1-2. Asegun na Salmo 34:8, paquemodo kita puede aprende que si Jehova bueno?

IMAGINA que tiene contigo un cosa ya dale para come que nuay pa tu pruba de antes. Puede tu sabe acerca con este si mira tu, ole, sabe de este recipe o pregunta con el opinion del otro acerca con este. Pero, el solamente manera para sabe si gusta tu con este amo si etu mismo pruba con ese.

² Puede kita aprende acerca na pagka-bueno de Jehova por medio na lehida del Biblia y na diaton maga publicacion y oi maga experiencia del otro acerca na maga bendicion que ya ricibi sila estaba con Jehova. Pero, puede lang kita entende si paquemodo de bueno si Jehova si kita mismo hay “pruba” con ese. (Le con el Salmo 34:8.) Ilustra kita con el un manera que puede kita hace con ese. Pone kita que quierre kita sirvi con Jehova full-time na ministerio. Pero para puede alcanza con ese goal, necesita kita hace simple con el diaton vida. Posible pirmi ya kita ta le con el promesa de Jesus que si hace kita una con el Reino, hay dale si Jehova con el cosa gayot kita necesita. Pero, nuay kita personal experiencia con ese promesa. (Mat. 6:33) Pero cay tiene kita fe na promesa de Jesus, ta pricura kita menora con el diaton maga gastos, tan adjust con el diaton secular trabajo y tan focus na diaton ministerio. Si hace kita se, hay aprende kita na diaton mismo experiencia que si Jehova deverasan ta dale el diaton maga necesidad. Kita mismo ya “pruba” que si Jehova bueno.

3. Uyun na Salmo 16:1, 2, quien ta beneficia na pagka-bueno de Jehova?

³ “Bueno si Jehova con todo,” maskin con aquellos quien no conoce con ele. (Sal. 145:9; Mat. 5:45) Pero, mas manada bendicion ta ricibi especialmente aquellos quien ta ama con Jehova  y ta sirvi con ele con todo alma. (Le con el Salmo 16:1, 2.) Discuti kita con el cuanto buen cosas que ya hace si Jehova para kanaton.

4. Paquemodo si Jehova ta dale mira el de suyu pagka-bueno con aquellos quien ta principia queda cerca con ele?

⁴ Cada vez ta aplica kita con el cosa kita ya aprende estaba con Jehova, puede kita mira el buen efecto de este na diaton vida. Mientras ta aprende kita acerca con ele y ama con ele, ta ayuda le kanaton evita pensa y hace maga cosas que gendeh le ta gusta. (Col. 1:21) Y cuando ya dedica kita diaton vida con Jehova y ya bautiza, mas ya dale le kanaton maga buen cosas igual na limpio conciencia y cerca relacion con ele.—1 Ped. 3:21.

5. Paquemodo kita experiencia con el pagka-bueno de Jehova na diaton ministerio?

⁵ Ta continua kita experiencia con el pagka-bueno de Jehova mientras ta participa kita na ministerio. Un huyain persona ba tu? Manada na maga siervo de Jehova el ansina. Posible antes tu queda uno del maga Testigo de Jehova, gendeh tu ta pensa que puede tu anda na casa del un gente que no conoce tu y man cuento con ele acerca na Biblia. Pero ahora, regular ya tu ta hace con ese. Y mas pa, na ayuda de Jehova, alegre tu ta hace con el trabajo predicacion! Ya puede tu sinti con el suporta de Jehova na manada manera. Ya ayuda le contigo esta calma si ta enfrenta tu oposicion na ministerio. Ya ayuda tambien le contigo acorda justo texto para le con el un interesao persona. Y ya dale le contigo el fuerza para continua predica maskin pa el maga gente na teritorio no quierre oi contigo.—Jer. 20: 7-9.

6. Na cosa manera el training que ta dale si Jehova evidencia del de suyu pagka-bueno?

⁶ Ta dale tambien mira si Jehova el de suyu pagka-bueno kanaton cay tan train le kanaton para na ministerio. (Juan 6:45) Na diaton midweek miting, ta oi kita maga bonito sampol discusion y ta anima kanaton que usa con ese na ministerio. Posible na primero, tan alang-alang kita pruba hace maga nuevo cosas pero si hace kita con ese, puede kita mira que ese nuevo manera efectivo na diaton teritorio. Ta anima tambien kanaton na maga miting y na convencion que participa na diferente forma de ministerio que nuay pa kita pruba de antes. Posible, hay sinti tambien kita lingasa si hace kita con este pero si Jehova hay bendici kanaton. Considera kita con el cuanto bendicion si hace kita maga nuevo manera para dale el diaton de con todo con Jehova, maskin cosa pa el diaton circumstancia. Despues, discuti kita si paquemodo kita puede alcanza con el diaton maga goal.

