1. Cosa ya dale si Jehova con el cada uno del de suyu maga fiel siervo?

YA DALE papel si Jehova con el cada uno del de suyu maga fiel siervo. Maskin pa otro-otro el diaton papel, todo kita precioso y necesita kita con el uno y otro. Si apostol Pablo ya ayuda kanaton para entende con este importante leccion. Paquemodo?

2. Asegun na Efeso 4:16, porque necesita kita aprecia con uno y otro y trabaja junto?

² Como cosa ya menciona na texto para na este articulo, ya hace claro si Pablo que nuay ni uno kanaton el puede habla con el otro siervo de Jehova “gendeh yo necesita contigo.” (1 Cor. 12:21) Para tiene paz el congregacion, debe kita aprecia con uno y otro y trabaja junto. (Le con el Efeso 4:16.) Si tiene unidad el congregacion, todo hay sinti el amor y hay queda fuerte el congregacion.

3. Cosa kita discuti na este articulo?

³ Cosa el cuanto manera que puede kita dale mira respeto con otro na congregacion? Na este articulo, hay considera kita si paquemodo el maga anciano puede dale mira respeto na otro anciano. Despues, hay considera kita si paquemodo kita dale mira apresacion con el diaton maga hermano y hermana quien gendeh casao. Y na uliji, hay aprende kita si paquemodo kita dale mira amor con aquellos quien no sabe tanto converza na diaton lengguaje.

4. Cosa el consejo de Pablo na Roma 12:10 que debe sigui el maga anciano?

⁴ Ya iscuji con el todo anciano na congregacion por medio na sagrao espiritu de Jehova. Pero, el cada uno tiene diferente regalo y abilidad. (1 Cor. 12:17, 18) Posible el cuanto nuevo lang ya queda anciano y nuay pa experiencia. El otro limitao ya el cosa ta puede hace por causa na diila edad y salud. Maskin pa ansina, el un anciano gendeh debe hace de menos con el otro anciano que dol ta habla le “gendeh yo necesita contigo.” Sino, el cada anciano debe sigui con el consejo de Pablo na Roma 12:10.—Le.

5. Paquemodo el maga anciano dale mira respeto na otro anciano y porque se importante?

⁵ El un anciano ta dale mira respeto na otro maga anciano si ta oi le enbuenamente kanila. Importante este especialmente si el maga anciano tan junto-junto para discuti con el maga serioso cosas. Porque? Nota si cosa ta habla el The Watchtower de Octubre 1, 1988: “Sabe el maga anciano que el Cristo, por medio del sagrao espiritu, puede guia con el maskin quien anciano para dale principio na Biblia que puede ayuda na maskin cosa situacion o si ta hace maga importante decision. (Act. 15:6-15) El sagrao espiritu ta ayuda con el todo maga anciano na congregacion, gendeh lang con el uno kanila.”

6. Paquemodo el maga anciano tiene unidad y cosa el beneficio de este na congregacion?

⁶ El un anciano quien ta dale mira respeto na otro anciano gendeh ta pricura que pirmi una man cuento na diila maga miting. Gendeh le ta pricura que ele ya lang pirmi man cuento y gendeh le ta pensa que justo pirmi el de suyu opinion. Sino, ta habla le con el cosa le ta pensa na humilde manera. Ta oi le enbuenamente con el opinion del otro. El mas importante, preparao le discuti maga principio na Biblia y sigui con el direccion del “fiel y sabio esclavo.” (Mat. 24:45-47, NWT) Si ta dale mira amor y respeto el maga anciano mientras ta discuti con el maga cosas, hay queda presente el sagrao espiritu y hay guia  este kanila para hace justo decision que puede hace fuerte con el congregacion.​—Sant. 3:17, 18.

7. Cosa el mirada de Jesus con aquellos quien nuay casa?

⁷ Tiene maga casao y de familia na congregacion ahora. Pero, tiene tambien kita manada hermano y hermana quien gendeh casao. Cosa debe el diaton mirada con aquellos gendeh casao? Considera si cosa el mirada de Jesus kanila. Cuando taqui le na tierra, nuay le casa. Ya esta le single y ya dale el de suyu tiempo y atencion na de suyu assignment. Nuay enseña si Jesus que debe casa el un Cristiano o debe le esta single. Pero ya habla le que el cuanto maga Cristiano hay decidi que gendeh casa. (Mat. 19:11, 12; mira con el study note na Mateo 19:12.) Ya respeta si Jesus con aquellos quien nuay casa. Nuay le pensa que el maga single mas bajo que con el maga casao o pensa que tiene cosa falta na diila vida.

