1-2. Cosa kita hay considera na este articulo?

COSA tu sinti si el package que bien necesita tu nuay pa llega cuando ta expecta tu con ese? Hay man luya ba tu? El Proverbio 13:12 ta habla: “El cosa ta expecta que nuay porsigui ta hace triste con el corazon.” Pero, paquemodo si ya puede tu sabe que tiene razon si porque el package nuay pa llega? Posible, con paciencia tu espera con este.

² Na este articulo, hay mira kita cuanto principio na Biblia que puede ayuda kanaton ‘espera con paciencia.’ (Miq. 7:7) Despues, hay examina kita dos situacion donde debe kita espera con Jehova para actua. Na uliji, hay considera kita maga bendicion que hay ricibi aquellos quien conforme espera con Jehova.

3. Cosa el Proverbio 13:11 ta enseña kanaton?

³ El Proverbio 13:11 ta enseña kanaton si porque kita debe queda paciencioso. Este ta habla: “El riqueza que pronto lang ya puede saca hay acaba, pero el riqueza que poco-poco ya ajunta hay queda manada.” Cosa kita puede aprende na este principio? El un sabio persona hay tene buen resulta cay con cuidao y con paciencia le ta hace con el maga cosas.

4. Cosa ta hace claro el principio que puede incuntra na Proverbio 4:18?

⁴ El Proverbio 4:18 ta habla kanaton que “el camino del maga recto igual como na ardor del sol que ta queda mas arde hasta llega el media dia.” Este versiculo claro ta dale mira que si Jehova ta ayuda con el de suyu maga siervo para entende con el  de suyu proposito—hinay-hinay. Pero, puede tambien este ayuda kanaton para entende si paquemodo el un Cristiano puede hace maga cambio na de suyu vida y queda mas cerca con Jehova. Gendeh puede hace apura con el espiritual progreso. Necesita se tiempo. Si estudia kita enbuenamente y aplica con el maga consejo estaba na Palabra del Dios y na de suyu organizacion, hinay-hinay kita cultiva con el maga calidad del Cristo. Hay mas conoce tambien kita con Dios. Considera si paquemodo si Jesus ya ilustra con este.

5. Paquemodo ya ilustra si Jesus que necesita tiempo para hace maga cambio el un persona?

⁵ Ya usa ilustracion si Jesus para explica si paquemodo el mensaje del Reino que ta predica kita puede compara na un diutay similla que hinay-hinay ta crici na corazon del maga sincero persona. Ele ya habla: “El siembra ta tene raiz y ta crici maskin no sabe le [el siembrador] si paquemodo ta sucede ese. El tierra mismo amo el ta produci: Primero el saja, despues el espiga, y acabar, todo el maga grano na espiga.” (Mar. 4:27, 28) Cosa quierre decir de este? Si Jesus ya explica que igual na un siembra que hinay-hinay ta crici, el un persona quien ya acepta con el mensaje del Reino hinay-hinay tambien ta crici na espiritual. Por ejemplo, mientras el diaton maga sincero Bible study mas ta queda cerca con Jehova, ta puede kita mira con el diila maga bonito cambio que ta puede sila hace. (Ef. 4:22-24) Pero, debe kita acorda que si Jehova el ta hace crici con el diutay similla.—1 Cor. 3:7.

6-7. Cosa kita puede aprende na manera si paquemodo si Jehova ya crea con el tierra?

⁶ Na todo cosa le ta hace, ta dale grande tiempo si Jehova para completa con el de suyu trabajo. Ta hace se ele para dale gloria con el de suyu nombre y para puede beneficia el otro. Considera, por ejemplo, si paquemodo si Jehova hinay-hinay ya prepara con el tierra para na maga gente.

⁷ Cuando ya crea si Jehova con el tierra, el Biblia ya habla que ele el quien “ya determina con el medida de este,” el quien “ya entera el  fundacion de este” y el “ya pone con el piedra-canto de este.” (Job 38:5, 6) Ya dale tambien le tiempo para examina con el de suyu trabajo. (Gen. 1:10, 12) Ta puede ba tu imagina si cosa ya sinti el maga angel cuando ya puede sila mira con el maga nuevo cosas que ya crea si Jehova? Asigurao, bien alegre gayot sila! Por causa con ese, ya principia sila “alaba suena con ele.” (Job 38:7) Cosa kita puede aprende? Ya alcanza miles de año para con Jehova que crea con el tierra, maga estrellas y todo vivo creatura. Pero cuando ya mira si Jehova con el todo cosa le ya crea, ele ya habla que “bien bueno” este.—Gen. 1:31.

8. Cosa kita considera ahora?

⁸ Como cosa kita ya puede mira na maga ejemplo, puede kita incuntra manada principio na Palabra del Dios que ta enseña kanaton que queda paciencioso. Ahora, discuti kita dos situacion donde debe kita con paciencia espera con Jehova.