7. Cosa bendicion kita ricibi si hace kita esfuerzo para hace pa mas na diaton ministerio?

⁷ Mas ta queda kita cerca con Jehova. Considera con el ejemplo del un anciano que el nombre si Samuel, * quien ta sirvi junto con el de suyu mujer na Colombia. Este man maridable alegre ya sirvi como maga pioneer na diila congregacion pero quierre sila hace pa mas na diila ministerio y ayuda con el un congregacion que tiene grande necesidad. Para alcanza con ese goal, necesita sila hace cuanto sacrificio. “Ya aplica kame con el Mateo 6:33 y ya descanza cumpra maga cosas que gendeh kame necesita,” ya habla si Samuel. “Pero, el de con todo dificil amo que deja con el diamon apartment. Ta gusta gayot kame de este diseño y gendeh mas kame ta paga con este.” Na diila nuevo assignment, maga 16 por ciento ya lang ta incuntra el man maridable compara na diila incuntrada de antes. “Ya puede gayot kame mira si paquemodo si Jehova ya guia y ya contesta  con el diamon maga rezo,” ya habla si Samuel. “Ya puede kame sinti que alegre si Jehova kanamon y ya sinti tambien kame con el de suyu amor na manera que nuay kame experiencia de antes.” Puede ba tu hace pa mas na de tuyu ministerio? Si ansina, puede tu asigura que hay queda tu mas cerca con Jehova y hay cuida le contigo.—Sal. 18:25.

8. Cosa tu ya puede aprende na cosa ya habla si Ivan y Viktoria?

⁸ Puede kita incuntra alegria na diaton servicio. Nota con el cosa ya habla si Ivan y Viktoria, un maridable quien ta sirvi como maga pioneer na Kyrgyzstan. Ya continua sila hace simple con el diila vida para puede sila man voluntario na maskin cosa assignment, incluido ya el maga proyecto de construida. Si Ivan ya habla: “Ya trabaja gayot kame enbuenamente na diamon cada assignment. Maskin pa cansao kame na fin del dia, ya sinti kame alegre cay sabe kame que ya usa kame con el diamon fuerza na trabajo del Reino. Alegre tambien kame cay ya tene kame manada nuevo amigo y maga bonito experiencia.”—Mar. 10:29, 30.

9. Cosa ya hace el un hermana quien tiene dificultad para hace pa mas na de suyu ministerio y cosa el resulta?

⁹ Alegre kita na servicio con Jehova maskin pa tiene maga dificultad. Por ejemplo si Mirreh, un de edad viuda na West Africa, yan retiro na de suyu trabajo como un doctor y ya principia man pioneer. Tiene grabe arthritis si Mirreh. Poreso, un hora lang le ta puede predica na casa en casa. Pero, mas manada hora le ta puede hace na public witnessing. Tiene le manada return visit y Bible study donde el cuanto ta llama le por medio na telefono. Cosa ya motiva con Mirreh para hace pa mas na ministerio? “Ta ama gayot yo con Jehova y con Cristo Jesus. Y pirmi yo ta reza con Jehova que ayuda conmigo hace el de mio de con todo na servicio con ele.”—Mat. 22:36, 37.

10. Como cosa ta habla na 1 Pedro 5:10, cosa ricibi aquellos quien ya hace una con Jehova?

¹⁰ Ta ricibi kita omento training estaba con Jehova. Si Kenny, un hermano pioneer quien ta sirvi na Mauritius, ya discubri que deverasan este. Cuando ya aprende le el verdad, ya descanza le entra escuela na universidad, ya bautiza y ya sirvi full-time na ministerio. Ele ya habla, “Ya pricura yo queda igual con profeta Isaias, quien ya habla: ‘Taqui yo! Imbia conmigo!’” (Isa. 6:8) Ya sirvi si Kenny na manada proyecto de construida y ya ayuda tambien le man translate maga publicacion que base na Biblia na de suyu mismo lengguaje. “Ya ricibi yo training que ya ayuda conmigo tene el maga skill que ta necesita yo para cumpli con el de mio maga assignment,” ya habla si Kenny. Pero, nuay lang le aprende si paquemodo hace con ese trabajo. Ya omenta le, “Ya aprende yo acerca na de mio maga limitacion y el maga calidad que necesita yo cultiva para queda mas buen siervo de Jehova.” (Le con el 1 Pedro 5:10.) Posible, puede tambien tu hace maga cambio para puede tu ricibi omento training estaba con Jehova.

