1. Cosa ya habla si David acerca na humildad de Jehova?

PUEDE ba gayot kita habla que humilde si Jehova? Si! Si David ya habla: “Ta dale tu conmigo el de tuyu defensa de salvacion y el de tuyu humildad ta hace conmigo alto.” (2 Sam. 22:36; Sal. 18:35) Posible, ta pensa si David con el tiempo cuando si profeta Samuel ya anda na casa del tata de David para iscuji si quien queda rey del Israel. Si David el menor na ocho anak hombre, pero con ele ya iscuji si Jehova para cambia con Rey Saul.​—1 Sam. 16:1, 10-13.

2. Cosa kita considera na este articulo?

² Asigurao, uyun gayot si David na cosa ya habla el un salmista acerca con Jehova: “Ta agacha le para mira con el cielo y con el tierra, ta hace le levanta con el humilde estaba na polvos. Ta alza le con el pobre . . . para manda con ele sinta junto con el maga prominente gente.” (Sal. 113:6-8) Na este articulo, hay considera kita una si paquemodo si Jehova ya dale mira humildad y mira si cosa kita puede aprende con ese. Despues, hay examina kita si cosa kita puede aprende con Rey Saul, profeta Daniel y Jesus acerca na ese calidad.

3. Paquemodo ta trata kanaton si Jehova y cosa este ta dale mira?

³ Ta dale mira si Jehova que humilde le na manera si paquemodo le ta trata con el de suyu maga imperfecto siervo. Gendeh lang le basta ta acepta con el diaton adoranza sino ta mira tambien le kanaton como de suyu maga amigo. (Sal.  25:14) Para queda kita de suyu amigo, si Jehova ya hace manera cuando ya dale le con el de suyu Anak como un rescate para na diaton maga pecado. Que bien grande el de suyu lastima y compasion para kanaton!

4. Cosa kanaton ya dale si Jehova y porque?

⁴ Considera con el otro manera si paquemodo si Jehova ta dale mira humildad. Como el Creador, puede era si Jehova crea kanaton que sigui lang con el cosa le quierre. Pero nuay se le hace. Ya crea le kanaton na de suyu imagen y ya dale le kanaton libertad para decidi. Quierre le que sirvi kita con ele por causa na diaton amor y cay sabe kita que beneficia kita si obedece kita con ele. (Deut. 10:12; Isa. 48:17, 18) Ta rindi gayot kita gracias cay bien humilde si Jehova!

5. Paquemodo si Jehova ta enseña kanaton queda humilde? (Mira con el letrato na cover.)

⁵ Ta enseña kanaton si Jehova queda humilde na manera si paquemodo le ta trata kanaton. Si Jehova el de con todo sabio Persona na universo. Maskin pa ansina, preparao le acepta sugestion del otro. Por ejemplo, ya permiti le con el de suyu Anak que ayuda con ele crea con el todo cosas. (Prov. 8:27-30; Col. 1:15, 16) Y maskin pa si Jehova el Todopoderoso, ta dale le autoridad con otro. Por ejemplo, ya iscuji le con Jesus para queda Rey del Reino y hay dale tambien Le autoridad con el 144,000 gente quien rula junto con Jesus. (Luc. 12:32) Siempre, yan train si Jehova con Jesus para queda Rey y Alto Sacerdote. (Heb. 5:8, 9) Tan train tambien le con aquellos quien hay rula junto con Jesus para hace diila maga assignment, pero gendeh le hay controla con el cada detalle del cosa sila hace. Sino, ta confia le que hay hace sila con el de suyu voluntad.​—Rev. 5:10.

6-7. Cosa kita puede aprende na diaton Tata na cielo acerca na dalida de autoridad con otro?

 ⁶ Si el diaton Tata na cielo​—quien gendeh ta necesita ayuda—​ta dale autoridad con otro, cosa pa gaha kita? Por ejemplo, etu ba un cabeza de familia o anciano na congregacion? Sigui con el ejemplo de Jehova y dale responsibilidad con otro, pero no pricura controla con el diila trabajo. Si imita tu con Jehova, gendeh lang acaba el trabajo sino puede pa tu man train con otro y ayuda kanila tiene confianza na cuerpo. (Isa. 41:10) Cosa pa puede aprende aquellos tiene autoridad na ejemplo de Jehova?

⁷ El Biblia ta habla que interesao si Jehova na opinion del de suyu maga angel. (1 Rey 22:19-22) Maga mayores, paquemodo ustedes puede imita con el ejemplo de Jehova? Puede ustedes pregunta con el de ustedes maga anak si paquemodo hace con el un trabajo na casa. Y si posible, sigui con el diila sugestion.

