1. Cosa kita todo quierre para na diaton maga pariente?

“CUANDO ya aprende yo el verdad, quierre yo que el de mio entero familia man junto conmigo na Paraiso,” ya habla el un hermana, si Pauline. * “Y bien quierre yo que el de mio marido si Wayne y el de mio anak man junto conmigo sirvi con Jehova.” Tiene ba tu pariente quien nuay pa conoce y ama con Jehova? Igual con Pauline, posible quierre tambien tu que el de tuyu pariente man junto contigo sirvi con Jehova.

2. Cosa maga pregunta kita hay discuti na este articulo?

² Gendeh kita puede forza con el diaton maga pariente para acepta con el buen noticia pero puede kita anima kanila para abri el diila pensamiento y corazon que oi con el mensaje del Biblia. (2 Tim. 3:14, 15) Porque kita debe predica con el diaton maga pariente? Porque kita debe dale mira empatia? Paquemodo kita puede ayuda con el diaton maga pariente aprende ama con Jehova igual kanaton? Y paquemodo puede ayuda kanaton el maga hermano y hermana na congregacion?

3. Base na 2 Pedro 3:9, porque kita debe predica con el diaton maga pariente?

³ Gendeh mas tarda, si Jehova hay termina ya con este sistema de maga cosas. Aquellos lang maga “quien tiene justo condicion de corazon para obtene vida eterna” hay sobrevivi. (Act. 13:48, NW) Ta dale kita el diaton manada tiempo y fuerza para predica con el maga gente que gendeh kita conoce na diaton lugar, poreso natural lang que quierre tambien kita predica con  el diaton maga pariente para sirvi tambien sila con Jehova junto kanaton. El diaton amable Tata, si Jehova, “quiere Le que nuay ni uno quien ay perde, sino todo ay arripinti.”​—Le con el 2 Pedro 3:9.

4. Cosa kamali kita posible ta hace si ta predica na diaton maga pariente?

⁴ Debe kita acorda que tiene justo y gendeh buen manera para predica con el mensaje del salvacion. Por ejemplo, con cuidao kita ta predica con el maga gente que gendeh kita conoce pero posible bien franca kita si ta predica na diaton maga pariente.

5. Cosa kita debe acorda antes kita pricura predica con el diaton maga pariente?

⁵ Manada kanaton el ta arripinti si ta acorda kita el primer vez que ya pruba kita predica con el diaton maga pariente y ta pensa que era ya predica kita kanila enbuenamente. Si apostol Pablo ya conseja con el maga Cristiano: “Hace el de ustedes conversada alegre y interesante. Contesta con cada uno con abilidad, como conviene.” (Col. 4:5, 6) Acorda kita con ese consejo si ta predica kita con el diaton maga pariente. Na ansina manera, posible gendeh kita puede ofende kanila sino ayuda se para oi sila kanaton.

6-7. Dale un ejemplo para ilustra que debe dale mira empatia con el maga marido o mujer quien gendeh ta sirvi con Jehova.

⁶ Dale mira empatia. Si Pauline, que ya menciona enante, ya habla: “Na primero, quierre yo converza na de mio marido acerca lang na maga espiritual cosas. Gendeh kame tan cuento acerca na otro cosas.” Pero el marido de Pauline que si Wayne diutay lang el saber na Biblia y gendeh le ta entende el maga cosa ta habla si Pauline. Para con ele, el todo ta pensa el de suyu mujer acerca lang na de suyu religion. Malingasa le que baka ta participa el de suyu  mujer na un peligroso secta y ya engaña ya con este.

⁷ Ya admiti si Pauline que mucho del de suyu noche y weekend ta usa le para man junto con el de suyu maga hermano y hermana​—na miting, na predicacion y na diila casa. “Tiene vez ta bolbe si Wayne que nuay gente na casa y ta sinti le triste,” ya habla si Pauline. Siempre, quierre si Wayne man junto con el de suyu mujer y con el de suyu anak. No conoce le si con quien sila tan junto y ta pensa le que mas importante para con el de suyu mujer el de suyu maga nuevo amigo y amiga contra con ele. Ya pensa si Wayne man divurcio con Pauline. Ta puede ba tu pensa cuanto manera que debe era hace si Pauline?

