1. Asegun na 1 Tesalonica 5:11, na cosa trabajo kita todo ta participa?

 YA PUEDE ya ba experiencia el de ustedes congregacion que construi o man renovate un Kingdom Hall? Si oo, asigurao ta puede pa tu acorda con el primer miting na ese facilidad. Ya rindi gayot tu gracias con Jehova. Gane, baka quierre tu llura na alegria mientras ta canta con el primer cancion. El diaton maga Kingdom Hall ta lleva alabanza con Jehova. Pero, puede pa kita lleva mas grande alabanza con ele si participa kita na otro clase de trabajo. Ese trabajo amo que hace fuerte con el maga persona quien ta anda na diaton maga lugar de adoranza. Mas valuable pa este contra construi maga facilidad. Amo se el cosa ta pensa si apostol Pablo cuando ya escribi le con el maga palabra na 1 Tesalonica 5:11, el texto onde yan base este articulo.​—Le.

2. Cosa kita discuti na este articulo?

² Un buen ejemplo si apostol Pablo quien sabe anima con el de suyu maga hermano y hermana. Tiene le empatia para kanila. Na este articulo, hay considera kita si paquemodo le ya ayuda con el maga hermano y hermana (1) para aguanta na maga probanza, (2) para tene paz con uno y otro, y (3) para hace fuerte con el diila fe con Jehova. Mira kita si paquemodo kita puede imita con ele y anima con el diaton maga hermano y hermana ahora.​—1 Cor. 11:1.

3. Cosa balance mirada tiene si Pablo?

³ Ta ama gayot si Pablo con el de suyu maga hermano. Ele mismo ya experiencia maga dificultad poreso puede le dale mira compasion y empatia con el maga hermano y hermana si ta enfrenta sila maga probanza. Na un ocasion, nuay mas sen si Pablo  poreso necesita le busca trabajo para suporta con el de suyu mismo cuerpo y con el de suyu maga uban. (Act. 20:34) Na de suyu trabajo, ta hace le tolda. Cuando ya llega le na Corinto, ya trabaja le junto con el maga quien tambien ta hace tolda​—kanda Aquila y Priscila. Pero cada Sabbath, ta anda le predica con el maga Judio y con el maga Griego. Despues cuando ya llega si Silas y Timoteo, “si Pablo ya usa todo el disuyo tiempo para predica.” (Act. 18:2-5) Nuay gayot ulvida si Pablo si cosa el proposito del de suyu vida​—que sirvi con Jehova. Cay buen ejemplo si Pablo na ministerio y na buscada lavida, ya puede le anima con el de suyu maga hermano y hermana. Ya hace le acorda kanila que no permiti con el maga problema y con el lingasa acerca na necesidad del familia que causa kanila para gendeh hace una con “el maga cosas que mas importante”​—el todo aspeto del adoranza con Jehova.​—Fil. 1:10, NWT.

4. Paquemodo si Pablo y Timoteo ya puede ayuda con el maga hermano y hermana para enfrenta persecucion?

⁴ Corto tiempo despues forma el congregacion na Tesalonica, el maga Cristiano alla ya enfrenta grabe oposicion. Cuando el un grupo de maga gente nuay puede incuntra con Pablo y Silas, ya puede sila mira con el “los demas del maga hermano y ya hace guyud canila para na maga autoridad del ciudad” y ya grita sila: “Todo sila ta anda contra con el maga ley de Cesar.” (Act. 17:6, 7) Ta puede ba tu imagina con el miedo que ya sinti aquellos maga nuevo Cristiano cuando ya puede sila realiza que contra kanila el maga gente del ciudad? Puede era sila man luya na diila servicio con Jehova pero no quierre si Pablo que sucede se. Maskin pa necesita sila sale de Silas, ya asigura sila que tiene quien ayuda con este nuevo congregacion. Ya hace acorda si Pablo con el maga de Tesalonica: “Ya imvia came con Timoteo, el hermano diamon . . . , para dale animo y hace con ustedes fuerte na fe, y para noay entre con ustedes quien ay duda por causa de esos maga sufrimiento que ta pasa ustedes.” (1 Tes. 3:2, 3) Grande el posibilidad que si Timoteo ya experiencia persecucion na Listra, el lugar onde le ya engranda. Ya puede le mira si paquemodo si Pablo ya hace fuerte con el maga hermano alla. Ciendo ya puede le mira con el ayuda de Jehova, si Timoteo puede asigura con el maga nuevo hermano y hermana que hay ayuda tambien kanila.​—Act. 14:8, 19-22; Heb. 12:2.