8. Na cosa manera ya dale mira si Jehova que paciencioso le con Abraham y Sara?

⁸ Humilde tambien si Jehova cay paciencioso le. Por ejemplo, paciencioso si Jehova con el de suyu maga siervo quien yan duda con el de suyu maga decision. Ya oi le con Abraham cuando malingasa este acerca na de suyu decision que destroza con el Sodoma y Gomorra. (Gen. 18:22-33) Y acorda si cosa el reaccion de Jehova cuando el mujer de Abraham, si Sara, ya re na de suyu promesa que hay queda le priñada maskin pa de edad ya le. (Gen. 18:10-14) Nuay le rabia con Sara sino ya trata le con ele con dignidad.

9. Cosa puede aprende el maga mayores y maga anciano na ejemplo de Jehova?

⁹ Maga mayores y maga anciano, cosa ustedes puede aprende na ejemplo de Jehova? Cosa ustedes ta hace si el de ustedes maga anak o el cuanto hermano na congregacion gendeh uyun na de ustedes decision? Ta pricura ba ustedes corecta dayun kanila? O ta pricura ustedes entende con el diila opinion? Hay beneficia gayot el familia y el congregacion si ta imita con Jehova aquellos quien tiene autoridad. Ya puede ya kita discuti si cosa kita puede aprende acerca na humildad de Jehova. Ahora, mira kita si cosa kita puede aprende na maga ejemplo na Palabra del Dios.

10. Paquemodo si Jehova ta usa con el ejemplo del otro para enseña kanaton?

¹⁰ Como el diaton “Grande Instructor,” si Jehova ta dale kanaton maga ejemplo na de suyu Palabra para enseña kanaton. (Isa. 30:20, 21) Ta aprende kita si ta medita kita con el maga istoria na Biblia de aquellos quien ya dale mira maga buen calidad, incluido ya el humildad. Ta aprende tambien kita si examina kita si cosa ya sucede con aquellos nuay dale mira con ese maga calidad.​—Sal. 37:37; 1 Cor. 10:11.

11. Cosa kita puede aprende na ejemplo de Saul?

¹¹ Pensa si cosa ya sucede con Rey Saul. Cuando joven pa le, un humilde persona le. Sabe le el de suyu maga limitacion y yan alang-alang pa gane acepta maga responsibilidad. (1 Sam. 9:21; 10:20-22) Pero despues del cuanto tiempo, ya queda le arogante y ya hace maga cosas que nuay le derecho para hace. Ya principia se despues lang le queda rey. Por ejemplo, ya cansa le espera con profeta Samuel y ya perde paciencia. En vez de confia con Jehova que salva  con el De Suyu maga siervo, si Saul ya hace ofrecimiento maskin pa nuay le derecho para hace con ese. Como resulta, ya perde el favor de Jehova y el de suyu posicion como rey. (1 Sam. 13:8-14) Hay beneficia gayot kita si aprende kita na este ejemplo y evita hace el maga cosas que nuay kita derecho para hace.

12. Porque un buen ejemplo si Daniel?

¹² Gendeh igual con Saul, considera con el buen ejemplo de profeta Daniel. Na de suyu entero vida, ya esta humilde si Daniel y pirmi ta pidi el guia de Jehova. Por ejemplo, cuando ya usa con ele si Jehova para habla si cosa quierre decir del sueño de Nabucodonosor, nuay habla si Daniel que con ele quel estaba. Sino, ya dale le todo gloria y honor con Jehova. (Dan. 2:26-28) Cosa el leccion para kanaton? Si el maga hermano ta gusta oi con el diaton talk o tiene kita maga buen experiencia na ministerio, debe kita dale todo gloria con Jehova. Debe kita realiza que gendeh kita este puede hace si nuay el ayuda de Jehova. (Fil. 4:13, NWT) Si ta hace kita se, ta imita tambien kita con el buen ejemplo de Jesus. Na cosa manera?

13. Cosa kita puede aprende con Jesus base na Juan 5:19, 30?

¹³ Ya depende si Jesus con Jehova maskin pa un perfecto Anak le del Dios. (Le con el Juan 5:19, 30.) Nuay le pricura rebata autoridad del de suyu Tata. El Filipo 2:6 ta habla kanaton que “noay [si Jesus] queda asigurista na disuyo derecho para queda igual con Dios.” Como un Anak que ta somete, sabe si Jesus con el de suyu limitacion y ta respeta con el autoridad del de suyu Tata.

