1. Cosa ta hace el otro para pricura hace mas na diila servicio con Jehova?

 BIEN manada kita trabajo mientras ta queda cerca el fin de este sistema. (Mat. 24:14; Luc. 10:2; 1 Ped. 5:2) Quierre kita hace el todo lo que puede para sirvi con Jehova. Manada el quien ta hace pa mas na diila ministerio. El cuanto quierre sirvi como maga pioneer. El otro tiene goal que sirvi na Bethel o na construida de maga teocratico facilidad. Y el cuanto maga hermano ta hace esfuerzo para cualifica como un siervo ministerial o un anciano. (1 Tim. 3:1, 8) Asigurao que bien alegre si Jehova mientras ta mira le que el de suyu maga siervo bien quierre sirvi con ele!—Sal. 110:3; Isa. 6:8.

2. Cosa kita posible sinti si nuay kita puede alcanza con el cuanto del diaton maga espiritual goal?

² Pero posible man luya kita si despues de cuanto tiempo, nuay siempre kita puede alcanza con el cuanto del diaton maga espiritual goal. O posible queda kita triste cay gendeh kita puede tene con el cuanto privilegio por causa na diaton edad o na otro circumstancia. (Prov. 13:12) Amo se el cosa ya sucede con Melissa. * Bien quierre le sirvi na Bethel o atende na School for Kingdom Evangelizers. Pero, ya habla le: “Gendeh mas yo cualificao por causa na de mio edad. Hasta na de mio sueño ya lang este maga privilegio. Tiene vez, ta sinti yo luya.”

3. Cosa posible hace el cuanto para cualifica na cuanto privilegio?

 ³ El cuanto maga joven quien tiene buen salud posible necesita pa man mature y demonstra cuanto calidad antes sila queda cualificao na cuanto privilegio. Posible, inteligente sila, pronto hace maga decision y preparao sirvi. Pero, baka necesita pa sila aprende si paquemodo queda mas paciencioso, hace mas enbuenamente el trabajo o queda mas respetoso. Si hace tu esfuerzo para cultiva con el maga calidad que necesita tu, posible tu ricibi un privilegio na tiempo que gendeh tu ta expecta con ese. Considera con el experiencia de Nick. Cuando 20 año le, yan luya gayot le cay nuay con ele iscuji para sirvi como un siervo ministerial. Ele ya habla, “Ya sinti yo que baka tiene cosa mali conmigo.” Pero, nuay descanza si Nick. Ya hace le el de suyu de con todo bueno na congregacion y na trabajo predicacion. Ahora, ta sirvi ya le como un miembro de Branch Committee.

4. Cosa kita considera na este articulo?

⁴ Tan luya ba tu cay nuay pa tu alcanza con el un espiritual goal? Si ansina, habla se con Jehova. (Sal. 37:5-7) Mas pa, puede tu pidi sugestion na maga mature hermano si paquemodo tu puede mejora con el de tuyu servicio con Dios y despues, pricura aplica con el diila consejo. Si hace tu con ese, posible tu ricibi con ese privilegio o alcanza con ese goal. Pero baka igual con Melissa que ya menciona enante, gendeh tu puede alcanza con el privilegio que quierre tu na presente tiempo. Cosa tu hace? Paquemodo tu puede mentena con el de tuyu alegria? Para contesta con ese pregunta, este articulo hay discuti (1) si cosa contigo puede dale alegria, (2) si paquemodo tu omenta con el de tuyu alegria y (3) si cosa maga goal tu puede hace para queda mas alegre.

5. Para queda alegre, onde kita debe man focus? (Eclesiastes 6:9)

⁵ Como cosa ya habla na Eclesiastes 6:9, puede kita incuntra alegria si busca kita con ese na justo lugar. (Le.) El un persona quien “alegre na cosa ta puede mira el ojos,” ta aprecia con el cosa le tiene, igual como el de suyu presente circumstancia. Pero el persona quien ta “desea con el maga cosas que gendeh puede obtene,” gendeh gayot queda alegre. Cosa el leccion para kanaton? Para queda alegre, debe kita man focus na cosa kita tiene y na cosa lang kita puede obtene.

6. Cosa ilustracion kita considera ahora y cosa kita puede aprende con ese?

⁶ Posible ba gayot queda alegre na maga cosas que tiene ya tu? Manada gente ta pensa que gendeh se posible cay mientras ta pasa el tiempo, quierre kita pruba hace con el maga nuevo cosas. Pero el deverasan, posible este. Puede gayot kita queda alegre na cosa “ta puede mira el [diaton] ojos.” Paquemodo kita puede hace con ese? Para sabe, considera kita con el ilustracion de Jesus acerca na maga talento que puede incuntra na Mateo 25:14-30. Hay aprende kita si paquemodo kita puede tene alegria y si paquemodo queda mas alegre na maga bendicion que tiene kita ahora.