8. Asegun na 1 Corinto 7:7-9, cosa ta anima si Pablo con el maga Cristiano?

⁸ Igual con Jesus, si apostol Pablo ya esta single cuando ta hace le con el de suyu ministerio. Nuay enseña si Pablo que gendeh justo para na un Cristiano que casa. Sabe le que este amo un personal decision. Maskin pa ansina, ya anima si apostol Pablo con el maga Cristiano si puede ba sila esta single mientras ta sirvi con Jehova. (Le con el 1 Corinto 7:7-9.) Asigurao que nuay hace de menos si Pablo con el maga single Cristiano. Gane, ya iscuji le con Timoteo, un single hermano, para hace con el maga pesao assignment. * (Fil. 2:19-22) Claro que gendeh justo pensa que el un hermano cualificao o gendeh cualificao por causa lang cay casao le o gendeh.​—1 Cor. 7:32-35, 38.

9. Cosa kita puede habla acerca na decision que casa o esta single?

⁹ Nuay habla si Jesus o si Pablo que el maga Cristiano debe casa o esta single. Cosa kita puede habla acerca na decision que casa o esta single? El The Watchtower de Octubre 1, 2012 ya dale bonito contestacion na este pregunta. Este ta habla: “El deverasan, el matrimonio y pagka-single amo maga regalo estaba con Dios. . . . Para con Jehova, gendeh debe tiene huya o man triste el un persona si gendeh le casao.” Poreso, necesita kita respeta  con el papel del maga single hermano y hermana na congregacion.

10. Paquemodo kita dale mira respeto con el diaton maga single hermano y hermana?

¹⁰ Paquemodo kita dale mira respeto con el sentido y circumstancia del diaton maga single hermano y hermana? Debe kita acorda que el cuanto maga Cristiano ya decidi que gendeh casa. El otro single Cristiano posible quierre casa pero nuay lang pa sila incuntra con el justo persona. El otro posible ya muri el diila marido o mujer. Maskin cosa pa man el diila razon, debe ba el maga hermano y hermana na congregacion pregunta con el maga single Cristiano si porque gendeh pa sila ta casa o ofrece kanila ayuda para busca si con quien casa? Deverasan, el cuanto maga single Cristiano posible pidi ansina ayuda. Pero si nuay sila pidi ayuda, cosa gaha sinti el diaton maga single hermano y hermana si habla se kita kanila? (1 Tes. 4:11; 1 Tim. 5:13) Considera kita con el comento del cuanto maga fiel single hermano y hermana.

11-12. Na cosa manera kita posible ta hace luya con el maga single?

¹¹ El un soltero circuit overseer quien bien efectivo na de suyu assignment ya habla que tiene manada beneficio si esta single el un persona. Pero, ya puede le nota que gendeh ta puede anima si el maga hermano y hermana ta pregunta con ele: “Porque gendeh pa tu ta casa?” El un single hermano quien ta sirvi na branch office ya puede observa: “Tiene vez, ta manda conmigo sinti el maga hermano y hermana que maka-lastima con el maga single. Dol ta manda sila sinti que el pagka-single amo un problema en vez de un regalo.”

¹² El un dalaga hermana quien ta sirvi na Bethel ya habla: “El cuanto maga publisher ta pensa que todo el maga single ta busca con quien casa o si junto sila na manada gente, un oportunidad se para busca marido o mujer. Cuando ya anda yo na otro lugar para na un assignment, ya atende yo miting. El hermana onde yo ta esta ya habla conmigo que tiene dos hermano na congregacion que igual de mio edad. Ya habla le conmigo que gendeh le tan reto conmigo na maga hermano. Pero cuando ya llega kame na Kingdom Hall, ya hala le conmigo para conoce con el dos hermano. Bien maka-huya gayot quel tiempo para kanamon tres.”

13. Cosa maga ejemplo el ya anima con el un single hermana?

¹³ El otro single hermana quien ta sirvi na Bethel ya habla: “Tiene yo conoce maga single pioneer quien tiene balance mirada, focus na diila maga goal, preparao ayuda con otro y alegre. Grande ayuda gayot sila na congregacion. Tiene sila balance mirada na pagka-single. Gendeh sila ta mira con el diila mismo cuerpo que mas alto que con otro cay single sila, ni ta sinti triste cay nuay sila marido o mujer y familia.” Bonito gayot si el maga hermano y hermana na congregacion ta respeta y ta aprecia con uno y otro. Sabe tu que gendeh sila ta tiene lastima contigo o ta envidia contigo. Gendeh tambien sila ta ignora contigo o ta pensa que mas bueno tu que kanila. Sabe tu que ta ama sila contigo.

14. Paquemodo kita dale mira que ta respeta kita con el maga single?

¹⁴ Hay queda alegre el diaton maga single hermano y hermana si aprecia kita kanila base na diila maga buen calidad. En vez de tiene lastima kanila, debe kita aprecia kanila cay fiel sila. Como resulta, el diaton maga single hermano y hermana gendeh sinti que dol ta habla kita kanila: “Gendeh yo necesita contigo.” (1 Cor. 12:21) Sino, hay sinti sila que ta respeta kita kanila y ta aprecia con el diila papel na congregacion.