11. Cosa esfuerzo ya hace el maga hermana na South Korea para puede participa na ministerio y cosa el resulta? (Mira con el letrato na cover.)

¹¹ Maskin el maga experienciao Testigo ta necesita training cuando ya pruba sila un nuevo forma de servicio. Durante el COVID-19 pandemic, el maga anciano na un congregacion na South Korea ya escribi: “El cuanto quien ta pensa que gendeh sila puede participa na ministerio por causa na diila salud ahora ta puede ya participa por medio na videoconferencing. El tres hermana que mas de 80 ya el edad ya aprende con el nuevo tecnologia y ta usa con este na ministerio halos todo el dia.” (Sal. 92:14, 15) Quierre ba tu hace pa mas na de tuyu  ministerio y mas pruba con el pagka-bueno de Jehova? Considera con el cuanto cosas que puede ayuda contigo alcanza con ese goal.

12. Cosa si Jehova ta promete con aquellos quien ta confia con ele?

¹² Aprende confia con Jehova. Ya promete le que hay bendici le kanaton si hay confia kita con ele y dale el diaton de con todo bueno. (Mal. 3:10) El un hermana na Colombia que el nombre si Fabiola ya mira si paquemodo ya cumpli si Jehova con ese promesa na de suyu vida. Quierre dayun le sirvi como un regular pioneer despues con ele bautiza. Pero, ta necesita le trabaja para suporta con el de suyu familia. Poreso cuando puede ya le man retiro, ya reza gayot le con Jehova que ayuda con ele. Ya habla le: “Largo tiempo el necesita para aproba con el un pension pero un mes lang despues yo man apply ya aproba dayun con ese. Dol un milagro este!” Dos meses despues, ya principia le man pioneer. Mas de 70 año ya le ahora y mas de 20 año ya le tan pioneer. Durante na ese tiempo, ya ayuda le ocho persona para bautiza. Ya habla le: “Maskin pa ta sinti yo luya tiene vez, ya ayuda si Jehova conmigo todo el dia para puede continua na de mio pioneering.”

13-14. Cosa maga ejemplo el puede ayuda kanaton para confia con Jehova y hace pa mas na diaton servicio?

¹³ Beneficia na maga ejemplo de aquellos quien ya confia con Jehova. El Biblia lleno de maga ejemplo del maga individual quien ya hace esfuerzo na servicio con Jehova. Na manada situacion, aquellos maga siervo de  Jehova ta necesita hace el primer accion antes sila puede ricibi el maga bendicion de Jehova. Por ejemplo, ya bendici lang si Jehova con Abraham despues pa le sale na diila lugar—“maskin noay le sabe si donde le ay anda.” (Heb. 11:8) Ya ricibi lang si Jacob con el un especial bendicion despues pa le lucha con el angel. (Gen. 32:24-30) Y cuando cerca ya el nacion de Israel entra na Tierra Prometido, ya puede lang travesa el maga gente despues pa pisa el maga sacerdote na Rio de Jordan.—Jos. 3:14-16.

¹⁴ Puede tambien tu beneficia na maga ejemplo del maga Testigo na moderno tiempo quien ya confia con Jehova y ya hace pa mas na diila ministerio. Por ejemplo, el un hermano que el nombre si Payton y de suyu mujer, si Diana, quierre-quierre le acerca na maga hermano y hermana quien ya hace pa mas na servicio con Jehova, igual como cosa puede le na serie “They Offered Themselves Willingly.” * Si Payton ya habla: “Si ta le kame con el diila experiencia, ta sinti kame igual como ta mira kame con el un persona quien ta come un sabroso comida. Mas ta dura kame mira, mas quierre kame que ‘pruba y mira que bueno si Jehova.’” Na uliji, si Payton y Diana ya sirvi onde tiene grande necesidad. Ya le ya ba tu con este serie? Y ya puede ya ba tu mira con el maga video Witnessing in Isolated Territory—Australia y Witnessing in Isolated Territory—Ireland na jw.org? Puede este ayuda contigo busca maga manera que puede tu hace pa mas na de tuyu servicio.

