1. Cosa kita puede pensa si medita kita con el todo cosas que ya crea si Jehova?

SI MEDITA kita si paquemodo de grande el universo que ya crea si Jehova, posible sinti kita igual con salmista David, quien ya pregunta na rezo: “Si ta mira yo con el de tuyu cielo, el maga trabajo del de tuyu mano, el luna y el maga estrellas que ya prepara tu, cosa ba el gente para pensa tu con ele, y el anak del gente para cuida tu con ele?” (Sal. 8:3, 4) Igual con David, posible kita pensa si paquemodo kita de diutay si compara con el maga estrellas que ya crea si Jehova y pensa si porque le kanaton ta pone atencion. Pero como cosa kita hay sabe, nuay lang si Jehova nota con el primer maridable, si Adan y Eva, sino ya hace tambien le kanila parte del de suyu familia.

2. Cosa el proposito de Jehova para con el de suyu maga primer anak aqui na tierra?

² Si Adan y Eva amo el maga primer anak de Jehova aqui na tierra y si Jehova amo el diila amable Tata na cielo. Ta expecta le con este maridable que queda productivo como miembro del de suyu familia. El Dios ya habla kanila: “Tene ustedes maga anak y queda manada, y llena con el tierra y goza con este.” (Gen. 1:28) Quierre le que tene sila maga anak y cuida con el tierra onde sila ta queda. Si ya obedece lang era sila y ya coopera na proposito de Jehova para kanila, si Adan y Eva y el diila maga anak ya esta era miembro del familia del Dios hasta para cuando.

3. Porque kita puede habla que ya dale con Adan y Eva un honorable papel na familia de Jehova?

³ Si Adan y Eva tiene un honorable papel na familia de Jehova. Como cosa escribido na Salmo 8:5, si David ya habla acerca na gente que ya crea si Jehova: “Ya hace tu con ele poco menos  na maga angel, y ya pone tu con ele corona de gloria y honor.” Deverasan, nuay dale con el maga gente el igual poder, inteligencia y abilidad que tiene el maga angel. (Sal. 103:20) Maskin pa ansina, “poco menos” lang el maga gente compara con ese maga poderoso espiritu creatura. Imagina este! Ya dale si Jehova un bonito vida con el diaton primer mayores.

4. Cosa ya sucede cay nuay obedece si Adan y Eva con Jehova y cosa kita hay discuti na este articulo?

 ⁴ Maka-triste, ya desobedece si Adan y Eva y gendeh mas sila miembro del familia de Jehova. Ya tiene se grande efecto na diila maga descendiente, como cosa kita hay sabe na este articulo. Pero, nuay cambia el proposito de Jehova. Quierre le que el maga obediente gente hay queda de suyu maga anak hasta para cuando. Una, discuti kita si paquemodo si Jehova ya honra kanaton. Despues, hay considera kita si cosa kita puede hace ahora para dale mira que quierre kita queda parte del familia del Dios. Y na uliji, hay considera kita si cosa maga bendicion hay tene el maga anak de Jehova aqui na tierra hasta para cuando.

5. Paquemodo kita puede honra con Dios cay ya hace le kanaton na de suyu imagen?

⁵ Ya honra kanaton si Jehova cuando ya hace le kanaton na de suyu imagen. (Gen. 1:26, 27) Cay ya crea kanaton na imagen del Dios, puede kita cultiva y demonstra manada del de suyu maga calidad, igual na amor, compasion, lealtad y pagka-recto. (Sal. 86:15; 145:17) Si cultiva kita ese maga calidad, ta honra kita con Jehova y ta dale prueba que ta aprecia kita con el cosa le ya hace. (1 Ped. 1:14-16) Si ta actua kita na manera que ta hace alegre con el diaton Tata na cielo, ta queda kita alegre. Y cay ya hace le kanaton na de suyu imagen, ya dale kanaton si Jehova el abilidad que queda el clase de gente que quierre le na de suyu familia.

