1. Cosa privilegio kita tiene?

UN PRIVILEGIO gayot queda parte del congregacion de Jehova! Tiene kita paz y alegria junto con el diaton maga hermano y hermana mientras ta adora con Jehova. Cosa el de tuyu papel na congregacion?

2. Cosa ilustracion ya usa si apostol Pablo na de suyu maga carta?

² Manada kita cosa puede aprende acerca na este topico estaba na ilustracion que ya usa si apostol Pablo na de suyu maga carta. Na cada uno de este maga carta, ya compara si Pablo con el congregacion na cuerpo del gente. Ya compara tambien le con el cada uno na congregacion na maga parte del cuerpo.​—Roma 12:4-8; 1 Cor. 12:12-27; Ef. 4:16.

3. Cosa el tres leccion que hay considera kita na este articulo?

³ Na este articulo, hay considera kita tres importante leccion que puede kita aprende na ilustracion de Pablo. Una, hay aprende kita que el cada uno kanaton tiene papel * na congregacion de Jehova. Ika-dos, hay discuti kita si cosa kita puede hace si tan dificil kita mira si cosa el diaton papel na congregacion. Y ika-tres, hay mira kita si porque kita necesita esta ocupao na trabajo que ya dale si Jehova con el cada uno kanaton.

4. Cosa ta enseña kanaton el Roma 12:4, 5?

⁴ El primer leccion que puede kita aprende na ilustracion de Pablo amo que cada uno kanaton tiene importante papel na familia de Jehova. Na primer parte del de suyu ilustracion, si Pablo ya habla: “Igual como el diaton cuerpo tiene mucho maga parte y cada parte tiene disuyo trabajo, pero uno lang siempre el cuerpo, ansina tamen todo kita unido con Cristo, maskin mucho, ta composita un cuerpo lang, y cada uno diaton un parte con uno y otro.” (Roma 12:4, 5) Cosa quierre decir de Pablo? El cada uno kanaton tiene otro-otro papel na congregacion, pero todo kita precioso.

5. Cosa “maga regalo” el ya dale si Jehova con el congregacion?

⁵ Si ta menciona acerca con aquellos quien tiene papel na congregacion, posible que ta pensa kita dayun con aquellos quien ta guia kanaton. (1 Tes. 5:12; Heb. 13:17) Deverasan que por medio con el Cristo, ya dale si Jehova “maga regalo con el maga gente.” (Ef. 4:8) Incluido na “maga regalo con el maga gente” el maga miembro del Cuerpo Gobernante, ayudante del Cuerpo Gobernante, miembro del Branch Committee, circuit overseer, field instructor (aquellos quien ta enseña na maga Bible school), anciano y siervo ministerial. Ya iscuji con este maga hermano por medio de sagrao espiritu para cuida con el maga siervo de Jehova y hace fuerte con el congregacion.​—1 Ped. 5:2, 3.

6. Asegun na 1 Tesalonica 2:6-8, cosa ta pricura hace el maga hermano con quien ya iscuji por medio de sagrao espiritu?

⁶ Por medio del sagrao espiritu, ya iscuji con el cuanto maga hermano para hace con el cuanto responsibilidad na congregacion. Igual si paquemodo el diferente parte del cuerpo, igual na mano y pies, ta trabaja para na beneficio del entero cuerpo, este maga hermano ta trabaja para na beneficio del entero congregacion. Gendeh se sila ta hace para alaba kanila. Sino, ta pricura sila ayuda y hace fuerte con el maga hermano y hermana. (Le con el 1 Tesalonica 2:6-8.) Ta rindi gayot kita gracias con Jehova cay ya dale le con este maga hermano quien ta hace una el bien del otro!

7. Cosa maga bendicion ta ricibi aquellos quien ta sirvi full-time?

⁷ Posible, el cuanto na congregacion ta sirvi como maga misionario, special pioneer o regular pioneer. Gane na entero mundo, tiene maga hermano y hermana quien ya decidi que sirvi full-time para predica y hace maga dicipulo. Por causa de ese, manada sila ya puede ayuda para queda maga dicipulo de Cristo Jesus. Maskin el mayoria kanila nuay tanto material cosas, ta dale kanila si Jehova manada maga bendicion. (Mar. 10:29, 30) Ta ama gayot kita con este maga hermano y hermana, y ta rindi kita gracias que parte sila del congregacion!

8. Porque el cada publisher precioso para con Jehova?

⁸ El maga hermano lang ba que tiene responsibilidad y aquellos quien ta sirvi full-time el tiene papel na congregacion? Gendeh! El cada publisher importante con Dios y con el congregacion. (Roma 10:15; 1 Cor. 3:6-9) Gane, uno del maga bien importante goal del congregacion amo el hacida de dicipulo de Señor Jesucristo. (Mat. 28:19, 20; 1 Tim. 2:4) Todo miembro del congregacion, bautizao man o unbaptized publisher, ta pricura hace prioridad con ese trabajo.​—Mat. 24:14.