7. Dale corto sumario del ilustracion de Jesus acerca na maga talento.

⁷ Na ilustracion, tiene un gente quien hay larga viaje. Antes le sale, ya llama le con el de suyu maga esclavo y ya dale kanila maga talento que puede sila usa para man negocio. *  Base na abilidad del cada uno, el gente ya dale cinco talento con el un esclavo, dos talento con el otro y un talento con el ika-tres esclavo. El primer dos esclavo ya trabaja enbuenamente para omenta este sen. Pero el ika-tres esclavo, nuay cosa ya hace na sen que ya dale con ele. Poreso, ya quita con ele na servicio el de suyu amo.

8. Porque puede queda alegre el primer esclavo na ilustracion?

⁸ Asigurao que bien alegre el primer esclavo cay ya dale con ele cinco talento el de suyu amo. Bien grande quel cantidad de sen y ta dale quel mira que ta confia gayot con ele el de suyu amo. Pero, quetal el segundo esclavo? Puede era le man luya cay mas poco talento le ya puede ricibi contra con el primer esclavo. Pero, cosa le ya hace?

9. Cosa nuay habla si Jesus acerca con el segundo esclavo? (Mateo 25:22, 23)

⁹ Le con el Mateo 25:22, 23. Nuay habla si Jesus que el segundo esclavo ya queda triste y yan sentimiento cay dos talento lang le ya ricibi. Y nuay tambien habla si Jesus que ya reclama el esclavo: ‘Este lang gayot el de mio? Igual lang yo de trabajador con aquel esclavo quien ya ricibi cinco talento! Si gendeh conmigo ta aprecia el de mio amo, mas bueno pa que entera yo con este dos talento y hace si cosa yo quierre.’

10. Cosa ya hace el segundo esclavo con el de suyu maga talento?

¹⁰ Igual con el primer esclavo, sabe el segundo esclavo que bien importante el responsibilidad que ya dale con ele y ya trabaja le enbuenamente para sirvi con el de suyu  amo. Como resulta, ya dobla le con el talento del de suyu amo. Ya premia con este esclavo cay buen trabajador le y ma-abilidad. Nuay lang basta queda alegre con ele el de suyu amo sino ya dale tambien con ele mas manada responsibilidad!

11. Cosa kita hace para queda mas alegre?

¹¹ Na igual manera, hay queda kita mas alegre si hace kita el todo na maskin cosa assignment que ya dale kanaton na servicio con Jehova. Queda ocupao na trabajo predicacion y na maga actividad na congregacion. (Act. 18:5; Heb. 10:24, 25) Prepara enbuenamente para na maga miting para puede tu dale maga comento que ta puede anima. Hace serioso con el maskin cosa parte que tiene tu na midweek miting. Si ya pidi contigo que ayuda hace con el un trabajo na congregacion, hace se na hora y dale mira que puede contigo confia. Si dale contigo assignment, no pensa que gendeh se importante. Pricura mejora con el calidad del de tuyu trabajo. (Prov. 22:29) Si hace tu el todo na de tuyu maga assignment y na otro maga espiritual actividad, mas pronto tu progresa y hay queda tu mas alegre. (Gal. 6:4) Mas facil tambien para contigo que queda alegre si ya ricibi el otro con el un privilegio que quierre tu ricibi.—Roma 12:15; Gal. 5:26.

12. Cosa ya hace el dos Testigo para queda mas alegre?

¹² Ta acorda pa ba tu con Melissa, el hermana quien quierre sirvi na Bethel o atende na School for Kingdom Evangelizers? Maskin pa nuay este sucede, ya habla le: “Ta pricura yo hace el todo na de mio ministerio como un pioneer y ta participa na todo aspeto de este. Ya hace este conmigo bien alegre.” Y cosa ya hace si Nick para gendeh man luya cuando nuay con ele iscuji para sirvi como un siervo ministerial? “Yan focus yo na maga privilegio que puede yo hace—participa na ministerio y dale maga buen comento na miting. Yan apply tambien yo que sirvi na Bethel y ya acepta conmigo pagka-sunod año.”

13. Cosa el resulta si hace tu el todo na de tuyu presente assignment? (Eclesiastes 2:24)

¹³ Si hace tu el todo na de tuyu presente assignment, hay ricibi ba tu mas manada responsibilidad na futuro? Posible se sucede, igual con Nick. Pero si gendeh, igual con Melissa, puede siempre tu queda bien alegre y satisfechao na cosa tu ta puede hace para con Jehova. (Le con el Eclesiastes 2:24.) Mas pa, hay queda tu bien alegre cay sabe tu que ta puede tu hace alegre con el diaton Amo, si Jesucristo.

14. Si acerca na diaton maga espiritual goal, cosa kita debe acorda?

¹⁴ Si tan focus kita na diaton presente assignment, quierre decir ba de este que gendeh mas kita busca manera para hace mas na diaton servicio con Jehova? Gendeh! Debe kita hace maga espiritual goal que puede ayuda kanaton para queda mas productivo na ministerio y mas puede ayuda con el diaton maga hermano y hermana. Para tene buen exito, mas bueno si man focus kita si paquemodo puede sirvi con otro en vez na diaton mismo cuerpo.—Prov. 11:2; Act. 20:35.

