1-3. Cosa el cuanto razon si porque el maga na full-time posible cambia assignment?

“DESPUES kame sirvi por 21 año como maga misionario, el diamon cuatro mayores ya queda maluya,” ya habla si Robert y Mary Jo. “Alegre kame cuida kanila. Pero, duele para kanamon deja con el lugar que ya queda cerca na diamon corazon.”

² “Cuando ya sabe kame que gendeh mas kame puede bira na diamon assignment por causa na diamon salud, ya llura kame,” ya relata si William y Terrie. “Quierre gayot kame sirvi na otro lugar pero gendeh mas se kame puede hace ahora.”

³ “Sabe kame que el quien ta persigui kanamon quierre cerra con el branch office onde yo ta sirvi,” ya habla si Aleksey. “Pero, maka-triste siempre cuando ya sucede este y necesita kame sale na Bethel.”

4. Cosa maga pregunta kita hay discuti na este articulo?

⁴ Manada tambien de aquellos ta sirvi full-time, incluido ya aquellos na Bethel, el ya ricibi nuevo assignment. * Posible, malisud para con el diaton maga fiel hermano y hermana que deja con el diila assignment que bien valoroso kanila. Cosa puede ayuda kanila para puede man adjust? Paquemodo tu asisti kanila? El contestacion na ese maga pregunta puede ayuda kanaton todo si enfrenta kita cambio na diaton vida.

5. Na cosa maga manera el cambio na assignment puede afecta kanaton?

⁵ Ta sirvi man kita na field o na Bethel, pronto lang para kanaton ama con el maga gente y maskin con el lugar onde kita ta sirvi. Poreso, ta sinti kita triste si deja ya kita con el diaton assignment. Tan miss kita con el maga hermano y hermana y tan lingasa kita kanila, especialmente si ya sale kita por causa na maga persecucion. (Mat. 10:23; 2 Cor. 11:28, 29) Mas pa, posible bien dificil para kanaton anda na nuevo lugar cay baka necesita pa kita man adjust na nuevo cultura. Puede tambien se kita sinti maskin pa bira lang kita na lugar onde kita estaba. “Gendeh mas kame familiar con el diamon cultura y maskin para predica usando el diamon mismo lengguaje,” habla si Robert y Mary Jo. “Ya sinti kame dol gendeh ya kame de aqui.” El cuanto quien ya tiene cambio na assignment posible enfrenta dificultad na financial. Posible no sabe sila cosa hace, tan lingasa y tan luya. Cosa puede ayuda kanila?

6. Paquemodo kita esta cerca con Jehova?

⁶ Esta cerca con Jehova. (Sant. 4:8) Puede se kita hace si confia kita con ele como “el quien ta oi con el rezo.” (Sal. 65:2) “Hace sale con ele el cosa ustedes ta sinti,” habla el Salmo 62:8. Si Jehova “ta puede hace todo maga cosa-cosa na un manera alto pa gayot con el ta puede kita mira o pensa.” (Ef. 3:20) Ta puede le dale maskin el maga cosa que nuay kita inclui na diaton maga rezo. Puede le hace el maga cosa que gendeh kita ta expecta, mas pa na cosa kita puede pensa para solva con el diaton maga problema.

7. (a) Cosa puede ayuda kanaton para esta cerca con Jehova? (b) Asegun na Maga Hebreo 6:10-12, cosa el resulta si continua kita sirvi con Jehova?

⁷ Para esta cerca con Jehova, le con el Biblia cada dia y medita con este. El un hermano que misionario de antes ya habla: “Mentena el de tuyu schedule de family worship y continua prepara para na miting como cosa tu ta hace cuando na assignment pa tu.” Y continua hace el todo na predicacion del buen noticia na de tuyu nuevo congregacion. Ta acorda si Jehova con aquellos quien ta continua sirvi con ele maskin pa gendeh mas sila ta puede hace el cosa sila ta puede hace de antes.​—Le con el Maga Hebreo 6:10-12.