15. Paquemodo el buen asosacion puede ayuda kanaton?

¹⁵ Iscuji buen asosacion. Mas facil para kanaton come con el comida que nuay pa kita pruba de antes si man junto kita con aquellos quien quierre-quierre come con ese. Na igual manera, si tan junto kita con aquellos quien ya hace una con Jehova na diila vida, grande el posibilidad que busca tambien kita manera que hace pa mas na diaton servicio con Dios. Este el cosa ya sucede con el un maridable, si Kent y Veronica. “El diamon maga amigo y familia ya anima kanamon que pruba nuevo forma de servicio,” ya habla si Kent. “Ya realiza kame que si man junto kita con aquellos quien ta hace una con el Reino, mas ta tene kita el confianza que pruba hace maga nuevo cosas.” Si Kent y Veronica ta sirvi ya ahora como maga special pioneer na Serbia.

16. Como cosa ta dale mira na ilustracion de Jesus na Lucas 12:16-21, porque debe kita preparao hace maga sacrificio?

¹⁶ Hace maga sacrificio para con Jehova. Gendeh kita ta necesita sacrificia con el todo cosas que quierre-quierre kita hace para hace alegre con Jehova. (Ecl. 5:19, 20) Pero, si tan alang-alang kita hace pa mas na servicio con Dios para lang evita hace maga personal sacrificio, puede kita hace con el kamali que ya hace el hombre na ilustracion de Jesus quien ya pricura trabaja para tene comfortable vida pero ya ignora con Dios. (Le con el Lucas 12:16-21, El Nuevo Testamento.) El un hermano que el nombre si Christian, quien ta queda na France, ya habla, “De antes, gendeh yo ta hace esfuerzo que dale el de mio tiempo y fuerza con Jehova y na de mio familia.” Ele y el de suyu mujer ya decidi man pioneer. Pero para puede alcanza con ese goal, necesita sila deja con el diila trabajo. Ya principia sila un diutay negocio donde ta paga kanila para limpia y ya aprende sila esta contento na diila diutay incuntrada. Alegre ba sila ya hace con ese maga sacrificio para puede sila man pioneer? Si Christian ya habla, “Mas alegre kame na diamon  ministerio ahora y alegre kame mira con el maga Bible study y return visit que ta aprende acerca con Jehova.”

17. Porque posible man dificil kita que pruba nuevo cosas na diaton ministerio?

¹⁷ Queda preparao para pruba maga nuevo clase de servicio. (Act. 17:16, 17; 20:20, 21) Si Shirley, un pioneer na United States, ya necesita man adjust con el de suyu ministerio durante el COVID-19 pandemic. Del una, yan alang-alang le pruba con el telephone witnessing. Pero cuando ya ricibi le el training durante el visita del circuit overseer, ya principia le regular participa na ese clase de predicacion. Ya habla le: “Del una, maka-miedo pero ahora quierre-quierre ya yo con ese. Mas manada kame maga gente ta puede man cuento ahora contra na predicacion na casa en casa!”

18. Cosa kanaton puede ayuda para enfrenta maga dificultad mientras ta pricura kita hace pa mas na diaton ministerio?

¹⁸ Hace plano y actua. Si ta experiencia kita maga problema, ta pidi kita ayuda na rezo y ta pensa enbuenamente si cosa hace acerca con este. (Prov. 3:21) Si Sonia, quien ta sirvi como un regular pioneer na un grupo que Romany el lengguaje na Europe, ya habla: “Quierre-quierre yo escribi de mio plano na un papel y ta pone yo con este na un lugar que ta puede yo mira. Na de mio mesa, tiene yo un drawing de dos camino que ta anda na diferente direccion. Si ta hace yo decision, ta mira yo con ese drawing y ta pensa si onde direccion ta guia el decision que ya hace yo.” Ta pricura si Sonia esta positivo maskin ta enfrenta maga dificultad. “El cada nuevo situacion,” ya habla le, “puede queda igual na un pader que puede sangga conmigo o un puente que puede ayuda conmigo—ta depende se na de mio mirada.”

19. Cosa kita debe determinao hace?

¹⁹ Ta bendici si Jehova kanaton na manada manera. Puede kita dale mira que ta aprecia kita con ese maga bendicion si ta hace kita el todo para alaba con ele. (Heb. 13:15) Posible, incluido alli que hace kita maga nuevo manera para hace pa mas na diaton ministerio y si Jehova hay bendici pa mas kanaton. Cada dia, pricura kita busca maga manera para “pruba y mira que bueno si Jehova.” Si hace kita se, queda kita igual con Jesus quien ya habla: “El dimio comida amo cumpli el voluntad de Aquel quien ya imvia conmigo y hace acaba el disuyo trabajo.”—Juan 4:34.