1. Cosa maga sacrificio ya hace el manada y porque se sila ya hace?

MILLONES del maga siervo del Dios ahora el ta hace maga sacrificio. Manada maga hermano y hermana el ya iscuji esta single. Tiene maga man maridable el ya decidi que gendeh tiene anak. Manada familia el ya hace simple con el diila vida. Ya hace sila este maga decision por causa na un importante razon​—quierre sila hace el todo que puede sila hace na servicio con Jehova. Contento sila y ta confia que si Jehova hay dale el todo cosas que necesita sila. Hay arripinti ba sila na diila decision? Gendeh! Porque kita se puede asigura? Un razon amo cay si Jehova ya bendici con Abraham, “el tata de aquellos quien ta cree” o tiene fe con Dios.​—Roma 4:11.

2. (a) Asegun na Maga Hebreo 11:8-10, 16, porque si Abraham ya sale na Ur? (b) Cosa kita discuti na este articulo?

² Ya deja si Abraham con el de suyu comfortable vida na ciudad de Ur. Porque? Cay ta espera le con el “ciudad plantao na maga fundacion.” (Le con el Maga Hebreo 11:8-10, 16.) Cosa ese “ciudad”? Cosa maga dificultad el ya enfrenta si Abraham mientras ta espera que planta con ese ciudad? Y paquemodo kita puede queda igual con Abraham y con aquellos quien ya sigui na de suyu ejemplo?

3. Cosa el ciudad que ya espera si Abraham?

³ El ciudad que ya espera si Abraham amo el Reino del Dios. Parte de ese Reino si Jesucristo y el 144,000 de maga iscujido Cristiano. Si Pablo ya refiri con ese Reino como el “ciudad del  Dios vivo, na Jerusalem del cielo.” (Heb. 12:22; Rev. 5:8-10; 14:1) Ya enseña si Jesus con el de suyu maga dicipulo que reza para llega ese Reino para puede cumpli el voluntad del Dios aqui na tierra igual na cielo.​—Mat. 6:10.

4. Asegun na Genesis 17:1, 2, 6, cosa sabe si Abraham acerca na ciudad o Reino que ya promete el Dios?

⁴ Sabe ba si Abraham el maga detalle acerca si paquemodo establicia con el Reino del Dios? Gendeh. Adentro del manada siglo, un “Misterio” o secreto ese maga detalle. (Ef. 1:8-10; Col. 1:26, 27) Pero, sabe si Abraham que el cuanto na de suyu maga descendiente hay queda maga rey. Ya promete se con ele si Jehova. (Le con el Genesis 17:1, 2, 6.) Tiene gayot fuerte fe si Abraham na maga promesa del Dios que dol ta puede le mira con el Iscujido o Mesias quien hay queda Rey na Reino del Dios. Amo se el razon si porque si Jesus ya habla con el maga Judio na de suyu tiempo: ‘El de ustedes tata si Abraham, ya queda alegre cuando ya pensa le que hay puede le mira con el de mio dia. Ele ya puede mira y ya queda alegre.’ (Juan 8:56) Claro que sabe si Abraham que el de suyu maga descendiente hay queda parte del Reino que hay establicia si Jehova, y conforme le espera con Jehova si cuando le cumpli con ese promesa.

5. Porque kita puede habla que ya espera si Abraham con el ciudad que ya hace el Dios?

⁵ Paquemodo si Abraham ya dale mira que ta espera le con el ciudad o Reino del Dios? Una, nuay si Abraham queda parte del maskin cosa reino aqui na tierra. Nuay le permanente esta na un lugar y nuay le dale de suyu suporta na maskin quien rey. Mas pa, nuay si Abraham hace de suyu mismo reino. Sino, ya continua le obedece con Jehova y ya espera que cumpli Le con el De Suyu promesa. Na ese manera, ya dale mira si Abraham de suyu bien grande fe con Jehova. Examina kita ahora con el cuanto na maga dificultad que ya enfrenta le y mira si cosa kita puede aprende na de suyu ejemplo.

6. Cosa clase de ciudad el Ur?

⁶ Ya deja si Abraham con el ciudad de Ur. Ese ciudad protegido cay tiene este bien  grande pader y maga hondo canal alrededor. Educao y rico el maga gente alla. Bueno sila na escribida y matematica. Y ta sale que ese lugar amo un centro de negocio. Manada maga documento de negocio el ya puede incuntra na ese ciudad. Liso el pader del diila maga casa y pintao se de blanco. El cuanto de ese maga casa tiene 13 o 14 cuarto y un cementao patio.

7. Porque si Abraham necesita confia que protege si Jehova con ele y con el de suyu familia?

⁷ Necesita si Abraham confia que si Jehova hay protege con ele y con el de suyu familia. Porque? Acorda que ya deja si Abraham y Sara con el ciudad de Ur donde protegido sila y comfortable el diila vida para queda na maga tolda na Canaan. Nuay mas maga grueso pader y hondo canal que ta protege kanila. Ahora, facil ya kanila ataca el diila maga enemigo.