8. Paquemodo el maga palabra na 1 San Juan 2:15-17 puede ayuda contigo que continua hace simple el de tuyu vida?

 ⁸ Continua hace simple de tuyu vida. No permiti que el lingasa de este mundo de Satanas hay “hace lumus” con el de tuyu espiritual actividad. (Mat. 13:22) No sigui na pressure de este mundo o na maga amigo y maga pariente quien ta habla contigo que necesita tu busca manada sen para mas queda enbuenamente el de tuyu vida. (Le con el 1 San Juan 2:15-17.) Confia con Jehova quien ya promete que dale el todo diaton necesidad na espiritual, emocional y material na tiempo “cuando necesita kita.”​—Heb. 4:16; 13:5, 6.

9. Asegun na Proverbio 22:3, 7, porque importante que evita man debe si gendeh necesita y cosa puede ayuda kanaton para hace justo decicion?

⁹ Evita man debe si gendeh necesita. (Le con el Proverbio 22:3, 7.) Posible grande el diaton gasto si cambia kita lugar y facil lang decidi que man debe. Para menora el debe, no man debe para cumpra maga cosas que gendeh tu necesita. Si na dificil situacion kita, igual si tiene quien ya enferma na familia, posible dificil decidi si cosa de grande kita man debe. Na ese situacion, acorda que el “rezo y peticion” puede ayuda para puede tu hace justo decicion. Si Jehova puede dale contigo el paz que hay ‘guarda el de tuyu corazon y pensamiento’ y ayuda contigo esta calma para puede tu decidi si cosa mas bueno hace.​—Fil. 4:6, 7; 1 Ped. 5:7.

10. Paquemodo kita tiene maga nuevo amigo?

¹⁰ Mentena el buen relacion. Habla na de tuyu maga amigo acerca si cosa tu ta sinti y el maga dificultad que ta experiencia tu, especialmente con aquellos igual de tuyu pasada. Si hace tu se, puede se dale alivio contigo. (Ecl. 4:9, 10) El de tuyu maga amigo de antes hay esta siempre de tuyu maga amigo. Ahora na de tuyu nuevo assignment, necesita tu busca nuevo maga amigo. Acorda que para tiene tu amigo, necesita tambien tu queda un buen amigo. Paquemodo tu tiene maga nuevo amigo? Cunta el de tuyu maga bonito experiencia na servicio con Jehova para puede sila sinti el de tuyu alegria. Maskin el los demas na congregacion posible gendeh entende si porque quierre-quierre tu sirvi full-time, el otro posible queda interesao que sabe pa mas y queda de tuyu amigo. Pero con cuidao que no dale sobra atencion na cosa tu ya puede cumpli na servicio con Jehova y no man focus na de tuyu negativo sentido.

11. Cosa tu hace para esta alegre el de ustedes matrimonio?

¹¹ Si necesita ustedes sale na de ustedes assignment por causa na salud del de tuyu marido o mujer, no disculpa con ele. O si tu mismo  el tiene problema na salud, no pensa que culpa de tuyu porque ustedes ya sale. Acorda que “un cuerpo” ustedes y ya promete ustedes con Jehova que hay cuida ustedes con uno y otro maskin cosa pa pasa. (Mat. 19:5, 6) Si ya sale ustedes na assignment cay ya tiene ustedes anak que nuay na plano, asigura con ele que mas importante le contra na de ustedes assignment. Habla pirmi con el de ustedes anak que ele “un premio” estaba con Dios. (Sal. 127:3-5) Cunta tambien con ele el de ustedes maga bonito experiencia na de ustedes assignment. Puede se ayuda con ele para sirvi tambien con Jehova full-time igual na cosa ustedes ya hace.

12. (a) Paquemodo kita puede ayuda con el maga na full-time para puede continua na diila assignment? (b) Paquemodo kita ayuda kanila man adjust na diila nuevo assignment?

¹² Manada congregacion y maga hermano y hermana el ta ayuda con aquellos na full-time para puede esta na diila assignment. Ta anima sila kanila para continua na diila trabajo, ta dale material ayuda y ta ayuda cuida con el diila familia que lejos kanila. (Gal. 6:2) Si ya ricibi nuevo assignment aquellos na full-time na de ustedes congregacion, no pensa que tiene sila cosa ya hace malo o ya disciplina kanila. * Sino ayuda kanila para pronto sila man adjust. Man welcome kanila y dale comendacion na trabajo que ya hace sila maskin pa menos el cosa sila ta puede hace por causa na diila salud. Conoce kanila. Aprende na diila maga saber, training y experiencia.