5. Paquemodo el un hermano que si Bryant ya beneficia na ayuda del un anciano?

⁵ Cosa pa ya hace si Pablo para hace fuerte con el maga hermano y hermana? Cuando ya bira sila na Listra, Iconio y Antioquia, si Pablo y Bernabe ‘ya iscuji maga anciano’ na cada congregacion alla. (Act. 14:21-23) Asigurao, aquel maga anciano ya puede dale comforta con el maga congregacion como cosa ta hace el maga anciano ahora. Nota con el experiencia del un hermano que si Bryant: “Cuando 15 año yo,” ya habla le, “el de mio tata ya deja kanamon y el de mio nana yan disfellow. Yan luya gayot yo y ya sinti que ya abandona conmigo.” Cosa ya ayuda con Bryant para enfrenta con este dificil tiempo? Ele ya habla: “El un anciano que si Tony tan cuento conmigo na miting y na otro maga tiempo. Ya relata le conmigo acerca con aquellos quien ya enfrenta probanza pero ya puede siempre esta alegre. Ya le ele conmigo el Salmo 27:10 y pirmi conmigo ta hace acorda acerca con Ezequias, quien fiel ya sirvi con Jehova maskin pa gendeh buen ejemplo el de suyu tata.” Cosa el efecto con Bryant del cosa ya hace este anciano? “Por causa na ayuda de Tony,” ya habla si Bryant, “ya puede yo decidi que sirvi full-time.” Maga anciano, queda alerto para puede ayuda con aquellos quien, igual con Bryant, posible necesita “buen palabra.”​—Prov. 12:25.

6. Paquemodo si Pablo ya usa con el experiencia del otro para anima con el maga hermano y hermana?

 ⁶ Ya hace acorda si Pablo con el maga hermano y hermana que por medio na fuerza que ta dale si Jehova, “bien manada . . . maga testigo” el ya puede aguanta na maga dificultad. (Heb. 12:1) Sabe si Pablo que el experiencia del maga persona de antes quien ya puede aguanta na todo clase de dificultad puede dale coraje con el de suyu maga hermano y hermana, y ayuda kanila para continua man focus “na ciudad del Dios vivo.” (Heb. 12:22) Deverasan tambien se ahora. Asigurao, ta queda gayot kita fuerte si ta le kita acerca si paquemodo si Jehova ya ayuda con Gideon, Barak, David, Samuel y con el manada pa otro. (Heb. 11:32-35) Y quetal el maga ejemplo del maga fiel siervo ahora? Na diaton world headquarters, pirmi kita ta ricibi maga carta estaba na maga hermano y hermana quien ya queda fuerte el fe despues sila le con el istoria de vida del maga moderno fiel siervo de Jehova.

7. Cosa tu ya aprende na consejo de Pablo na Roma 14:19-21?

⁷ Ta hace kita fuerte con el diaton maga hermano y hermana si ta hace kita manera para tene paz na congregacion. Maskin pa otro-otro el diaton opinion, gendeh kita ta permiti con este para causa division. Y gendeh kita ta insisti con el diaton derecho na maga cosas que gendeh ta viola con el principio na Biblia. Considera un ejemplo. Na congregacion de Roma, tiene maga Cristiano que Judio y Gentil. Cuando gendeh mas aplicable el Ley de Moises, el maga siervo de Jehova gendeh mas necesita obedece con el maga ley de este acerca na restriccion del cuanto maga comida. (Mar. 7:19) Principia aquel tiempo, el cuanto Judio Cristiano ya sinti que puede ya sila come con el todo clase de comida. Pero, el otro maga Judio Cristiano ya sinti que gendeh justo que hace se. Por causa con ese, ya tiene division na congregacion. Ya hace claro si Pablo que importante que mentena con el paz y ya habla: “Ta hace tu bueno si gendeh tu ta come carne, ni ta toma vino, ni otro pa maga cosa-cosa que ta hace duda o peca con el dituyo hermano o hermana, o queda le maluya na disuyo fe.” (Le con el Roma 14:19-21.) Ya ayuda si Pablo con el maga hermano y hermana para mira si cosa el mal efecto na maga individual y na congregacion si tiene sila este maga conflicto. Conforme tambien le cambia con el de suyu mismo custumbre para gendeh man luya el otro. (1 Cor. 9:19-22) Na igual manera, puede tambien kita hace fuerte con otro y mentena paz si gendeh kita man purpiajan acerca na maga cosas que el cada persona el debe decidi.