8. Asegun na 1 Pedro 3:1, 2, cosa el posible puede dayun nota el diaton maga pariente?

⁸ Dale mira buen ejemplo. Na manada situacion, el diaton maga pariente ta puede nota el maga cosa kita ta hace compara na cosa kita ta habla. (Le con el 1 Pedro 3:1, 2.) Ya puede dayun realiza si Pauline con ese verdad. “Sabe yo que ta ama kanamon si Wayne y no quierre le que man divurcio kame,” ele ya habla. “Pero el de suyu amenazo ya manda conmigo realiza que debe yo aplica si cosa ta habla si Jehova acerca na matrimonio. En vez de converza con ele pirmi acerca na maga espiritual cosas, debe yo dale mira buen ejemplo por medio na de mio conducta.” Nuay mas forza si Pauline con Wayne man cuento acerca na Biblia y ya principia le man cuento con ele acerca na otro cosas. Ya puede nota si Wayne que el de suyu mujer mas ya queda calmao y el de suyu anak ya queda buen bata. (Prov. 31:18, 27, 28) Cuando ya puede observa si Wayne el buen efecto del mensaje del Biblia na de suyu familia, ya abri le el de suyu pensamiento y corazon para ricibi el Palabra del Dios.​—1 Cor. 7:12-14, 16.

9. Porque kita debe continua ayuda con el diaton maga pariente?

 ⁹ Continua ayuda con el de tuyu maga pariente. Si Jehova ya dale ejemplo kanaton. Na manada beses ya dale le el oportunidad con el maga gente que oi con el buen noticia y obtene el vida. (Jer. 44:4) Y si apostol Pablo ya habla con Timoteo que continua ayuda con otro. Porque? Cay si hace le se, puede le salva con el de suyu mismo cuerpo y aquellos quien ta oi con ele. (1 Tim. 4:16) Ta ama kita con el diaton maga pariente poreso quierre kita que sabe sila el verdad na Palabra del Dios. El maga palabra y accion de Pauline ya tiene dayun buen efecto na de suyu familia. Ahora alegre le ta sirvi con Jehova junto con el de suyu marido. Pioneer sila dos y si Wayne ta sirvi como un anciano.

10. Porque necesita kita queda paciencioso?

¹⁰ Queda paciencioso. Si vivi kita asegun na maga principio del Dios, dificil para na diaton maga pariente acepta con el diaton nuevo creencia y manera de vida. Mas mucho, el una sila ta puede nota amo que gendeh ya kita ta participa na maga religioso celebracion y na maga actividad que tiene que hace na politica. Na primero, posible el cuanto del diaton maga pariente rabia kanaton. (Mat. 10:35, 36) Pero gendeh kita debe pensa que gendeh mas sila cambia. Si descanza ya kita hace entende kanila el diaton creencia, dol ta juzga ya kita que gendeh sila conviene ricibi el vida hasta para cuando. Nuay kanaton dale si Jehova el trabajo para juzga sino ya dale se ele con Jesus. (Juan 5:22) Si paciencioso kita, el diaton maga pariente posible queda interesao oi con el diaton mensaje.​—Mira con el cajon “ Usa con el Diaton Website Para Enseña.”

11-13. Cosa tu ya aprende na tratamiento de Alice na de suyu mayores?

¹¹ Dale mira pagka-bueno pero no permiti que el de tuyu pariente cambia con el de tuyu decision. (Prov. 15:2) Considera el ejemplo de Alice. Ya aprende le acerca con Jehova cuando lejos le ta queda na de suyu mayores quien gendeh ta creé na Dios y activo na politica. Ya puede le pensa que mas bueno si habla ya le dayun con el de suyu mayores acerca na maga buen cosas que ya puede le aprende. “Si espera pa tu largo tiempo para habla acerca el maga nuevo cosas que ta creé y ta hace tu, mas hay rabia sila,” ya habla si Alice. Ya escribi le carta para na de suyu mayores y ya pregunta si cosa diila opinion acerca na maga topico na Biblia que posible puede dale interes kanila igual na amor. (1 Cor. 13:1-13) Ya rindi le gracias con el de suyu mayores que ya hace con ele engranda y ya cuida con ele y despues, ya imbia le kanila maga regalo. Cuando ya visita le con el de suyu mayores, ya hace le el todo para ayuda con el de suyu nana hace maga trabajo na casa. Del primero, gendeh alegre el mayores de Alice cuando ya habla le kanila acerca na de suyu nuevo creencia.

¹² Cuando na casa si Alice del de suyu mayores, ta le ele el de suyu Biblia todo’l dia. “Ya ayuda este con el de mio nana entende el importancia del Biblia na de mio vida,” ya habla le. Nuay tarda, el tata de Alice ya decidi aprende acerca na Biblia para puede le sabe si cosa el razon si porque ya cambia el pensamiento del de suyu anak y quierre le busca mali na Biblia. “Ya dale yo con ele un Biblia y ya escribi yo carta para con ele alla,” ya habla si Alice. Cosa el resulta? En vez de puede incuntra mali el tata de Alice, ya puede alcanza na de suyu corazon el cosa le ya puede le na Palabra del Dios.

