TIENE ba un assignment na congregacion que quierre tu hace pero gendeh tu ta puede hace? Posible, un responsibilidad se que ta hace el otro. O baka un assignment o privilegio este que ta hace tu antes. Pero por causa na de tuyu edad, salud, dificultad na sen o responsibilidad na familia, gendeh mas tu ta puede hace el cosa tu ta hace de antes. O siguro, ya descanza tu na de tuyu assignment por causa na maga cambio na organizacion. Maskin cosa pa el razon, posible ta sinti tu que gendeh tu ta puede hace el maga cosas que quierre tu hace na servicio con Dios. Na ese maga situacion, gendeh maka-estraña si ta sinti tu triste. Pero maskin pa ansina, cosa contigo puede ayuda para gendeh man luya, man sentimiento o rabia? Paquemodo tu puede mentena de tuyu alegria?

Puede kita aprende un leccion si paquemodo esta alegre na ejemplo de Juan Bautista. Ya ricibi le cuanto bonito privilegio pero posible, nuay le expecta el maga cosas que ya sucede na de suyu servicio con Jehova. Posible, nuay le pensa que mas largo tiempo le na preso contra na de suyu ministerio. Maskin pa ansina, ya continua queda alegre si Juan y ya mentena le con ese hasta na fin del de suyu vida. Cosa ya ayuda con ele? Y paquemodo kita esta alegre maskin pa experiencia kita maga cosas que posible kanaton hace triste?

Maga Abril 29 C.E., ya principia si Juan con el de suyu assignment que prepara con el maga gente na llegada del Mesias. Ele ya habla: “Arripinti ustedes cay el Reino del Cielo cerca ya.” (Mat. 3:2; Luc. 1:12-17) Manada el ya creé con ele. Gane, ya llega el bien manada gente estaba na maga lejos lugar para oi con el de suyu mensaje y manada el ya arripinti y ya bautiza. Ya dale tambien aviso si Juan con el maga religioso lider, quien ta pensa que bien recto sila, acerca na juzgamiento que hay ricibi sila si gendeh sila cambia. (Mat. 3:5-12) Ya hace si Juan el de con todo importante trabajo na de suyu ministerio cuando ya bautiza le con Jesus del Octubre 29 C.E. Desde aquel tiempo, ya habla si Juan con el maga gente que sigui con Jesus, el Mesias.​—Juan 1:32-37.

Acerca na assignment de Juan, si Jesus ya habla: “Noay pa quien ya nace na mundo quien mas  importante pa con Juan el Bautista.” (Mat. 11:11) Asigurao, alegre si Juan na bendicion que ya ricibi le. Igual con ele, manada tambien ahora ya ricibi maga bonito bendicion estaba con Dios. Un ejemplo amo el un hermano, si Terry. Ele y el de suyu mujer, si Sandra, ya sirvi full-time mas de 50 año ya. Si Terry ya habla: “Ya tiene yo manada bonito privilegio. Ya sirvi yo como un pioneer, Bethelite, special pioneer, circuit overseer, district overseer y ahora, un special pioneer ya tambien yo.” Alegre kita si ricibi kita maga privilegio na organizacion pero como cosa kita hay aprende na ejemplo de Juan, necesita esfuerzo para esta alegre si cambia el diaton situacion.

Ya esta alegre si Juan Bautista cay nuay perde el de suyu apreciacion na maga privilegio que ya tiene le. Considera kita un ejemplo. Despues del bautismo de Jesus, ya menora el siguidores de Juan mientras el siguidores de Jesus ta queda manada. Malingasa el maga dicipulo de Juan poreso ya habla sila con ele: “Maestro, el gente estaba junto con Uste . . . ta bautiza ahora y todo el maga gente ta anda con ele.” (Juan 3:26) Si Juan ya contesta: “El quien tiene el novia amo el novio. Pero el amigo del novio, quien talli con ele y ta oi con ele, ta alegra cuando ta oi le el voz del novio. Y este amo gayot el dimio alegria, y ahora completo ya.” (Juan 3:29) Nuay man competencia si Juan con Jesus. Nuay tambien le pensa que nuay valor el de suyu trabajo cay mas importante el trabajo de Jesus. Sino, ya esta alegre si Juan cay ya aprecia le con el de suyu papel como “el amigo del novio.”

El custumbre de Juan ya ayuda con ele queda contento maskin pa gendeh facil el de suyu assignment. Por ejemplo, un Nazareo si Juan desde ya nace le poreso no puede le toma vino. (Luc. 1:15) “Ya vene si Juan, quien ta ayuna y gendeh ta toma,” ya habla si Jesus donde ta refiri le con el simple manera de vida de Juan. Pero si Jesus y el de suyu maga dicipulo gendeh maga Nazareo y igual lang na comon gente el diila manera de vida. (Mat. 11:18, 19) Mas pa, nuay hace maga milagro si Juan pero sabe le que el maga dicipulo de Jesus, incluido ya aquellos quien ta sigui con Juan de antes, ya puede hace maga milagro. (Mat. 10:1; Juan 10:41) En vez de pensa con este maga diferencia, ya continua si Juan queda activo na assignment que ya dale con ele si Jehova.