8. Cosa ya hace si Pablo cuando el un importante issue puede era hace perde con el paz na congregacion?

⁸ Ya dale mira buen ejemplo si Pablo si paquemodo mentena paz si tiene quien gendeh tan uyun acerca na maga importante cosas. Por ejemplo, el cuanto na congregacion del primer siglo ya insisti que capa el maga Gentil quien ya queda Cristiano, posible para nuay cosa habla el maga gendeh siervo. (Gal. 6:12) Si Pablo nuay gayot man uyun con ese. Pero en vez de insisti que sigui con el cosa le quierre, con humildad le ya pidi consejo con el maga apostoles y anciano na Jerusalem. (Act. 15:1, 2) Por causa na cosa le ya hace, ya puede le ayuda con aquellos maga Cristiano para mentena paz y alegria na congregacion.​—Act. 15:30, 31.

9. Paquemodo kita puede sigui con el ejemplo de Pablo?

⁹ Si tiene un serioso conflicto que ya sucede, ta mentena kita paz si ta pidi kita guia con aquellos con quien ya iscuji si Jehova para cuida  con el congregacion. Mas mucho, puede incuntra con el direccion na diaton maga publicacion o na maga guideline que ya dale el organizacion. Si sigui kita con ese maga instruccion en vez de insisti con el cosa kita quierre, hay ayuda kita mentena paz na congregacion.

10. Cosa pa ya hace si Pablo para mentena paz na congregacion?

¹⁰ Ya mentena tambien paz si Pablo cay ya habla le el maga positivo calidad del de suyu maga hermano y hermana, y gendeh el maga negativo. Por ejemplo, na fin del de suyu carta para na maga de Roma, ya menciona si Pablo con el nombre del manada maga persona y positivo comento o detalle acerca kanila. Puede kita imita con Pablo si menciona tambien kita con el maga buen calidad del diaton maga hermano y hermana. Si hace kita con ese, ta ayuda kita con el diaton maga hermano y hermana para mas queda cerca con uno y otro, y como resulta, hay queda fuerte el amor del congregacion.

11. Cosa kita hace para tene paz si tiene maga conflicto?

¹¹ Tiene vez, maskin el maga mature Cristiano posible gendeh man uyun na un cosa o man purpiajan pa gane. Ya sucede se con Pablo y con el de suyu amigo, si Bernabe. Este dos hombre yan purpiajan si lleva ba sila con Marcos na diila sunod viaje como misionario. “Ya tene sila dos un grande discusion” y yan separtajan. (Act. 15:37-39) Pero, si Pablo, Bernabe y Marcos ya arregla con el diila problema y na ese manera, ya dale sila mira que importante el paz y unidad na congregacion. Na uliji, ya habla maga buen cosas si Pablo acerca con Bernabe y Marcos. (1 Cor. 9:6; Col. 4:10) Necesita tambien kita arregla con el maga conflicto que tiene kita con otro na congregacion y despues, continua man focus na diila maga buen calidad. Na ese manera, ta ayuda kita para mentena paz y unidad.​—Ef. 4:3.

12. Cosa el cuanto dificultad que ta enfrenta el diaton maga hermano y hermana?

¹² Ta puede kita anima con el diaton maga hermano y hermana si ta ayuda kita hace fuerte con el diila fe con Jehova. El cuanto ta experiencia que ta gangguia kanila el diila familia que gendeh Testigo o el diila maga uban na trabajo o escuela. El otro tiene grabe enfermedad o tan luya cay tiene kanila quien ya hace sinti duele. Y el otro bautizao ya por cuanto año y bien tarda ya ta espera con el fin de este sistema de maga cosas. Este maga situacion puede pone na probanza con el fe del maga Cristiano ahora. El maga miembro del congregacion del primer siglo ya enfrenta maga semejante dificultad. Cosa ya hace si Pablo para anima con el de suyu maga hermano y hermana?

13. Paquemodo si Pablo ya ayuda con aquellos quien ta enfrenta oposicion por causa na diila creencia?

¹³ Ya usa si Pablo con el Escritura para hace fuerte con el fe del de suyu maga hermano y hermana. Por ejemplo, posible que el maga Judio Cristiano no sabe si cosa habla con el diila maga familia quien ta clama que mas justo el Judaismo contra na Cristianidad. Asigurao que ya puede gayot hace fuerte con este maga Cristiano el carta de Pablo na maga Hebreo. (Heb. 1:5, 6; 2:2, 3; 9:24, 25) Puede sila usa con el de suyu razonable argumento para contesta con el maga quien tan contra kanila. Ahora, puede kita ayuda con el diaton maga hermano y hermana quien ta enfrenta oposicion para usa con el maga publicacion que base na Biblia para explica con el diila creencia. Y si ta gangguia con el maga jovenes cay ta creé sila na creacion, puede kita ayuda kanila busca maga informacion na brosyur Was Life Created? y The Origin of Life—Five Questions Worth Asking para dale mira si porque sila ta creé na Creador.