14. Cuando ya pidi con ele que hace el un cosa que nuay le autoridad para hace, cosa ya habla si Jesus?

¹⁴ Considera si cosa ya hace si Jesus cuando ya atraca con ele si Santiago y Juan junto con el diila nana y ya pidi con ele privilegio que nuay le derecho para dale. Ya contesta dayun si Jesus que solamente el de suyu Tata na cielo el quien puede decidi si quien sinta na de suyu lao derecha y izquierda na Reino. (Mat. 20:20-23) Ya dale mira si Jesus que sabe le de suyu limitacion. Nuay le hace maskin un cosa que nuay con ele dale autoridad si Jehova para hace. (Juan 12:49) Paquemodo kita puede imita con el buen ejemplo de Jesus?

15-16. Paquemodo kita puede aplica con el consejo na Biblia na 1 Corinto 4:6?

 ¹⁵ Ta imita kita con el buen ejemplo de Jesus si ta aplica kita con este consejo na Biblia: “No man lampas na cosas que escribido.” (1 Cor. 4:6, NWT) Poreso si ta pidi kanaton consejo, gendeh kita ta habla el diaton lang opinion o habla el primer cosa que ta pensa kita. Sino, debe kita dale consejo estaba na Biblia o na diaton maga publicacion. Na este manera, ta dale kita mira que sabe kita diaton maga limitacion. Si hace kita se, ta dale kita mira que sabe kita que mas bueno el consejo de Jehova contra con el diaton.​—Rev. 15:3, 4.

¹⁶ Puera que ta honra kita con Jehova, tiene pa otro razon si porque kita debe queda humilde. Hay aprende kita ahora si paquemodo el humildad puede dale kanaton alegria y ayuda kanaton tiene buen relacion con otro.

17. Porque alegre el maga humilde persona?

¹⁷ Si humilde kita, grande el posibilidad que hay queda kita alegre. Porque man? Cay si sabe kita el diaton maga limitacion, alegre kita ricibi maskin cosa ayuda estaba con otro. Por ejemplo, pensa con el tiempo cuando ya cura si Jesus con el diez leproso. Uno lang kanila el ya bira para rindi gracias con Jesus cay sabe le que gendeh le queda bueno na de suyu mismo esfuerzo lang. Este humilde persona ya rindi gayot gracias na ayuda que ya ricibi le y ya dale gloria con Dios.​—Luc. 17:11-19.

18. Paquemodo el humildad ta puede ayuda kanaton para tiene buen relacion con otro? (Roma 12:10)

¹⁸ El maga humilde persona mas facil tiene buen relacion con otro y tiene maga buen amigo. Porque? Sabe sila que el otro maga gente tiene maga buen calidad y ta confia sila  kanila. El maga humilde persona alegre si el otro ta puede hace con el diila maga assignment y preparao sila dale comendacion y honor kanila.​—Le con el Roma 12:10.

19. Cosa el cuanto razon si porque kita debe evita con el orgullo?

¹⁹ Gendeh igual con el maga humilde, el maga orgulloso persona tan dificil dale comendacion con otro y quierre que kanila lang alaba. Ta compara sila con el diila mismo cuerpo con otro y ta pricura queda mas bueno con otro. En vez de man train con otro y dale kanila autoridad, posible sila habla, “Mas bueno pa si iyo se hace cay gendeh se puede hace enbuenamente el otro.” El un orgulloso persona quierre queda mas importante que con otro y celoso. (Gal. 5:26) Ese clase de maga gente ralo lang tiene maga deverasan amigo. Si ya puede kita nota que tiene kita orgullo, necesita kita reza con Jehova con todo corazon que ayuda kanaton tiene “pensamiento nuevo” para ese custumbre gendeh queda parte del diaton personalidad.​—Roma 12:2.

20. Porque kita debe queda humilde?

²⁰ Ta rindi gayot kita gracias cay ya dale kanaton buen ejemplo si Jehova! Ta puede kita mira con el de suyu humildad na manera si paquemodo le ta trata con el de suyu maga siervo y quierre kita imita con ele. Omento pa, quierre kita imita con el maga buen ejemplo na Biblia de aquellos quien ya sirvi con Jehova con humildad. Ojala dale kita pirmi con Jehova el honor y gloria que conviene para con ele. (Rev. 4:11) Si hace kita se, puede kita queda amigo de Jehova hasta para cuando cay ta ama le con el maga humilde.