9. Cosa el un situacion donde necesita kita espera con Jehova?

⁹ Posible, necesita kita espera con el diaton maga rezo que contesta. Si ta reza kita que dale kanaton fuerza para aguanta con el diaton probanza o ayuda kanaton para ganá con el diaton mal inclinacion, posible sinti kita que tarda llega el ayuda de Jehova. Porque gendeh dayun si Jehova ta contesta con el todo del diaton maga rezo?

10. Porque kita necesita espera con paciencia que contesta si Jehova con el diaton maga rezo?

¹⁰ Si Jehova ta oi enbuenamente con el diaton maga rezo. (Sal. 65:2) Ta mira si Jehova con el diaton maga sincero rezo como prueba que tiene kita fe con ele. (Heb. 11:6) Interesao tambien mira si Jehova si paquemodo kita de determinao que actua harmonia na diaton maga rezo y hace con el de suyu voluntad. (1 Juan 3:22) Poreso, posible necesita kita queda paciencioso y vivi harmonia na diaton maga rezo si ta pricura kita descanza con el un cosa que gendeh bueno. Si Jesus ya ayuda kanaton para entende que el cuanto del diaton maga rezo posible gendeh dayun contesta. Ele ya habla: “Si ta reza ustedes, pidi gayot y ay recibi ustedes el cosa quiere. Continua busca gayot y ay encontra ustedes el cosa ta busca. Continua saluda na puerta, y ay invita con ustedes entra. Cay si quien ta pidi, ele ay recibi; y si quien ta anda busca, ele ay encontra; y ay invita entra con el gente quien ta continua saluda.” (Mat. 7:7, 8, El Nuevo Testamento) Si ta sigui kita con este consejo y ‘no descanza reza,’ puede kita asigura que el diaton Tata na cielo ta oi kanaton y hay contesta con el diaton maga rezo.—Col. 4:2.

11. Si ta sinti kita que gendeh ta contesta si Jehova con el diaton maga rezo, cosa kita debe acorda? (Maga Hebreo 4:16)

¹¹ Maskin pa dol gendeh dayun ta contesta con el diaton rezo, ya promete si Jehova kanaton que el diaton rezo hay contesta “cuando necesita kita el ayuda,” na justo tiempo. (Le con el Maga Hebreo 4:16.) Poreso, gendeh kita debe disculpa con Jehova si nuay le dayun contesta con el diaton rezo na tiempo que ta pensa kita que debe ya le contesta. Por ejemplo, manada el ta reza por cuanto año que quierre sila mira que el Reino del Dios hay termina con el mal sistema de maga cosas. Ya habla pa gane si Jesus que debe kita reza con este. (Mat. 6:10) Pero, gendeh gayot justo si permiti el un persona que perde el de suyu fe con Dios cay nuay llega el fin na tiempo que el maga gente ta expecta con ese. (Hab. 2:3; Mat. 24:44) Poreso, justo lang que continua kita  espera con Jehova y tene fe que contesta le kanaton. El fin hay llega na justo tiempo cay ya iscuji ya si Jehova el “dia pati hora” si cuando se llega. Y ese dia amo el de con todo buen tiempo para con todo.—Mat. 24:36; 2 Ped. 3:15.

12. Na cosa situacion posible bien dificil para kanaton queda paciencioso?

¹² Posible, necesita kita queda paciencioso mientras ta experiencia maltratamiento. El maga gente na este mundo ta maltrata con aquellos quien diferente el sexo, raza, cultura o nacionalidad. Ta maltrata con otro cay tiene sila problema na fisical o na pensamiento. Mucho maga siervo de Jehova el ya experiencia injusticia por causa na diila creencia que base na Biblia. Si ya experiencia kita maltratamiento, debe kita acorda con el palabra de Jesus. Ele ya habla: “Si quien ay resisti hasta el fin, ay salva gayot.” (Mat. 24:13) Pero, cosa tu hace si ya sabe tu que tiene quien ya comete serioso culpa na congregacion? Despues el maga anciano sabe acerca con ese, hay queda ba tu paciencioso y confia que solva sila con ese na manera de Jehova? Cosa posible hace el maga anciano si tiene quien ya hace serioso culpa?

13. Cosa quierre si Jehova que hace el maga anciano si tiene quien ya comete serioso culpa?

¹³ Si ya sabe el maga anciano que tiene quien ya comete serioso culpa na congregacion, ta reza sila y ta pidi el “saber que ta sale na cielo” para puede sila mira con el situacion igual si paquemodo si Jehova ta mira con ese. (Sant. 3:17) El diila goal amo que “saca con [el quien ya culpa] na mal camino” si posible. (Sant. 5:19, 20) Quierre tambien sila hace el todo para protege con el congregacion y dale comforta con aquellos quien ya sinti duele. (2 Cor. 1:3, 4) Si ya puede sila sabe que tiene quien ya comete serioso culpa, el maga anciano debe una sabe si cosa el deverasan ya sucede y posible necesita se tiempo. Despues, reza sila, dale consejo estaba na Escritura y corecta con el quien ya culpa “na justo manera.” (Jer. 30:11) Maskin pa el maga anciano gendeh ta espera por largo tiempo, gendeh tambien sila ta apura hace decision. Si ta sigui el maga anciano con el direccion de Jehova, hay puede mira el congregacion el buen resulta de ese. Pero maskin pa ya hace ya todo el maga anciano na justo manera, posible siempre sinti duele aquellos quien ya sale afectao con ese. Si ya sucede se contigo, cosa tu puede hace para gendeh tu tanto sinti duele?