14. Maskin pa ocupao si Pablo que predica y enseña, cosa le ya hace?

 ¹⁴ Ya anima si Pablo con el de suyu maga hermano y hermana que dale mira amor por medio na “maga trabajo bueno.” (Heb. 10:24) Ya ayuda le kanila gendeh lang por medio na cosa le ya habla sino por medio tambien na cosa le ya hace. Por ejemplo, cuando el maga Cristiano na Judea ya experiencia escasez de comida, ya lleva si Pablo el cuanto cosas que necesita sila. (Act. 11:27-30) Gane, maskin pa ocupao si Pablo que predica y enseña, pirmi le ta busca manera para ayuda con aquellos quien tiene necesidad na material. (Gal. 2:10) Como resulta, ya puede le ayuda con el de suyu maga hermano y hermana para confia que hay cuida kanila si Jehova. Ahora, si ta dale kita el diaton tiempo y fuerza, y ta usa el diaton abilidad para ayuda na disaster relief, ta puede tambien kita hace fuerte con el fe del diaton maga hermano y hermana. Puede tambien kita hace con ese si regular kita dona na worldwide work. Por medio na este maga manera y otro pa, ta ayuda kita con el diaton maga hermano y hermana para confia que nunca kanila abandona si Jehova.

15-16. Paquemodo kita debe trata con aquellos quien ya queda maluya el fe?

¹⁵ Nuay descanza ayuda si Pablo con aquellos quien ya queda maluya el fe. Ya dale le mira compasion kanila y yan cuento kanila na amable y positivo manera. (Heb. 6:9; 10:39) Por ejemplo, na de suyu carta para na maga Hebreo, manada beses le ya usa con el palabra “kita” y na ese manera, ya dale le mira que necesita tambien le aplica con el de suyu consejo. (Heb. 2:1, 3) Igual con Pablo, gendeh kita ta descanza ayuda con aquellos quien ya queda maluya el fe. En vez, ta hace kita fuerte kanila por medio na diaton sincero interes para kanila. Na este manera, ta asigura kita kanila que ta ama kita kanila. Puede tambien kita anima kanila si converza kita na amable y calma manera.

 ¹⁶ Ya asigura si Pablo con el de suyu maga hermano y hermana que ta mira si Jehova con el diila maga buen trabajo. (Heb. 10:32-34) Puede tambien kita hace igual ansina si ta ayuda con el un hermano o hermana quien ya queda maluya el fe. Puede kita manda relata con ele si paquemodo le ya guinda na verdad o anima con ele que acorda el maga tiempo cuando ya ayuda con ele si Jehova. Puede kita usa con ese oportunidad para asigura con ele que nuay ulvida si Jehova con el de suyu amor y maga buen trabajo y nunca Le abandona con ele na futuro. (Heb. 6:10; 13:5, 6) Si hace kita con este, posible kita puede anima con este maga hermano y hermana que continua sirvi con Jehova.

17. Cosa abilidad kita puede continua mejora?

¹⁷ Igual si paquemodo el un construction worker puede mejora con el de suyu abilidad, puede tambien kita queda mas efectivo na manera si paquemodo kita ta hace fuerte con uno y otro. Puede kita ayuda kanila para enfrenta maga probanza si relata kita kanila maga ejemplo de aquellos quien ya puede aguanta de antes. Puede kita mentena paz si menciona kita el maga buen cosas que ta mira kita con otro, preserva el paz si posible este perde y hace bira el paz si tiene maga conflicto que ya sucede. Y puede kita continua hace fuerte con el fe del diaton maga hermano y hermana si habla kita kanila maga importante verdad na Biblia, dale kanila practical ayuda y si suporta kita con maskin quien que ya queda maluya na espiritual.

18. Cosa tu determinao hace?

¹⁸ Aquellos quien ta construi maga facilidad del organizacion ta sinti alegre y contento. Puede tambien kita sinti con ese si ayuda kita hace fuerte con el fe del diaton maga hermano y hermana. Gendeh igual na maga facilidad que hay man buluk lang, el resulta del diaton trabajo puede esta hasta para cuando! Ojala queda kita determinao que continua “dale animo con uno y otro, y man ayudajan para puede crici na fe.”​—1 Tes. 5:11.