8. Cosa problema el ya enfrenta si Abraham?

⁸ Ya hace si Abraham con el voluntad del Dios, pero ya llega el tiempo que nuay bastante comida el de suyu familia. Ya experiencia sila escasez de comida na mismo lugar donde kanila ya manda anda si Jehova. Bien grabe aquel escasez poreso si Abraham ya decidi que temporario esta na Egipto. Pero cuando talla sila na Egipto, el Faraon, el rey del nacion, ya saca con el de suyu mujer. Imagina si paquemodo de malingasa si Abraham. Pero ya hace manera si Jehova para manda con el Faraon debolbe con Sara con Abraham.​—Gen. 12:10-19.

9. Cosa maga problema ya tiene si Abraham na de suyu familia?

⁹ Ya tiene tambien problema si Abraham na de suyu familia. El de suyu mujer, si Sara, gendeh ta puede tiene anak. Por cuanto decada, bien triste sila por causa con ese. Poreso, ya dale si Sara con el de suyu ayudante, si Agar, con Abraham para puede tiene anak si Abraham y Sara. Pero cuando ya queda priñada si Agar con Ismael, nuay mas le respeta con Sara. Ya queda bien tormento el situacion y gane, ya sale si Agar por causa con Sara.​—Gen. 16:1-6.

10. Cosa maga suceso el ya pone na probanza con el confianza de Abraham con Jehova?

¹⁰ Na uliji, ya queda priñada si Sara y ya tiene sila anak, si Isaac. Ta ama si Abraham con el de suyu maga anak, si Ismael y Isaac. Pero por causa cay ya maltrata si Ismael con Isaac, necesita manda sale si Abraham con Ismael y Agar. (Gen. 21:9-14) Despues del manada año, ya manda si Jehova con Abraham que dale con Isaac como un ofrecimiento. (Gen. 22:1, 2; Heb. 11:17-19) Na ese dos situacion, necesita si Abraham confia que gendeh deja si Jehova con el de suyu dos anak.

11. Porque si Abraham necesita espera con paciencia con Jehova?

¹¹ Necesita si Abraham espera con paciencia con Jehova. Posible, mas de 70 año ya le cuando ya sale sila na Ur. (Gen. 11:31–12:4) Y adentro de maga cien año, ya queda le na tolda na otro-otro parte del Canaan. Ya muri si Abraham na edad de 175. (Gen. 25:7) Pero nuay le mira con el cumplimiento del promesa de Jehova que dale con el de suyu maga descendiente el tierra de Canaan. Nuay tambien le mira que ya planta con el ciudad o Reino del Dios. Maskin pa ansina, el Biblia ya menciona que si Abraham ya tiene “largo y alegre vida.” (Gen. 25:8) Ya mentena si Abraham con el de suyu fuerte fe maskin pa ya enfrenta le maga dificultad y alegre le espera con Jehova. Porque le se ya puede hace? Cay na entero vida de Abraham, ya protege con ele si Jehova y ya trata con ele como un amigo.​—Gen. 15:1; Isa. 41:8; Sant. 2:22, 23.

12. Cosa kita ta espera y cosa kita hay considera?

 ¹² Igual con Abraham, ta espera tambien kita con el ciudad que plantao na maga real fundacion. Pero, gendeh kita ta espera que planta pa con ese. Ya establicia ya con el Reino del Dios del 1914 y ta rula ya se na cielo. (Rev. 12:7-10) Pero ta espera kita que rula se na entero tierra. Mientras ta espera kita que sucede se, posible que enfrenta kita manada dificultad semejante na cosa ya experiencia si Abraham y Sara. Ya puede ba imita el maga siervo de Jehova ahora con el ejemplo de Abraham? El maga istoria de vida na El Torre de Guardia ta dale mira que igual con Abraham y Sara, manada ahora el ta demonstra fe y paciencia. Considera kita con el cuanto de ese maga istoria y mira si cosa kita puede aprende.

13. Cosa tu ya aprende na experiencia de Hermano Walden?

¹³ Queda preparao hace maga sacrificio. Si quierre kita hace una na diaton vida con el Reino del Dios, necesita kita queda igual con Abraham quien preparao hace maga sacrificio para hace alegre con Dios. (Mat. 6:33; Mar. 10:28-30) Nota con el ejemplo del un hermano, si Bill Walden. * Del 1942, cuando cerca ya gradua si Bill na de suyu curso architectural engineering na un universidad na U.S., ya principia le estudia junto con el maga Testigo de Jehova. Ya menciona el de suyu maestro que tiene trabajo ta espera con ele despues le gradua. Pero, nuay se acepta si Bill. Ya explica le que gendeh le acepta con el trabajo cay quierre le hace el todo que puede le hace na servicio con Dios. Nuay dura, ya manda el gobierno con Bill que sirvi como un soldao. Con respeto le nuay acepta con ese y como resulta, ya multa con ele $10,000 y ya sentencia con ele cinco año na preso. Ya larga con ele despues del tres año. Despues del cuanto tiempo, ya invita con ele na Gilead y ya sirvi le como misionario na Africa. Ya casa si Bill con Eva y junto sila ya sirvi na Africa, donde necesita sila hace manada  sacrificio. Despues del manada año, ya bira sila na United States para cuida con el nana de Bill. Si Bill ya habla: “Ta puede yo llura si ta pensa yo con el grande privilegio que ya tiene yo para sirvi con Jehova por mas de 70 año. Pirmi yo ta rindi gracias con ele cay ya ayuda le conmigo para usa el de mio vida na servicio con ele.” Puede ba tambien tu usa con el de tuyu vida para sirvi full-time na ministerio?

