39; Ef. 1:7) Puede este ayuda contigo para gendeh tu pensa negativo acerca na de tuyu mismo cuerpo.​—2 Tes. 2:16, 17.

Ika-dos, queda cerca con Jehova por medio na rezo que ya queda posible por causa na sacrificio de Jesus. Por causa na rescate, puede kita reza con Jehova que “tiene kita confianza para atraca na trono de Dios para ay experiencia el di suyo lastima y para ay recibi tamen kita el di suyo gran favor para ayuda canaton na hora del di aton necesidad.” (Heb. 4:15, 16; 10:19-22, El Nuevo Testamento) El rezo puede kanaton ayuda queda determinao resisti con el tentacion para hace culpa.​—Luc. 22:40.

Ika-tres, obedece con Jesus. Si apostol Juan ya escribi: “Si quien ta cree con el Anak tiene vida hasta cuando. Si quien no quiere cree con el Anak gendeh gayot ay mira el Vida. Emvez, el rabia de Dios talli con ele.” (Juan 3:36) Nota que asegun con Juan, aquellos quien gendeh ta demonstra fe amo maga desobediente. Entonces, ta demonstra tu fe con Jesus si ta obedece tu con ele. Ta obedece tu con Jesus si ta sigui tu con “el Ley de Cristo” que amo el todo cosa le ya enseña y ya manda. (Gal. 6:2) Ta obedece tambien tu con Jesus si ta sigui tu con el direccion que ta dale le por medio del “fiel y sabio esclavo.” (Mat. 24:45, NW) Si ta obedece tu con Jesus, puede tu aguanta maskin cosa clase pa de problema.​—Luc. 6:47, 48.

Un dia, el un gente ya habla con Jesus: “Ta cree yo pero ayuda conmigo, cay diutay lang el dimio fe.” (Mar. 9:24) Tiene fe este gente pero ya admiti le que necesita le grande fe. Igual con este gente, llega el tiempo que todo kita necesita grande fe. Y todo kita puede hace fuerte con el diaton fe ahora. Como cosa kita ya puede mira, ta hace kita fuerte con el diaton fe si ta estudia kita y ta medita con el Palabra del Dios. Como resulta, mas ta hace este hondo con el diaton apreciacion con Jehova. Queda tambien este fuerte si adora kita con Jehova, habla con otro acerca na diaton esperanza y reza pirmi junto con el diaton maga hermano y hermana. Puera con ese, si ta hace kita fuerte con el diaton fe, hay ricibi kita con el de con todo grande regalo. El Palabra del Dios ta anima kanaton: “Maga hermano y hermana, mientras ta crici na de ustedes fe . . . esta ustedes na amor de Dios.”​—Jud. 20, 21.