9. Porque precioso para kanaton el diaton maga hermana?

⁹ Ta dale si Jehova importante papel con  el maga hermana na congregacion. Precioso con ele el maga mujer, nana, viuda y single hermana quien leal ta sirvi con ele. El Biblia ya menciona acerca na manada maga mujer quien ya ganá el favor del Dios. Ya considera kanila como maga buen ejemplo cay ya demonstra sila sabeduria, fe, pagka-activo, coraje, pagka-bondadoso y ya hace sila maga buen trabajo. (Luc. 8:2, 3; Act.16:14, 15; Roma 16:3, 6; Fil. 4:3; Heb. 11:11, 31, 35) Ta rindi gayot kita gracias con Jehova cay tiene kita maga hermana na congregacion quien tiene tambien ese maga bonito calidad.

10. Porque precioso kanaton el diaton maga de edad hermano y hermana?

¹⁰ Alegre tambien kita cay manada maga de edad na congregacion. Na cuanto maga congregacion, tiene maga de edad hermano y hermana quien leal ya sirvi con Jehova na diila entero vida. Mientras el otro kanila nuevo lang ya aprende el verdad. Ya dura ya man sila ta sirvi o nuevo lang, posible ta experiencia sila maga problema na salud cay de edad ya sila. Por causa con ese, posible que limitao ya el cosa sila ta puede hace na congregacion y na ministerio. Maskin pa ansina, ta hace sila el todo lo que puede para predica y ta usa sila con el diila fuerza para anima y man train con otro. Ta beneficia tambien kita na diila experiencia. Deverasan, precioso sila kanaton y con Jehova.​—Prov. 16:31.

11-12. Paquemodo ya puede anima contigo el maga jovenes na congregacion?

¹¹ Pensa tambien con el maga jovenes. Ta enfrenta sila manada maga problema na este mundo que ta controla si Satanas y lleno del de suyu maga filosofia. (1 Juan 5:19) Maskin pa ansina, ta mira kita kanila que tan comento na maga miting, ta participa na ministerio y con coraje ta defende con el diila creencia. Ta puede se anima kanaton. Tiene gayot importante papel el maga jovenes na congregacion de Jehova!​—Sal. 8:2.

¹² Pero el cuanto maga hermano y hermana tan dificil creé que tiene sila importante papel na congregacion. Cosa puede ayuda kanaton como individual para mira que tiene kita papel na congregacion?

13-14. Porque posible ta sinti el otro que gendeh sila importante na congregacion?

¹³ Nota con el ika-dos leccion que puede kita aprende na ilustracion de Pablo. Ya discuti le acerca el un problema que manada el ta enfrenta ahora. Tan dificil sila creé que importante sila na congregacion. Si Pablo ya escribi: “Si el pies ay habla: ‘Cay gendeh yo mano, gendeh yo parte del cuerpo,’ gendeh se ay hace con ele menos parte del cuerpo. Si el orejas ay habla: ‘Cay gendeh yo el ojos, gendeh yo parte del cuerpo,’ gendeh se ay hace con ele menos parte del cuerpo.” (1 Cor. 12:15, 16) Cosa ta enseña kanaton si Pablo?

¹⁴ Si compara tu con el de tuyu mismo cuerpo con otro, posible pensa tu que gendeh tu importante na congregacion. El cuanto na congregacion bueno enseña, bueno organiza trabajo, bueno anima y bueno dale comforta con otro. Baka ta sinti tu que gendeh tu igual de bueno kanila. Ta dale se mira que humilde tu y sabe tu de tuyu maga limitacion. (Fil. 2:3) Pero debe tu con cuidao. Si pirmi tu compara de tuyu mismo cuerpo con otro quien tiene maga abilidad, hay man luya tu. Y igual na cosa ya menciona si Pablo, posible pa gane tu sinti que nuay tu papel na congregacion. Cosa puede ayuda contigo para enfrenta con ese?

15. Asegun na 1 Corinto 12:4-11, cosa kita necesita realiza acerca na maga regalo que tiene kita?

¹⁵ Considera con este: Ya dale si Jehova maga regalo por medio de sagrao espiritu con el cuanto na maga Cristiano del primer siglo, pero nuay sila todo ricibi igual regalo. (Le con el 1 Corinto 12:4-11.) Ya dale kanila si Jehova diferente maga regalo y abilidad, pero el cada uno kanila precioso con ele. Ahora, gendeh mas kanaton ta dale maga regalo por medio de sagrao espiritu. Pero igual lang siempre el principio. Posible que gendeh igual el diaton maga abilidad pero todo kita precioso con Jehova.

16. Cosa consejo de apostol Pablo el necesita kita aplica?

¹⁶ En vez de compara con el diaton mismo  cuerpo con otro, necesita kita aplica con el consejo de apostol Pablo: “En vez de quedar orgulloso, cada uno debe observa el di suyo mismo trabajo y caracter. Si bueno ese di suyo trabajo y caracter, entonces puede le man alegre del cosa le ta hace. Pero no debe le compara el cosa ta hace le con el cosa ta hace el maga otro gente, para no queda le orgulloso cay ta pensa le que mas mejor el di suyo trabajo que con el trabajo del otro gente.”​—Gal. 6:4, El Nuevo Testamento.