13. Cosa ayuda kita puede dale con aquellos ya ricibi nuevo assignment?

 ¹³ Na principio, aquellos ya ricibi nuevo assignment posible necesita el de tuyu ayuda para busca casa onde esta, trabajo, transportacion y otro pa cosas que necesita sila. Posible necesita tambien sila sabe maga informacion igual na pagada de tax o si paquemodo saca insurance. Pero el cosa sila mas ta necesita amo que pricura kita entende con el diila situacion. Baka tan lisud sila por causa na diila problema na salud o del diila familia. Posible dolorido sila cay tiene quien ya muri na familia. * Y maskin gendeh sila ta habla, posible triste sila cay tan miss sila con el diila maga amigo y amiga na diila assignment de antes. Necesita sila tiempo para enfrenta con ese maga sentido que posible gendeh kita ta entende.

14. Paquemodo el maga publisher ya ayuda con el un hermana man adjust na de suyu nuevo assignment?

¹⁴ Mientras tanto, el de tuyu suporta y ejemplo puede ayuda kanila man adjust. “Na assignment de mio de antes, ta conduci yo Bible study cada dia,” habla el un hermana quien ya sirvi na otro nacion por cuanto año. “Na de mio nuevo assignment, tan lisud yo maskin para le texto o dale mira video na ministerio. Pero el maga publisher ya invita conmigo para man junto kanila na diila maga return visit y study. Este maga activo hermano y hermana quien ta conduci maga progresivo Bible study ya puede ayuda conmigo para queda positivo na ministerio. Ya puede yo aprende si paquemodo principia man cuento na maga gente na diamon nuevo teritorio. Este todo ya ayuda para bira otravez el de mio alegria.”

15. Paquemodo tu tiene buen exito na de tuyu nuevo assignment?

¹⁵ Puede tu tiene buen exito na de tuyu nuevo assignment. No pensa que tiene tu cosa kamali ya hace na de tuyu assignment de antes o pensa que nuay mas tu valor. Pensa con el maga ayuda que ta dale si Jehova  contigo y continua predica. Imita con el maga fiel Cristiano del primer siglo. Maskin onde lugar man sila ya guinda, ya continua sila “anuncia el Buen Noticia.” (Act. 8:1, 4) El de tuyu esfuerzo que continua predica hay tiene buen resulta. Por ejemplo, el maga pioneer con quien ya manda sale na un nacion, ya cambia na otro lugar que tiene grande necesidad na diila lengguaje. Despues del cuanto meses, ya forma el nuevo maga grupo.

16. Paquemodo tu tiene alegria na de tuyu nuevo assignment?

¹⁶ “El alegria que ta sale con Jehova amo el de ustedes fuerza.” (Neh. 8:10, ftn.) El diaton alegria debe ta depende na diaton relacion con Jehova y gendeh na diaton assignment, maskin pa ta ama kita con este. Poreso si quierre kita queda alegre, esta kita cerca con Jehova y continua pidi sabeduria, guia y suporta. Acorda que yan enjoy tu na de tuyu assignment de antes cay ya hace tu el todo lo que puede para ayuda con el maga gente alla. Pone el de tuyu corazon na de tuyu nuevo assignment y mira si paquemodo ayuda si Jehova contigo para man enjoy tambien con ese.​—Ecl. 7:10.

17. Cosa kita debe acorda acerca na diaton presente assignment?

¹⁷ Debe kita acorda que temporario lang el diaton presente assignment pero el diaton servicio con Jehova hasta para cuando. Na nuevo mundo todo kita posible tiene cambio na assignment. Si Aleksey que ya menciona enante, ya habla que el maga cambio na assignment amo ta ayuda con ele para queda preparao para na nuevo mundo. “Del antes, sabe yo que real si Jehova y el nuevo mundo pero ta mira yo dol poco lejos pa este,” habla si Aleksey. “Ahora, tiene ya yo cerca relacion con Jehova que dol talli le enfrente conmigo y cerca ya gayot el nuevo mundo.” (Act. 2:25) Poreso, maskin cosa man el diaton assignment, quierre kita esta cerca con Jehova. Nunca le hay deja kanaton y hay ayuda le kanaton para queda alegre mientras ta hace kita el todo lo que puede na servicio con ele​—maskin onde pa man este.​—Isa. 41:13.