Si aprecia kita con el diaton presente assignment na servicio con Jehova, puede kita mentena con el diaton alegria. Si Terry, que ya menciona enante, ya habla: “Tan focus yo con el cada assignment que ta dale conmigo.” Mientras ta pensa le con el de suyu vida cuando ta sirvi le full-time, ya habla le, “Ya tiene yo maga bien bonito experiencia y nuay yo cosa ya arripinti.”

Puede kita queda mas alegre na servicio con Dios si medita kita si porque bien valoroso el diaton assignment o responsibilidad. El razon amo cay tiene kita privilegio “trabaja junto con Dios.” (1 Cor. 3:9, El Nuevo Testamento) El un valoroso cosa hay esta bonito si pirmi kita cuida con este. Na igual manera, hay esta kita alegre si pirmi kita pensa que un bien grande honor que trabaja junto con Jehova. Hay evita kita compara con el diaton sacrificio na sacrificio del otro. Y gendeh kita pensa que gendeh importante el trabajo que ya dale kanaton si compara con el trabajo que ya dale con otro.​—Gal. 6:4.

Posible, sabe si Juan que limitao lang el de suyu ministerio pero posible nuay le expecta que acaba este dayun. (Juan 3:30) Del 30 C.E., maga seis mes despues bautiza si Juan con Jesus, ya hace con ele preso si Rey Herodes. Pero maskin pa ya sucede se, ya continua siempre le enseña. (Mar. 6:17-20) Cosa ya ayuda con ele para esta alegre maskin pa na ese maga cambio? Ya esta le focus na espiritual cosas.

Mientras na preso si Juan, ya ricibi le noticia acerca na ministerio de Jesus. (Mat. 11:2; Luc. 7:18) Convincido si Juan que si Jesus el Mesias pero posible, ya pensa le si paquemodo cumpli si Jesus con el todo cosas que ya habla na Escritura acerca na Mesias. Ciendo hay rula el Mesias, posible gaha que rula ya dayun si Jesus? Posible gaha que libra con ele na preso? Cay quierre le  sabe mas acerca na cosa hace si Jesus, ya manda le anda con el dos del de suyu maga dicipulo para pregunta con Jesus: “Uste ya ba Aquel quien ay vene o necesita pa came espera con otro?” (Luc. 7:19) Cuando ya bira sila, asigurao que ya oi gayot si Juan mientras ta cunta sila maga milagro que ya hace si Jesus para cura con el maga gente y ya manda kanila bira para habla con Juan: “El maga bulag ya puede mira, el maga piang ya puede camina, el maga leproso ya queda limpio, el maga bungul ya puede oi, el maga muerto ya levanta y el Buen Noticia ya anuncia con el maga pobre.”​—Luc. 7:20-22.

Asigurao que ya queda fuerte si Juan na cosa le ya oi. Prueba este que ta cumpli si Jesus con el maga profecia acerca na Mesias. Maskin pa si Jesus nuay hace sale na preso con Juan, sabe si Juan que valoroso el de suyu servicio. Maskin cosa pa el de suyu situacion, tiene le razon para queda alegre.

Igual con Juan, si man focus kita na espiritual cosas, puede kita aguanta con alegria y paciencia. (Col. 1:9-11) Puede kita hace con este si le kita con el Biblia y medita con ese. Hay hace este acorda kanaton que tiene valor el todo cosa kita ta hace na diaton servicio con Dios. (1 Cor. 15:58) Si Sandra ya habla: “Si ta le yo un capitulo na Biblia cada dia, ta ayuda este conmigo para queda mas cerca con Jehova. Ya ayuda este conmigo para man focus con ele y gendeh na de mio mismo cuerpo.” Puede tambien kita man focus na maga cosas que ta hace el otro para con Jehova. Ayuda este kanaton para gendeh lang pensa acerca na diaton mismo cuerpo sino na maga cosas que ta hace si Jehova. “El programa na JW Broadcasting cada mes ya ayuda kanamon para queda mas cerca na organizacion,” ya habla si Sandra, “y ya ayuda este para puede kame mentena diamon alegria na diamon assignment.”

Si Juan Bautista ya cumpli de suyu trabajo que tiene “el Espiritu y el poder de Elias” y igual con Elias, ele “un gente igual lang canaton.” (Luc. 1:17; Sant. 5:17) Si tiene kita apreciacion y tan focus na espiritual cosas igual con Juan, puede tambien kita esta alegre na servicio con Jehova maskin cosa pa sucede na diaton vida.