6. Paquemodo ya honra si Jehova con el maga gente cuando ya prepara le con el tierra?

⁶ Ya prepara si Jehova un bonito lugar para kanaton. Antes le crea con el primer hombre, ya prepara si Jehova con el tierra para na maga gente. (Job 38:4-6; Jer. 10:12) Cay bueno le y bondadoso, ya crea si Jehova manada bonito cosas para hace kanaton alegre. (Sal. 104:14, 15, 24) Ya dale le tiempo para pensa acerca na cosa le ya crea y “ya mira el Dios que ese bueno.” (Gen. 1:10, 12, 31) Ya honra le con el maga gente y ‘ya dale kanila autoridad’ na todo cosas que ya crea le na tierra. (Sal. 8:6) Proposito del Dios que queda alegre el maga perfecto gente mientras ta cuida con el de suyu maga bonito creacion hasta para cuando. Pirmi ba tu ta rindi gracias con Jehova para na ese bonito promesa?

7. Paquemodo el Josue 24:15 ta indica que el gente tiene libertad para decidi?

⁷ Ya dale kanaton si Jehova el libertad para decidi. Puede kita iscuji si cosa kita hace na diaton vida. (Le con el Josue 24:15.) Alegre el diaton amable Tata si ta iscuji kita sirvi con ele. (Sal. 84:11; Prov. 27:11) Puede kita usa na diferente manera con el diaton libertad para decidi. Considera con el ejemplo que ya dale mira si Jesus.

8. Dale un ejemplo si paquemodo si Jesus ya usa con el de suyu libertad para decidi.

⁸ Puede kita imita con Jesus si iscuji kita hace una el interes del otro contra diaton. Un dia cuando bien cansao si Jesus y el de suyu maga apostoles, ya viaja sila para na un silencio lugar onde puede sila descanza. Pero, nuay se sila puede hace. Un grupo de gente el ya puede incuntra kanila y quierre sila aprende con Jesus. Pero, nuay consumi si Jesus. Sino, ya tiene le lastima con el maga gente. Poreso, cosa ya hace si Jesus? “Ya principia Le insiña  canila por largo tiempo.” (Mar. 6:30-34) Si imita kita con Jesus y usa con el diaton tiempo y fuerza para ayuda con otro, ta dale kita gloria con el diaton Tata na cielo. (Mat. 5:14-16) Ta dale tambien kita mira con Jehova que quierre kita queda parte del de suyu familia.

9. Cosa debe acorda el maga mayores?

⁹ Ya dale si Jehova con el maga gente el abilidad para tene maga anak y el responsibilidad que enseña kanila para ama y sirvi con ele. Si un mayores tu, ta aprecia ba tu con ese especial regalo? Maskin pa ya bendici gayot si Jehova con el maga angel, nuay kanila dale ese privilegio. Por causa con ese, aquellos quien ta hace engranda anak debe aprecia con ese oportunidad. Ya dale un importante responsibilidad con el maga mayores para hace engranda con el diila maga anak “con disciplina y instruccion que ta sale con el Señor.” (Ef. 6:4, El Nuevo Testamento; Deut. 6:5-7; Sal. 127:3) Para ayuda con el maga mayores, el organizacion del Dios ya produci maga tool que base na Biblia, igual na maga publicacion, video, cancion y articulo na website. Claro que el diaton Tata na cielo y el de suyu Anak ta ama gayot con el maga jovenes. (Luc. 18:15-17) Si el maga mayores ta confia con Jehova y ta hace el todo para cuida con el diila maga precioso anak, alegre si Jehova. Ese maga mayores ta ayuda tambien con el diila maga anak para tene el esperanza queda parte del familia de Jehova hasta para cuando.

10-11. Cosa ya hace posible si Jehova para kanaton por causa del rescate?