15. Cosa maga cambio na vida el ya hace el cuanto para hace pa mas na diila ministerio?

¹⁵ Del ya pasa maga año, manada del maga publisher el quien ya hace diila goal que aprende otro lengguaje para puede sila hace pa mas na diila ministerio. Para hace se, ya hace sila maga cambio na diila vida. Este maga hermano y hermana ya deja con el diila congregacion que donde ta usa con diila mismo lengguaje para suporta na otro congregacion que otro el lengguaje y tiene mas grande necesidad. (Act. 16:9) Personal decision este que ya hace el maga Cristiano para suporta con el Reino. Maskin pa necesita manada año para queda sila bueno converza na nuevo lengguaje, grande ayuda sila na congregacion. El diila maga buen calidad y experiencia ta hace fuerte con el maga hermano y hermana na congregacion. Ta aprecia gayot kita kanila cay ya hace sila maga grande sacrificio.

16. Onde debe man base el maga anciano si ta recomenda con el un hermano para sirvi como anciano o siervo ministerial?

¹⁶ El grupo de maga anciano gendeh debe pensa que gendeh cualificao para recomenda con el un hermano para sirvi como un anciano o un siervo ministerial por causa lang cay gendeh pa gayot le bueno converza na lengguaje del congregacion. Gendeh sila debe man base con ese, sino debe sila sigui na cosa ta menciona el Biblia acerca na cualificacion para na un anciano y siervo ministerial.​—1 Tim. 3:1-10, 12, 13; Tito 1:5-9.

17. Cosa debe decidi el maga mayores si ta cambia na otro lugar el diila familia?

¹⁷ El cuanto maga Cristiano ya cambia na otro lugar para sale na dificil situacion del diila nacion o para busca trabajo. Como resulta, posible que el diila maga anak ta aprende na escuela con el lengguaje del nacion onde sila ya cambia. Posible tambien que el maga mayores necesita aprende con el lengguaje para puede busca trabajo. Paquemodo si tiene congregacion o grupo que ta usa con el diila mismo lengguaje? Cosa congregacion sila debe atende? Debe ba sila atende na congregacion donde ta usa con el lengguaje del lugar onde sila ya cambia o na congregacion que ta usa con el diila mismo lengguaje?

18. Harmonia na Galacia 6:5, paquemodo kita dale mira que ta respeta kita con el decision del cabeza del familia?

¹⁸ El cabeza del familia el quien debe decidi si na cosa congregacion sila atende. Ciendo un personal decision este, debe le considera si cosa el mas bueno para na de suyu familia. (Le con el Galacia 6:5.) Necesita kita respeta con el de suyu decision. Maskin cosa man el de suyu decision, acepta kita con ese y ricibi con el familia como parte del diaton congregacion.​—Roma 15:7.

19. Cosa debe considera el cabeza del familia?

¹⁹ Na otro maga situacion, tiene maga familia el quien ta sirvi na congregacion que ta usa  con el mismo lengguaje del mayores, pero posible que el maga anak gendeh tanto sabe na ese lengguaje. Si ese congregacion talli na lugar donde ta usa con el lengguaje que ta aprende el maga bata na escuela, posible que el maga bata man dificil entende con el maga miting y gendeh sila progresa na espiritual. Porque? Cay gendeh sila ta usa con el lengguaje del diila mayores na escuela. Na ese situacion, el cabeza del familia necesita reza y pensa enbuenamente si cosa sila necesita hace para ayuda con el diila maga anak para queda mas cerca con Jehova y na de suyu maga siervo. Puede sila ayuda con el diila anak para aprende con el diila lengguaje o cambia na otro congregacion donde ta usa con el lengguaje que mas ta entende el maga anak. Maskin cosa man decidi el cabeza del familia, el congregacion onde le ya iscuji debe manda sinti con ele y con el de suyu familia que ta respeta y ta aprecia sila kanila.

20. Paquemodo kita dale mira que ta respeta kita con el diaton maga hermano y hermana quien ta aprende nuevo lengguaje?

²⁰ Na manada congregacion, tiene maga hermano y hermana quien ta hace esfuerzo para aprende nuevo lengguaje. Posible, tan dificil sila habla si cosa sila ta pensa. Pero si gendeh kita man focus na manera sila ta converza, puede kita mira con el diila amor para con Jehova y el diila deseo para sirvi con ele. Si puede kita mira con el diila maga bonito calidad, mas aprecia y respeta kita con este maga hermano y hermana. Gendeh kita habla kanila “gendeh yo necesita contigo” por causa lang cay gendeh sila tanto sabe converza na diaton lengguaje.

21-22. Cosa bonito privilegio kita tiene?

²¹ Un grande privilegio gayot que ya dale kanaton papel si Jehova na de suyu congregacion. Hombre man kita o mujer, single o casao, joven o de edad, bueno na un lengguaje o gendeh, precioso kita todo con Jehova y na uno y otro.​—Roma 12:4, 5; Col. 3:10, 11.

²² Ojala continua kita aplica con el maga bonito leccion que ya puede kita aprende na ilustracion de Pablo acerca na cuerpo del gente. Como resulta, hay pricura kita busca manera para aprecia con el diaton papel y con el papel del otro na congregacion de Jehova.