14-15. Cosa tu ya aprende na experiencia de Hermano y Hermana Apostolidis?

¹⁴ No expecta que gendeh tu tiene problema. Na ejemplo de Abraham, puede kita aprende que maskin aquellos quien ta sirvi con Jehova na diila entero vida, ta enfrenta siempre maga problema. (Sant. 1:2; 1 Ped. 5:9) Amo tambien se el ya sucede con Hermano Aristotelis Apostolidis. * Ya bautiza le del 1946 na Greece y del 1952, ya queda le engage con el un hermana, si Eleni, quien quierre tambien usa de suyu vida na servicio con Jehova. Pero ya enferma si Eleni y ya puede sabe que tiene le brain tumor. Ya puede quita con el tumor, pero cuanto año lang despues sila casa, ya bira se otravez. Ya opera otravez con ele el maga doctor pero ya queda paralisao si Eleni y gendeh mas este ta puede converza enbuenamente. Ya continua le siempre queda activo na ministerio maskin enfermo le y ta persigui kanila el gobierno de aquel tiempo.

¹⁵ Ya cuida si Aristotelis con el de suyu mujer por 30 año. Durante ese tiempo, ya sirvi le como un anciano, miembro na maga assembly committee y ya ayuda le na construida de Assembly Hall. Despues, del 1987, yan accidente si Eleni mientras ta predica. Yan coma le por tres año y despues ya muri. Na todo cosa le ya experiencia, si Aristotelis ya habla: “Adentro na manada año, ya experiencia yo manada problema y el cuanto de ese derepente ya llega y nuay yo expecta. Poreso, necesita yo queda determinao que aguanta y gendeh deja con el maskin cosa que hace conmigo luya. Y pirmi si Jehova ta dale conmigo el fuerza que necesita yo para enfrenta con este maga problema.” (Sal. 94:18, 19) Ta ama gayot si Jehova con aquellos quien ta hace el  todo cosa sila puede hace na servicio con ele maskin ta enfrenta maga problema.

16. Cosa buen consejo ya dale si Hermano Knorr con el de suyu mujer?

¹⁶ Man focus na diaton esperanza na futuro. Yan focus si Abraham na maga bendicion que hay dale con ele si Jehova na futuro y este ya ayuda con ele para aguanta na de suyu maga problema. Si Hermana Audrey Hyde ya pricura esta positivo maskin pa el de suyu primer marido, si Nathan H. Knorr, ya muri de cancer y el de suyu segundo marido, si Glenn Hyde, ya tiene Alzheimer’s disease. * Ya habla le que ya puede con ele ayuda el cosa ya habla si Hermano Knorr cuanto semana antes este muri. Ya habla le: “Ya hace conmigo acorda si Nathan: ‘Asigurao el diaton esperanza maskin muri kita y gendeh mas kita sufri otravez.’ Despues, ya anima le conmigo: ‘Man focus na futuro cay talli el de tuyu premio.’ . . . Ya habla pa le: ‘Esta ocupao​—pricura usa de tuyu vida para ayuda con otro. Si hace tu se, hay queda tu alegre.’” Un buen consejo gayot que esta ocupao na hacida de bueno con otro y ‘queda alegre na diaton esperanza’!​—Roma 12:12.

17. (a) Porque kita debe man focus na diaton esperanza na futuro? (b) Na cosa manera el Miqueas 7:7 puede ayuda kanaton para beneficia con el maga bendicion na futuro?

¹⁷ Ahora, tiene kita mas grande razon para man focus na diaton esperanza na futuro. El maga cosa ta sucede na mundo ahora claro ta dale mira que ta vivi ya kita na ultimo parte del ultimo maga dia de este sistema. Gendeh dura, gendeh mas kita necesita espera con el ciudad que tiene maga real fundacion para rula aqui na tierra. Uno na maga bendicion que hay experiencia kita amo el resureccion del diaton maga familia, amigo y amiga quien ya muri. Na ese tiempo, si Jehova hay resucita con Abraham y con el de suyu familia aqui na tierra por causa na fe y paciencia que ya dale le mira. Talla ba tu para incuntra kanila? Hay queda se posible si igual con Abraham, preparao tu hace maga sacrificio para na Reino del Dios, si mentena tu con el de tuyu fe maskin ta enfrenta maga problema y si con paciencia tu espera con Jehova.​—Le con el Miqueas 7:7.