¹⁰ Ya dale si Jehova con el de suyu precioso Anak para puede kita otravez queda parte del De Suyu familia. Como cosa ya menciona na  parapo 4, ya peca kanda Adan y Eva y no puede mas sila queda miembro del familia de Jehova y maskin el diila maga anak. (Roma 5:12) Intencional ya desobedece con Dios kanda Adan y Eva poreso conviene lang kanila quita na de suyu familia. Pero, quetal el diila maga anak? Ta ama si Jehova con el maga gente poreso ya hace le manera para el maga obediente gente hay queda parte del de suyu familia. Ya hace le se por medio na sacrificio del de suyu unico Anak, si Jesucristo. (Juan 3:16; Roma 5:19) Ya puede adapta si Jehova con el 144,000 fiel gente como de suyu maga anak por causa na rescate de Jesus.—Roma 8:15-17; Rev. 14:1.

¹¹ Mas pa, millones de maga fiel siervo el ta hace con el voluntad del Dios. Tiene sila el esperanza que queda miembro del familia del Dios despues del ultimo probanza na fin del 1,000 año. (Sal. 25:14; Roma 8:20, 21) Por causa cay tiene sila ese esperanza, ta llama ya sila ahora con Jehova, el diila Creador, como “Tata.” (Mat. 6:9) Hay dale tambien oportunidad con aquellos con quien hay resucita para aprende si cosa si Jehova ta expecta kanila. Aquellos quien obedece con el de suyu direccion hay queda tambien miembro del de suyu familia.

12. Cosa pregunta kita ahora hay considera?

¹² Como cosa kita ya sabe, ya honra si Jehova con el maga gente na manada manera. Ya adapta ya le con el maga iscujido como de suyu maga anak y ya dale le esperanza con el grande grupo que queda tambien de suyu maga anak na nuevo mundo. (Rev. 7:9) Cosa kita puede hace ahora para dale mira con Jehova que quierre kita queda parte del de suyu familia hasta para cuando?

13. Cosa kita puede hace para queda miembro del familia del Dios? (Marcos 12:30)

¹³ Dale mira de tuyu amor con Jehova por medio na con todo corazon servicio con ele. (Le con el Marcos 12:30.) Na todo cosas que ya dale kanaton el Dios, posible el uno na de con todo valoroso amo que puede adora  con ele. Ta dale kita mira que ta ama kita con Jehova si ta “obedece [kita] su maga mandamiento.” (1 Juan 5:3) El uno na maga mandamiento que quierre si Jehova que obedece kita amo el mandato que ya dale si Jesus que hace maga dicipulo y bautiza kanila. (Mat. 28:19) Ya manda tambien le kanaton que ama con uno y otro. (Juan 13:35) Si Jehova hay hace parte del de suyu familia na entero mundo con el maga obediente.—Sal. 15:1, 2.

14. Paquemodo kita dale mira amor con otro? (Mateo 9:36-38; Roma 12:10)

¹⁴ Dale mira amor con otro. Amor el de con todo importante calidad de Jehova. (1 Juan 4:8) Ya dale ya kanaton mira amor si Jehova antes pa kita conoce con ele. (1 Juan 4:9, 10) Ta imita kita con ele si ta dale kita mira amor con otro. (Ef. 5:1) El uno na de con todo buen manera para puede kita dale mira amor para na maga gente amo si ayuda kita kanila aprende acerca con Jehova mientras tiene pa tiempo. (Le con el Mateo 9:36-38.) Si hace kita se, ta dale kita kanila oportunidad para queda miembro del familia del Dios. Despues bautiza el un persona, debe kita con ele continua dale mira amor y respeto. (1 Juan 4:20, 21) Paquemodo kita con ese hace? El un manera amo si confia kita con ele. Por ejemplo, si no puede kita entende si porque le ya hace con el un cosa, gendeh kita pensa que ya hace le se cay tiene le mal motivo. Sino, hay dale kita mira honor con el diaton hermano y considera con ele que mas alto que kanaton.—Le con el Roma 12:10; Fil. 2:3.

15. Con quien kita debe dale mira lastima y pagka-bueno?

¹⁵ Dale mira lastima y pagka-bueno na todo maga gente. Si quierre kita queda parte del familia de Jehova hasta para cuando, debe kita aplica con el Palabra del Dios na diaton vida. Por ejemplo, ya enseña si Jesus que debe kita dale mira lastima y pagka-bueno con todo maga gente, maskin na diaton maga enemigo. (Luc. 6:32-36) Pero, posible dificil se para kanaton hace tiene vez. Si ansina, debe kita aprende pensa y actua igual con Jesus. Si hace kita el diaton de con todo para obedece con Jehova y imita con Jesus, ta dale kita mira con el diaton Tata na cielo que quierre kita queda parte del de suyu familia hasta para cuando.