¹³ Necesita kita dale mira pagka-bueno pero no permiti que el diaton pariente hay cambia con el diaton decision maskin pa experiencia kita maga probanza. (1 Cor. 4:12b) Ya experiencia oposicion si Alice na de suyu nana. “Cuando ya bautiza conmigo, ya llama conmigo de mio nana ‘mal anak.’” Cosa ya hace si Alice? “Nuay yo descanza man cuento acerca  na de mio nuevo religion pero con respeto yo ya explica que ya decidi ya yo queda un Testigo de Jehova y gendeh yo cambia con el de mio decision. Ya asigura yo con el de mio nana que ta ama gayot yo con ele. Ya llura kame dos y ya cuci yo con ele sabroso comida. Desde aquel dia, el de mio nana ya acepta que el Biblia ta ayuda conmigo queda mas buen persona.”

14. Porque gendeh kita debe permiti que cambia el diaton maga pariente con el diaton decision que sirvi con Jehova?

¹⁴ Posible ta necesita pa largo tiempo antes puede entende el diaton maga pariente si paquemodo de importante para kanaton que sirvi con Jehova. Por ejemplo, ya llura ya tambien el nana de Alice cuando ya decidi le man pioneer en vez de sigui el querrer del de suyu mayores para con ele. Pero nuay cambia si Alice con el de suyu decision. “Si permiti tu que cambia el de tuyu familia con el de tuyu decision acerca na un cosa posible que pricura tambien sila cambia el de tuyu decision acerca na otro cosas. Pero si dale tu mira pagka-bueno y gendeh permiti que cambia sila con el de tuyu decision, posible que el cuanto hay oi contigo,” ya habla si Alice. Ese el cosa ya sucede con ele. Pioneer ya el de suyu mayores ahora y anciano el de suyu tata.

15. Asegun na Mateo 5:14-16 y 1 Pedro 2:12, na cosa manera el “maga buen trabajo” del otro posible puede ayuda con el diaton maga pariente?

¹⁵ Si Jehova ta hace cerca con el maga gente con ele por medio na “maga buen trabajo” del de suyu maga siervo. (Le con el Mateo 5:14-16; 1 Pedro 2:12.) Si el de tuyu mujer o marido gendeh Testigo de Jehova, ya puede ya ba le conoce maga hermano y hermana na de ustedes congregacion? Si Pauline, que ya menciona enante, ya invita maga hermano y hermana na  diila casa para puede conoce kanila el de suyu marido. Ya acorda si Wayne si paquemodo el un hermano ya ayuda con ele entende si quien gayot el maga Testigo de Jehova: “Nuay le trabaja un dia para lang man junto conmigo mira sports na diamon casa. Y ya pensa yo, ‘Normal lang tambien le!’”

16. Porque kita debe invita con el diaton maga pariente na maga miting?

¹⁶ El un buen manera para ayuda con el diaton maga pariente amo invita kanila na diaton maga miting. (1 Cor. 14:24, 25) El primer miting que ya atende si Wayne amo el Comemoracion cay despues quel del de suyu trabajo y unrato lang el programa. “Nuay yo entende si acerca na cosa el talk,” ya habla le, “pero ya acorda yo con el maga gente. Ya atraca sila, yan welcome y yan lamano conmigo. Ya puede yo habla que sincero gayot sila.” Tiene tambien un man maridable que bien bueno con Pauline. Ta ayuda sila con ele cuida con el de suyu anak hombre na miting y na ministerio. Poreso cuando ya decidi si Wayne que necesita le sabe mas acerca na nuevo creencia del de suyu mujer, ya pidi le con el marido que man Bible study con ele.

17. Na cosa kita gendeh debe disculpa con el diaton mismo cuerpo, pero porque gendeh kita debe pensa que gendeh ya cambia el diaton maga pariente?

¹⁷ Ta esperanza kita que todo del diaton maga pariente hay man junto kanaton sirvi con Jehova. Pero maskin cosa pa diaton esfuerzo para ayuda kanila, posible gendeh siempre sila queda siervo del Dios. Si ansina el situacion, gendeh kita debe disculpa con el diaton mismo cuerpo na diila decision. Siempre, gendeh kita puede forza con maskin quien para acepta el diaton creencia. Pero si puede mira el de tuyu maga pariente que alegre tu ta sirvi con Jehova, puede este tiene grande efecto kanila. Reza para kanila. Enbuenamente converza kanila. No descanza ayuda kanila. (Act. 20:20) Tiene confianza que si Jehova hay bendici con el de tuyu maga esfuerzo. Y si iscuji el de tuyu maga pariente que oi contigo hay salva sila!