14. Cosa ejemplo na Biblia el puede ayuda contigo si ya sinti gayot tu duele na cosa ya hace el un Cristiano?

 ¹⁴ Ya puede ya ba contigo hace sinti duele el otro, posible el un hermano o hermana? Puede tu incuntra maga bonito ejemplo na Palabra del Dios que ta enseña kanaton si paquemodo kita espera con Jehova que corecta con el injusticia. Por ejemplo, maskin pa el maga hermano de Jose ya maltrata con ele, nuay le permiti que el diila culpa causa con ele para queda bien rabiao. Sino, ya continua le dale el todo na servicio con Jehova y ya bendici con ele cay ya aguanta le con paciencia. (Gen. 39:21) Despues del cuanto tiempo, ya puede perdona si Jose con aquellos quien ya hace sinti duele con ele y ya mira le si paquemodo si Jehova ya bendici con ele. (Gen. 45:5) Igual con Jose, ta tene kita comforta si cerca kita con Jehova y espera con ele para corecta con el injusticia na justo tiempo.—Sal. 7:17; 73:28.

15. Cosa ya puede ayuda con el un hermana para aguanta con el injusticia que ya experiencia le?

¹⁵ Siempre, gendeh todo injusticia el igual de serioso na cosa ya experiencia si Jose. Pero, todo kita ta sinti duele si tiene quien ta maltrata kanaton. Si tiene kita problema con otro, incluido aquellos quien gendeh ta sirvi con Jehova, hay beneficia kita si aplica kita con el maga principio na Biblia. (Fil. 2:3, 4) Considera un experiencia. El un hermana ya sinti gayot duele cuando ya sabe le que el de suyu uban na trabajo ta hace con ele malo na otro. En vez de rabia dayun, el diaton hermana ya dale tiempo para pensa el ejemplo de Jesus. Cuando ya insulta con Jesus, nuay le man balus insulta con otro. (1 Ped. 2:21, 23) Poreso, ya deja ya lang el hermana con el cosa ya sucede. Ya puede le sabe na uliji que el de suyu uban na trabajo, tiene gale un grabe problema na salud y ta experiencia stress. Ya puede pensa el hermana que posible gendeh intencional el cosa ya hace el de suyu uban na trabajo. Poreso, ya queda bien alegre el hermana cay ya puede le aguanta con paciencia con el maltratamiento y ya tene le paz.

16. Cosa puede dale comforta si ta experiencia tu injusticia? (1 Pedro 3:12)

¹⁶ Si ta experiencia tu injusticia o tiene quien ya hace sinti duele contigo, acorda que si Jehova cerca “con aquellos quien dolorido el corazon.” (Sal. 34:18) Ta ama le contigo por causa  na de tuyu paciencia y cay ta buta tu con ele el de tuyu maga lingasa. (Sal. 55:22) Ele el Juez na entero tierra. Ta mira le todo cosa ta sucede. (Le con el 1 Pedro 3:12.) Si ta experiencia tu maga dificultad que gendeh tu ta puede solva, preparao ba tu espera con ele?

17. Como cosa ta habla na Isaias 30:18, cosa asiguranza ya dale kanaton si Jehova?

¹⁷ Gendeh mas dura, el diaton Tata na cielo hay bendici gayot kanaton por medio del de suyu Reino. El Isaias 30:18 ta habla: “Si Jehova con paciencia ta espera para dale mira favor con ustedes, y hay levanta le para dale mira lastima con ustedes. Cay si Jehova amo un Dios de justicia. Alegre el todo aquellos quien ta continua espera con ele.” Aquellos quien ta continua espera con Jehova hay ricibi manada bendicion ahora y na nuevo mundo que hay llega.

18. Cosa maga bendicion el ta espera kanaton na futuro?

¹⁸ Si entra ya el maga siervo del Dios para na nuevo mundo, gendeh mas sila experiencia el maga lingasa y problema que ta enfrenta sila ahora. Hay perde ya el injusticia y nuay mas ya dolor. (Rev. 21:4) Gendeh mas kita man lingasa cay tiene ya abundancia del maga cosas que necesita kita. (Sal. 72:16; Isa. 54:13) Cosa ya de bale ese tiempo!

19. Na cosa kanaton hinay-hinay ta prepara si Jehova ahora?

¹⁹ Mientras tanto, cada vez kita ta puede quita con el mal practica y cultiva maga buen calidad, ta prepara kanaton si Jehova para queda bajo na de suyu rulanza. No perde esperanza y man luya. Ta espera kanaton el un buen vida na futuro! Mientras ta esperanza con ese, ojala continua kita espera con paciencia con Jehova mientras ta completa le con el de suyu trabajo!