15. Cosa el cuanto goal que puede ayuda contigo queda mas alegre?

¹⁵ Cosa maga goal tu puede hace? Pidi con Jehova que ayuda contigo sabe si cosa maga goal tu puede alcanza. (Prov. 16:3; Sant. 1:5) Puede ba tu pricura alcanza con el uno de maga goal que ya menciona na  primer parapo de este articulo—queda un auxiliary o regular pioneer, sirvi na Bethel o participa na construida de maga teocratico proyecto? O baka  puede tu aprende otro lengguaje o anda y predica na maga gente na otro lugar. Para sabe tu si cosa el envuelto aqui, puede tu man repaso con el capitulo 10 del libro Organized to Do Jehovah’s Will y si man cuento tu con el maga anciano na de ustedes congregacion. * Mientras ta hace tu esfuerzo para alcanza con ese maga goal, hay puede mira el otro que ta progresa tu y hay queda tu mas alegre.

16. Cosa tu hace si gendeh tu puede alcanza con el un especifico goal?

¹⁶ Pero, paquemodo si gendeh tu puede alcanza con el uno del maga goal que ya menciona? Pricura hace un goal que posible tu alcanza. Considera con el cuanto ejemplo.

17. Asegun na 1 Timoteo 4:13, 15, cosa posible hace el un hermano para progresa na enseñada?

¹⁷ Le con el 1 Timoteo 4:13, 15. Si un bautizao hermano tu, puede tu hace esfuerzo para mejora na de tuyu converzada y enseñada. Porque? Cay si hace tu esfuerzo na de tuyu lehida, converzada y enseñada, mas puede tu ayuda con aquellos quien oi contigo. Pruba hace goal que estudia y aplica con el cada leccion que ya discuti na brosyur Progresa na De Tuyu Lehida y Enseñada. Estudia con el leccion, man practice con ese na casa y pricura aplica con el cosa tu ya aprende si ta dale tu talk. Pidi maga sugestion con el auxiliary counselor o na otro maga anciano “quien ta hace esfuerzo na converzada y enseñada.” * (1 Tim. 5:17, NWT) Man focus gendeh lang si paquemodo aplica con el leccion na brosyur sino si paquemodo ayuda con el quien oi contigo  para hace fuerte con el diila fe o si paquemodo motiva kanila que aplica con el cosa sila ya aprende. Si hace tu se, hay queda tu mas alegre y sila tambien.

18. Cosa puede ayuda kanaton para puede alcanza maga goal na ministerio?

¹⁸ Todo kita tiene responsibilidad que predica y hace maga dicipulo. (Mat. 28:19, 20; Roma 10:14) Quierre ba tu mejora con el de tuyu abilidad na este bien importante trabajo? Hace maga especifico goal mientras ta estudia y ta aplica tu con el cosa tu ta aprende na brosyur Enseñada. Puede tu saca omento practical sugestion na Vida y Ministerio de Cristiano—Workbook de Miting y na maga video de sampol discusion que ta dale mira na midweek miting. Pruba otro-otro maga idea para sabe tu si cosa el mas efectivo. Si hace tu con este maga sugestion, asigurao hay queda tu alegre mientras ta progresa el de tuyu abilidad na ministerio.—2 Tim. 4:5.

19. Cosa tu hace para cultiva maga calidad que ta hace alegre con Dios?

¹⁹ Si ta pensa tu maga goal, no ulvida con el uno na maga bien importante—cultiva maga calidad que ta hace alegre con Dios. (Gal. 5:22, 23; Col. 3:12; 2 Ped. 1:5-8) Cosa tu hace para alcanza con ese? Pone kita que quierre tu tene mas fuerte fe. Puede tu le maga articulo na diaton maga publicacion que ta dale maga practical sugestion si paquemodo tu hace fuerte con el de tuyu fe. Asigurao, hay beneficia gayot tu si mira tu maga video na JW Broadcasting^® que ta ilustra si paquemodo el diaton maga hermano y hermana ya dale mira grande fe mientras ta enfrenta diferente probanza. Despues, considera maga manera que puede tu imita con el diila fe na de tuyu mismo vida.

20. Cosa kita hace para queda mas alegre y evita man luya?

²⁰ Asigurao que todo kita quierre que hace pa mas na cosa kita ta puede hace ahora para con Jehova. Na nuevo mundo del Dios, puede kita hace el todo cosa kita quierre para sirvi con ele. Mientras tanto, si hace kita el todo na cosa kita ta puede hace ahora, puede kita queda mas alegre y evita man luya. Y mas importante, hay lleva kita honor y alabanza con Jehova, el diaton “alegre Dios.” (1 Tim. 1:11, NWT) Ojala, hay tene kita alegria na maga privilegio que tiene kita!