16. Paquemodo kita puede protege con el reputacion del familia de Jehova?

¹⁶ Protege con el reputacion del familia de Jehova. Na un literal familia, normal lang na un diutay bata que copia con el de suyu mayor hermano. Si el mayor hermano ta aplica con el maga principio del Biblia na de suyu vida, hay queda le buen ejemplo para na de suyu menor hermano. Si el mayor hay hace mal cosas, posible el menor hermano hay sigui con el de suyu mal ejemplo. Ansina tambien na familia de Jehova. Si el un fiel Cristiano hay queda apostata o hace imoral o mal trabajo, posible el otro hay hace tambien igual ansina. Aquellos quien ta hace con ese ta hace malo con el reputacion del familia de Jehova. (1 Tes. 4:3-8) Debe kita evita sigui con el maga mal ejemplo y no permiti con el maskin cosa que hace kanaton lejos na diaton amable Tata na cielo.

17. Cosa clase de pensamiento kita debe evita y porque?

¹⁷ Confia con Jehova en vez na maga material cosas. Ya promete si Jehova que hay dale le kanaton comida, ropa y lugar onde esta si busca kita una con el Reino y obedece con el de suyu maga mandamiento. (Sal. 55:22; Mat. 6:33) Si ta confia kita con ese promesa, hay evita kita pensa que el maga material cosas que ta ofrece este mundo hay dale kanaton seguridad y deverasan alegria. Sabe kita que el solamente manera para tene kita paz na pensamiento amo si hace kita el voluntad de Jehova. (Fil. 4:6, 7) Maskin pa puede kita cumpra manada cosas, debe kita considera si tiene ba kita el tiempo  o fuerza para usa y cuida con ese. Posible gaha que sobra kita ta ama con el diaton maga riqueza? Debe kita acorda que el Dios ya dale kanaton trabajo para hace na de suyu familia. Quierre decir de ese que gendeh kita debe permiti que queda kita ocupao na otro cosas. Asigurao, no quierre kita queda igual con el joven hombre quien ya ama gayot con el de suyu maga material cosas poreso ya decidi le que gendeh sigui con Jesus. Como resulta, ya perde el de suyu oportunidad que sirvi con Jehova y queda uno del de suyu maga adaptao anak.—Mar. 10:17-22.

18. Cosa grande honor y bendicion hay tene el maga obediente gente hasta para cuando?

¹⁸ El maga obediente gente hay tene el de con todo grande honor—el privilegio que ama y adora con Jehova hasta para cuando! Aquellos quien tiene esperanza aqui na tierra hay queda tambien alegre mientras ta cuida con el tierra que ya crea si Jehova para queda diila perfecto lugar onde sila esta. Gendeh mas dura, el Reino del Dios hay hace otravez bonito con el tierra y con el todo cosas aqui. Hay solva si Jesus con el todo problema que ya causa si Adan y Eva cuando ya decidi sila que deja con el familia del Dios. Hay resucita si Jehova con el millones y dale kanila el oportunidad que tene vida hasta para cuando con perfecto salud na un paraiso tierra. (Luc. 23:42, 43) Mientras hinay-hinay ta queda perfecto el familia de Jehova aqui na tierra, el cada uno hay reflecta con el “gloria y honor” que ya menciona si David.—Sal. 8:5.

19. Cosa kita debe acorda?

¹⁹ Si parte tu del grande grupo, tiene tu un bonito esperanza. Ta ama contigo el Dios y quierre le que queda tu miembro del de suyu familia. Poreso, hace el todo para hace alegre con ele. Pone pirmi na de tuyu pensamiento y corazon el maga promesa del Dios. Aprecia con el de tuyu privilegio que adora con el diaton Tata na cielo y con el diaton esperanza que alaba con ele hasta para cuando!