17. Cosa el beneficio si sigui kita con el consejo de Pablo?

¹⁷ Si sigui kita con el consejo de Pablo y examina con el diaton mismo trabajo, puede kita mira que tiene kita maga regalo y abilidad que nuay el otro. Por ejemplo, posible que el un anciano gendeh gayot bien bueno si ta enseña na stage pero bien efectivo le na hacida de dicipulo. O baka gendeh le igual de bueno organiza na otro maga anciano na congregacion, pero conocido le como un amable anciano con quien facil atraca el maga publisher para pidi consejo estaba na Biblia. O gaha, conocido con ele como bien hospitable. (Heb. 13:2, 16) Si claro kita ta puede mira con el diaton maga abilidad, hay queda kita alegre na cosa kita ta puede hace para na congregacion. Y gendeh kita envidia con el diaton maga hermano quien tiene maga regalo que otro na cosa kita tiene.

18. Paquemodo kita progresa na diaton maga abilidad?

¹⁸ Maskin cosa man el diaton papel na congregacion, todo kita debe progresa na diaton servicio y abilidad. Para ayuda kanaton hace se, tan train kanaton si Jehova por medio na de suyu organizacion. Por ejemplo, na diaton midweek miting, ta ricibi kita maga instruccion si paquemodo queda mas efectivo na diaton ministerio. Ta pricura ba tu aplica con el cosa tu ta aprende aqui?

19. Cosa tu puede hace para alcanza con el goal que atende na School for Kingdom Evangelizers?

¹⁹ Tan train tambien kanaton si Jehova por medio na School for Kingdom Evangelizers. Puede atende na este escuela el maga hermano y hermana quien ta sirvi full-time que tiene edad de 23 hasta 65. Posible, ta sinti tu que gendeh gayot tu puede alcanza con ese goal. Pero en vez de hace lista si porque tu gendeh puede atende con ese, hace un lista de maga razon si porque tu quierre atende. Despues, hace un plano que puede ayuda contigo para queda cualificao para man apply. Por medio na ayuda de Jehova y na de tuyu esfuerzo, puede tu hace el cosa tu ta pensa que imposible para contigo.

20. Cosa kita puede aprende na Roma 12:6-8?

²⁰ Puede kita incuntra con el ika-tres leccion na ilustracion de Pablo na Roma 12:6-8. (Le.) Ya dale otravez mira si Pablo que aquellos na congregacion tiene diferente maga regalo. Pero ahora, ya hace le claro que debe kita usa con el diaton maga regalo para anima y hace fuerte con el congregacion.

21-22. Cosa leccion kita puede aprende con Robert y Felice?

²¹ Considera con el ejemplo del un hermano con quien kita llama Robert. Despues sirvi na otro nacion, yan assign con ele para sirvi na Bethel na de suyu mismo nacion. Maskin pa ya asigura con ele que nuay le cosa ya hace malo, ele ya habla: “Por cuanto mes, triste yo cay ta pensa yo que tiene yo cosa ya hace mali na de mio assignment. Tiene maga tiempo que quierre ya yo descanza na de mio servicio na Bethel.” Paquemodo ya bira de suyu alegria? El de suyu uban anciano ya hace con ele acorda que yan train kanaton si Jehova na  diaton maga assignment de antes para mas puede le kanaton usa na diaton presente assignment. Ya realiza si Robert que gendeh mas le debe pensa con el cosa ya sucede de antes, sino man focus na cosa le ta puede hace ahora.

²² Ta semeja tambien con ese el experiencia de Hermano Felice Episcopo. Ele y el de suyu mujer ya gradua na Gilead del 1956 y ya sirvi le como un circuit overseer na Bolivia. Del 1964, ya tiene sila anak. Si Felice ya habla: “Dificil para kanamon que deja con el diamon assignment. Deverasan, yan luya gayot yo por un año. Pero na ayuda de Jehova, ya cambia yo con el de mio mirada na diamon situacion y yan focus yo na de mio nuevo responsibilidad como un tata.” Ta sinti ba tu igual con Robert y Felice? Tan luya ba tu cay nuay mas el maga privilegio que tiene tu de antes? Si ansina tu ta sinti, hay queda tu mas alegre si man focus tu na cosa tu ta puede hace ahora para sirvi con Jehova y con el de tuyu maga hermano. Esta ocupao y usa con el de tuyu maga regalo y abilidad para ayuda con otro. Y hay queda tu alegre mientras ta hace tu fuerte con el congregacion.

23. Cosa kita debe hace y cosa kita considera na sunod articulo?

²³ El cada uno kanaton precioso con Jehova. Quierre le que sinti kita que parte kita del de suyu familia. Si dale kita tiempo para pensa si cosa kita puede hace para anima con el diaton maga hermano y hermana y hace esfuerzo para cumpli con ese, gendeh kita sinti que gendeh kita importante na congregacion. Pero quetal el diaton mirada na otro na congregacion? Paquemodo kita puede dale mira que ta aprecia kita kanila? Na sunod articulo, hay considera kita con ese.